Kongresi Amerikan pritet te votoje pavaresine e Kosoves pa kushte

[dodoni]

Kosovë
30.01.2003
Kongresi amerikan pritet të votojë rreth përkrahjes së pakusht për shtetin e Kosovës

Kongresistët Lantos dhe Hyde ndryshojnë tekstin e rezolutës për mbështetjen e pavarësisë së Kosovës

WASHINGTON, 29 JANAR - Kongresistët amerikanë Tom Lantos dhe Henry Hyde ia kanë dorëzuar Komitetit për Marrëdhënie me Jashtë të Dhomës së Përfaqësuesve të Kongresit amerikan propozimin e ndryshuar të rezolutës për pavarësinë e Kosovës, raportohet nga Washingtoni. Sipas raporteve të mediave elektronike, propozimi i ndryshuar i rezolutës, që është dorëzuar të hënën, më 27 janar, është i njëjtë me versionin e propozuar nga Lantos dhe kongresisti Benjamin Gilman, më 27 qershor 2002. Proceduar e Kongresit parasheh që rreth rezolutave të propozuara të deklarohen edhe Dhoma e Përfaqësuesve edhe Senati, me rekomandim të komiteteve përkatëse. Në teksin e ri të rezolutës së dorëzuar kërkohet pranimi i pakusht i pavarësisë së Kosovës, ndërkohë që nuk përmendet më “zhvillimi dhe konsolidimi i shtetit demokratik”, siç thuhej në tekstin e 7 janarit. Në rezolutën e re më nuk përmendet si kusht për pavarësim as ndërtimi i marrëdhënieve stabile me fqinjët, e as luftimi i krimit të organizuar, raportojnë mediat. Sipas tekstit të ri të rezolutës së propozuar të kongresistëve, Rezoluta 1244 e Këshillit të Sigurimit të OKB-së nuk përmendet si kornizë për zgjidhjen e statusit të ardhshëm të Kosovës, por vetëm thuhet se me këtë dokument i është dhënë fund okupimit dhjetëvjeçar të Kosovës nga ana e Serbisë. Në rezolutën Lantos-Hyde përmendet nevoja për rimëkëmbjen ekonomike të Kosovës përmes investimeve të huaja dhe transicionin e qetë drejt pavarësisë, ndërkohë që më nuk përmendet as pozita e minoritetit serb në Kosovë, por vetëm garantohet kthimi i të gjithë serbëve të ikur që nuk kanë kryer krime. Nga teksti i rezolutës i dorëzuar më 7 janar në versionin e ri janë hequr pjesët ku flitet për dhunën etnike kundër serbëve dhe për pjesëmarrjen e serbëve në jetën politike të Kosovës, sikur edhe pjesa ku flitej për domosdoshmërinë e ndërtimit të institucioneve, sundimit të ligjit, garantimit të lirisë së lëvizjes si dhe kthimit të të gjithë të zhvendosurve. Kongresistët Lantos dhe Hyde argumentojnë se pavarësimi i Kosovës nga Serbia është i vetmi opcion i drejtë për Kosovën, meqë autonomia shumë herë është treguar si e papërshtatshme. Ata i propozojnë SHBA-së që publikisht të përkrahë pavarësinë dhe vendosjen e Kosovës si një shtet sovran dhe demokratik, si të vetmen mënyrë për arritjen e paqes dhe stabilitetit afatgjatë në Ballkan. Në rezolutë po ashtu theksohet nevoja që të pranohet rreziku nga shtyerja e zgjedhjes së statusit final të Kosovës për qëndrueshmërinë e saj ekonomike dhe për të ardhmen e Evropës Juglindrore, duke vlerësuar se “roli i OKB-së, NATO-s dhe institucioneve të tjera është që të punojnë në lehtësimin e transicionit të qetë drejt pavarësisë”. Autorët e tekstit - kongresistët Gilman, Lantos dhe Hyde - ka kohë që angazhohen për ndryshimin e politikës zyrtare amerikane drejt pranimit të opcionit të pavarësisë së Kosovës si i vetmi që është i qëndrueshëm.
Marre nga koha.net