Suroi: BE dhe NATO t'i vene kushte Serbise per njohjen e Kosoves

[Val9]

Nga Express më 04.09.2009 në ora 18:43
Kryetari i Bordit të Klubit për Politikë të Jashtme, Veton Surroi ka vlerësuar se “afati për tërheqjen e trupave të NATO’s nga Kosova është shans ideal për të filluar një dialog në mes institucioneve të Kosovës, Bashkimit Europian dhe NATO’s lidhur me tërheqjen e NATO’s dhe vendosjen e rendit, integritetit territorial dhe funksionimit të tërësishëm të Kosovës”.

Këto komente ai i bëri në Slano të Kroacisë, ku po merr pjesë në konferencën e organizuar nga Këshilli Kroat i Atlantikut dhe Divizioni për Politika Publike i NATO’s.

Çështja tjetër e diskutuar në këtë konferencë ishte procesi i zgjerimit të NATO’s dhe integrimi i Ballkanit Perëndimor në këtë aleancë.

“Pengesë reale për integrimin e Ballkanit Perëndimor në NATO është Serbia, e cila duke mos njohur Kosovën dhe duke mos dashur të hyjë në NATO, bëhet pengesë edhe për shtetet tjera, e në radhë të parë Kosovën”, ka thënë Surroi.

“Çështja e hyrjes së Kosovës në NATO tanimë është një problem politik në të cilin Serbia ka gisht dhe mban peng tërë procesin. Për këtë është e nevojshme që të unifikohet politika e BE’së dhe e NATO’s ndaj Serbisë dhe të kushtëzohet integrimi i mëtutjeshëm i Serbisë me funksionimin e Kosovës dhe integrimin e saj në strukturat euroatlantike”, ka thënë Surroi.