Prodi: Dera Eshte E Hapur Per ne BE

[Shijaksi-London]

Prodi: Dera është e hapur për në BE

NGA BBC NE SHQIP LONDER
-------------------------------------------------------------------------------

Prodi thotë se Shqipëria e ka derën të hapur për të hyrë në BE
Presidenti i Komision Evropian Romano Prodi tha se Shqipëria po ecën në drejtimin e duhur drejt stabilitetit, por ka ende për të bërë për të arritur atë nivel zhvillimin ekonomik si dhe goditjen e kriminalitetit për të hyrë në Bashkimin Evropian.
Duke folur në një intervistë ekskluzive për BBC në shqip para vizitës së tij të premten në Tiranë zoti Prodi tha se Shqipëria ka bërë në përparim të konsiderueshëm.
Ai vuri në dukje se fillimi i procesit të negociatave për marrëveshjen e stabilizim-asociimit është "një instrument për ta futur vendin në binarët e duhur".
"Ne dërgojmë një mesazh të qartë se dera është e hapur dhe varet nga ju për të përmbushur kushtet me qëllim të që të futeni brenda," tha zoti Prodi.
Arben Manaj i BBC në shqip bisedoi me zotin Prodi.

BBC: Cilat janë disa probleme që hasin vendet e Ballkanit për t'u integruar në Bashkimin Evropian?

Zoti Prodi: Të gjithë i dinë rregullat e integrimit dhe ajo që ne po bëjmë është që hap pas hapi po ndihmojmë vendet që duan të hyjnë në BE për të plotësuar rregullat dhe kushtet që pranohen gjerësisht.

BBC: Zoti Prodi, cila është sfida më e madhe që ka sot Shqipëria - foshnjëria ekonomike apo mungesa e stabilitetit politik?
Zoti Prodi: Nuk ka mungesë stabiliteti. Hap pas hapi, Shqipëria po ecën në drejtimin e duhur. Ka pasur një mungesë të tmerrshme stabiliteti në të shkuarën. Ka pasur probleme të vështira politike. Ndërsa sot procesi demokratik, me vështirësitë e dukshme që vëmë re në Shqipëri si dhe historinë e këtij vendi gjatë dy brezave të fundit, po ecën në drejtimin e duhur dhe Shqipëria po shkon drejt stabilitetit politik. Ndërsa në aspektin ekonomik pika e nisjes është shumë e ulët, por shpejtësia sigurisht që është e krahasueshme me të gjitha vendet e tjera të rajonit. Sigurisht, ne kemi një problem të madh, që ka lidhje me të kaluarën, por ne duhet të jemi të qartë me shqiptarët, të themi p.sh.kriminalitetin, kjo lloj sjellje nuk do të gjej vend në një Evropë të zgjeruar.

BBC: A mendoni se Shqipëria epitomizon të gjitha dukuritë negative të vendeve kandidate nga Ballkani?
Zoti Prodi: Pse këmbëngulni vetëm në dukuritë negative?

BBC: Sepse këto janë ato faktorë që e pengojnë Shqipërinë të anëtarësohet, apo jo zoti President?

Zoti Prodi: Unë e përsëris se shqiptarët e filluan nga një pikë shumë e ulët dhe po ecin në drejtimin e duhur me një shpejtësi që ndoshta nuk është ajo që dikush shpresonte, por ky është një përparim i konsiderueshëm. Kështu që unë mendoj se ne kemi një situatë të tillë dhe po fillojmë pas më shumë se një viti përgatitjesh procesin e marrëveshjes se stabilizim-asociimit, i cili është një instrument për të arritur qëllimin që ju bëni në pyetjen tuaj: pra, për ta futur vendin në binarët e duhur.

BBC: Zoti President, nisur nga shpejtësia që përmendët ju, si dhe nga fakti që ju jeni personi i përshtatshëm për t'iu përgjigjur pyetjes sime, realisht kur mund të futet Shqipëria në Bashkimin Evropian?

Zoti Prodi: Është e pamundur t'i përgjigjesh kësaj pyetjeje, sepse vendimi nuk merret vetëm për një vend, por axhenda jonë është se secili vend do të shqyrtohet sipas meritave. Ne thjesht themi që, kur të jenë gati ata do të anëtarësohen nëse dëshirojnë, por askush nuk mund të thotë sot se kur do të ndodhë kjo. Po e përsëris, ne po ndërmarrim hapin e parë, dhe pikërisht me marrëveshjen e stabilizim-asociimit, e cila përbën një fazë që do të ndihmojë përgatitjen për t'u bërë anëtar i këtij Bashkimi. Por kjo do të bëhet në të ardhmen, ne nuk e dimë se kur. Megjithatë, ne dërgojmë një mesazh të qartë se dera është e hapur dhe varet nga ju për të përmbushur kushtet me qëllim të që të futeni brenda.

BBC: Si mendoni, mund të ndodhë kjo pas 10-15 vjetësh?

Zoti Prodi: Unë nuk mund të angazhohem për të dhënë ndonjë datë të caktuar. Dhe ata nuk më kanë kërkuar ta bëj këtë, sepse ata e dinë se problem nuk është koha se kur, por si.

BBC: Zoti President, kur një shqiptar i thjeshtë dëgjon për mundësinë e integrimit të Shqipërisë në Evropë, ndër gjërat e para që i shkon ndërmend është pyetja: 'A do të kem unë mundësi të udhëtoj në Evropë pa pasur vizë, njëlloj si bullgarët, rumunët, kroatët?' A do t'u jepet shqiptarëve kjo mundësi?
Zoti Prodi: Kur të ketë ardhur dita që të jenë bërë anëtarë, ata do të trajtohen njëlloj si anëtarët e zakonshëm të Bashkimit Evropian dhe sigurisht që nuk do të ketë anëtarë të klasit të parë dhe anëtarë të klasit të dytë.

BBC: Zoti Prodi, unë kisha parasysh periudhën e ndërmjetme deri sa të bëhen anëtarë me të drejta të plota. Dhe këtu kam parasysh për shembull bullgarët apo rumunët, të cilët para se të njoftoheshin zyrtarisht se do të anëtarësoheshin në BE kanë pasur mundësi të udhëtojnë pa vizë apo me regjim të relaksuar vizash në shumë vende evropiane...

Zoti Prodi: Ne fillojmë të premten dialogun. Sigurisht, që ne do të trajtojmë edhe kushtet për këtë regjim vizash, por edhe në këtë rast nuk mund të themi se kur, por cilat janë kushtet që duhet të plotësohen, si dhe shkalla e bashkëpunimit që do të arrihet, për të udhëtuar lirshëm.

BBC: Zoti President, kam përshtypjen që shqiparët që kërkojnë të udhëtojnë jashtë shtetit e bëjnë më shumë për arsye ekonomike. A mendoni se ka ardhur koha të ushtronit më shumë presion ndaj vende të Bashkimit Evropian për të relaksuar regjimin e vizave me Shqipërinë, me qëllim që shqiptarët të mos hyjnë në këto vende nga dera e pasme?

Zoti Prodi: Unë e përsëris se qëllimi për të qenë anëtar i Bashkimit Evropian është që të lehtësohet futja e Shqipërisë në Bashkim, por kjo është diçka për të ardhmen e jo për sot. Sigurisht që nuk ka diskriminim ndaj shqiptarëve. Problemi është se si të rregullohet një gjë e tillë, dhe kjo ka kushte të dyfishta: pranimi nga ana jonë dhe pranimi nga ana e tyre.

BBC: Zoti Prodi, cilat janë shanset që Kosova t'i bashkohet procesit të stabilizim-asociimit me Bashkimin Evropian?
Zoti Prodi: Ne nuk e kemi parashikuar këtë për momentin, por e përsëris se në strategjinë afatgjatë, për mendimin tim dhe të Komisionit Evropian, të gjitha vendet e Ballkanit, nëse dëshirojnë, do të jenë një ditë pjesë e BE-së.

BBC: Po me Maqedoninë, e cila e ka filluar tashmë këtë proces, çfarë do të ndodhë më tej?
Zoti Prodi: E njëjta situatë. Kemi një bashkëpunim në fushën e policisë. Muajin tjetër do të shkoj në Maqedoni thjesht për të diskutuar me ta se çfarë mund të bëjmë së bashku në fushën ekonomike e politike, me qëllim që t'i ndihmojmë edhe ata që të stabilizojnë gjendjen politike, si dhe për t'i ndihmuar në rritjen ekonomike.

BBC: Zoti Prodi, shqiptarët ju konsiderojnë si mikun e tyre nisur nga angazhimet tuaja në të kaluarën. Çfarë do t'u thoni të premten shqiptarëve në Tiranë me qëllim që ata të mos humbasin shpresën?

Zoti Prodi: Unë do t'u them që jemi ende miq. Unë jam ende mik i fortë i Shqipërisë. Sepse unë isha shumë pranë atij vendi në momentet më të vështira të historisë së tij të kohëve të fundit. Unë i ndihmova pa ndërhyrë në jetën e tyre të brendshme politike. Kështu që ajo që do t'ju them është: 'Ju lutem, kini besim tek unë. Unë jam miku juaj, por natyrisht po ju sjell kushtet dhe masat që ju duhet të ndërmerrni me qëllim që ju të hyni në radhët tona.' Unë i njoh ata, dhe kjo është arsyeja që kam besim tek ai vend, por kjo nuk më autorizon mua të devijoj nga rregullat që ne kemi, të cilat i kemi respektuar për të dhjetë vendet që do të anëtarësohen në procesin e zgjerimit.

BBC: Dhe në mbyllje, gjatë vizitës suaj të fundit në Tiranë, zoti Prodi, ju theksuat fjalët: 'Stabilitet, stabilitet, stabilitet!'. A do t'u shtonin ndonjë fjalë tjetër këtyre?
Zoti Prodi: Shihni, që nga koha që kam qenë atje nuk ka pasur trazira politike. Ata kanë shtuar dialogun politik, marrëdhëniet midis qeverisë dhe opozitës sigurisht që janë më të mira seç kanë qenë kur unë predikoja: 'Stabilitet, stabilitet, stabilitet'. Kështu që unë mendoj se ata kanë filluar tashmë të japin rezultate.