Të Vërtetat Dhe Normat E Jetës Së Krishterë

[simonpjetri]

MËKATI



MËKATI është vepër e keqe që e bën njeriu me vullnet të lirë dhe me vetëdije.

Mëkat është shkelje e urdhrit të Zotit, apo të Kishës, si edhe veprim kundër ndërgjegjes personale.



Bagëtia nuk mund të bëjë mëkat – sepse nuk ka as arsye (mend), as vullnet të lirë.

Fëmija i vogël, që ende nuk ka arritur deri te përdorimi i arsyes, si edhe njeriu i çmendur dhe i pavetëdijshëm (p. sh. në gjumë) – nuk mund të bëjë mëkat – sepse nuk di çka bën dhe nuk zgjedh mëkatin me liri.



Llojet e mëkateve

Dallojmë:

Mëkatin e trashëguar ("rrjedhshëm", "origjinal", "burimor") – të trashëguar prej të parëve, që nga Adami dhe Eva, e deri te prindërit tanë; dhe

mëkatin personal – që e kemi bërë vetë.

(Mëkati i trashëguar falet vetëm në pagëzim, kurse mëkati personal në pagëzim dhe në rrëfim.)


Mëkate personale mund t’i bëjmë – me mendime, me fjalë, me vepra dhe me lëshime detyrash.

Mëkatet mund të jenë të mëdha, apo të vogla (të rënda, apo të lehta).


Mëkati i madh (i rëndë) e ndërpret lidhjen tonë miqësore me Zotin, kurse

mëkati i vogël nuk e këput lidhjen me Zotin, por e dobëson dhe na e zvogëlon hirin shenjtërues.

Kushtet që diçka të mund të llogaritet si mëkat i madh (apo "mortar", mëkat "për vdekje" – dmth. për vdekje shpirtërore), për të cilin njeriu meriton dënimin e amshuar në ferr, janë këto:

a) që të jetë fjala për punë të madhe;

b) që mëkatari të jetë plotësisht i vetëdijshëm se bën mëkat të madh;

c) që mëkatari me vullnet plotësisht të lirë vendoset për mëkat.



Të gjitha mëkatet na falen në sakramentin e pagëzimit.

Për të shlyer mëkatin e madh, të bërë pas pagëzimit, është i domosdoshëm sakramenti i Rrëfimit, kurse mëkatet e vogla falen edhe në bazë të veprave të mira, pendesave dhe sakrificave.

Kushti për faljen e çfarëdo mëkati është pendimi i sinqertë dhe besimi se Zoti është Atë i mirë dhe i mëshirshëm, i gatshëm të na i falë fajet tona.

[simonpjetri]

Veprat e mëshirshme të shpirtit:

1. Këshilloji ata që dyshojnë.

2. Mësoji të padijshmit.

3. Qortoji mëkatarët.

4. Ngushëlloji të pikëlluarit.

5. Fali fyerjet.

6. Duroji ata që të mërzisin.

7. Lutju Zotit për të gjallë e të vdekur.

[simonpjetri]

Punët e nevojshme për t’u rrëfyer mirë:

1. Kujto të gjitha mëkatet që i ke bërë!

2. Pendohu për të gjitha mëkatet që i ke bërë!

3. Jepja fjalën Zotit se nuk do të mëkatosh më!

4. Trego rrëfyesit të gjitha mëkatet pa rrena!

5. Bëje pendesën që ta jep rrëfyesi.


Vëni re!

Zoti na i fal mëkatet në bazë të meritave të Jezu Krishtit,
i cili vdiq në kryq për shëlbimin tonë.
Mirëpo, falje s’ka pa pendim.

Pendimi është keqardhja për shkak të mëkatit,
me të cilin e kemi fyer Zotin dhe Kishën
dhe njëkohësisht e kemi rrezikuar shëlbimin tonë.

Për faljen e mëkateve bëjmë edhe pendesën.