Ajo, vetëm ajo!

[mondishall]

Ç'të them më shumë

Nuk mund të ndodhte, s'mund të ndodhte vërtet
E njëjta dashuri të ndahej në dy
A mundet në dy pjesë të ndahet një qiell
A mundet në dy qiej të ndritë i njëjti yll?

Megjithatë besova, ashtu siç besoj unë
Që në të njëjtin qiell dy dashuri do gjeja
Siç ndodh të shfaqet njera ëndrrës nëpër gjumë
Siç është aq reale në çast të zgjimit tjetra.

Kështu u nisa qiellit me të ëndrrës krahë
Zgjimin e harrova në imazhin e gjumit
Ylli i shfaqur natës si kometë u shfaq
Dhe si një kometë hapësirës humbi.

Ç'të them më shumë, më shumë s'kam ç'them
As Zoti vetë s'kërkon më shumë hesap
Krahët Ai m'i dha të fluturoja në qiell
Dhe tokës t'i kthehem me dashurin' e par'.

[mondishall]

Vetapologji

Në s'di të notoj(sh), nuk është faji i detit
I qiellit faji s'është, në s'di të fluturoj(sh)
As qielli e as toka, nuk kanë faj për peshqit
As deti nuk ka faj, që peshqit s'janë zogj.

Nuk është faji im për dashurinë tënde
Për dashurinë time, as faji tënd nuk është
Mos vallë qiellit kërkova(e) atë që tokës s'gjendej
Me krahët e munguar, që ëndrra më(të) kish dhënë?

Në s'di të këndoj(sh), nuk është i pianos faji
I bojrave s'është faji, në s'di të vizatoj(sh)
Në s'di që të ngrohem(sh), nuk është faji i zjarrit
As faji i zjarrit s'është, që drutë s'djeg njëlloj.

Nuk është faji tënd për dashurinë time
Për dashurinë tënde, as unë nuk kam faj
Mos vallë nga vetja desha(e) atë që vetja s'ishte
Apo s'desha(e) atë, që vetja fshehur mban?

[Agim Doçi]

Mondishall urime!!!!!!!!!!

ESHTE MJAFT SAKTE DHE MUND TE DEKLAROJ QE JE PRANE TE MADHIT KIPLING!

[mondishall]

Ju pershendes i dashur Agim me...

Unit

Kur çastin e ndjenjës logjikës ja vesh
Dhe vetes i thua se je dashuruar.
Kur trupin në shtrat me tjetrën e ke
Dhe çastin me tjetër shijuar
Gjej veten e Unit dyzuar!

Kur vuan për çastin më tej se çasti
Dhe prapë më tej atë çast ëndërron.
Kur Zotit i lutesh të të falë mëkatin
Dhe prapë me mëkatin mëkaton
Zgjo ëngjëllin në shpirtin demon!

[mondishall]

Epsh dashurie

Nga qielli i shpirtit bie shi dashurie
Deri në mosqenie të gjithin më lag
Nga shpirti i qiellit një diell po bie
Më shkrin të tërin, më kthen në llavë.

Nga nata e ëndrrës bien yje ekstaze
Deri në mosqënie të gjithin më tretin.
Nga ëndrra e natës trupi i një vashe
Si krater vullkani, shpërthen mbi mua epshin.

[mondishall]

Shtrëngatë dashurie

Si thua, e dashur, si thua
Tërbohemi sot si kjo kohë
Me njeri-tjetrin bashkuar
Shtrëngatë dashurie krijojmë?

Ç’po ndodh, e dashur, ç’po ndodh?
Cikloni po vjen, më përpin
Më merr, më thith, më shtrëngon
Ciklon më kthen mes tij.

Çfarë do, e dashur, çfarë do
T’i them shtrëngatës mos ndalë?
Shtrëngata s’ka fjalë, gjëmon
Tash jemi të dy një shtrëngatë.

[mondishall]

Ne ëndërrojmë të pajetuarën

Mos përfito, të lutem mos përfito, nga dobësia ime ndjesore!
Ajo i flet shpirtit me gjuhën e shpirtit, që veç shpirti e di
Ne jetojmë padrejtësisht, vërtet padrejtësisht, këtë botë mizore
Që më parë se ne, oh, pse më parë se ne, mosqënies sonë ju ngjit.

Mos luaj, të lutem, oh mos luaj, me ëndrrat e mia!
Ato veç për mua janë krijuar, pyeti në s’beson, që të besosh
Ne ëndërrojmë të pajetuarën, që desh të na jetësonte Perëndia
Por as ne, as Perëndia vetë, oh pse as vetë Ajo, nuk mundi dot!

Mos kërko, të lutem mos kërko, atë që as kërkimi nuk e di!
Botës sonë, e jona thashë, haha, e jona kurrë ajo s’ka qënë
Gjej nëse mundesh, a mundesh vallë, një të dytë në gjithësi
Uroj mos e gjesh, oh sa uroj, sepse mua për së dyti do më çmëndë!

[mondishall]

Më zgjo!

Më zgjo, nëse më do, nga gjumi i përhumbur
Ku shpirti s’ka qetësi e vetëm trupi fle!
Shpëtomë, nëse më do, nga kjo sirenë e bukur
Që ka fytyrën tënde, por Ti ajo nuk je!

Më zgjo, nëse më do, nga ëndrra mëkatare
Ku mollën e një Eve kafshoj me kaq uri!
Shpëtomë, nëse më do, nga kjo krijes’ parajse
Që ka fytyrën tënde, por jo, ajo s’je Ti!

[mondishall]

Vetëm Unë dhe Ti

Shfaqma syrin tënd në pikën e vesës
Të shikoj lotimin e shpirtit që vuan
Shtoma drithërimën në rrahjet e zemrës
Të ndjej qënien tënde, që s’rron dot pa mua.

Hidh shikimin tënd me syrin e Hënës
Kodin e të cilit vetëm une e di
Dërgo zërin tënd me notat e këngës
Që ta mbaj në buzë, çka këndoj në shpirt.

Shfaqmu e paturpshme, pa veshjen e Evës
T’ja kaloj Adamit në Edenin tim
A s’ja kam kaluar, që pa lindur jetës
Kur veç Zotit ishim, vetëm Unë dhe Ti?

[mondishall]

Kjo do të thotë...

Kur kërkon ëndrrën ta prekësh
Veç në gjumë, jo në zgjim
Kur me mua do të ecësh
Në imazhin pambarim

Kjo do të thotë...

Kur kërkon të shfaqësh ndjenjën
Pa e prekur ndjenjën time
Kur e fsheh rrahjen e zemrës
Zhytur veç në ëndërrime

Kjo do të thotë...

Kur në zgjim ke frikë vetveten
Dhe vetvetja frikë të ka
Kur në ëndërr do të kthehesh
Të më prekësh larg e larg

Kjo do të thotë, që për ty s’jam.