Ajo, vetëm ajo!

[mondishall]

O ndjenja!

O ndjenja të shpërndara
Të harlisura ndjenja!
O ndjenja shkrehamane,
Frikamane ndjenja!

Ju ndjek e s’ju arrij
Më ndiqni e s’më arrini
E prapë Unë jam Ju
E prapë Ju Unë jini.

Më çmendni e ju çmend
S’ju gjej, edhe më gjeni
S’më gjeni dhe ju gjej
Ju shkel, edhe më shkelni

Ju ngre, edhe më ngrini
S’ju le, edhe s’më lini.
O ndjenja tradhëtare
Besnike gjithashtu
O ndjenja mëkatare
S’do rroja dot pa ju!

[mondishall]

Aty, në qiellin tonë

Nga i pafundmi qiell
Me yjet e fundvitit
Një copëzë do t’sjell
Me dashurinë e shpirtit.

Në rëntë ndonjë yll
Si meteor i shkrirë
Shiko e sytë mbyll
Dhe thuaj një dëshirë.

Pastaj sytë hapi
Dhe shko në dhomën tënde
Diku fshehur tek shtrati
Dëshira do të gjendet.

Fli bashkë sot me të
Nuk është meteor
Rri ndezur për gjithnjë
Aty, në qiellin ton’.

30 dhjetor 2010

[Dar_di]

I nderuar poet, ngela duke lexuar këto vargje dhe përshtypjet e mia i mblodha si rezultat i reflektimit dhe ngacmimit që më nxitën t`i paraqes me pak fjalë. Konstruksionizmi i poezive tuaja është i një lloji magjepsës, i gjetur e frymëzuar nga motive shpirtërore, por edhe me kundrime universale, të cilat nganjëherë e bëjnë vargun tuaj enigmatik, por gjithnjë origjinal, duke qenë këmbëngulës për të kuptuar të gjitha masat që formësojnë identitetin e tyre. Vargu yt është aq i fuqishëm emocionalisht, që transmeton bukuri dhe kolorit të ngrohtë, por edhe një shpërthim, ku më shumë e ku më pak, filozofik. Si të tilla, bashkëdyzimi i filozofisë me poezinë, krijojnë një harmonizim të natyrshëm, që krijimtarinë tuaj artistike e bën mjaft enciklopedike. Vlera e tyre është tepër e madhe.

Do ta veçoja poezinë “Përtej”, të cilën e lexova disa herë, në mesin e kësaj oaze artistike, mjaft të suksesshme.

Ju përgëzoj sinqerisht!

Dar_di

[mondishall]

I nderuar poet, ngela duke lexuar këto vargje dhe përshtypjet e mia i mblodha si rezultat i reflektimit dhe ngacmimit që më nxitën t`i paraqes me pak fjalë. Konstruksionizmi i poezive tuaja është i një lloji magjepsës, i gjetur e frymëzuar nga motive shpirtërore, por edhe me kundrime universale, të cilat nganjëherë e bëjnë vargun tuaj enigmatik, por gjithnjë origjinal, duke qenë këmbëngulës për të kuptuar të gjitha masat që formësojnë identitetin e tyre. Vargu yt është aq i fuqishëm emocionalisht, që transmeton bukuri dhe kolorit të ngrohtë, por edhe një shpërthim, ku më shumë e ku më pak, filozofik. Si të tilla, bashkëdyzimi i filozofisë me poezinë, krijojnë një harmonizim të natyrshëm, që krijimtarinë tuaj artistike e bën mjaft enciklopedike. Vlera e tyre është tepër e madhe.

Do ta veçoja poezinë “Përtej”, të cilën e lexova disa herë, në mesin e kësaj oaze artistike, mjaft të suksesshme.

Ju përgëzoj sinqerisht!

Dar_di

Po e vendos kete kartoline vleresimi dhe urimi ne blogun tim. Faleminderit mik dhe me fal per borxhin krijues qe kam ndaj teje dhe cdo lexuesi, te cilin jam i sigurt qe s'do ta shlyej dot.
Gezuar festen e ndrimit te viteve, qofsh gjithmone i shendetshem dhe i suksesshem ne cdo cast te Vitit te Ri 2011.

[mondishall]

Më thuaj

Do t’jepja krahun tim
Për krahun e munguar
Të vije fluturim
Në lartësinë ku s’vuaj.

Aty ku jam veç unë
Larg tokës së molepsur
Ku lind e nuk vdes kurrë
I pastri shpirt i mbetur.

Do pres pafundësisht
Pafundësisht mos prit
Më thuaj në s’do vish
Të t’them , as unë s’vij.

[mondishall]

S'i ik un' dashurisë

Nuk thirra dashurinë
Me zërin e dashnorit
S'kërkova as magjinë
Nga shpirti i Erosit.

S'ju luta dashurisë
Me fjalë qaramani
As renda marrëzisë
Me hapa Don Zhuani.

S'i ik un' dashurisë
Me hapin e hajdutit
As fshihem ndaj ndjesisë
Që fshehur më rri trupit.

S'e pres un' dashurinë
Me dorën e lypsarit
S'i falem Perëndisë
Me shpirt të mëkatarit.

[mondishall]

Më mirë në ëndërr nate

Drejt gjumit po nis veten
Drejt vetes gjumin nis
Mes ëndrrash le të tretem
Për t’u ringjall në zgjim.

Dhe në s’do kem ringjallje
Rivdekje s’do të kem
Më mirë në ëndërr nate
Se ëndrrës nënë diell.

[mondishall]

U rinova moshës



Më hyre ndjenjës
Si uji nëntokës
U ngatrova rrjedhës
U rinova moshës.


Vetja më ngjan
Si toka e vjetër
Por ujin e nxjerr
Kristal, të freskët.


Si e vjetra tokë
Por e reja ditë
Si stinët në kohë
Që shkojnë dhe vinë.

[mondishall]

Në një dashuri

Natën me ty
Ditën me tjetër
Jeni një në dy
Apo dy më erdhët?

Me ty, dita
Me tjetrën, nata
Prapë dy ju kisha
Apo njerën e pata?

Mos ishe ti, tjetra
Mos tjetra ish', ti?
Më gjetët, ju gjeta
Në një dashuri.

[mondishall]

Moj dallgë!

Ç’më sheh moj dallgë e detit
S’jam shkëmbi përball teje
Që prek, përplas pas qejfit
Me tekat e një femre.

Dhe gryet shkëmb i gjorë
Dhe plaket para kohe
Dhe tretet si dëborë
Sikur mos ekzistonte.

Ç’të mbeti pas kësaj
Veç shkëmbit të grimcuar
Ç’u bëre kështu moj dallgë
E plakur, e vetmuar.

Mos paça atë fat
Që pati miku tënd
As femrën si ty dallgë
Që tret e zhduk një shkëmb.