Rezultatet e zgjedhjeve lokale në Kosovë, 15 nentor 2009

[Nice_Boy]

S’ka rezultate deri nga fillimi i javës së ardhshme

Zyrtarë të Komisionit për Ankesa dhe Parashtresa thonë se nuk do të mund të marrin një vendim për ankesat e partive politike për rrethin e dytë të zgjedhjeve në Kosovë, deri nga fillimi i javës së ardhshme.

Me gjithë deklarimet e zyrtarëve të Komisionit Qendror të Zgjedhjeve për mundësinë e publikimit të rezultateve përfundimtare të zgjedhjeve të raundit të dytë, deri nga fundi i kësaj jave, ankesat e partive politike duket sikur do ta vonojnë këtë proces.

Lidhja Demokratike e Kosovës, pretendon të ketë shënuar fitore në Prizren, në Lipjan dhe në Gjilan dhe se rezultati atje të jetë manipuluar.

KQZ thotë se duhet pritur numërimin e votave me kusht, ndërkaq Partia Demokratike thotë se fitorja është e saj.

Bëhet me dije ndërkaq se Qendra e numërimit ka filluar verifikimin e afro 1.600 votave me kusht për komunën e Prizrenit, ku vazhdon paqartësia e rrethit të dytë të zgjedhjeve, megjithëse KQZ i zgjedhjeve ka bërë të ditur se rezultati atje është pothuaj i barabartë.

Kryetari i Komisionit Zgjedhor për Ankesa dhe Parashtresa, Tahir Rrecaj tha për BBC-në se subjektet politike në Kosovë kanë dorëzuar afro 50 ankesa për parregullsi në raundin e dytë të zgjedhjeve.

Ai sqaroi se numri më i madh i ankesave janë bërë nga Lidhja Demokratike e Kosovës dhe Partia Demokratike e Kosovës.

Prizreni dhe Gjilani prijnë për nga numri i parregullsive, për të cilat janë ankuar subjektet politike.

[Llapi]

Ju tregoj sot
KQZ ka përfunduar procesi i verifikimit të votave me kusht. Sot, fillon numërimi i tyre. Nëse gjithçka shkon si duhet, gjatë ditës përcaktohet fituesi i Prizrenit. Këtë lajm, PDK dhe LDK e presin në ankth.

Nga Faton Ismajli më 16.12.2009 në ora 7:58
Të mërkurën pritet të dihet definitivisht se kush do të jetë Kryetar i Komunës së Prizrenit për katër vitet e ardhshme - Ramadan Muja i Partisë Demokratike apo Hanefi Muharremi i Lidhjes Demokratike.

Tashmë ka përfunduar procesi i verifikimit të votave me kusht, derisa sot pritet të nisë procesi i numërimit të tyre.

Komisioni Qendror i Zgjedhjeve, të martën mbrëma, në një mbledhje që është zhvilluar me dyer të mbyllura, ia ka dhënë dritën e gjelbër numërimit të votave me kusht, me prioritet votave me kusht të Prizrenit, Lipjanit e Rahovecit.

“Sot është procesi i verifikimit të fletëvotimeve me kusht, kurse nesër pritet të fillojë numërimi i tyre”, ka thënë një zyrtar i lartë i KQZ’së, në kusht anonimiteti për Express, të martën.

Zyrtarisht, askush nuk ka dashur të flasë për këtë çështje.

Gara në Prizren, Lipjan e Rahovec është jashtëzakonisht e ngushtë dhe fituesi në këto komuna do të përcaktohet nga një numër jashtëzakonisht i vogël i votave.

Kjo situatë ka shkaktuar konfuzion të madh, sidomos për garën e Prizrenit.
Nga atje, të martën, kanë ardhur lajme kontradiktore.

Zyrtarët e Komisioni Komunal Zgjedhor në Prizren kanë paraqitur të dhëna të reja për rezultatin e votimeve, ku kandidati i LDK’së, Hanefi Muharremi prin para Ramadan Mujës.

Nysret Bytyçit, Shef Ekzekutiv i KKZ’së në Prizren, ka thënë se gjatë futjes së të dhënave në kompjuter janë bërë disa gabime. Sipas tij, në vendvotimin 04/2, LDK’ja ka pasur 164 vota, kurse PDK’ja 146, në vendvotimin 2042, LDK’ja ka pasur 65 vota më shumë, kurse PDK’ja, 35. Prandaj, sipas Bytyçit, me evitimin e këtij gabimi, LDK’ja del fituese në Prizren me 78 vota, por pa i numëruar votat me kusht.

Këto deklarata janë hedhur poshtë nga Shefi i Shtabit Zgjedhor të PDK’së në Prizren, Zafir Berisha. Sipas tij, të dhënat e prezantuara nga Nysret Bytyçi nuk janë të vërteta. Madje, Berisha e ka cilësuar Shef Ekzekutiv i KKZ në Prizren si “njeri të LDK’së”.

Të dielën pas mesnate, KQZ’ja kishte dhënë rezultatet preliminare për Komunën e Prizrenit. Rezultati, sipas KQZ’së, është 50 me 50, por Ramadan Muja i PDK’së prin me 42 vota ndaj Hanefi Muharremit.

Sido që të jetë, e vërteta për Prizrenin gjendet në 1602 votat me kusht, të cilat, sipas burimeve të Expressit, numërohen sot.

Kjo situatë duket se do të shtyjë procesin e certifikimit të rezultateve.

Kryetarja e KQZ’së, Nesrin Lushta ka sqaruar se janë një varg procedurash, të cilat duhet të kryhen deri në arritjen e rezultatit përfundimtar për Komunën e Prizrenit.

“Konsideroj se vetë numërimi nuk do të marrë shumë kohë. Pastaj, deri te certifikimi normalisht se është periudha e ankesave dhe paraqitjes së parashtresave. Andaj, për momentin nuk mund t’ju them diçka në mënyrë më precize”, ka thënë Lushta.

Ajo e ka lënë të hapur mundësinë e rivotimit në Prizren, por ka thënë se njëherë presin vendimet e KZAP’së për ankesat e partive.

Deri më tash në KZAP janë dorëzuar 13 ankesa, me pretendimet për parregullsi në procesin e votimit.

Kryetari i këtij Komisioni, Tahir Recaj thekson se është e pamundur që ankesat të shqyrtohen para javës së ardhshme, kjo nënkupton që edhe rezultatet nuk mund të certifikohen pa vendimet e KZAP’së.

“Nuk besoj që brenda tri ditëve. Afati treditësh është afat kur pala kundërshtare ka të drejtë të paraqes ankesë, pastaj kërkohet edhe një afat tjetër, por sidoqoftë besoj që brenda javës së ardhshme do të përfundojmë me ankesat dhe do t’i hapim rrugë certifikimit”, ka thënë Rrecaj.

Në bazë të rezultateve preliminare të Komisionit Qendror të Zgjedhjeve për balotazhin e së dielës, Partia Demokratike e Kosovës ka fituar në 10 komuna, Lidhja Demokratike e Kosovës në 5, kurse Aleanca për Ardhmërinë e Kosovës në 3 komuna.

[Llapi]

KQZ anulon rreth 600 vota në vendvotimet në Prizren dhe Lipjan

Komisioni Qendror i Zgjedhjeve anuloi rreth 600 vota në vendvotimet në Lipjan dhe Prizren pasi ka konstatuar se ka pasur parregullsi. Anulimi nga KQZ-ja është bërë pasi Komisioni Komunal Zgjedhor në Prizren ka pranuar se janë bërë gabime në numërim dhe ky ndryshim i siguron avantazh vetëm prej tetë votave të kandidatit të LDK-së Hanefi Muharremi....
Postuar: 11:51:10 / 16.12.2009
Numërimi i votave me kusht dhe atyre të personave me aftësi të kufizuara do të qartësojë definitivisht rezultatin zgjedhor në komunën e Prizrenit, ku të dyja partitë PDK dhe LDK pretendojnë se janë fituese.
Komisioni Qendror i Zgjedhjeve ka bërë anulimin e 600 votave në Lipjan dhe Prizren pasi Komisioni Komunal Zgjedhor atje ka pranuar se janë bërë gabime. Anulimi ka ardhur pas ankesave që ka deponuar LDK për parregullsi në Lipjan, Gjilan dhe Prizren.

Komisioni Zgjedhor për Ankesa dhe Parashtresa ndërkaq ka filluar të shqyrtojë fluksin e ankesave për parregullsi që kanë deponuar partitë politike, shumica nga të cilat i ka bërë Lidhja Demokratike të Kosovës.

Zyrtarët e KQZ-së ndërkaq kanë pohuar sot se të paktën edhe tri ditë nuk mund të nxjerrin rezultatin përfundimtar.
Në anën tjetër zyrtarë dhe vëzhgues ndërkombëtar i kanë dhënë një vlerësim në përgjithësi pozitiv procesit zgjedhor në raundin dytë.


| s.b & RTK staff |

[Kosovelli]

Urime fitorja PDK, edhe pse po mundohen disa huligane te ldk e te aak me manipulu me vota.
Partite tjera ldk aak ldd i kisha shkruare shkurtimishte ldk + aak + ldd = ldal = huligana.
Folni ashtu si eshte realiteti e mose folninga inati e gjelozija:
Kushe ishte udheheqsi i uqk( thaqi), kushe ishte udheheqsi krysore ne rambuje (thaqi), kushe e formoje ushtrine e kosoves(thaqi), kushe e shpalli pavarsine e kosoves (thaqi), kushe e formuloje kushtetutene e kosoves (thaqi), kushe e antarsoj kosoven ne fondine monetare nderkombetar(thaqi).
Thaqi eshte hero i gjalle edhe u mbete ne historine e kosoves pertemire.
Nedimoni keti njeriute te menqure e mose e pengoni se kosova nuk ka pase udheheqes ma te menqure ne keto 500 vitete e fundite.
Eshte njeri shume i menqure se nuk merrete me thashethanate dhe shpifjeve te tylifare laperave.
DUGI puna ma e rendesishme ne kete bote eshte me kane i sinqerte ndaje vetvetes.
Ramushi e dine vetvene e vet se nuke eshte i afte.

[Drenica 97]

PDK e vetme e mundi koalicionin LUTA-DACI-RAMUSHI -BLLACA.............................

[Nice_Boy]

Anulohen votat ne Nente Komuna

Prizren, 15 dhjetor

Shefi i shtabit zgjedhor nga radhët e PDK-së, Zafir Berisha, në një konferencë me gazetarë, ka ngulur këmbë se kandidati Ramadan Muja udhëheq në zgjedhjet e balotazhit dhe çdo ndërrim të këtyre rezultateve e konsideron manipulim të shefit të KKZ-së, Nysret Bytyçi, duke e quajtur të afërt me LDK-në. Por, Nysret Bytyçi, shef ekzekutiv i KKZ-së në Prizren, përmes një deklarate për televizione, tha se ka fituar LDK-ja. Bytyçi ka thënë se gjatë futjes së materialit në të dhënat e votimeve në kompjuter janë bërë disa gabime teknike. ”Në vendvotimin 04/2, LDK-ja ka pasur 164 vota, kurse PDK-ja 146, në vendvotimin 2042 LDK-ja ka pasur 65 vota më shumë, kurse PDK-ja 35. Në vendvotimin 2006/3 LDK-ja ka pasur 154 vota kurse PDK-ja 152 vota. Dhe, sipas Bytyçit, me ndryshimin e këtyre gabimeve, LDK-ja del fituese në Prizren me 8 vota më shumë. Këto të dhëna, sipas Bytyçit, i janë dërguar edhe KQZ-së në Prishtinë.
Kryetari i PDK-së për Prizren, Zafir Berisha, tha se ka pasur shkelje. Ai publikoi edhe emra të votuesve nga Llapi e Prishtina në favor të kandidatit të LDK-së.
Kurse zëdhënësi i degës së LDK-së, Haziz Hodaj, ka prezantuar votat përfundimtare sipas procesverbaleve të KKZ-së në Prizren nga përfaqësuesit e LDK-së dhe LDD-së me ndryshimin në qendrën e votimit 2014 A/02 D në Lutogllavë. “Ne kemi ftuar shefin e KKZ-së, Nysret Bytyçi, në telefon dhe ai ka pohuar se pas rinumërimit thotë kandidati i LDK-së Hanefi Muharremi ka fituar për 8 vota më shumë.

Numërimi s’ka nisur ende

Disa nga partitë vazhdojnë të bëjnë vërejtje lidhur me parregullsitë e shfaqura në procesin e zgjedhjeve. Aktualisht, PDK-ja dhe LDK-ja gjithë vëmendjen e kanë përqendruar në Prizren, ku verifikimi i votave me kusht është vlerësuar të jetë përcaktues për rezultatin përfundimtar. Numërimi i votave me kusht në Qendrën e Numërimit të Votave në Fushë-Kosovë nuk ka filluar as gjatë ditës së djeshme deri në orët e vona të mbrëmjes për shkak se, siç thanë zyrtarët e kësaj qendre, hapësira e dedikuar për numërim ka qenë ende e zënë me transportin dhe sistemimin e kutive të votimit nga terreni. “Asnjë kuti nga asnjë komunë të votave me kusht nuk është numëruar”, ka thënë Valton Hyseni, zyrtar për marrëdhënie me publikun. Ndonëse deri në orët e mesditës ka zgjatur sistemimi i kutive, ata thanë se për fillimin e numërimit nevojitet një vendim që duhet të vijë nga KQZ-ja. Sipas njoftimeve zyrtare të QNR-së, pranimi i materialeve nga të gjitha komunat ka përfunduar gati krejtësisht, ndërkohë që në proces janë Dragashi, Lipjani, Prizreni dhe Peja. Sa i përket numërimit janë duke u proceduar zarfet e fletëvotimeve me kusht të këtyre komunave: Istog, Kaçanik, Malishevë, Obiliq, Shtërpcë, Klinë, Junik, Podujevë, Gjilan, Novobërdë, Viti, Vushtrri dhe Hani i Elezit. Koordinatori i kësaj qendre, Burim Ahmetaj, shpjegoi se për shkak të transparencës së procesit, KQZ-ja dhe përfaqësuesit e të gjitha partive politike do të jenë të pranishëm gjatë procesit të verifikimit.

Reagimet pozitive

Kryeparlamentari Jakup Krasniqi ka vlerësuar se Kosova në këtë fundvit ka përmbyllur suksesshëm procesin e zgjedhjeve, përderisa ka thënë se partitë vërejtjet e tyre duhet t’i paraqesin në organet përkatëse. “Kjo do të ishte rruga më e mirë. Ne po shohim përpjekje që shumëçka të mediatizohet. Por, konsideroj që duhet të respektohen institucionet përgjegjëse për të dhënë mendimin e tyre dhe fjalën përfundimtare”, ka thënë Krasniqi.
Ndërkaq, kryeministri i Kosovës, Hashim Thaçi, ka vlerësuar mbarëvajtjen e raundit të dytë të zgjedhjeve, duke theksuar se sovrani ka folur, vendosur dhe ka shprehur vullnetin dhe se ai proces është përmbyllur. “Është me rëndësi që procesin që jemi duke e kaluar tani, të ankesave, parashtresave të ndryshme, assesi të mos politizohet dhe të mos ketë ndikime apo pretendime ndikuese, por t’i besohet punës së shkëlqyeshme, të cilën e ka bërë edhe Komisioni Qendror i Zgjedhjeve, edhe KZAP-i, dhe kemi marrë një vlerësim shumë të lartë prej të gjitha autoriteteve ndërkombëtare se në Kosovë ka ndodhur një mrekulli e organizimit të shkëlqyeshëm të zgjedhjeve të lira”, tha kryeministri Thaçi. Në këtë drejtim, sipas tij, ka fituar shteti i Kosovës, partitë, të gjithë kandidatët që janë fitues dhe në këtë drejtim, siç tha, duhet të punuar maksimalisht që të respektohen standardet profesionale të përmbylljes edhe të këtij procesi. “Duhet të respektohet profesionalizmi dhe assesi të ndodhë ndikimi politik në këtë proces, as ndaj KQZ-së dhe as ndaj KZAP-it”, tha Thaçi.

[Nice_Boy]

Korrigjohet rezultati, 8 vota para Muharremi

Nysret Bytyçi, shef ekzekutiv i KKZ-së në Prizren, tha se ka fituar LDK-ja. Bytyçi ka thënë se gjatë futjes së materialit në të dhënat e votimeve në kompjuter janë bërë disa gabime teknike


Gjilan, 16 dhjetor

Lutfi Haziri ka thënë se nuk do të pranojnë rezultatin e zgjedhjeve të balotazhit në Gjilan. Këtë deklaratë nënkryetari i LDK-së e ka dhënë në emër të koalicionit të djathtë, pas një takimi të përbashkët që kanë mbajtur LDK-ja, AAK-ja dhe LDD-ja. Dega e LDK-së në Gjilan jo që nuk e ka njohur fitoren e kandidatit të PDK-së, Qemajl Mustafa, por edhe e ka shpallur fitues kandidatin e saj, Fatmir Rexhepi, duke i vlerësuar të paqena dhe të papranueshme rezultatet preliminare të KQZ-së.

Rexhepi: Na janë vjedhur 1.746 vota

Sipas rezultateve të shtabit zgjedhor të LDK-së, Rexhepi (LDK) ka një epërsi ndaj Mustafaës (PDK) - 50,5 : 49,5. Fatmir Rexhepi tha se rezultatet preliminare konsiderohen jolegjitime, nga koalicioni i djathtë, për shkak të parregullsive të mëdha që kanë ndodhur gjatë ditës së votimit. “Na janë vjedhur 1.746 vota, kurse pjesë e këtyre parregullsive dhe lëshimeve, është edhe raporti i KKZ-së të Gjilanit, me rezultatet preliminare të balotazhit, ku janë mbi 1169 fletëvotime më shumë sesa numri i votuesve, si dhe 397 vota të fshehura brenda raporteve që i ka publikuar KQZ-ja”, ka thënë Rexhepi, duke këmbëngulur se nuk do ta pranojë këtë rezultat, porse do të insistojë deri në fund për të vërtetën. Ndërkaq, Lutfi Haziri ka njoftuar se për të gjitha këto shkelje janë ankuar në KZAP dhe tani janë në pritje të vendimit të këtij komisioni.

Mustafa (PDK): Fituesi është i përcaktuar

PDK-ja e ka shpallur fitoren e kandidatit të saj, Qemajl Mustafa, dhe tashmë ka filluar bisedimet me partneret e koalicionit për ndarjen e drejtorive. Kam pasur bindje të plotë se do të dalim fitues edhe në këto zgjedhje, ka thënë Mustafa, duke shprehur keqardhje vetëm për diferencën e ngushtë të votave që ai ka me kundërkandidatin e LDK-së. “Më vjen keq që diferenca është e ngushtë, sepse kemi pritur më shumë, por sido që të jetë edhe ky rezultat e përcakton qartë fituesin”, ka thënë Mustafa. Ndryshe, ai ka thënë se aktualisht është në bisedime për ndarjen e qeverisjes me partnerët e koalicionit dhe shpreson se këto gjëra do të qartësohen deri në fund të kësaj jave. Ndërkohë do të fillojnë përgatitjet edhe për konstituimin e asamblesë komunale, që do të bëhen pas një takimi paraprak me grupet politike. Relaksimi i raporteve është i nevojshëm pas çdo procesi zgjedhor, ka thënë Qemajl Mustafa.
I.Musliu

[Nice_Boy]

Përmbyset rezultati preliminar në Prizren

Drama rreth përcaktimit të fituesit të garës për udhëheqjen e pushtetit lokal në Prizren është thelluar edhe më shumë të martën pas përmirësimeve të deklaruara nga zyrtarët e Komisionit Komunal Zgjedhor. Shifrat e fundit të prezantuara nga ky organ kanë përmbysur rezultatin preliminar në favor të kandidatit të Lidhjes Demokratike të Kosovës, Hanefi Muharremi, duke i dhënë atij një epërsi të ngushtë prej tetë votash përballë rivalit të Partisë Demokratike të Kosovës, Ramadan Muja. Sipas shefit ekzekutiv të KKZ-së në Prizren, Nysret Bytyçi, dallimet në rezultatin preliminar kanë dalë në pah pas konstatimit të lëshimeve të bëra gjatë bartjes së të dhënave në tri vendvotime. “Gabimi ka ndodhur gjatë bartjes së rezultateve nga tri vendvotime. Koha ka qenë e shkurtër dhe kemi qenë nën presion, prandaj është normale që ka pasur gabime.

Në këtë situatë e tëra do të varet nga numërimi i 1 mijë e 602 votave me kusht, proces ky i cili nuk do të nisë pa bekimin e Komisionit Qendror Zgjedhor dhe pa praninë e vëzhguesve të partive politike. Burim Ahmetaj, koordinator i Qendrës për Numërime dhe Rezultate, ka deklaruar se procesimi i materialit nga Komuna e Prizrenit nuk do të bëhet pa informimin paraprak të KQZ-së dhe pa praninë e partive politike (Koha Ditore)

Dyshime edhe në Mitrovicë

Nga Express më 16.12.2009 në ora 19:18

Shtabi zgjedhor i kandidatit të Koalicionit AKR-LDD për Kryetar të Mitrovicës, Nexhmedin Spahiut, nëpërmjet një komunikatë për media, ka thënë se janë bërë falsifikime të procesverbaleve nga ana e PDK’së gjatë balotazhit.

Sipas tyre, falsifikimet e procesverbaleve janë bërë në Tunel të Parë të Mitrovicës.

“Në pikën 1116/02R, në Tunelin e Parë në Mitrovicë, është falsifikuar procesverbali. Procesverbali origjinal përmban një diferencë të thellë në numrin e votave në favor të Nexhmedin Spahiut karshi kandidatit të PDK’së. Procesverbali i prezantuar para KQZ’ja ua ka ndërruar vendin këtyre rezultateve, duke i shënuar numrin e votave të Nexhmedin Spahiut Avni Kastratit dhe anasjelltas”, thuhet në komunikatë, të lëshuar të mërkurën.

Procesverbali, sipas shtabit të Spahiut, është falsifikuar nga Kryetari i komisionit në pikën 1116/02R, Lavdim Musa, djali i kolonel Emin Musës.

Po ashtu, siç thuhet më tej në komunikatë, në rezultatin preliminar janë bërë disa gabime teknike që kanë ndryshuar rezultatin në favor të Avni Kastratit të PDK’së.

Shtabi i AKR’së parashikon se me anulimin e këtyre votave, ku pretendohet se ka pasur gabime, do të ndikojë që votat me kusht të vendosin për Kryetarin e ardhshëm të Mitrovicës.

[Nice_Boy]

KQZ anulon rezultatet në 9 vendvotime

Me rekomandim të Qendrës për numërim të votave, Komisioni Qendror Zgjedhor (KQZ), në një mbledhje të mbajtur të mërkurën me dyer të mbyllura, ka anuluar rezultatet e votave në nëntë vendvotime ku janë evidentuar parregullsi, prej të cilave tri janë në Prizren, dy në Gjilan dhe nga një vendvotim në Dardanë, Besianë dhe Vushtrri.

Vetëm pak ditë pas përfundimit të rrethit të dytë të zgjedhjeve për kryetar në 21 komuna të Kosovës, KQZ ka vendosur të anulojë rezultat në 9 vendvotime, për shkak të parregullsive të evidentuara.

Ndërkaq, subjektet politike, të cilat kanë dorëzuar ankesat e tyre në Komisionin Zgjedhor për Ankesa dhe Parashtresa (KZAP), pritet të marrin përgjigje javën e ardhshme.

KZAP vetëm gjatë ditës së sotme ka pranuar mbi 22 ankesa lidhur me parregullsi, ndërkaq nesër pritet të fillojë numërimi i votave me kusht.

Bazuar në rezultatet preliminare të Komisionit Qendror të Zgjedhjeve për balotazhin e së dielës, Partia Demokratike e Kosovës ka fituar në 10 komuna, Lidhja Demokratike e Kosovës në 5, kurse Aleanca për Ardhmërinë e Kosovës në 3 komuna.

Në Prizren kandidati i Lidhjes Demokratike të Kosovës, Hanefi Muharremi, dhe ai i Partisë Demokratike të Kosovës, Ramadan Muja, kanë fituar përqindje të njëjtë 50:50, andaj numërimi i votave me kusht për këtë komunë pritet të përcaktojë udhëheqësin e ri të qytetit të dytë më të madh në Kosovë. /kosovapress/

[Llapi]

Sejdiu të jetë president, jo kryetar i LDK-së

Nga Express më 17.12.2009 në ora 17:20
Zëvendëkryeministri i Kosovës, njëherësh nënkryetar PDK-së, Hajredin Kuçi, e ka ftuar sot publikisht presidentin Fatmir Sejdiu dhe partinë e tij - LDK që t’u besojnë institucioneve të përcaktuara me kushtetutë për organizimin e zgjedhjeve.

Deklarata vjen pas akuzave të LDK-së, ditëve të fundit, në adresë të partnerit në koalicionin qendror – PDK për parregullsi dhe keqpërdorime votash në disa komuna, në zgjedhjet e balotazhit që u zhvilluan të dielën.

“Ne i ftojmë që të gjithë kompetentët ta luajnë rolin e tyre. Ata që po ankohen në vendimet e KQZ-së dhe të KZAP-it, ata i ka emëruar presidenti i Republikës së Kosovë, sipas kompetencave kushtetuese që ka ai. E ftojmë publikisht presidentin e Republikës, që është edhe kryetar i Lidhjes Demokratike të Kosovës, që kësaj radhe të jetë më shumë president i Republikës, më pak kryetar i LDK-së, pra të besoj në institucionet që i ka emëruar ai, të kërkojë nga partia e vet që ta bëjë të njëjtën gjë, pra të besojnë në institucionet e pavarura dhe të përfundojmë këtë proces me sukses”, ka thënë Kuçi, në një konferencë me gazetarë.

Nga ana tjetër, sipas Kuçit, PDK-ja i pret me qetësi rezultatet përfundimtare që do të dalin nga institucionet kompetente të vendit.

Nënkryetari i PDK-së tha se partia e tij i jep mbështetje të plotë Komisionit Qendror Zgjedhor (KQZ), Komisionit Zgjedhor për Ankesa dhe Parashtresa (KZAP) dhe institucioneve të tjera të pavarura, kompetente për organizimin, vëzhgimin dhe monitorimin e zgjedhjeve të lira, të pavarura dhe demokratike në Kosovë.

I pyetur nëse ende ka kuptim bashkëjetesa PDK-LDK, pas të gjitha akuzave ekstreme që janë bërë nga të dy partitë në koalicion, numri dy i PDK-së është shprehur se edhe mediet kanë bartur një pjesë të fajit në këtë drejtim, duke u munduar të bartin problemin në nivelin qendror.

“Maksut Shehu, diku në vitin 80... e ka shkruar një shkrim, që dikush më ka thënë ta mbajë në mend: ‘A ka të drejtë dikush të iu thotë edhe gazetarëve nuk e keni mirë’. Unë po ju them se keni tentuar ta bartni garën në nivel qendror, nuk është problemi në nivel qendror, problemi është që degët dhe nëndegët tona, aktivistët tanë, anëtarët e tjerë të kuptojnë një racionalitet në qëndrime”, u shpreh Kuçi, transmeton KosovaPress.

Ai gjithashtu ka shfaqur shqetësimin e PDK-së në lidhje me protestat e mundshme, duke thënë se të gjithë ata që kanë hyrë në garë duhet ta pranojnë humbjen me qetësi.

Kuçi ka vlerësuar se Kosova ka traditë të mirë në ndërtimin e politikave dhe të demokracisë, duke thënë se njohja e rezultateve ka qenë një dukuri e mirë që nga viti 2000.