Ajo, vetëm ajo!

[mondishall]

Na la një dashuri...

Mos luaj aman, rolin e viktimës
Kur mire e di që unë, nuk jam në rol të vrasësit
S'të erdha si vampir, që shfaqet errësirës
Por si Adam naiv, ndaj mollës së mëkatit.

Të dy jemi viktima dhe mëkatarë bashkë
Dënuar dhe të falur, të falur të dënuar
Nuk ka më rëndësi, më le apo të lashë
Na la një dashuri, që mbeti pa filluar.

[mondishall]

Planeti i dashurisë sime

E di që do të t'pres, edhe përtej ksaj jete
Ashtu si para saj, e di që të kam pritur
Mes dy pritjesh të mia, si shtojzavalle erdhe
Më bëre të jetoj, magjinë e paditur.

E di që do të t'pres, përtej kësaj natyre
Ku stinët s'kanë rradhë dhe viti rradhë s'ka
Ku nga flokët e borës, do mbijnë miliona lule
Dhe unë me to do t'thurr, kurorën e kristalt'.

E di që do të t'pres, përtej çdo yllësie
Aty ku universi, nga grimcë e Zotit lind
Ku diejtë do ndriçojnë, planete dashurie
Ku emrin tënd do marë, edhe planeti im.

[mondishall]

Çdo herë si hera e parë

Të shoh me shikim të panjohur
Të prek me ndjenjë të paprekur
Të xhvesh më shumë se i ndrojtur
Mahnitem zbulimit të gjetur.

Të puth si pa e ditur puthjen
Majsisët t'i thith si naiv
I etur për më poshtë ngutem
Mes shtegut ku rrjedh një burim.

I dehur nga kjo lojë e mosditjes
Pas mijra lojrave tona
Bëhem padurues i pritjes
Të rihyj aty ku sa dola.

[mondishall]

Përballje fantazish

Ulur përballë, përballshëm shikimi
Asnjera palë njera-tjetrën s'e njeh
Të dyja palët fillojnë ngacmimin
Atë ngacmim, që serioziteti fsheh.

Ngacmim me sy, me buzë, me trup
Ashtu si vetëm femra, aktorshëm e di
Këmbët lëviz, të zbulojë atë fund
Shikimin mashkullor ta thithë brenda tij.

Aty është Helena, Troja është aty
Kali i Odiseut ku fshihet vallë?
Ah, në Kalë Troje shndrohen katër sy
Dhe nisin kështu betejën e zjarrtë.

Humbës asnjë, të gjithë fitonjës
Troja digjet dhe ringrihet sërish
Eeh, kush s'e do këtë Kalë të Trojës
Që të fut kështjellës dhe pa qënë princ.

[mondishall]

Kristal zvarovski

E nisa nga shpirti, pa ta ditur shpirtin
Të besova si Zotin, apriorisht
Kujtova pastaj të çuditshëm ritin
Ritin e prekjes së plagës me gisht.

Si hije e vjetër më ndiqte riti
Dhe unë e ndiqja si hije atë
"Akoma s'e ke vënë në plagë gishtin?"
Më fliste hija, me të hijes zë.

Me bisht ndër shalë një ditë iku hija
Bashkë me të dhe riti i saj
Tek ty e dashur ka mbet' virgjëria
Kristal zvarovski mbi vellon e bardhë.

[mondishall]

Pija ujë tek burimi

Pija ujë tek burimi
S'ishte ujë, po ishe Ti
Para syve pasqyrimi
Prapa syve një hyjni.

Etja mbeti e pashuar
Ç'ishte kjo pangopësi?
Para syve pasqyruar
Prapa syve një hyjni.

Do pres natën sa të bjerë
Nga uji të dalësh Ti
Para syve trupëzuar
Prapa syve yllësi.

[mondishall]

Me të katërta...

Edhe Ty me sy të kam xhveshur
Dhe Ty tjetra të kam parë lakuriq
Ty më tej në imazh të kam prekur
Me të katërtën kam mbaru në ëndërrim.

Më pas përsëri nga e para
Nga e para, veç me një ndryshim
Vetëm xhveshje me sy tek e katërta
Me të treja për tri netë në ëndërrim.

Më pas, eeh, më pas me asnjë
Me të katërta dhe në fjalë skuqaman
Nam me sy e me ëndrra unë bëj
Dhe në vargje që guxoj mbase le nam.

[mondishall]

Aroma e trupit tënd

Sot e dashur mos u parfumos
Të dua me aromën e dashuris'
E vetmja aromë që s'më ngop
Sado me hund' e buzë që ta thith.

Çfarë lule mbin në atë sqetull
Fshehur si luginës së një mali?
Çfarë pelini më josh në atë vetull
Që në buzë më ëmbëlson si pikë mjalti?

Çfarë gonxhe fshehin ato buzë?
Oh sa dehje më shkaktojnë kur i prek!
Trupit tënd si lëndinës shtrihem unë
Cilën lule s'e provoj e nuk më deh?

[mondishall]

Partneri tënd i vetëm

Mos më beso, e dashur, asnjëherë
Asnjëherë mos ndalo së dyshuari
Jam dyMondshi i pandashëm në jetë
Me vetveten shpesh i ngatëruari.

Po ti mos u mërzit për çka të them
Ngatërimet lemi mua t'i çngatëroj
Më pëlqen, besim me mosbesim të kesh
Më pëlqen, të kesh besim dhe të dyshosh.

Se në mes të kësaj loje xhelozie
Si një balerinë kërcyer majë gishtash
Ti shfaq virgjëri t'pafundme dashurie
Që më bëjn' partner të vetëm virgjërirash.

[mondishall]

Nuk të pyes, sa e ndjen veten grua

Nuk të pyes, sa e ndjen veten grua
Jo se kam frikë nga e imja burrëri
Për ty veprën time, akoma s'kam mbaruar
Dhe me sa duket s'do ketë kurrë mbarim.

Mos e arritsha këtë çast pyetës
Sepse më pëlqen kështu të të ndjej
Si bëhesh grua e re dhe e vjetër
Dhe mes të dyjave femrën time gjej.