Zgjedhjet per pushtetin vendor ne Kosove mbahen ne 15 nentor 2009

[Llapi]

Institucionet presin pjesëmarrje të serbëve në zgjedhje
Kryeministri Hashim Thaçi ka shprehur bindjen se zgjedhjet lokale te 15 nëntorit do të jenë në frymën e tolerancës ndërpartiake gjë që është dëshmuar deri më tani. Kryeministri shfaqi bindjen se edhe serbet do të marrin pjesë në këto zgjedhje....

Postuar: 17:04:21 / 10.10.2009
Organizimi i zgjedhjeve lokale, të 15 nëntorit, do të jenë fer dhe në frymën e tolerancës ndërpartiake të cilën subjektet politike e kanë dëshmuar deri më tani. Kjo ishte bindja e kryeministrit Thaçi. Kryeministri i vendit tha se edhe serbët do të jenë pjesë e këtyre zgjedhjeve, me që është dëshmuar deri më tani se shumë subjekte, kandidatë të pavarur dhe iniciativa tani më janë regjistruar në KQZ.

Në mesin e 74 subjekteve të certifikuara nga Komisioni Qendror i Zgjedhjeve, janë edhe subjekte të cilat përfaqësojnë të gjitha pakicat që jetojnë në Kosovë.

Kryeministri Hashim Thaçi lavdëroi sot edhe sjelljen e gjithë spektrit politik në procesin e parë zgjedhor, që nga shpallja e pavarësisë.

Këto komente kryeministri Thaçi i ka bërë sot me rastin e vënies së gurthemelit të dy shkollave të mesme profesionale, njëra në Malishevë dhe tjetra në Skenderaj, të cilat ai i vlerësoi me standarde evropiane dhe mundësi të mirë për edukim.

Ky projekt është financuar nga Qeveria e Norvegjisë dhe Qeveria e Kosovës dhe që do të kushtojë rreth 10 milion euro.
“Duke ndërtuar shkolla profesionale ne iu japim të rinjve, të cilët shkollohen, këtu një shans më të mirë për të gjetur vende pune, dhe, në këtë mënyrë ata do të mundë të kontribuojnë për të ardhmen e Kosovës”, ka thënë me këtë rast, z. Svere Johan Kvale, Ambasador i Norvegjisë në Kosovë.

Ndërsa ministri i Arsimit Enver Hoxhaj ka thënë se cilësia e kësaj shkolle do të jetë sipas standardeve evropiane.

Në këto dy shkolla do të kenë mundësinë për nxënësit nga Malisheva dhe Skenderaj që të ndjekin shumë drejtime profilesh, të cilat kryesisht do të jenë në cilësinë e zanateve.



| s.b & RTK staff |

[Llapi]

Betejë e ashpër për ‘kokrra’

12 Tetor, 2009
Kandidatët e komunave për zgjedhjet lokale janë duke e bërë interesant procesin parazgjedhor, i cili mbetet me plot pikëpyetje. Kjo betejë vetëm sa do të marrë ritëm me nisjen zyrtare të fushatës zgjedhore brenda pak ditësh. Ndryshe nga herët e tjera, lista e kandidatëve për kryetarë komunash duket më e gjatë dhe me plot ekuacione. Në garën për kryeqytetin është një listë jo e vogël emrash. Gara ka filluar të ashpërsohet me vendosjen e panove në çdo kënd të Prishtinës.

Prishja e balancave
Tashmë kandidatët kanë filluar të shpenzojnë bateritë e tyre për këtë proces mjaft mediatik. Por një gjendje e tillë është duke i përcjellë edhe qytetet e tjera jo më pak të rëndësishme, për të cilat në gjykimin e analistëve vlerësohen si arenë të betejave kryesore dhe madje përcaktuese të zgjedhjeve të ardhshme nacionale. Mu për këtë, këto zgjedhje bëhen më interesante, por edhe më të ashpra se ndonjëherë. Formacionet e partive paraqiten me përzgjedhjet më të mira të elementeve brenda tyre, por edhe me hyrje të reja. Për analistin Ramush Tahiri, në garën zgjedhore janë sjellë personalitete të forta. Ndërsa për analistin Behlul Beqaj, figurat e nxjerra nga partitë politike për këtë garë më tepër janë zgjedhjet e liderëve sesa të bazës partiake. Të vetëdijshëm për kontingjentin e madh të atyre që nuk i janë përgjigjur zgjedhjeve të fundit, partitë politike tash së fundi kanë filluar të bëjnë thirrje për dalje sa më masive në zgjedhje. Prishtina nuk është vetëm epiqendra ku luhet politika, por edhe sfida kryesore për të fituar çdo forcë politike. Mu për këtë, partitë politike janë duke udhëhequr një fushatë policentrike.
Analisti Tahiri këtë proces e ka skicuar si një garë tejet të fortë të përqendruar në disa nga komunat në mes të kandidatëve, pavarësisht ngjyrimeve politike. “Konsideroj se do të ketë ndryshime në këtë garë, në të cilën marrin pjesë shumë subjekte”, ka thënë, ai duke vlerësuar se kjo do të ndikojë në prishjen e balancave të forcave politike”, thotë ai.
Garë e fortë
në Prishtinë e Prizren
Në vlerësimet e Tahirit, Prishtina, Prizreni dhe Gjilani, janë arena e betejave kryesore, kur është fjala mes dy forcave politike të koalicionit aktual PDK-LDK. “Janë edhe disa komuna të tjera ku mund të hyjnë në balotazh pikërisht partnerët e koalicionit”, thotë ai. Ndryshe në Gjakovë ai si kandidatura të forta konsideron kryetarin aktual Pal Lekaj, i cili dëshiron të marrë edhe një mandat dhe nga ana tjetër Mimoza Kusari nga AKR-ja.

Kandidatët,
zgjedhje e liderëve
Po aq interesante do të jetë edhe qyteti i Suharekës, ku të gjitha partitë paraqiten me figura të lëvizjeve, ku PDK-ja do të garojë me Ramë Vatën, i cili konsiderohet si një figurë emblematike e lëvizjes dhe AAK me Blerim Kuçin. “Në këto qendra të mëdha më i shprehur mund të jetë balotazhi dhe më pas të fillojë procesi i marrëveshjeve”, tha Tahiri. Si interesante Tahiri e konsideron edhe kandidaturën e Nexhmedin Spahiut në Mitrovicë të mbështetur nga AKR-ja, aq më shumë pas tërheqjes nga kjo garë të Bajram Rexhepit nga PDK-ja. Por, jo më pak emra të spikatur dhe të dëshmuar në jetën politike, në këtë garë, vijnë nga radhët e partive tjera, të cilat presin fitore në disa komuna, duke pretenduar të përfaqësojnë kontingjentin e të pakënaqurve.
Për analistin Behlul Beqaj, perfomanca e kandidatëve është në kuadër të nivelit të perfomancës së partive që i kanë propozuar. “Ndërsa e vetmja çështje, që mund të diskutohet, ka të bëjë me faktin se janë rritur kompetencat e kryetarëve të komunave, me një mandat më të gjatë dhe në kuadër të këtyre dy elementeve mund të pritet një raport më i mirë i prefektëve të ardhshëm të komunave”, tha Beqaj. Ai thotë se kandidatët e prezantuar më tepër janë zgjedhjet e liderëve të partive sesa të bazave, duke e konsideruar këtë si një fatkeqësi. Shumica e partive në zonat më pak popullore pritet të përqendrojnë vëmendjen duke rritur rivalitetin ndaj njëra- tjetrës. I.K.

[Guri i Kuq]

KPM për “Zgjedhjet 2009”

Nga mediat kërkohet ta zbatojnë Ligjin për zgjedhjet

Në debatin “Mediat dhe zgjedhjet”, u kërkua që gjatë fushatës të mos ketë ofendime, fyerje, të mos ketë shkelje të të drejtave të njeriut, të ketë korrektësi dhe të ketë cilësi të nivelit kulturor.
Komisioni i Pavarur i Mediave organizoi debatin “Mediat dhe zgjedhjet”, ku të pranishëm ishin edhe përfaqësues të medieve në Kosovë.
Daut Demaku, nënkryetar i Këshillit të Komisionit të Pavarur për Media (KPM), pohoi se KPM ka insistuar vazhdimisht dhe insiston, që ta instalojë klimën e mirëkuptimit, të bashkëpunimit në mënyrë që t’u largohen sanksioneve dhe dënimeve ndaj medieve.
“Sanksionet dhe dënimet janë tepër të pa nevojshme dhe veprojnë e funksionalizohen atëherë kur thyhen të gjitha normat”, tha Demaku dhe ka vlerësuar se jemi se jemi para një momenti shumë serioz, para një momenti kur do të shpallet dhe do të fillojë fushata zgjedhore.
“Në Kosovë janë mbajt disa herë zgjedhje, janë mbajt zgjedhje të mira korrekte dhe janë mbajt zgjedhje pa incidente, pa probleme, por nuk kanë qenë të organizuara nga institucionet tona, nga Kosova, kanë qenë të organizuara kryesisht nga OSBE-ja dhe bashkëpunëtor të tjerë”, tha nënkryetari i KPM-së, Daut Demaku.
Ai kërkoi që gjatë fushatës të mos ketë ofendime, fyerje, të mos ketë shkelje të të drejtave të njeriut, të ketë korrektësi, të ketë cilësi të nivel kulturor në komunikimet e fushatës zgjedhore.
Ndërsa kryetarja e Komisionit Qendror Zgjedhor (KQZ), Nesrin Lushta u shpreh se janë zgjedhjet e para të cilat organizohen nga institucionet vendore dhe kujtoi se KQZ është i vetmi komision që ka për detyrë organizimin e zgjedhjeve.
“Është një sfidë e madhe për ne vendorët është hera e parë që ne vendorët po i organizojmë zgjedhjet. Jemi shumë optimist, jemi më shumë entuziazëm dhe jemi duke i respektuar ligjet, të cilat na thonë që Komisioni Qendrorë Zgjedhor është i vetmi organ, i cili ka kompetenca për përgatitjen e zgjedhjeve”, tha Lushta.
KPM gjatë këtij takimi ka prezantuar edhe një udhëzues ku u bëhet thirrje medieve që të zbatohet Ligji për zgjedhjet. Mes tjerash në udhëzim thuhet se qëllimi i këtij udhëzimi është që të sigurojë që audienca e radios dhe televizionit të jetë në gjendje të identifikojë reklamimin politik, çoftë i paguar nga një burim i jashtëm apo i dhënë pa pagesë nga subjekti transmetues, duke e dalluar atë nga çdo përmbajtje tjetër.
Po ashtu është prezantuar edhe udhëzimi për heshtjen e medieve para dhe gjatë ditës së votimit, i cili ka për qellim interpretimin e heshtjes zgjedhore.
“Asnjë person ose medium nuk transmeton ose publikon çfarëdo materiali që i takon aktiviteteve të fushatës gjatë periudhës që fillon njëzetekatër orë para hapjes së vendvotimeve dhe deri në mbylljen zyrtare të tyre”, thuhet në udhëzim.

[Guri i Kuq]

Partitë politike të gatshme për aktivitete parazgjedhore

Bota sot,
13.10.209

Në prag të fushatës parazgjedhore në Kosovë.
----
Subjektet politike në Kosovë vazhduan aktivitetet parazgjedhore. Kështu, LDK-ja njoftoi se do të fillojë fushatën në orët e para të datës 15 tetor. Ndërsa AAK-ja, tha se tashmë kanë përfunduar të gjitha konsultimet me qytetarë dhe e ka të gatshëm programin zgjedhor.

LDK ka finalizuar agjendën për fushatën zgjedhore më listën e kandidatëve për kryetarë komunash, njoftoi shefi i shtabit zgjedhor, Lutfi Haziri. Ky subjekt politik, do t’i fillojë aktivitetet, një minutë pas mesnatës ndërmjet 14 dhe 15 tetorit. Sipas Hazirit LDK-ja ka respektuar të gjitha rregullat ligjore të kësaj fushate. Motoja e LDK-së do të jetë “Një qëllim dhe një vizion” .

“Ky është afati ligjor të cilin ne në mënyrë solemne me prezencën e vullnetarëve, strukturave dhe autoriteteve tona në ndërtesën e marrë enkas për zgjedhje, do të fillojmë fushatën “Me një qëllim, me një vizion”. Një qëllim dhe një vizion, i një partie që për 20 vjet arriti t’i realizojë premtimet, me punë, me sakrificë dhe me angazhim politik. Një vizion, me kandidatët tonë të komunave dhe me listën partiake si LDK, për të filluar dhe për të fituar besimin e qytetarëve për të ndërtuar komunën”, ka theksuar Haziri.

Ndërsa kandidati i AAK-së për kryetar të Prishtinës, Besnik Tahiri tha se tashmë partia e tij ka përfunduar konsultimet me qytetarë dhe se, sipas tij, AAK-ja tashmë ka programin e gatshëm për të qeverisur me Prishtinën.

“Gjatë gjithë këtij procesi ne jemi munduar të marrim informata sa më të sakta prej tyre në mënyrë që zëri i tyre dhe sugjerimet e tyre të inkorporohen në program. Më gëzon fakti që përveç brengave dhe halleve të qytetarëve, ne kemi marrë edhe ide konkrete të cilat do të hyjnë në ofertën time programore të cilat me rastin e fitores do të jenë projekte të cilat do të ekzekutohen në Prishtinë dhe në lagjet e Prishtinës”, ka thënë Tahiri.

Të enjten fillon zyrtarisht fushata zgjedhore për zgjedhjet lokale të 15 nëntorit. Të gjitha partitë politike thonë se i kanë bërë përgatitjet e nevojshme dhe kanë premtuar se do të zhvillojnë fushatë të qetë dhe të begatshme, me qëllim që të sigurojnë rezultatet që presin.

[Llapi]

Zotohen për respekt

Partitë politike nënshkruan pasditen e së martës Kodin e Mirësjelljes, në një ceremoni solemne. Në mesnatë, ndërkaq, nisën fushatën për zgjedhjet e 15 nëntorit.

Nga Përparim Isufi më 15.10.2009 në ora 8:21
Partitë politike janë zotuar se do të respektojnë rregullat e zgjedhjeve dhe do të bëjnë fushatë korrekte dhe në respekt të kundërshtarëve.

Të ftuar nga Presidenti i Kosovës, Fatmir Sejdiu, përfaqësues të subjekteve të certifikuara për zgjedhjet e 15 nëntorit, të martën kanë nënshkruar Kodin e Mirësjelljes prapa të cilit ato marrin obligime për të treguar pjekuri politike gjatë 30 ditëve sa ato do të jenë në gjueti të votuesve.

Nënshkrimi i këtij kodi është bërë 9 orë para se zyrtarisht partitë të nisin fushatën për zgjedhjet të cilat mbahen për herë të parë në Kosovën e pavarur.

Presidenti Fatmir Sejdiu ka shfaqur besimin se zotimi publik i subjekteve politike për Kodin e Mirësjelljes do të kontribuojë për të forcuar përkushtimin e Kosovës për zgjedhje demokratike në vend. Sipas tij, me këtë akt solemn u premtohet gjithë qytetarëve të vendit se do ta promovojnë aktivisht këtë kod të mirësjelljes dhe do të vëzhgojnë zbatimin e tij.

“Ky proces zgjedhor për herë të parë do të menaxhohet nga institucionet e vendit tonë, ndërsa organizatat dhe miqtë tanë ndërkombëtarë do të kenë rolin e vet të veçantë ndihmës dhe monitorues”, ka thënë Presidenti.

Përfaqësues të korit diplomatik në Kosovë kanë apeluar për proces të qetë zgjedhor në Kosovë më 15 nëntor.

Ambasadori i SHBA’së në Kosovë, Christopher Dell u shpreh se këto zgjedhje do të jenë jetike për ecjen e mëtejme të shtetit të Kosovës, ndërkohë që u ka bërë thirrje kandidatëve në garë që të angazhohen për zgjidhjen e problemeve elementare të qytetarëve.

“Duhet të kemi parasysh se në fund të fundit këto janë zgjedhje lokale dhe ky është një rast që njerëzit të votojnë për gjërat që prekin jetën e tyre të përditshme, shkollat, rrugët, ndriçimin e rrugëve, mbledhjen e mbeturinave, krijimin e vendeve të reja të punës në nivel lokal”, ka thënë Ambasadori Dell.

I njëjti mesazh është dhënë edhe nga e Ngarkuara me Punë në Ambasadën e Suedisë në Kosovë, në emër të Presidencës së Bashkimit Europian.

“Mund t’ju siguroj të gjithëve se këto zgjedhje do të vëzhgohen me kujdes nga qendrat europiane dhe më gjerë dhe do të shërbejnë si pikë e rëndësishme e referencës për progresin aktual demokratik në Kosovë”, është shprehur Ambasadorja Ingrid Johanson.

Fryma e fushatës zgjedhore në Kosovë do të fillojë qysh në minutën e parë të ditës së enjte.

Kandidati i LDK’së për Kryetar të Prishtinës e ka bërë këtë mbrëmë në orën 00:01, duke lëshuar në terren një grup vullnetarësh nga selia e Shtabit Zgjedhor të LDK’së në Lagjen Pejton të Prishtinës. Por zyrtarisht, fushata e LDK’së fillon në orën 18 me një tubim në orët e mbrëmjes në Prishtinë.

AAK’ja hap fushatën e saj në orën 13:00, të enjten, në Pallatin e Rinisë. Derisa, AKR’ja dhe LDD’ja hapin fushatën e tyre në mesditë, në Sheshin Nëna Tereze.

[Llapi]

Edhe zyrtarisht filloi gara zgjedhore për pushtetin lokal

Filloi fushata për zgjedhjet lokale në Kosovë

Politikanët janë zotuar se do të sigurojnë zgjedhje të lira dhe të drejta. PDK dhe LDK fushatën para simpatizantëve të tyre, në mënyrë simbolike e kanë filluar vetëm një minuat pas mesnate, ndërsa hapja solemne para qytetarëve do të ndodh gjatë ditës.

Hapjes së fushatës elektorale i ka paraprirë nënshkrimi i Kodit të Mirësjelljes nga ana e përfaqësuesve të partive politike. Për 74 subjekte politike sot fillon zyrtarisht gara për zgjedhjet lokale të 15 nëntorit. Ekspertët vlerësojnë se mbarëvajtja e procesit zgjedhor është e rëndësisë historike për Kosovën, pavarësisht se bëhet fjalë për zgjedhje lokale. Dy partitë më të mëdha të vendit Partia Demokratike e Kosovës dhe Lidhja Demokratike e Kosovës, i kanë shfrytëzuar minutat e parë të kohës së paraparë për fillimin e fushatës zgjedhore në Prishtinë, ndërsa partitë tjera pritet fushatën gjatë ditës së sotme. PDK dhe LDK fushatën para simpatizantëve të tyre, në mënyrë simbolike e kanë filluar vetëm një minuat pas mesnate, ndërsa hapja solemne para qytetarëve do të ndodh gjatë ditës.

Tubimin qendror AAK e mban në Sallën e Sportit, Pallati i Rinisë dhe Sporteve në Prishtinë, në ora 13.00. Edhe koalicioni AKR dhe LDD e fillojnë fushatën së bashku në Shehsin "Nëna Terezë", në ora 13.00.

PDK e fillon fushatën e saj elektorale në Sallën e Kuqe e Pallatit të Rinisë, në ora 14.00, ndërsa në Sheshin "Nëna Tereze", në ora 18.00 mbahet koncert. Ndryshe, subjektet politike fokus kryesor në këtë garë zgjedhore kanë kryeqytetin. Për të drejtuar Prishtinën në mandatin e ardhshëm katërvjeçar nga partitë më të mëdha politike garojnë: kryetari i tanishëm Isa Mustafa, që përfaqëson LDK-në, Astrit Salihu nga PDK-ja, Besnik Tahiri, nga AAK-ja, e Vegim Gashi i AKR-së. Politikanëtjanë zotuar se do të sigurojnë zgjedhje të lira dhe të drejta. Pikërisht, kjo ka qenë edhe kërkesa e pranisë ndërkombëtare në Kosovë, përfaqësues të të cilëve i kanë konsideruar zgjedhjet lokale si një test për demokracinë, meqë zhvillohen për herë të parë në Kosovën e pavarur.

Reagimi i KQZ-së

KQZ thotë se përgatitjet rreth organizimit të zgjedhjeve të para pas pavarësisë, po zhvillohen sipas dinamikës së paraparë. Zëdhënësi Fehmi Ajvazi tha se një ekip i KQZ-së tashmë është në Slloveni për të parë si po shkon prodhimi i listave të votuesve. Do të ketë rreth 1.5 milion fletëvotime për këtë proces zgjedhor dhe natyrisht dhjetë për qind gjithmonë prodhohen më tepër”, tha Ajvazi. Gjithashtu, Ajvazi thotë se KQZ-ja aktualisht po punon në emërimin e këshillave të vendvotimeve. Ai thotë se këshilla të tillë janë formuar edhe në mjediset serbe, pavarësisht rezervave që ky komunitet ka për zgjedhjet lokale. E veçanta e zgjedhjeve të sivjetme është se ato do të zhvillohen edhe në komunat e reja, që parashihen të krijohen me planin për decentralizim. Zëdhënësi Fehmi Ajvazi shpjegon:“Zgjedhjet tashmë dihet se do të mbahen në 36 komuna të Kosovës, domethënë zgjedhjet përfshijnë të gjithë territorin e Kosovës dhe ky është një vendim i kryer”, thotë Ajvazi.

Edhe kësaj radhe, diaspora kosovare do të ketë mundësi që të votojë përmes postës. KQZ-ja ka bërë të ditur se edhe rreth 5 mijë qytetarë të verbër, do të kenë mundësinë për të votuar sipas alfabetit të Brajtit.

LDK hapi zyrtarisht fushatën zgjedhore

Mbrëmë, një minutë pas mesnate, Lidhja Demokratike e Kosovës (LDK), me moton "Një qëllim. një vizion", e çeli zyrtarisht fushatën zgjedhore për zgjedhjet lokale të 15 nëntorit. Në ceremoninë solemne, e cila u zhvillua në atmosferë festive, morën pjesë drejtues të LDK së, si edhe deputetë, ministra, zëvendësministra e aktivistë të partisë nga mbarë vendi. Në hapje të fushatës zgjedhore, Lutfi Haziri, nënkryetar i LDK së dhe shef i Shtabit Qendror Zgjedhor të partisë, përcolli mesazhin e LDK ja për zgjedhje të qeta dhe të ndershme. Njëkohësisht, ai shprehu bindjen se në këto zgjedhje do të dalë fituese partia e parë demokratike shqiptare, e cila theu akujt e sistemit njëpartiak në hapësirat shqiptare. Në këtë ceremoni u bë edhe prezentimi i kandidatit të LDK së për Kryetar të Prishtinës, Prof. Dr Isa Mustafës, i cili shpalosi para simpatizantëve të partisë objektivat kryesore të programit të tij për periudhën e ardhshme 4 vjeçare të udhëheqjes së kryeqytetit të Republikës së Kosovës. Gjatë gjithë kohës së ceremionisë, para selisë së Shtabit Qendror Zgjedhor të LDK së ishin mbledhur rreth 100 aktivistë e simpatrizantë të partisë, të cilët brohoritnin: "LDK, LDK, LDK", "Fitorja është e jona", "Isa Mustafa është fituesi", etj. Tubimi promovues i të gjitha kandidatëve të LDK së për kryetarë të komunave do të mbahet sonte, në orën 19.00, në Qendrën e Rinisë e të Sporteve në Prishtinë.

[Llapi]

Thaqi: Fitues i zgjedhje shteti dhe qytetarët


Kryeministri i Kosovës Hashim Thaçi


Me rastin e fillimit zyrtar të fushatës zgjedhore, kryeministri i Kosovës Hashim Thaçi ka uruar të gjitha subjektet politike pjesëmarrëse në këtë proces, ndërkohë që ka shprehur bindjen e thellë, se do të ketë fushatë fer, fushatë të konkurrencës së vlerave.

Ai ka theksuar se fillimi i fushatës elektorale, zgjedhjeve të para në Kosovën e pavarur ka filluar mbarë.

"Me lejoni që në emër të Qeverisë së Kosovës, t'i uroj gjithë spektrit politik të Kosovës për fillimin e mbarë të fushatës elektorale, t'i uroj gjithë spektrit politik, kandidatëve, gjithë qytetarëve, për këtë mundësi të re për zhvillimin e demokracisë së re. Ne duam të besojmë fuqishëm se do të kemi një fushatë fer, të konkurrencës së vlerave, të një përfaqësimi sa më të madh të spektrit politik, por edhe qytetarëve të Kosovës”, ka thënë ai.

Kryeministri, ka vlerësuar pjesëmarrjen e madhe të subjekteve politike në përgjithësi dhe atyre serbe në veçanti, duke thënë se është certifikim rekord i pjesëmarrjes në zgjedhje.

Thaçi ka shprehur besimin e plotë në zgjedhje të suksesshme, ndërkaq ka theksuar se fitues mbi të gjitha duhet të jetë shteti i Kosovës dhe qytetarët e saj.

Procesi zgjedhor, sipas Thaçit, nuk do të ndikojë aspak në agjendën shtetërore dhe qeveritare, përkundrazi ballafaqimi i vlerave vetëm sa do ta forcojë angazhimin për implementimin e prioriteteve tona.

[Guri i Kuq]

Koalicioni AKR-LDD, model i një qeverisje të suksesshme



Koalicioni, Lidhja Demokratike e Dardanisë dhe Aleanca Kosova e Re, të enjten kanë filluar fushatën parazgjedhore, në qendër Prishtinës para simpatizantëve të dy partive politike.
Lideri i LDD-së, Nexhat Daci, tha para qytetarëve të mbledhur në sheshin Nëna Tereze në Prishtinë, se koalicioni mes tij dhe Pacollit, do t’u sjellë komunave të Kosovës, një model qeverisje që qytetarët e Kosovës, nuk kanë pasur rastin ta shohin deri tash.

“Te ne bashkohen dy aleanca, ajo e Akademisë së Shkencave, dhe ajo e Biznesit të suksesshëm që përfaqësohet nga Behgjet Pacolli”, tha Daci.

Ndërkohë, lideri i AKR-së, Behgjet Pacolli, tha se AKR-ja dhe LDD-ja, sjellin shembullin e bashkimit, tolerancës dhe kuptimit mes rivalëve.

“Koalicioni që kemi krijuar me LDD-në, është shembulli që garanton se do ta çojmë Kosovën përpara, jo me dhunë, jo me ndarje, por të bashkuar siç jemi ne”, tha Pacolli në fjalimin e tij.

AKR-ja dhe LDD-ja, garojnë në Prishtinë me kandidatin e përbashkët që vjen nga Aleanca Kosova e Re, Vegim Gashi. Kandidati për Prishtinën nga dy këto parti, kërkoi votën e qytetarëve. “Nëse doni një qeverisje me ndryshe, një qeverisje që i duhet qytetarëve, votoni koalicionin AKR-LDD”, ka thënë Vegim Gashi.
Në ndërkohë, para qytetarëve, janë prezantuar kandidatët e këtij koalicioni për kryetarë të komunave të Kosovës. /Telegrafi/

Postuar: 14:56 / 15 Tetor 2009 | RSS

[Guri i Kuq]

Thaçi: Ne kemi kandidat që mund ta ndryshojë Prishtinën


Partia Demokratike e Kosovës ka hapur fushatën e saj zgjedhore për Prishtinën. Kryetari i PDK-së dhe njëherësh kryeministri Thaçi tha se Prishtinës i duhet udhëheqja e PDK-së, për shkak se nën udhëheqjen e PDK-së në nivel qendror Kosova ka ecur përpara ndërkaq, Prishtina ka ngecur prapa.
Partia Demokratike e Kosovës ka hapur fushatën e saj zgjedhore për Prishtinën, me premtimin se edhe kryeqendrën e Kosovës do ta shndërrojë në një qendër zhvillimi, ashtu siç e ka shndërruar gjithë Kosovën në nivel qendror.

Në konventën kryesore të mbajtur në Sallën e Kuqe të Pallatit të Rinisë, në të cilën u bë prezantimi i kandidatit për kryetar të Prishtinës, Astrit Salihu dhe kandidatëve për asamblenë e re komunale, krerët e PDK së kanë shprehur bindjen për fitore të thellë, duke theksuar se Prishtinës i duhet ndryshimi.

Kryeministri i Kosovës, njëherësh kryetar i PDK së, Hashim Thaçi përmendi të gjitha të arriturat gjatë kësaj periudhe, duke nisur nga shpallja e pavarësisë, ndërtimi i shkollave, ngritja e pagave të arsimtarëve, ndërtimi i rrugëve anekënd Kosovës, përderisa ka theksuar se për të qenë qeveria më e suksesshme, duhet të ketë partner në qeverisjen lokale.
Duke folur për kandidatin Astrit Salihun, Thaçi ka shprehur bindjen e thellë se ai i njeh më së miri problemet, nevojat dhe kërkesat e njerëzve të Prishtinës.

Ai ka premtuar përkrahjen e plotë të PDK së dhe të tijën personale për kandidatin Salihu, ndërkaq ka kërkuar mbështetjen e plotë edhe të shumicës së qytetarëve të Prishtinës.

[Guri i Kuq]

AAK-ja premton vizion të ri qeverisës


Kandidati i AAK-së, Besnik Tahiri hapi sot fushatën parazgjedhore
Aleanca për Ardhmërinë e Kosovës ka mbajtur të enjten manifestimin qendror të fushatës, me ç’rast ka shpalosur programin e saj për zgjedhjet lokale të vitit 2009.

Kryetari i AAK-së, Ramush Haradinaj ka ftuar qytetarët e Kosovës që të votojnë për partinë e tij, nëse duan ta shohin një shtet stabil. “Nuk mund të jetë shteti i Kosovës stabil me gjithë këto ngecje në krijimin e shtetit demokratik. Nuk mund të jetë shteti i Kosovës me perspektivë me gjithë këta qytetarë të papunë, të mërzitur dhe të zhgënjyer”, ka thënë Haradinaj.

Kryetarja e Forumit të Grave të AAK-së, Donika Kada-Bujupi ndërkaq, ka thënë se kjo klasë politike që tashmë po qeverisë me Kosovën duhet patjetër të ndryshojë.

“Duke pasur parasysh dështimin e kësaj klase politike, e cila në fatkeqësinë e të tjerëve erdhi në pushtet, duke dëgjuar nga ju, nga qytetarët e Kosovës për hallet dhe problemet e tyre, unë sikurse edhe ju jam e shqetësuar për të ardhmen e fëmijëve të mi dhe fëmijëve e të gjithë qytetarëve të Kosovës”, ka thënë ajo.

Votën e qytetarëve në fjalimet e tyre e kanë kërkuar edhe nënkryetari i parë i AAK-së, Blerim Shala, dhe këshilltari i Haradinajt Steve Schook.

Kandidati i AAK-së, Besnik Tahiri hapi sot fushatën parazgjedhore

Me këtë rast janë prezantuar kandidatët e AAK-së për kryetarë të komunave të Kosovës.

Ardhmërinë e Kosovës, Besnik Tahiri, hapi sot fushatën parazgjedhore duke bërë homazhe tek shtatorja e Heroit dhe Komandantit të Ushtrisë Çlirimtare të Kosovës, Zahir Pajaziti, dhe tek varri i ish Presidentit historik të Kosovës, Dr. Ibrahim Rugova.

Me këtë rast, z. Tahiri tha se, e fillon fushatën parazgjedhore me respektin me të madh për figurat kombëtare të Kosovës, të cilat dhanë çdo gjë nga vetja e tyre që ne sot të jetojmë dhe punojmë të lirë.

"Prej këtu them që shumë prishtinas nuk kemi pasur fatin që të jemi pjesëtar të Ushtrisë Çlirimtare të Kosovës. Por, me rasti e fitores sime, unë do të kujdesem që veteranët, invalidët e luftës së UÇK së dhe familjet e dëshmorëve të kenë një tretman të veçantë dhe një përkujdesje institucionale edhe nga pushteti lokal", tha Tahiri.

Po ashtu z. Tahiri, bërë homazhe edhe tek varri i ish Presidentit të Kosovës, Dr. Ibrahim Rugova, ku ndër të tjera tha se, përkulemi më respekt pranë varrit të Presidentit historik të Kosovës, Dr. Ibrahim Rugova, i cili është një nga më meritorit për atë që ne sot po e gëzojmë.

Me këtë rast, Kandidati për kryetar të Prishtinës, nga Aleanca për Ardhmërinë e Kosovës, Besnik Tahiri, tha se Prishtina, si Kryeqytet i Kosovës, duhet patjetër ta ketë një park përkujtimor, në të cilin do të përmblidhet historia jonë kombëtare.