Dy vajzat e mitura nga Peja nuk kanë dashur të kthehen në Serbi, për të jetuar me nënën e tyre. Ajo janë të vendosura që të jetojnë në Pejë me babanë e tyre, përkundër një vendimi të Gjykatës së Suboticës që ato të jetojnë me nënën. Ato kanë tentuar t’i dërgojnë me dhunë. Ka reaguar Albin Kurti dhe KMDLNJ-ja.
Nga Express më 08.10.2009 në ora 8:24
Përpjekja për t`iu përgjigjur Ministrisë së Drejtësisë së Serbisë nga zyrtarë të lartë të Ministrisë së Drejtësisë së Kosovës ka dështuar, pasi që dy vajzat nga Peja kanë refuzuar që ato të dërgohen në Serbi për të jetuar me nënën e tyre.
Ministria e Drejtësisë e Kosovës, të mërkurën ka tentuar dhunshëm t’ia dërgojë nënës së tyre në Serbi, dy motrat A. K.(13) dhe D .K.(11). Ato të premten e kaluar janë marrë në Pejë, ku po jetonin me babën e tyre, Nami Kahrimani, nga punëtorët e Ministrisë së Drejtësisë, në asistim të policisë së Pejës dhe të punëtorit të Qendrës për Punë Sociale të Pejës.
Të dy vajzat e mitura me dëshirë kanë jetuar qe një vit me babanë e tyre në Pejë, përkundër vendimit të para dy viteve të Gjykatës së Suboticës së Serbisë, e cila pas shkurorëzimit të prindërve, Nami Kahrimani dhe Zuma Hajdarpasic, që jetonin në atë qytet, ka vendosur që vajzat të mbesin me nënën, edhe pse ato edhe atje kanë kundërshtuar që të jetojnë me nënën e tyre.
Dy motrat që pesë ditë kanë jetuar në në “SOS Kinder Dorf” në Prishtinë, ku prej aty të mërkurën, dy zyrtarë i kanë nisur ato që t’i kthejnë në Serbi.
Si dy vjet më parë, gjatë procesit gjyqësor, vajzat kanë kundërshtuar kthimin në Serbi dhe tërë kohën e udhëtimit në makinë ato kanë qarë dhe kanë bërtitur që të mos i kthejnë në Serbi.
Në kufirin mes Kosovës dhe Serbisë, të dy zyrtarët që kanë dashur t’i kthejnë ato në Serbi, për shkak të presionit janë detyruar që t’i kthejnë vajzat sërish në Prishtinë.
Të dy vajat e mitura janë kthyer sërish në “SOS Kinder Dorf” në Prishtinë, deri në një vendim të organeve kompetente.
“Tash për vajzat do të vendosë gjykata kompetente dhe Qendra Sociale”, ka thënë Ehat Miftaraj, udhëheqës i Divizionit për Bashkëpunim Juridik Ndërkombëtar në Ministrinë e Drejtësisë.
Zyrtarë të Këshillit për Mbrojtjen e të Drejtave dhe Lirive të Njeriut, vendimin për dërgimin e dy vajzave nga Peja për në Serbi, e ka vlerësuar si shkelje të të drejtave të njeriut.
Behxhet Shala ka thënë për Express se është vendimi i vajzave nëse ato dëshirojnë të jetojnë në Kosovë me babanë e tyre, apo dëshirojnë të kthehen në Serbi dhe të vazhdojnë jetën me nënën e tyre.
“Nëse ato dëshirojnë të jetojnë këtu, është vendim i tyre dhe askush nuk mund t’i dërgojë me dhunë në një vend ku ato nuk dëshirojnë të jetojnë. S`ka asnjë dyshim se në këtë rast janë shkelur të drejtat e njeriut”, thotë Shala.
Për çudi, për këtë rast ka reaguar edhe lideri i Lëvizjes Vetëvendosje, Albin Kurti.
Kurti ka kritikuar Qeverinë e Kosovës për veprimin e turpshëm dhe eklatant, siç thotë ai, përpjekjen e autoriteteve kosovare për kthimin e dy vajzave nga Peja në Serbi, te nëna e tyre, përkundër vullnetit të vajzave.
Albin Kurti ka vlerësuar se shteti i Kosovës duhet të jetë në shërbim të qytetarëve të saj për të mirën e tyre.
“Me dërgimin e këtyre dy vajzave për në Serbi, përkundër vullnetit të tyre dhe të prindit të tyre, u shënua edhe një rast tjetër eklatant ku u dëshmua se shteti i Kosovës nuk është fare shtet”, vlerëson ai.
Veprimi i autoriteteve të Kosovës ndaj kërkesës së Serbisë, sipas Albin Kurtit, është alarmuese për shoqërinë tonë.
“Kjo është e padrejtë, e turpshme dhe aq e dëmshme, por fatmirësisht këto dy vajza janë kthyer në Prishtinë. Kjo u arrit si rezultat i klithjeve dhe vendosmërisë së tyre që të mos shkojnë në Serbi, përkundër zyrtarëve kosovarë që po e kryenin punën e Serbisë në Kosovë”, ka thënë ai.
Përgjigju Duke Cituar
Postuar më parë nga Qyfyre
Krijoni Kontakt