Komentet tuaja mbi zgjedhjet lokale ne Kosove, 15 nentor 2009

[Llapi]

Përballen në Gjykatë

Për ligjshmërinë e vendimeve të KQZ’së dhe KZAP’së për procesin zgjedhor të Gjakovës, do të vendoset të martën e ardhshme në Gjykatën Kushtetuese. Në seancën dëgjimore pritet të ballafaqohen edhe AKR’ja dhe AAK’ja.

Nga Faton Ismajli më 03.02.2010 në ora 8:30
Pas një jave në Gjykatën Kushtetuese do të ballafaqohen Komisioni Qendror i Zgjedhjeve dhe Komisioni për Ankesa dhe Parashtresa, për të sqaruar vendimet e tyre për procesin elektoral të Gjakovës.

Në këtë seancë, që mbahet më 9 shkurt, pritet të marrin pjesë edhe partia fituese në Gjakovë, AAK’ja, dhe AKR’ja, e cila humbi garën zgjedhore.

Kjo është bërë e ditur nga Kryetarja e KQZ’së, Nersin Lushta, e cila ka thënë se vendimet që do të merren në Gjykatën Kushtetuese do të respektohen.

“Kjo është një ftesë për një seancë dëgjimore, ku janë të ftuar KQZ’ja, KZAP’ja, AAK’ja dhe AKR’ja. Andaj, se si do të rrjedhin vendimet nuk mund të prejudikoj asgjë”, ka thënë Lushta pas mbledhjes së KQZ’së.

AKR’ja e Behgjet Pacollit ka ngritur padi ndaj vendimit të KQZ’së për certifikimin e rezultateve zgjedhore për Komunën e Gjakovës si dhe ndaj vendimit të Gjykatës Supreme, e cila ka shpallur të ligjshëm certifikimin e këtyre rezultateve. Megjithëkëtë, kandidatja e AKR’së për Kryetare te Gjakovës, Mimoza Kusari-Lila ka kërkuar edhe vënien e masës së përkohshme për anulimin e rezultateve zgjedhore në Komunën e Gjakovës.
Përkundër këtyre vendimeve, AKR’ja ende shpreson se në Komunën e Gjakovës do të ketë përsëritje të zgjedhjeve për shkak se dyshohet për parregullsi gjatë procesit zgjedhor.

“Mendoj se edhe rasti i Gjakovës duhet të shkojë në rivotim për shkak se ka pasur shumë parregullsi, të cilat i ka argumentuar AKR’ja”, ka thënë anëtari i KQZ’së, Fadil Maloku.

“Gjykata Kushtetuese do të sjellë vendimin meritor për rastin e Gjakovës, pasi KZAP’ja nuk ka marrë vendim të drejtë”, ka shtuar ai.

Ndryshe, as të hënën KQZ’ja nuk ka diskutuar fare për procesin e bllokuar elektoral të Gjilanit, por është thënë se me këtë çështje ky institucion do të merret në ditët në vijim. Derisa për organizmin e zgjedhjeve në Istog, Kryetarja Lushta tha se KQZ’ja është duke pritur caktimin e datës nga Presidenti Fatmir Sejdiu.

“KQZ’ja është e gatshme të organizojë zgjedhjet në Istog, pas caktimit të datës nga Presidenti Fatmir Sejdiu. Por, ju kisha lutur të mos merreni me këtë çështje derisa të kryhet varrimi i Kryetarit të ndjerë, Fadil Ferati”, ka thënë ajo.

Zgjedhjet në Istog pritet të mbahen brenda 45 ditësh, pasi Kryetari i kësaj komune, Fadil Ferati ka ndërruar jetë.

[Guri i Kuq]

Rreth zgjedhje për të parin e Prizrenit, ka për tu folur edhe shumë gjatë...


Shtrohet pyetja si mund të humbi një kandidat shumë i përgatitur profesionalisht,i dëshmuar për dhjetë vite si ekspert në lëminë e shërbimeve publike,një njeri i thjeshtë e modest,shumë më i ri se kundërkandidati i tij, një pensioner 75 vjeçarë,që përveç këtij gjysmë-mandati,kurr në jeten e vet nuk është marrë me gjë tjetër përveç ditarit të mësuesit e profesorit ?

-----------------
Nëse nuk ka pazare të nëndheshme,fenomeni i Prizrenit do të duhej të analizohej shumë më tepër nga analistët politik dhe sociologët e lëmive të ndryshme.
Fitorja e PDK në Prizren ekskluzivisht është fitore e Hashim Thaçit, e asesi e kandidatit të saj Ramadan Muja dhe liderëve lokal të kësaj partie.
Përveçë retorikës së një stili shumë demode dhe ripërsëritjes së premtimeve kapitale të liderit të PDK-së Hashim Thaçi, për autostradën Morinë -Merdare,Universitetin e Prizrenit,të rihapur për të saten here, sa herë të mbahen zgjedhjet dhe një Hidrocentrali në Zhur të Prizrenit,për të cilin cinikët thonë se do bëhet në një vend pa lum,Ramadan Muja në premtimet e veta gjatë fushatës, nuk ka thenë bash asgjë të re, për mirëvajtjen e jetës në këtë qytet të madh të Kosovës.Po ashtu,edhe liderët lokal të PDK-së,nuk patën asnjë risi në fushatën e tyre pompoze,përveç përsëritjes së premtimeve marramendëse të liderëve të vet,me një fjalorë të mjerë gjysmëanalfabetësh,karakteristikë për shumicën e aparatçikëve lokal të kësaj partie.

Pra, pse humbi Hanefi Muharremi,kandidat i LDK-së ?

Kandidatura e këtij njeriu u pat pritur shumë mirë në qarqet e analistëve dhe qytetarëve të thjeshtë të Prizrenit.Bisedat e organizuara nëpër studiot televizive,e tregonin këtë kandidat si shumë të përgatitur,serioz dhe njohës shumë të mirë të problemeve komunale të qytetit me 200.000 banorë.
Performanca e tij ishte shembullore.Një kohë kishte qenë drejtor i një ndërrmarrjeje transportuese në Prizren,pas lufte kishte udhëhequr për shtatë vite me shëbimet publike të Prizrenit me shumë rezultate e suksese që shihen dhe së fundi,kishte udhëhequr me ndërmarrjen regjonale të furnizimit me ujë,ku edhe këtu nuk munguan rezultatet.
Prizreni ishte dhe është një nga qytetet e pakta, që kishte pa ndërprerë ujë të pijëshëm edhe në pikun e verës.Kështu thonë njohësit e rrethanave në Prizren…
Gjatë fushatës,z. Muharremi ishte shumë më racional në premtime dhe më se i arsyeshëm për mundësitë buxhetore të një komune.Ai ishte i përqendruar në çështjet vërtetë komunale,çka edhe janë pjesë e pushtetit lokal,sepse ndërtimet kapitale që premtoi Hashim Thaçi dhe PDK, me Ligj të VQ Lokale,asnjë nuk janë në kompetencë të pushtetit lokal.
--------
Për mendimin tim,z. Muharremi është viktimë e moskoordinimit,diskordancës e kakofonisë së liderëve të LDK-së gjatë fushatës parazgjedhore.Liderët e saj zgjodhen një formë fushate shumë karakteristike….
Me një mimikri të çuditëshme, sa mundën shanë Qeverinë qendrore(ku janë pjesëmarrës gati të barabartë),lidhën e zgjidhën koalicione nga më të ndryshmet brenda natës dhe krejtë në fund,ia lanë në dorë gjithë përgjegjësinë e organizimit të fushatës(në fazen e tretë të rivotimit),një lideri të një partie tjetër, që në këtë qytet nuk ka hiç më shumë se 8-9 përqind të elektoratit (AAK e Ramush Haradinajt).Për të kenë ironia dhe hipokrizia edhe më madhe,në javën e fundit të rrethit të tretë të votimeve,liderët (disa) e LDK-së u duken vetem një herë në Prizren !! Sa për të thënë se, ja ishim..!!
Gjithë kjo bënë të dyshohet se ka një marrëveshje interne në mes të F. Sejdiut dhe H. Thaçit, për epilogun e zgjedhjeve lokale në këto tri komunat e fundit,Lipjan,Gjilan dhe Prizren...!?

LDK-ja ka tashmë katër vite që de-facto e de-jure është pa kryetar.Zotni F. Sejdiu,që në mandatin e parë si President,pas vdekjes së Dr. Rugovës,edhe me Kornizën Kushtetuese të UNMIK-ut për Kosovën, e kishte të ndaluar involvimin në çështjet partiake të LDK-së.Kjo solli deri te përçarja marramendëse e parties, që kulmoi me Kongresin e 6-të,kur erdhi edhe te ndarja përfundimtare e saj.Për pasojë,LDK-ja nga 47 për qind e eloktoratit,sa kishte më 2004,ra në 22 për qind,me çka humbi primatin e partisë së parë në nivel qendror dhe humbi gati të gjitha bastionet e saj historike si,Gjilani,Ferizaji,Gjakova,Vitia,Prizreni e komuna tjera me rëndësi për te...
Edhe pas kësaj katrahure,kjo parti as qe e pa të udhës të analizojë shkaqet për një rënie kaq drastike.Vazhdoi me të vjetren,një amulli e gjum karakteristik,si në në prralla…
Thirren në emrin e Dr. Rugovës sa munden e sa here tu duhet,e në anën tjetër, nuk bëjnë asgjë për ribashkim të spektrit rugovian,bile përkundrazi, me qesendi e arrogancë i pranojnë ish anëtarët dhe krerët e vet të dikurshëm,me një kusht –mos të përzihen fare në “punët e mëdha” të saj dhe mos të shkapurisin aty ku nuk duhet..!.
Në të njejten kohë,krahëhapur e me pompë rikëthehen ish kundershtarët më të rreptë e më të paskrullt të Dr. Rugovës, si në rastin Bukoshi,ftesat e njëpasnjëshme për zonjushen Tahiri e shumë të tjerë,që gjatë kohës së Rugovës, nuk lane gurë pa luajtë për shkërmoqjen e godinës së madhe të LDK-së.
Në këto zgjedhje lokale,LDK-ja prap hyri pa kokë dhe pa asnjë strategji afatgjate.Pa kokë,sepse Z. Sejdiu vazhdon të mbaj postin e të parit të saj si i “ngrirë”,edhe pse të gjitha analizat dhe praktika partiake tregoi këtu e gjithëkund,që një parti pa lider nuk ka shansë e asnjë gjasë të korrë fitore në kurrfarë zgjedhjesh.Ai qendron në një post,për të cilin e ka të ndaluar me Kushtetutë ta ushtrojë,gjë që e din shumë mire ai dhe gjithë shpura e tijë e ashtuquajtur kryesi e LDK-së,të gjithë qatipa të rryer në këto punë pushteti e privilegjesh,kur bëhet fjalë për ta.Por,për punë tjera,nuk ia thonë hiç të gjorët…Humbën me rend të gjithë…Astrit Haraçia-Gjakovë,ra në 10 përqind,Mursel Ibrahimi-Mitrovicë,Sali Asllani-Suharekë,Pejë,Dragash.Malishevë,Ferizaj,Prizren,Vi ti….
Dhe,për ironi të gjithë këta, janë unison në deklaratat e tyre, që të mbetet kjo gjendje pa krye….me Fatmirin e Eqremin në krye…
Sepse,duhet të shembet deri në themel shtëpia politike e Dr. Ibrahim Rugovës….

Populli thjeshtë foli ;Udha e mbarë,por pa neve….

Deri kur ?

[Guri i Kuq]

Letër LDK-së!

Beqë Cufaj, beqe.cufaj@zeri.info | 04-02-2010 18:49 CET

Të nderuar, ngushëllimet më të sinqerta për humbjen e njërit prej njerëzve tuaj më të rëndësishëm, Fadil Feratit. Shkuarja e tij është një prej humbjeve të mëdha jo vetëm për Partinë tuaj, por për tërë qytetarët e Republikës së Kosovës. I lehtë i qoftë dheu! Ja që jeta duhet të vazhdojë. Problemet që ju si parti dhe ne si qytetarë, qoftë të partive të tjera, apo edhe të paanshëm, por për këtë edhe të pavarur në gjykim, janë aq të mëdha saqë menjëherë pas zisë do të vijë çasti kur ju, si udhëheqësi e anëtarësi dhe ne si të paanshëm, do ta pyesim veten: çka tashti?! Ju anëtarë dhe udhëheqës të nderuar të LDK-së, keni një histori të pashoqe dhe nëse doni edhe të pakrahasueshme në historinë politike të Evropës në përgjithësi dhe asaj Juglindore në veçanti. Me liderin tuaj e tonin karizmatik, dr. Rugovën, i cili njihej si “Gandi” dhe “Brand”-i i Kosovës, që për dhjetë vjet me radhë i priu lëvizjes së pashembullt pacifiste. Pas Luftës së Kosovës, kur askush nuk e priste, me në krye me Ibrahim Rugovën, e kthyet rrjedhën e krejt vendeve të dala nga pasluftërat e shkatërrimit të ish-Jugosllavisë, duke fituar zgjedhjet në të gjitha nivelet. Nuk mundemi këtu pa përmendur edhe krejt përndjekjet, shantazhimet, torturat e vrasjet që udhëheqësve e anëtarëve tuaj iu bënë pas Luftës së vitit 1999. Një parti me histori sa krenare aq edhe tronditëse. Një parti e cila në çastin kur e humbi “Maximo-Lider”-in e saj, dr. Rugovën, mbeti pa krye, pa shpirt dhe para së gjithash pa elan. Vdekja
e Tij dhe shkuarja në Hagë e aleatit tuaj energjik, Haradinajt, ju bëri që të bëheshit një parti e cila po të mos kishte personalitete të “tërthorta” dhe pa ambicie si Sabri Hamiti... kushedi si e ku do të përfundonte. Të tjerat dihen. Zgjedhja e pasardhësit, katapultimi nga brenda e jashtë i aparatçikëve profitero-profesionistë, rënia e madhe në votimet e para dy vjetëve, martesa e zorshme me partnerin dikur armik të përbetuar, ndalim tatëpjeta e rënies së vjet/sivjetshme në nivel lokal (me fenomenin Isa Mustafa) dhe para së gjithash mospërcaktimi juaj në doni të kaloni bile një herë në jetën tuaj në opozitë apo ta ruani kështu këtë “copëz” pushteti... po ua bën jetën kaq të zorshme, ecjet kaq të rënda. Rrjedhimisht ne as që po dimë sa LDK i kemi. Të jeni ju një parti që pritjen e ka sulm? Apo vazhdoni të mendoni që pasardhësi i “Maximo Lider”-it e ka po atë forcë e karizmë që paraardhësi i tij e kishte?! Nëse po, atëherë gaboheni. Sepse problemi juaj është që jeni duke qeverisur me një kundërshtar, i cili e di saktësisht se çka do nga ju. Pasoja është që në këtë cik-cak mes jush dhe partnerit në qeverisje po vuajmë të gjithë: por më së shumti ju! Për dallim nga krejt pritjet tona të deritashme qe dy dekada me radhë kjo mund të jetë më fatalja. Sepse fituesi i saj po shihet. Kurse humbësi i madh do të jeni ju. Falë ngurrimit të presidentit tonë dhe kryetarit tuaj me postin e "ngrirë" që të zgjedhë cilën karrige e do: atë të liderit të LDK-së apo të presidentit të Kosovës.

[Guri i Kuq]

Ngushëllim apo nekrolog
Binak Kelmendi | 03-02-2010 16:10 CET
Kjo nuk është polemikë. Megjithatë, dua të kapem për katër-pesë fjalë të djeshme të Beqë Cufajt në editorialin e tij botuar në “Zëri” në këtë faqe. Në të vërtetë, më shumë dua të kapem në idenë e tij. Sepse, ngushëllimin e tij për vdekjen e Fadil Feratit bërë LDK-së nuk e mora vetëm ngushëllim për humbjen e një individi të rëndësishëm të kësaj partie. Le të më ndjejnë LëDëKëistët, unë këtë ngushëllim e mora më shumë nekrolog, mu për Lidhjen Demokratike të Kosovës, pas rezultateve të zgjedhjeve të fundit që edhe sivjet “na i hëngrën veshët”. Dhe jo vetëm pas këtyre. Në fakt, Beqa ka thënë kështu. Ndërmjet rreshtash. Ose ka dashur të bëhet kurtoaz. Sepse ka plotësisht të drejtë për këtë nekrolog a ngushëllim. I bashkëngjitem edhe unë. Dhe e quaj këtë “requiem” një paralajmërim për vdekjen e një partie që dikur “vrante e kthjellte”. Jo me fajin e atyre pak besnikëve që po firojnë vazhdimisht. Por me fajin e atyre që rrinë në krye të partisë e që me gjasë përtojnë t’i shkundin edhe dardhët e arrira. Se kush e di, mund të fryjë era dhe ja dardhët në prehër… Nuk po përmend emra. Rikonfirmimi i humbjes së LDK-së në Prizren e në Lipjan nuk është humbja më e re e kësaj partie. Kjo parti ka humbur edhe më herët. Dhe humbja më e madhe është mospranimi burrëror i humbjes. Edhe moscaktimi i fajësisë së eprorëve të kësaj partie. Sepse asnjëri nga përgjegjësit e saj nuk denjon tëpranojë pjesën e vet të fajit. E quan atë rrethanë objektive. Dhe nuk jep llogari para elektoratit. Ose shfajësohet çuditshëm. Në të vërtetë, kjo parti para elektoratit të vet kurrë nuk ka dhënë llogari. As kur ka fituar, as kur ka humbur. Edhe kur ka fituar ka qenë mu elektorati i saj ai që e ka pësuar. Sepse LDK, në të vërtet udhëheqja e saj, kishte fituar vetëm për veten e vet. Shikoni komunat si kanë qenë ato kur dikur udhëhiqeshin nga LDK-ja dhe shikoni ato ku tani udhëheqin partitë tjera. Shikoni edhe postet që kanë tash udhëheqësit e këtyre komunave që i kanë marrë për “merita” në Prishtinë. Dhe, natyrisht, duke qenë kështu, elektorati nuk do më fjalë në ajër… Që nga fillimi i garës pluraliste në Kosovë, LDK-ja garën më të madhe e ka zhvilluar vetëm në radhët e veta. Nuk po kujtojmë këtu kuvendin e karrigeve. Dhe jo vetëm kjo luftë e saj e ka ftohur elektoratin. Sidomos pjesën intelektuale të tij. Kjo pjesë nuk e deshi inercinë në të cilën llogariste LDK-ja, prandaj heshtur ose haptas u larguan nga ajo. Inercinë nuk e mbajti dot as “udhëheqësi historik” . Nuk do ta mbajë askush nëse nuk bëhen reforma e punë. Ka kaluar, kaherë, koha e Njëshit. Edhe në Kosovë. Sepse edhe populli thotë, “me një hu nuk thuret gardhi”. Beqë, a do ta quaje tash nekrolog? Unë po. Le të më ndjejnë prapë LëDëKëistët. Elektorati nuk do cinizëm e as vallëzime. Aq më pak improvizime.