Ajo, vetëm ajo!

[mondishall]

Magjia e magjisë

Dhe pse nuk të shprehem
Nuk të bëj kompliment
Nga pamja jote dehem
Kur rri dhe kur ec.

Kur rri më magjeps
Si hyjneshë bukurie
O Zot, kur buzëqesh
Ndizem e shkrihem.

Kur ec më tërbon
Si kalë të hasdisur
Ç’më bëre, o Zot
Të mbaroj, pa nisur.

Kur rri dhe kur ec
Kur ec dhe kur rri
Për mua ti je
E magjisë, magji.

[mondishall]

Dëshira që vuaj

Të preka, të ndjeva
Nga ëndrra më erdhe
Mes ëndrrës mbeta
Në zgjime mëngjesesh.

Të ishe imazh
Reale të ishe?
Unë prapë të pash'
Në gjumë e zgjime.

Realja e fjetur
Endrra e zgjuar
E dashur ke mbetur
Dëshira që vuaj.

[mondishall]

Puhiza-ciklon

Puhiza e erës
Më ndali në buzë
La shijen e ndjenjës
Të femrës që puth.

Pastaj u përhap
Në gushë e gjoks
Oh, ç'zbriti në bark
Më tej ku s'duroj!

Ku iku puhiza
Me mua ç'po ndodh?
Në botë drithërimash
Puhiza-ciklon.

[mondishall]

Endrrës rinore

Kur nata shtrihet
Në trupin e tokës
Nga gjumi ngrihet
Endërrimi joshës.

Më vjen pa trokitur
Pa ftuar më hyn
Më sjell papritur
Nga qielli një yll.

Largohet nata
Nga drita yjore
Më vjen shtojzovallja
E ëndrrës rinore.

Unë natës i them
“Të lutem mos ik
I skuqur jam krejt
Ndaj skuqjen ma fshih”.

Nuk di ç’po më ndodh
Në shpirt e në trup
I zgjuar s’guxoj
S’guxoj as në gjum’.

[mondishall]

Endrra e zemëruar

Unë kurrë nuk e dija si zemërohet ëndrra
Dhe kur i zemëruar kam qenë sa herë mes saj
Ajo më qetësonte mes fjalëve të ëmbla
Dhe ikte zemërimi jashtë ëndrrës si i marrë.

Po ç'pati sot me mua një tjetër zemërim
Që ende pa filluar lumturinë ma prishi?
Unë i erdha ëndrrës si zog në fluturim
Ajo si re e vrenjtur mbi krahët e mia zbriti.

Oh, sa më lëndoi kjo ëndërr e sotme
Krahët m'i njomi me lotët e saj
Pranoj më mir' zemërimet e kësaj bote
Por jo këtë ëndërr në zemrimin e parë.

[mondishall]

Një ditë në vit të çlodhem

Nuk di kush të pret më shumë, Shen Valentin
Buzpaprekurit e kupës së dashurisë
Don Zhuanët e të zakonshmit mashtrim
Romeot e Zhulietat, e mosbërjes së flisë?

Mos vallë diku të pret, një Eva dhe Adam
Mollës së ndalueme, as farat mos ja lenë?
Se ti e vetem ti, nuk e njeh atë mëkat
Pa ç’ka se ti qëndron, afër Zotit i shenjtë.

Më thuaj aman, kush të pret , o Valentin
Ai që vrapon vitit, të arrijë ditën tënde
Ajo që gjithë vitit, përgjërohet për një dit’
Heshtur dhe kaq kohë, për një çast rrahje zemre?

Mos vallë diku të pret, plakushi merakçi
Buzët e plakës, në buzë vajze t’i kthejë
Fshehtas të kërkojë të viagrës magji
Qoftë dhe kjo magji, për të fundit herë?

Eh, o Valentin, më shumë s’po të pyes
Qenkan kaq të shumtë, adhuresit e tu
Mua mos më prit, sot kam marë lejë
Një ditë në vit të çlodhem, me të dashurën këtu.

[mondishall]

S'jam Platoni

Nuk më solli Zoti tokës
Si relike muzeumi
Që të rrish e të më shohësh
Si një ëndërr që sjell gjumi.

Nuk më bëri Zoti mashkull
Pa të bërë dhe ty femër
Nëse pak Adam kam patur
Ti nuk paske pakëz Evën?

Nuk e fsheha unë Adamin
Ti nga Eva pse u fsheve?
S'jam Platon ta mbaj mëkatin
Veç në botën e ideve.

[mondishall]

Ja ku jam

Ja ku është uj' i burimit
Shuaj etjen që ti ke
Nuk ka rregull të shijimit
Etjen gota nuk e nxe.

Ja ku është pik' e vesës
Loti im rënë mbi lule
Ra për ty e asnjë tjetër
Dhimbja tretet, por nuk shuhet.

Ja ku është udha e ecjes
Pret veç hapin tënd ta hedhësh
Jeta s'ësht' asfalt i vetes
Dashurinë s'ke ku ta mbjellësh.

Ja ku jam dhe pse s'më sheh
Në burimi dhe në vesa
Udhës ku s'kam frik' të ec
Ku s'më gjete e s'të gjeta.

[mondishall]

Me lerë të rroj me hijen

Të shoh dhe pa të parë
Të prek dhe pa të prekur
Si qiellit renë e bardhë
Si shi shpirtit të etur.

Në hijen që ti ndjek
Eshtë dritë e shpirtit tim
Ti kokën mos e kthe
Se shuhem si qiri.

Më lerë të rroj me hijen
Që trupi tënd lëshon
Dikur për mua ishe
Ajo që s'je më sot.

[mondishall]

Veç falje mos më jep

Një tufëzë të vogël
Nga flokt e tua më jep
Të më ndalojë kohën
Që ikën dhe kur vjen.

Më jep një çast shikimi
Nga sytë e tu jeshilë
Dhe në më zëntë verbimi
Të shoh veç dashurinë.

Më jep qoft dhe një tingull
Që goja flladshëm nxjerr
Kur zëri të jetë fikur
Me buzë ta vërshëllej.

Veç falje mos më jep
Më lerë gjyqit të Hadit
E meritoj pak ferr
Nga molla e mëkatit.