Tuneli me pagesë? Flasim Mima dhe Shehu
Shekulli Online | 21/10/2009
TIRANE (UPDATE) - Përfaqësues të administratës i janë shmangur përpjekjeve të Shekullit për të marrë një reagim zyrtar lidhur me deklarimet e firmës menaxhuese turke, për tarifa pagesash që do të aplikohen pas rihapjes së Tunelit të Kalimashit.
Ndërkohë që zyrtarisht ka ende ngurrim për tu prononcuar, kanë ardhur gjatë ditës dy deklarata të ndryshme nga dy përfaqësues të mazhorancës, dy ish-zëvendësministrat Florion Mima dhe Sheferedin Shehu.
Z.Mima, i pyetur rreth lajmit të botuar dje në Shekulli, deklaroi në një emision televiziv në mëngjes, se "nuk mund të ketë pagesa për kalimin në tunel sepse kjo është një rrugë e ndërtuar me taksa". Ai këmënguli se një vendim i tillë është i pamundur.
Disa orë më vonë, ishte z.Shehu, që në linjë telefonike për Shekullin, deklaroi se "pagesat përgjatë rrugës janë një opsion i mundshëm" për shkak të kostove të mëdha të këtij aksi.
Ndërkohë firma turke në aksin rrugor ka blerë trarët dhe pajisjet elektronike për pagesat dhe është duke i montuar ato.
*************************************************
KUKËS - Tuneli i Kalimashit do të jetë me pagesë pas rihapjes. Do të jetë kompania menaxhuese turke "Savronik" që do të mbledhë paratë për automjetet që do të qarkullojnë përmes tunelit, si dhe në autostradën Morin-Kukës-Milot.
"Me rihapjen e tunelit do të fillojë edhe aplikimi i pagesave dhe për këtë do të bëhet instalimi i trarëve elektronikë", thotë për "Shekulli"-n njëri prej operatorëve të kompanisë menaxhuese. Sipas operatorit, trarët kanë ardhur, por ende nuk janë instaluar.
Ky proces së bashku me informatizimin e të gjithë kontrollit të tunelit do të kryhet gjatë periudhës që tuneli vazhdon të qëndrojë i mbyllur, ku krahas punëve ndërtimore do të realizohen edhe punimet elektronike, si vendosja e kamerave të kontrollit dhe instalimi i pajisjeve elektromekanike.
Tarifat e pagesave për kalimin e automjeteve në tunelin e Kalimashit janë përcaktuar paraprakisht. Ato do të jenë 200 lekë për veturat, 500 lekë për furgonët dhe 1000 lekë për autobusët dhe kamionët.
Ndërkohë që sistemi i pagesës do të jetë tërësisht elektronik, i ngjashëm me sistemin e pagesave për parkimin e automjeteve në aeroportin e Rinasit, ku çdo pagesë do të jetë e kontrolluar nga sistemi, kur në momentin ku do të dalë vlera e printuar e pagesës, do të bëhet e mundur hapja e traut.
Qeveria shqiptare ka lidhur një kontratë dyvjeçare me kompaninë turke "Savronik" për menaxhimin e tunelit të Kalimashit.
Në dispozicion të kësaj kompanie është akorduar një vlerë prej 3 miliardë lekësh që do të përdoret për një periudhë 2-vjeçare për menaxhimin e plotë të tunelit të Kalimashit. Ndërkohë, kompania ndërtuese "Bechtel&Enka" që nga mbrëmja e 11 tetorit vazhdon punën përgjatë 24 orëve në të dy tubat e tunelit.
Në tunelin përmes të cilit është qarkulluar para 11 tetorit po vazhdon përforcimi i strukturave me shufra çeliku dhe më pas me betonimin e sipërfaqeve anësore në gjatësinë prej rreth 1 kilometër në mesin e tunelit. Kompania "Bechtel&Enka" ka deklaruar muajin maj të vitit të ardhshëm si afatin e fundit për përfundimin e të gjitha punimeve në të dyja galeritë e tunelit të Kalimashit.
Fuoristradat, 1500 lekë për të kaluar "mbi" tunel
Mbyllja e tunelit të Kalimashit ka bërë që të gjithë udhëtarët nga Kukësi, Hasi e Kosova të drejtohen nga rruga e ashtuquajtur e vjetër, pikërisht në segmentin Morinë-Kukës-Fushë-Arrës-Pukë-Bushat-Lezhë-Tiranë apo Morinë-Kukës-Fushë-Arrës-Shpal-Rrëshen.
Por mbyllja e tunelit ka stimuluar biznesin e automjeteve tip "fuoristrada" të cilat qarkullojnë në rrugë të vështira.
Pronarë të këtyre automjeteve janë vënë në dispozicion të udhëtarëve që dëshirojnë të qarkullojnë nga Kalimashi në Thirrë përmes një rruge malore që lidh dy grykat e tunelit. Kjo rrugë është e gjatë rreth 15 kilometra dhe shtrihet deri në lartësitë mbi 1000 metër mbi nivelin e detit. Rruga është përdorur më parë për transport të lëndës drusore dhe me fillimin e punimeve në tunel është riparuar nga "Bechtel&Enka" dhe është përdorur nga personeli i kësaj kompanie për t'u lidhur me të dy anët e tunelit, kur kjo vepër nuk kishte përfunduar së shpuari nga të dy anët. Kundrejt një pagese prej 1500 lekësh, pronarët e fuoristradave u shërbejnë udhëtarëve nga Kalimashi në Thirrë dhe anasjelltas.
Por kjo rrugë paraqet plot rreziqe në qarkullim për shkak se ajo shtrihet në një terren malor dhe me një pjerrësi të madhe. Ndaj policia ka marrë urdhër që të mos lejohet qarkullimin përgjatë këtij segmenti. Por drejtuesit e këtyre mjeteve i kanë bërë sfidë policisë, ku nuk janë penguar nga askush që të qarkullojnë.
Përgjigju Duke Cituar
Postuar më parë nga SERAFIM DILO
Krijoni Kontakt