Emisionet telivizive per Ramazan

[_Mersin_]

Ne televizionin Shijak Tv jepen cdo dite para iftarit dhe ne oren 23:30 emisione fetare per ramazanin dhe fene Islame.Apo i ndiqni?

[_Mersin_]

http://www.shekulli .com.al/2009/ 08/30/gruaja- ime-jo-patjeter- me-shami. html

Intervista / Muaji i Ramazanit për një futbollist. Rrëfimi i Erald Deliallisit. Sakrifica, stërvitja dhe marrëdhënia me shoqërinë.

Deliallisi: Futboll dhe agjërim në muajin e shenjtë të Ramazanit

Flokë me onde të gjata deri tek supet. Mban veshur bluzë të kuqe dhe pantallona treçerekëshe të bardha dhe një çantë të zezë të hedhur krahëve. Ky është personi që po e prisnim përballë xhamisë së Tabakëve.

Në momentin e parë të jep përshtypjen e një djali mendjemadh, që me vështirësi mund të arrijë të komunikojë, por sapo ulemi, na rezulton e kundërta. Sakrifica ka kosto për të. Dhe ai e bën këtë për hir të Zotit.

Në muajin e shenjtë të Ramazanit, për besimtarët e fesë myslimane, Erald Deliallisi nuk është si gjithë të tjerët. Agjërimi i tij është disi më i vështirë, por jo i papërballueshë m për futbollistin e "Teutës" së Durrësit. 27-vjeçari ka gati 12 vjet që çdo vit agjëron muajin e Ramazanit, edhe pse gjatë gjithë kësaj kohë ka ushtruar njëkohësisht sportin. Vështirësi? Normalisht që ka pasur, por këtu qëndron e bukura, thotë Eraldi.

Për këtë fakt nuk ndihet ndryshe nga pjesa tjetër e grupit. "Nuk e kam problem edhe kur orari i faljes është gjatë kohës që zhvillohet ndeshja. Në pushim falem në dhomën e zhveshjes", - thotë ai.

Ndërsa, për sa u përket marrëdhënieve me vajzat, Deliallisi është ca më i rezervuar. Jo domosdoshmërish femra e tij e jetës duhet të jetë myslimane apo me shami, mjafton që ajo ta kuptojë atë dhe t'i përshtatet.

"Të gjithë kemi të drejtën të zgjedhim, dhe unë kam menduar se duhet të bëj zgjedhjen më të përshtatshme" , - thotë ai me qetësinë e tij olimpike, të cilën nuk e trazojnë aspak edhe pyetjet me spec.

Ju jeni një besimtar mysliman që e keni të trashëguar fenë, apo e keni fituar me kalimin e viteve?

Jo, nuk e kam të trashëguar, se në periudhën e komunizmit, si çdo shqiptar, ka qenë e censuruar. Familjarët e mi kanë qenë dhe janë besimtarë, por jo praktikantë të rregullt të fesë myslimane. Unë vetë e kam marrë dhe fituar nga shoqëria, por edhe nga dëshira ime. Kemi qenë me një klub disa shokë, të cilët besonim që kur ndodhesha në gjimnaz.

Çfarë ju ka ngacmuar dhe shtyrë për të besuar?

Ndihesha mirë. Zemrat e njerëzve i ka në dorë Zoti, dikujt ia hap dhe ia mbush me besim dhe dikujt tjetër, nuk do t'ia hapë zemrën. Mosha 15-16 vjeç ka qenë ajo më vendimtarja, ku unë fillova dhe të falesha në xhami, ndërsa agjërimin në ramazan e kam mbajtur më herët. Tashmë nuk është aspak e sforcuar, gjithçka vazhdon në rutinën e përditshme.

Në moshë fare të vogël keni mbajtur ramazan, por edhe paralelisht keni luajtur futboll. Ju ka qëlluar ndonjëherë ramazani në pikun e sezonit futbollistik?

Thuajse përherë në sezon intensiv jam. Gjithmonë muaji i Ramazanit ka qëlluar në kohën kur kam për të luajtur ndeshje. Momentet më të vështira për një futbollist janë në fazën përgatitore, e cila fatmirësisht nuk më ka përkuar ndonjëherë me muajin e Ramazanit.

Kur Ramazani bie në dimër, është pak më e lehtë, tani me thënë të drejtën e kam pak të vështirë. Vapa më jep etje. Në dimër nuk është problem, pasi ora katër e gjysmë e pasdites vjen shumë shpejt.

Ramazani ka më shumë se një javë që ka nisur, e keni lënë stërvitjen këto kohë?
Joo, nuk bëhet fjalë. Sa për lodhjen, ndodh që edhe lodhem ndopak, po kjo është sakrifica, ç'të bëjmë. Kur sakrifikon njeriu ndjen edhe kënaqësi. Ramazani ka edhe disa rregulla lehtësuese, të cilat pse të mos i zbatojmë.

P.sh., kur je udhëtar, kur je i sëmurë, edhe mund ta prishësh, nuk ka ndonjë gjë të keqe. Këto janë tolerime. Ditën e ndeshjes nuk mbaj agjërim. Po kështu edhe kur kam stërvitje dy herë në ditë. Këto gjëra tolerohen nga Zoti, nuk është nevoja të bëhem unë super hero.

Trajneri juaj e di që ju mbani ramazan?

Po, ne jemi disa djem që e mbajmë agjërimin, na mblodhi një ditë para, na foli, por edhe ne ia shpjeguam dhe pjesën tonë se kjo nuk ndikon në nivelin e lojës. Unë kuptoj dhe nuk paragjykoj çdo person për ketë, është normale.

Keni kaq kohë që puna juaj është në një ekip, dhe pothuajse gjatë gjithë kësaj kohe e ke shfaqur hapur që je praktikant, je ndjerë ndonjëherë i paragjykuar?

Jo, ballafaqim direkt nuk kam pasur, se ua kemi imponuar të tjerëve respektin për ne. Unë nuk e kam problem dhe nuk më vjen turp që kur të më vijë ora e falje,s të falem edhe në dhomën e zhveshjes.

Kemi qenë grup shoqërie që rrinim bashkë, kemi pasur njëri-tjetrin dhe nuk është se jemi përzier me shoqëri tjetër dhe nuk e kemi ndjerë nevojën të integroheshim në një shoqëri tjetër. Jo se nuk na ndodh, puna na lidh që të jemi 20 veta e të bëjmë stërvitje përditë, rrinim bashkë, hamë, por jo se janë të gjithë njëlloj.

Ju si futbollist keni një regjim ditor ushqimor, a e respektoni atë?

Po, po. Kemi regjim dhe unë jam shumë korrekt ndaj atij regjimi. Në mëngjes, bukë me mjaltë e me qumësht, në drekë supë dhe në darkë diçka të lehtë. Unë nuk ha shumë, se kam hallin e peshës, duhet të ruhem edhe nga shëndeti i tepërt.

Po tani, gjatë Ramazanit, ku ushqeheni?

Në shtëpi. Ndonjëherë ne si shoqëri ftojmë njëri-tjetrin për iftar. Kjo ndodh kryesisht në ditët e pushimit.

Je dehur ndonjëherë në jetën tënde?

Jo. Nuk pi fare, as cigare e as alkool, madje as kafe. Jo vetëm kur kam hyrë në futboll, por as më parë nuk kam pirë. Nuk jam qejfli i këtyre gjërave.

E keni të vështirë me vajzat këto ditë, pasi futbollistët janë disi në qendër të vëmendjes?

Jo, aspak. Varet se si e menaxhon veten dhe se sa e vendos në qendër të vëmendjes.

Jeni i mirinformuar për fenë dhe lexoni vazhdimisht?

Po lexoj, "Kur'anin". Por edhe libra të tjerë, jo vetëm fetarë, edhe jo fetarë.

Cili është arsimi juaj?

Kam mbaruar dy shkolla të larta, Akademinë e Edukimit Fizik dhe Fakultetin e Shkencave Politike.

Ku mendon se është e ardhmja juaj, sepse futbolli dihet që përfundon në një farë moshe?

Nuk besoj se do të jetë në sport, por gjithsesi të shohim. Kam bërë shumë sakrifica për këto shkollat që kam përfunduar.

Ke dhënë ryshfet ndonjëherë për ndonjë provim?

Jo, jo, asnjëherë, nuk bëhet fjalë. Te Instituti i Edukimit Fizik, siç jemi mësuar t'i themi rëndom Akademisë, ka ndodhur që ndonjëherë më kanë ndihmuar pedagogët, pasi edhe luaja futboll dhe na njihnin. Por kurrë nuk kam dhënë ryshfet.

Keni një futbollist model që kërkon t'i ngjash?

Joo.
Në një të ardhme, kur të krijoni familje, gruaja juaj duhet të jetë me domosdoshmëri besimtare myslimane dhe e veshur me shami, apo nuk ka rëndësi për ju?

Nuk është e thënë që duhet të jetë me patjetër me shami. E rëndësishme është që të më përshtatet mua. Minimumi që do të jetë është që të më respektojë për këto që kam. Nuk ka gjëra absolute, unë nuk ia imponoj asaj fenë time, por edhe ajo mos të më imponojë mua. Secili ka të drejtën të zgjedhë. Unë nuk detyroj njeri, por kam të drejtë të përzgjedh.

Jeni i pasionuar pas skedinave, i vendosni ato?

Jo, nuk vendos. Dikur kam vendosur ndonjëherë sa për gallatë. Me njëmijë lekë të vjetra fusja 10 ndeshje. Kuptohet që nuk fitoja asnjëherë. Gjithsesi, besimtarëve myslimanë nuk u lejohen bastet, shkak ky që ka bërë të mos jem i dhënë ndonjëherë pas tyre.

E frekuentoni jetën e natës?

Jo. Me raste, kur ka ndonjë organizim. Ky është tipi im dhe ka rastisur që është plotësuar nga feja. Nuk i kam qejf këto vendet e zhurmshme.

Jeni i dashuruar momentalisht?

Unë përgjithësisht jam për një marrëdhënie serioze. Po deri më tani kam pasur sportin e shkollën. Këto gjëra vijnë edhe natyrshëm, por kam qenë i predispozuar të përfundoj këto, sepse secila do pjesën e vetën që t'i përkushtohesh.

Sikur të kisha qenë ndonjë tip aventurieri për të përfituar nga rasti, momentet nuk kanë qenë të pakta. E kanë një çik namin e keq këta futbollistët, por jo të gjithë mund t'i fusësh në një thes.

Keni qenë ndonjëherë pjesë e ekipit të Kombëtares sonë?

Jo. Kam luajtur me ekipin e Shpresës.

Cili është pozicioni juaj në fushën e blertë?

Jam mesfushor mbrojtës.

Ju vetë me kë jeni tifoz?

E ndjek futbollin në përgjithësi, por nuk është se jam shumë i fiksuar për ndeshjet. Kjo për faktin se gjithë ditën luaj vetë futboll. Atë pak kohë të lirë që kam dua ta kaloj ndryshe.

Je tip impulsiv apo keni hatërmbetje?

Jo, jo, jam krejt e kundërta. Jam shumë i qetë. Kam disa miq që shoqërohem, të tjerët i respektoj. Pastaj kur nuk gjej të njëjtin raport kundrejt meje, nuk është se i pres gjërat me thikë dhe të them: "Ik ti këtej se nuk je shoqëria ime", thjeshtë shmangem dhe ftohja kuptohet.

Nuk jam tip që flas para mendjes e ta them llafin e fundit të parin, mundohem t'i peshoj gjërat. Edhe nuk jam tip që t'i bie kokës, thjesht tregohem indiferent.

Cila është ajo gjë që të acaron më tepër?

Gënjeshtra, dyfytyrësia, hipokrizia, këto gjëra nuk i duroj dot.

Për fenë thatë se nuk e kishit traditë familjare, po futbollin?

Futbolli është edhe fati, talenti, puna. Shumë persona nga brezi im janë djegur për shembull me ketë profesion. Në fakt janë pjesa më e madhe.

Cila është ndeshja juaj më e mirë dhe ajo më e keqe që keni luajtur ndonjëherë?

Kam disa, si më specifike e bukura dhe e arrira mendoj se ka qenë vjet kur luaja me Tiranën. Mbetëm tetë vetë në lojë. Ishim 1 - 0 për Elbasanin dhe pjesën e dytë, nga 1 me 0 e kthyem në 2 me 1 për ne.

Cila është pjata juaj e preferuar?

Nga gjellët kam imam bajalldinë, gatim tipik i tiranasve.

Mjeku: Agjërimi te futbollistët? Ndikon në përqindje të vogël

Ata janë persona që duhet të jenë vazhdimisht në formë dhe të mirëstërvitur. Askush nuk do ta dijë për diçka më tej se kaq. Por për lojtarët që besojnë dhe kërkojnë të agjërojnë në këtë muaj të shenjtë, sakrifica shkon edhe më tej duke agjëruar.

Për të mësuar se si ndikon kjo tek ata lojtarë që në këto ditë respektojnë fenë e tyre, kemi kontaktuar me mjekun e Dinamos, Pertef Rusi.

Në një prononcim për SH2-shin, Rusi pohoi se, "Normalisht, ata lojtarë dalin nga rutina e përditshme, por kjo tek lojtarët ndikon në një përqindje të vogël, se një trup i stërvitur arrin ta përballojë lehtë. Ata ushqimin e marrin, por nuk e marrin si zakonisht dhe i ndryshon regjim. Jo se rrinë vazhdimisht pa u ushqyer.

Nuk mund të themi absolutisht se futbollistët që mbajnë Ramazan nuk janë në gjendje të luajnë. Të gjithë këto varen nga organizimi i gjithsecilit. Edhe në qoftë se do të ndikonte, rezultati do të ishte i papërfillshëm.