Vangjush Dako po zbaton "modelin Rama" për bunkerizimin e qytetit bregdetar

[Brari]

Skandal. Vangjush Dako po zbaton "modelin Rama" për bunkerizimin e qytetit bregdetar


Kryebashkiaku socialist i Durrësit ndërton pallate mbi muret bizantine


Qyteti bregdetar i Durrësit po vuan të njëjtat pasoja si kryeqyteti përsa i përket gjelbërimit. Në të gjitha vendet publike ka patur hapësira për çlodhjen e qytetarëve apo lulishte për të marrë ajër të pastër, janë uzurpuar dhe janë kthyer ose po kthehen në ndërtime pallatesh. Siç duket, Kryetari i Bashkisë së Durrësit, Vangjush Dako, po ndjek "modelin Rama" për bunkerizimin e qytetit. Kryebashkiakut të Durrësit, ashtu si edhe atij të kryeqytetit nuk iu bëjnë aspak përshtypje ankesat e qytetarëve apo protestat e shoqatave të ndryshme, për mungesën e vendeve publike çlodhëse, atyre u intereson vetëm pasurimi. Dhe mjeti më i mirë për ta për t'u pasuruar është ndërtimi vend e pa vend në qytet.

Në qendër të Durrësit, përballë Postës dhe stacionit të autobuzave të plazhit, ka qenë një lulishte (lulishtja 1 Maji), ku qytetarët kalonin kohën e lirë. Para disa viteve, të paktën shfrytëzohej si e tillë. Disa qytetarë thonë se shpresuan se, Vagjush Dako do të vinte dorë dhe do të krijonte më shumë vende publike, por ndodhi e kundërta. Ai sapo u zgjodh në krye të Bashkisë së Durrësit, ndoqi të njëjtën rrugë ashtu si Edi Rama në Tiranë, duke i marrë frymën qytetit me ndërtime. "Shpresuam të gjithë që me ardhjen e Vangjush Dakos në krye të Bashkisë, hapësirat publike do të shtoheshin, gjelbërimi në Durrës gjithashtu, por realisht, asnjeri prej nesh nuk mendoi që dhe ato pak hapësira publike do të ziheshin me pallate. Këto ndërtime i kanë zënë frymën Durrësit", thonë disa qytetarë durrsakë.

Me ardhjen e Vangjush Dakos në krye të Bashkisë së Durrësit, janë dhënë leje ndërtimi mbi mure bizantine, mbi tempuj romakë, përballë, anash dhe pas Bashkisë së qytetit. Është ndërtuar një kompleks pallatesh mbi të vetmen lulishte potenciale të qytetit dhe ndërtimet vazhdojnë pafund. "Ne si qytetarë durrsakë, jemi realisht të shqetësuar për uzurpimin e vazhdueshëm dhe të pashpirt që po i bëhen hapësirave publike në Durrës", thonë disa nga qytetarët që takuam. Këto janë vetëm disa nga ndërtimet që kanë lulëzuar dhe lulëzojnë në qytetin e Durrësit me leje të dhëna nga një kryetar bashkie, i cili si kryefjalë të programit të tij ka fjalën beton.



..

rd