Mes dilemave për zgjedhje dhe presioneve nga Beogradi

[DYDRINAS]

Mes dilemave për zgjedhje dhe presioneve nga Beogradi



11.10.2009
Zijadin Gashi

Beogradi vazhdon t'u dërgojë mesazhe politike serbëve të Kosovës se nuk ka kushte për të dalë në zgjedhjet lokale të 15 nëntorit. Por, formimi i komunave të reja, nga disa politikanë serbë shihet si arsye e mjaftueshme për pjesëmarrje.

Zgjedhjet lokale të 15 nëntorit në Kosovë kanë zgjuar një interesim më të madh tek komuniteti serb. Kjo të paktën vërehet te numri i subjekteve politike të këtij komuniteti që është paraqitur tek Komisioni Qendror i Zgjedhjeve, për të marrë pjesë në procesin zgjedhor.

Decentralizimi dhe formimi i komunave me shumicë serbe shihen si mundësi të reja për këtë komunitet, që të shtrijë një vetëqeverisje më të gjerë lokale.

Sllobodan Petroviq, kryetar i Partisë së Pavarur Liberale, veçon sidomos decentralizimin dhe komunat e reja - si arsye të mjaftueshme për pjesëmarrje në zgjedhje.

“Po mundësohet formimi i gjashtë komunave të reja me shumicë serbe dhe ky është faktori kryesor që motivon serbët e Kosovës që të dalin në zgjedhje”, thotë Petroviq.

Partia, të cilën ai drejton, ka marrë pjesë edhe në procesin e kaluar zgjedhor dhe është pjesë e Qeverisë dhe Parlamentit të Kosovës.

Ndërsa një numër i konsiderueshëm i subjekteve serbe ka konfirmuar pjesëmarrjen, një pjesë tjetër e spektrit politik serb përkrah në një formë zgjedhjet, por heziton të përcaktohet.

Rangjell Nojkiq, kryetar i Lëvizjes së Rezistencës Serbe për Kosovën, mban rezerva në lidhje me definimin e përgjegjësive të komunave të reja, ku serbët përbëjnë shumicën.

“Është shumë e rëndësishme që në asnjë mënyrë nuk duhet lejuar të formohen vetëm komuna formale, kurse në praktikë ato të mos kenë kuptim dhe të mos u ofrojnë asgjë serbëve për mbrojtjen e interesave të tyre”, thotë Nojkiq.

Përderisa te komuniteti serb vazhdojnë dilemat rreth pjesëmarrjes apo bojkotit të zgjedhjeve të ardhshme lokale, Qeveria e Serbisë vazhdon me presionet mbi serbët për bojkotimin e zgjedhjeve.

Këtë javë, ministri në Qeverinë e Serbisë për Kosovën, Goran Bogdanoviq, gjatë qëndrimit në Leposaviq, ua ka tërhequr vërejtjen serbëve se nëse marrin pjesë në zgjedhjet e Kosovës dhe fitojnë funksione në kuadër të institucioneve, do t’i humbin funksionet që ushtrojnë në kuadër të strukturave paralele, që Serbia ka ngritur në Kosovë.

“Nuk mund të lejojmë që njerëzit të kenë dy punëdhënës dhe të marrin nga dy paga dhe mendoj se kjo është shumë e qartë”, ka thënë Bogdanoviq, sipas të cilit, për serbët e Kosovës duhet të jetë e qartë se Beogradi vlerëson se nuk ka kushte që ata të marrin pjesë në zgjedhjet lokale në Kosovë.

Sidoqoftë, janë 21 subjekte politike serbe që janë paraqitur për pjesëmarrje në zgjedhjet lokale. Interesim për zgjedhje është vërejtur edhe në komunat e reja, si Graçanicë, Ranilluk e Kllokot.

Ndërkaq, një interesim krejtësisht i vogël i serbëve për zgjedhje vërehet në pjesën veriore të Kosovës, ku ka një përqendrim më të fuqishëm të strukturave paralele të Serbisë, të cilat nuk i njohin institucionet e Republikës së Kosovës.

Radio Europa e Lirë

[DYDRINAS]

Kosovë: Shpërthim në një familje serbe në komunën e Gjilanit

Besim Abazi

Zëri i Amerikës,Prishtinë
11-10-2009


Policia në Kosovë bëri të ditur se ka ndodhur një shpërthim në një familjeje serbe në lindje të vendit, por pa pasoja në njerëz.

Shpërthimi i cili ka lënë pas vetes vetëm dëme materiale, ka ndodhur në fshatin Cërnicë të komunës së Gjilanit, në shtëpinë e Milorad Todoroviçit, zyrtar i Partisë Demokratike të Serbisë.

Zoti Todoroviç, ishte në një periudhë zyrtar i lartë në Ministrinë e kthimit në qeverinë e Kosovës e më pastaj këshilltar i ish ministrit serb për Kosovën Sllobodan Samarxhiç.

Fshati Cërnicë është i banuar me popullatë të përzier. Policia tha se është duke bërë hetime intensive, por është herët të thuhet për autorët apo motivet e mundshmej.

Zyrtarë të qeverisë serbe thanë ndërkaq se ky shpërthim është dëshmi e pafuqisë së institucioneve të Kosovës si dhe policisë dhe paqeruajtëseve ndërkombëtarë, për të ofruar siguri për të gjithë qytetarët e Kosovës.




P.S.

Sic duket, sherbimi sekret serb është shumë aktiv kohët e fundit në trekëndëshin Gjilan-Preshevë dhe Kumanovë.

[beni33]

disa shqiptar e nde po shohin endraa se beogradi dote ndryshoj qendrimin fashist ndaj kosoves disa ende endrrojn per vllazrim bashkim po harrojn se bashkjetesa me serb ka vdek edhe uroj qe kurr mos te vjen ajo dit