Trafik vizash nëpërmjet ambasadave
Persona brenda përfaqësive të huaja në Shqipëri bashkëpunonin me një organizatë
Sokol Çobo
Punonjës të disa ambasadave të huaja në Tiranë bashkëpunonim me një grup të mirorganizuar për trafik personash dhe falsifikim dokumentesh, duke arritur të jepnin dhjetëra viza të rregullta në këmbim të ryshfeteve të majme. Prokuroria e Tiranës tha dje se ka përfunduar hetimet për 10 të pandehur, ndërsa disa persona të tjerë nuk janë identifikuar, pasi ambasadat respektive nuk kanë bashkëpunuar me hetuesit, duke i mbajtur sekrete disa dokumente. Si rrjedhojë, nuk është bërë i mundur dokumentimi i këtyre abuzimeve, vetëm si mungesë e informacionit zyrtar. Burime zyrtare nga Prokuroria e Tiranës thanë se një nga 10 të pandehurit që është dërguar në gjykatë quhet Thanas Todhri. Policia ka rënë në gjurmët e këtij personi nga informacionet se ai arrinte t‘i pajiste emigrantët brenda një kohe të shkurtër me viza. Ky person është mbajtur nën vëzhgim dhe përgjim për një kohë relativisht të gjatë, nga ku ka rezultuar se ai e zhvillonte aktivitetin e tij kryesisht pranë ambasadave. "Nga transkriptet e bisedave të tij telefonike është saktësuar se ai nëpërmjet njohjesh të ndryshme, njohje të cilat në shumicën e rasteve kalonin deri tek ambasadat- pa arritur në emra konkretë për shkak të mungesës së informacionit, i cili ishte tepër i pakët nga disa përfaqësi -arrinte të siguronte viza, për të cilat nuk disponohet ndonjë fakt nëse këto kanë qenë të rregullta apo dhe të falsifikuara. Është evidentuar saktësisht pjesëmarrja e tij që nga përpilimi i dokumenteve e deri në nisjen e emigrantëve në Rinas, ku ai jepte dhe orientimet për hotelet, mënyrat e lëvizjes, si dhe personat të cilët do të kontaktoheshin prej tij", thanë burimet nga Prokuroria e Tiranës. Sipas tyre, i pandehuri Todhri ka pasur komunikime me shumë numra të tjerë telefoni, që bënin fjalë për momentin e nisjes apo të mbërritjes, duke u sugjeruar apo kërkuar të dhëna dhe informacione të tjera më të hollësishme. Ky person, sipas prokurorisë, në disa telefonata ka marrë porosi të ndryshme për probleme vizash.
Vizat në ambasadë
Prokuroria tha se ka zbërthyer mekanizmat me të cilat ky shtetas pajiste kërkuesit me viza, të cilat deri në këtë moment janë vlerësuar të rregullta, pasi si të tilla janë konsideruar edhe nga autoritetet e huaja që kanë bërë pranimin. Personat e kontaktuar me të pandehurin dhe që kanë prezantuar para tij nevojën për një vizë, kanë dorëzuar një pjesë të dokumentacionit të kërkuar nga ambasadat respektive (certifikatë, garanci bankare) dhe në pamundësi për të plotësuar kërkesat e tjera që lidheshin pikërisht me të qenit në një punë të qëndrueshme dhe stabël me të ardhura të mjaftueshme, për të krijuar besueshmëri pranë institucionit në fjalë, ja besonin pikërisht këtë moment të pandehurit, i cili përgatiste dokumentacionin fals të institucioneve shqiptare, apo dhe të firmave të rëndësishme, të cilat jepeshin në një zarf, së bashku me dokumentet e tjera. Këto dërgoheshin nga kërkuesit pranë ambasadave dhe për fatin e tyre të mirë gjithnjë këto të dhëna nuk verifikoheshin. Në këtë mënyrë, sipas prokurorisë, i pandehuri ka plotësuar dokumentacionin e shtetasve Ervis Nuri Zeneli, i cili është prezantuar me dokument të falsifikuar si punonjës i një firme. Prokuroria ka verifikuar edhe disa raste të tjera, ndërsa këtë rast nuk e quan si "kalim të paligjshëm të kufirit", por "falsifikim".
Akuzat
Prokuroria thotë se në analizë të këtij fakti, i cili përbën thelbin e akuzës ndaj të pandehurit, pavarësisht se materiali i prezantuar pranë ambasadave mbetet i dyshimtë në përmbajtjen e tij, gjithsesi gjykohet se nuk ndodhemi para elementëve të veprës penale, të "kalimit të kufirit", për të cilën është filluar aktiviteti kriminal. Pavarësisht anës dokumentare, e cila mbetet në vlerësim të institucionit që e pranon dhe që e gjykon nëse është apo jo e domosdoshme, marrja e një vize, pavarësisht sa më sipër, është përmbyllja e gjithë praktikës dhe për sa kohë ajo jepet nga institucioni që e lëshon dhe kërkuesi i saj, zbaton në pikat e kontrollit kërkesat në fjalë, atëherë nuk kemi më kalim të paligjshëm të kufirit, por një falsifikim të dokumenteve. Prokuroria thotë gjithashtu se, pavarësisht qëndrimit të Thanas Todhrit ndaj akuzës, apo edhe qëndrimit të të pandehurve të tjerë në raport me të dhe faktet në ngarkim të tyre, deklarimet e personave që tregojnë rrethanat e hetimit, ekspertimet teknike, dokumentojnë në tërësinë e tyre aktivitetin e të pandehurit.
shqip.
Përgjigju Duke Cituar
Krijoni Kontakt