Ajo, vetëm ajo!

[KUJTIM CAMI]

Faleminderit Mondi per kenaqesine qe na jep me keto poezi kaq te bukura. Me sinqeritet mbetesh nga me te preferuarit e mi.

[mondishall]

Kenaqesia eshte imja i dashur Kujtim qe ndjehesh mire ketu ne faqen time. Te falenderoj dhe pershendes...

Sikur...

Sikur pak nga shikimi im të merrje
Do shikoje verbimin tim për ty
Ashtu e verbër do zhyteshe qiejve
Dhe mua pa gabuar do më gjeje aty.

Sikur pak nga ndjesia ime të ndjeje
Si llavë vullkani do derdheshe mbi mua
Vullkanit të shpirtit tënd do më ktheje
Të digjeshim lumturisht nga epshi i pashuar.

Sikur..
Vazhdojmë më mirë pa 'sikur'
A s'është më mirë kështu,
Të mbetet diçka e paditur?

[mondishall]

Buzët e puthjes

Ti fle
Sytë tërheqin mbi vete çarçaf qerpikësh
Poshtë tij shikimin shndrojnë në ëndërr
Për ta celur në gonxhe buzësh puthjen.

Ti zgjohesh
Buzët e puthjes kërkon gjithandej
Mos i kërko e dashur
Natës tjetër dyfish borxhin do ta kthej.

[mondishall]

Nuk di më tepër çdo

Nuk dua të të bind për dashurinë time
Fillimin e këtij çasti e quaj dobësi
Vazhdimin e quaj përpjekje anemike
Fundin e fituar, një gënjeshtër pa bisht.

Kur nuk të bind aspak ky shpirt i dashuruar
Ç'të duhen ato fjalë romancash poetike?
Unë di që dashurisë si skllav i jam nënshtruar
Po dhe si mbret i vura kurorë mbretërie.

Nuk di më tepër çdo, nga mbreti dhe nga skllavi
Më tepër dashuria s'do ishte dashuri
Nëse ti je një Evë, pranoj të jem Adami
Veç lojra mollësh s'dua, siç mund të duash ti.

[mondishall]

Mëkati i mëkatit të mëkatit

E çuditshme qenka, vërtet
Mëkatet u falkan me rrëfim
Mëkatari i penduar flet
Falësi na qenka, një prift!

Ai prift që dikur ka mëkatuar
Më besoni, jam i sigurt' për këtë
Kokëulur thellë në shpirt i penduar
Ka premtuar se mëkate s'do bëj' më.

Fli tani i qetë edhe ti
Se të fali sot ky prift dikur i falur
Dhe në bëfshi që të dy mëkat të ri
Mjafton prapë të rrëfeheni zemërhapur.

E çuditshme qenka, vërtet
Na u falka dhe mëkati i mëkatit
Kurse Eva dhe Adami në Eden
U dëbuan se kafshuan mollën e gjarprit!

[mondishall]

Sikur mos ishe Ti, ajo që je

Sikur mos ishe Ti, ajo që je
Sikur të jesh Ti, ajo që s'ishe
Sinqerisht, e dashur, po të them
Dashuria në shum' kopshte do të mbillej.

Nuk them se jam i moralshëm
Sa e pamoralshme kjo fjalë më duket
E pranoj që ndjej gjithanshëm
Siç ndjej në aromë gjithë lulet.

E pranoj që shikoj gjithandej
Ku e bukura më shikon gjithashtu
Jam i tëri mbushur rreze si një diell
Por burimi më buron vetëm për Ty.

Nuk them se jam i pamëkatshëm
Sa absurde më duket kjo fjalë
Ti kastile më largohesh gjumit natën
Dhe një tjetër më sjell ëndrrës për ta parë.

Të betohem për kët' qiell e për kët' dhe
Që me fjalë dhe në ëndërr të tradhëtoj
Ah, sikur mos ishe Ti ajo që je
S'do më kishe burrë të ndershëm dhe dashnor!

[mondishall]

Dhe tha Zoti ...

Shtatë sekondat biblike të dashurisë

E dini pse besoj një nga çuditë e biblës
Ku bota e jonë, në shtatë ditë u krijua?
Sepse provova vetë, në shtatë sekonda të ditës
Si bota e dashurisë, u lind dhe rrit tek mua.
-1-
Ishte sekonda e parë, kur zëri i shpirtit tha
-Shiko Mondi një vajzë, mes vajzave të tjera.
Vërtet, kur hodha sytë, shikimi im u ndal
Tek vajza syjeshiltë me flokët kaçurela.
-2-
Sekonda e dytë ishte, kur shpirti foli prapë
-Do ndjesh një trak në zemër, që kurrë s'e ke ndjerë
Vërtet, ashtu më ndodhi dhe ishte hera e parë
Ku gjoksi me gufonte, si kurrë ndonjëherë.
-3-
-Tani përmbaje veten, më tha i treti zë
Tregoju i përmbajtur, shikoje pa të parë
Se dhe ajo si ty, po bën të njëjtën gjë
Për të vazhduar ndryshe, sekondës së katërt..
-4-
E katërta sekondë më solli tjetër fjalë
T'i flisja jo me gojë, por me sytë e mi
Si mund ta dijë kët' gjuhë, e panjohura vajzë?
Por çudia ndodhi, prandaj është çudi.
-5-
Dhe vazhdoi çudia sekondës së pestë
Kur zëri më tha, të ecja drejt saj
Një çast u ngurosa, si qënie pa jetë
Në pritje të vinte, sekonda e gjasht'.
-6-
-Mos e humb toruan, edhe pak ka mbetur
Të kesh prane atë, që për ty ka lindur
Tani foli ti, mjaft qëndrove heshtur
Veç me fjalë shpirti, në do për ta bindur.
-7-
Ooh sekonda e shtatë, e shtata sekondë
Gjithë rrezet e diellit, ranë përmbi mua
-Kjo është dashuria, zëri i shtatë më thotë
Kjo çudi magjike, nga Zoti krijuar.

[mondishall]

Dashuria është dhe arti si të xhvishesh.

Mos më prit, të kam thënë dhe më parë
Mos më prit në krevat e lakuriqtë
Pritmë mua të fillojmë dalngadalë
Pritmë mua ta zbuloj atë enigmë.

Mos kujto se ta them për kompliment
Mos kujto se bëj shaka pas kaq vitesh
Dashuria sa më ngop, uri më sjell
Dashuria është dhe arti si të xhvishesh.

Më tërbon kur zbulohesh para meje
Më tërbon kur më bën të paduruar
Oh, arrite më në fund në veshje Eve
Ajo gjethe që ka mbetur është për mua.

[mondishall]

Pa jetën e dashuruar...

Për hatër të asgjëje tjetër nuk ndahem prej teje
Prej teje nuk ndahem, as për hatër të jetës sime
Ç'kuptim do kisha unë, pa dashurinë e një jete
Pa jetën e dashuruar, që vetëm ti shpirtit ma linde?

Mos m'u mërzit o Diell, që parësor nuk je
Nga ty një gjë kuptova, sa ndjeva dashurinë
Më shumë se trup i zjarrtë vërtitur nëpër qiell
Ti linde shpirtit tim dhe natës i dhe dritë.

Më fal o qielli im, që ajrin e jetës më jep
Më fal që para teje, një qiell tjetër preferoj
Aty, vetëm aty, shpirti im frymën e gjen
Aty, vetëm aty, gjen krahë të fluturoj.

Të lutem Toka ime, mos më mbaj mëri
E di që unë pa ty, s'do isha ky që jam
Po a jetohet jeta, moj Tokë, pa dashuri
Pa dashurinë time, që gjallë dhe ty të mban?

Për hatër të asgjëje tjetër nuk ndahem prej teje
Dashuria ime!

Selanik, nëntor 2011

[mondishall]

Nuk ka largësi mes shpirtrash të dashuruar

Dashurinë do e gjeja dhe përtej pafundësisë
Shpejtësia e dritës s'do më duhej fare
Me tjetër formulë do udhëtoja gjithësisë
Me atë formulë ku largësia nuk matet.

Nuk ka largësi mes shpirtrash të dashuruar
Shpirtrat largësinë s'e njohin kursesi
Sinqerisht ju them, sepse e kam provuar
Kur trupash munguar, dashuroja shpirtërisht.