Patriarku i Aleksandrise Hiresia e Tij Theodhori II viziton Shqiperine

[Matrix]

Kisha Orthodhokse Autoqefale e Shqipërisë pret në vizitë zyrtare dhe paqësore, Papën dhe Patriarkun e
Aleksandrisë dhe gjithë Afrikës, Fortlumturinë e Tij, Theodhorin II




Vizita historike e Papës dhe Patriarkut të Aleksandrisë, Fortlumturisë së Tij, Theodhorit II do të zhvillohet nga datat 31 tetor – 5 nëntor 2009. Kjo vizitë zyrtare merr një rëndësi të veçantë, pasi në jetën kishtare të çdo vendi, vizita të tilla mbartin një jehonë të fuqishme, për vetë karakterin e tyre të veçantë eklisiologjik dhe historik.

Patriarku i Aleksandrisë, Theodhori II në vizitën e tij zyrtare dhe paqësore do të shoqërohet nga Hirësia e Tij, Mitropoliti i Kampalës dhe Eksarku i gjithë Ugandës, Imzot Jonai, nga Hirësia e Tij, Mitropoliti i Muanzisë, Imzot Jeronimi dhe nga Hirësia e Tij, Episkopi asistent, Imzot Nikodhimi i Nitrisë.

Delegacioni zyrtar i Patriarkanës së Aleksandrisë do të pritet mëngjesin e së shtunës në Aeroportin “Nënë Tereza” nga Kryepiskopi i Tiranës, Durrësit dhe gjithë Shqipërisë, Fortlumturia e tij, Imzot Anastasi, i shoqëruar edhe nga anëtarë të Sinodit të Shenjtë, nga kleri dhe populli, besimtarë të Kishës Orthodhokse Autoqefale të Shqipërisë.

Pritja zyrtare e vizitorëve të lartë do të bëhet të njëjtën ditë, të shtunën, datë 31 tetor pranë Katedrales Orthodhokse, “Ungjillëzimi i Perëndilindëses” në Tiranë, ku do të psalet edhe dhoksologjia dhe do të shkëmbehen përshëndetjet e mirëseardhjes mes dy Primatëve. Më pas Patriarku i Aleksandrisë dhe delegacioni që e shoqëron do të vizitojnë Manastirin e shën Vlashit, ku do të takojnë stafin pedagogjik dhe studentët e Akademisë Teologjike “Ngjallja e Krishtit” si dhe mësuesit dhe nxënësit e Liceut Kishtar “Kryqi i Nderuar”.

Vizita pesëditore e Primatit të Kishës aleksandriane do të jetë e pasur me aktivitete dhe takime të shumta, nga të cilat mund të veçojmë bashkëmeshimin Patriarkal dhe Arkieratik të dy Primatëve në Katedralen Orthodhokse “Ungjillëzimi i Perëndilindëses”, të dielën, datë 1 nëntor. Paraditja e së hënës, datë 2 nëntor do t’i rezervohet takimeve zyrtare me krerët më të lartë të shtetit, me Presidentin e Republikës, z. Bamir Topi, me Kryeministrin, z. Sali Berisha, me Kryetarin e Bashkisë së Tiranës, z. Edi Rama si dhe me zyrtarë të tjerë të lartë të shtetit shqiptar.

Pasditen e së hënës, Papa dhe Patriarku i Aleksandrisë dhe i gjithë Afrikës do të takohet me personalitete të fushave të ndryshme, politikanë dhe përfaqësues diplomatikë në ambientet e Hotel “Tirana International”, ku do të organizohet një pritje zyrtare në nderim të vizitës së tij.

Ditën e martë datë 3 nëntor, Patriarku, Theodhor II do të jetë i pranishëm në aktivitetin jubilar me rastin e 10-vjetorit të funksionimit të Klinikës Orthodhokse “Ungjillëzimi” në Tiranë. Ditët në vazhdim, ai do të vizitojë edhe Mitropolinë e Korçës, kisha dhe manastire dhe institucione të ndryshme të Kishës, për të parë nga afër veprën misionare që po kryhet në Shqipëri nën udhëheqjen e frymëzuar të Kryepiskopit Anastas.

Ngjarje të tilla janë sanksionuar prej shekujsh në traditën kishtare orthodhokse dhe ato janë aq sa të rralla sa edhe të gjalla dhe madhështore për vetë simbolet dhe mesazhet që ato përcjellin. Mbas zgjedhjes dhe fronëzimit të çdo Patriarku apo Kryepiskopi, Primati të Patriarkanave apo Kishave Autoqefale anekënd botës, fillon edhe realizmi i një sërë vizitash zyrtare të quajtura “paqësore” në gjuhën kishtare. Këto vizita kryhen pranë Selive të Kishave të tjera Orthodhokse me qëllim njohjen nga afër të Krerëve të Kishave Lokale, për të ruajtur kështu lidhjen e unitetit kishtar që përbën edhe Institucionin e Kishës në tërësi.

Patriarkana e Aleksandrisë, me seli në vendin e Nilit, Egjiptin, ka një histori të lashtë dhe të rëndësishme për vetë rolin që ka luajtur në jetën e krishtërimit. E themeluar që në shekullin e parë nga Apostulli i Krishtit, Marku, Kisha e Aleksandrisë është e njohur për shkollën e saj të famshme teologjike nga ku kanë dalë personalitete që kanë parashtruar fuqishëm tezat e tyre teologjike, që më vonë do të miratoheshin nga Sinodet Ekumenike, duke u pranuar si dogma të përjetshme të së vërtetës orthodhokse.

Edhe sot, Patriarkana e Aleksandrisë udhëheq dhe zhvillon përpjekje të mëdha misionare në kontinentin e Afrikës dhe simbolikisht lidhet edhe me Kishën tonë, pasi Kryepiskopi Anastas para se të merrte përsipër udhëheqjen e ringritjes së Kishës të Shqipërisë, mbante mbi supe eksperiencën e suksesshme misionare, gjatë aktivitetit të tij të gjatë baritor si Mitropolit i Afrikës Lindore, që përfshinte nën juridiksion shtetet e Kenias, Ugandës dhe Tanzanisë.

Për të ndjekur informacione më të zgjeruara, galeri fotografike si dhe lajme të përditshme mbi çdo aktivitet që do të karakterizojë vizitën zyrtare dhe paqësore të Papës dhe Patriarkut të Aleksandrisë dhe gjithë Afrikës, Imzot Theodhorit II, si dhe për t’u njohur me biografitë e anëtarëve të delegacionit zyrtar, vizitoni websitin zyrtar të Kishës së Shqipërisë www.orthodoxalbania.org dhe atë të Patriarkanës së Aleksandrisë www.patriarchateofalexandria.com

Është në nderin dhe krenarinë e çdo Kishe dhe kombi pritja e vizitorëve, udhëheqësve të lartë fetarë të Patriarkanave dhe Kishave Autoqefale, të cilët kudo në botë priten me nderet që i takojnë kryetarëve të shteteve.



Aleks Curi

(Marre nga faqja zyrtare e KOASH: http://www.orthodoxalbania.org )

[Albo]

Dita e parë, datë 31.11.2009

Me mbërritjen në aeroportin “Nënë Tereza”, nisi edhe realizimi i vizitës historike të Papës dhe Patriarkut të Aleksandrisë dhe gjithë Afrikës, Imzot Theodhorit II. Për ta pritur në aeroport kishin dalë të gjithë Mitropolitët dhe episkopët, anëtarë të Sinodit të Shenjtë të Kishës Orthodhokse Autoqefale të Shqipërisë, të kryesuar nga Kryepiskopi i Tiranës, Durrësit dhe i gjithë Shqipërisë, Anastasi. Në aeroport ndodheshin edhe klerikë nga të katër dioqezat, si dhe besimtarë orthodhoksë.

Në orën 11.00, Patriarku i Aleksandrisë, në krye të delegacionit që e shoqëronte, që përbëhej nga Hirësia e Tij, Mitropoliti i Kampalës dhe Eksark i gjithë Ugandës, Imzot Jonait, nga Hirësia e Tij, Mitropoliti i Muanzisë, Imzot Jeronimi dhe Hirësia e Tij, Episkopi asistent, Imzot Nikodhimi i Nitrisë, u fut në oborrin e Katedrales Orthodhokse “Ungjillëzimi i Hyjlindëses”, i cili ishte mbushur me besimtarë, që u uronin mirëseardhjen duke psalur e duke hedhur petale lulesh dhe gjethe dafinash.

Mbas shërbesës së Dhoksologjisë, që u psal me rastin e pritjes zyrtare të vizitorëve të lartë të Kishës Aleksandriane, u shkëmbyen edhe përshëndetjet e dy Primatëve.

I pari që uroi mirëseardhjen ishte Kryepiskopi Anastas, i cili në fjalën e tij shprehu gëzimin dhe ngazëllimin shpirtëror që mbushte zemrat e Sinodhit dhe popullit besimtar të Shqipërisë. Kryepiskopi shprehu edhe mallëngjimin që ndiente kur kujtonte takimin e parë me Patriarkun Theodhor, kur ai ishte student i vitit të parë të Fakultetit Teologjik të Universitetit të Athinës, por edhe vitet e shërbimit të tij hierapostullor në Afrikë dhe Liturgjinë e parë në Kampala, në maj të vitit 1964. Kujtimet e Kryepiskopit përmbanin edhe historitë e jetëve të anëtarëve të delegacionit, kur ata ishin akoma fëmijë e më pas studentë të Kryepiskopit në Athinë.

Më pas, Kryepiskopi Anastas shpjegoi edhe lidhjen shpirtërore që ka Afrika më Shqipërinë, si dy stacione të rëndësishme të veprimtarisë së Tij kishtare.

Në përshëndetjen e tij, Papa dhe Patriarku i Aleksandrisë dhe i gjithë Afrikës, Theodhori II, iu drejtua Kryepiskopit me fjalët: “Mësues i dashur, Ju e dini mirë që nga qyteti i madh i Aleksandrisë, i cili u ndërtua nga ptolemejtë, pasardhësit e Aleksandrit të Madh, e kanë fillesat shkollat më të njohura teologjike dhe katekike. Teologët aleksandrianë kanë shpjeguar dogmat orthodhokse, duke triumfuar kështu mbi të gjitha herezitë. Shikoj me gëzim në këtë katedrale ikonat e Shën Athanasit të Madh dhe të Shën Joan Përdëllimtarit, Patriarkëve të Mëdhenj të Aleksandrisë... Sa herë që kam nevojë për ripërtëritje shpirtërore gjej kohë dhe vizitoj viset e shkretëtirës së Nitrisë, ku jetonin etërit e mëdhenj eremitë, për të qenë sa më pranë frymës së tyre asketike...

Dy Mitropolitët afrikanë që më shoqërojnë, nuk janë zgjedhur rastësisht të jenë pjesë e delegacionit tonë. Ata janë bijtë tuaj, që i rritët shpirtërisht, duke i përgatitur për detyrën e lartë të Episkopit. Ju hodhët farën e hierapostullisë në Afrikë duke rigjallëruar ndërgjegjen misionare të të gjithë Kishës Orthodhokse.

Edhe në kujtimet e jetës sime personale, kur isha nxënës në shkollën e Rizarios, zë vend figura e një mësuesi të ndriçuar, që vinte herë pas here e na vizitonte. Ishit Ju, atëherë Episkopi i Andrusës, prej të cilit dëgjova për herë të parë për Afrikën, pa e ditur akoma që Perëndia do t’i drejtonte hapat e mia drejt këtij kontinenti kur më tha: “Shko në Afrikë dhe ngri Kryqin e Apostullit dhe Ungjillor Markut”. Dhe në këtë muaj që po realizojmë vizitën tonë, këtu pranë Jush, festojmë edhe përvjetorin e pestë të fronëzimit si Patriark i Aleksandrisë, si një simbolikë e fuqishme që lidh dy Kishat tona.

Para 10 vjetësh këtë Kishë martirike e vizitoi Patriarku Ekumenik, Vartholomeu I, që është edhe Episkopi i Parë në radhën e Orthodhoksisë. Tani, para jush, gjendet Episkopi i Dytë në radhën kanonike, por që është njëkohësisht edhe nxënësi dhe biri juaj. Ndërkohë që Afrika bën përparime në shpërndarjen e mesazhit të Ungjillit, ne admirojmë Kishën e Shqipërisë, që nën udhëheqjen e frymëzuar të Fortlumturisë Suaj, po shënon ringritje të fuqishme, ku ngado shikojmë mrekullitë e Hirit të Perëndisë në veprën tuaj. Vitet dhe brezat kalojnë dhe dikur të gjithë do të lexojnë se nga viset e Afrikës dhe të Shqipërisë kaloi figura e ndritur e Kryepiskopit Anastas, i cili ungjillëzoi dhe ringjalli shpresën kudo. Personaliteti juaj është i njohur, jo vetëm në orthodhoksi, por në të gjithë botën. Ju na mësuat se si të ishim misionarë të vërtetë”.

Vizita e Patrikut Theodhor vijoi sipas programit në Manastirin e Shën Vlashit. I shoqëruar nga Kryepiskopi Anastas, Primati i kontinentit afrikan pa nga afër ambientet e Akademisë Teologjike “Ngjallja e Krishtit”, vizitoi Skitin e Miroprurëseve dhe konviktin e vajzave, Shtëpinë orthodhokse të fëmijëve “Shpresa”. Ai mbolli së bashku me Kryepiskopin dy fidanë ullinj, si simbol uniteti dhe bashkëpunimi midis Patriarkanës së Aleksandrisë dhe Kishës së Shqipërisë.

Patriarku i Aleksandrisë në vijim mori pjesë në një drekë të përbashkët me stafin pedagogjik dhe studentët e Akademisë Teologjike “Ngjallja e Krishtit”, si dhe mësuesit dhe nxënësit e Liceut Kishtar “Kryqi i Nderuar”.

Gjatë takimit me studentët dhe nxënësit e rinj, Patriarku zhvilloi një bisedë të ngrohtë me ta. Ai u tregoi atyre jetën e tij dhe hapat që ndoqi që kur ishte në bankat e shkollës dhe deri në zgjedhjen e tij në Fronin e Patriarkut të Aleksandrisë. Më pas morën fjalën edhe anëtarët e delegacionit, që treguan kujtimet e tyre që lidheshin edhe me ndihmën që u ka dhënë atyre Kryepiskopi Anastas, i cili kishte paraparë tek ta, qysh prej fëmijërisë, udhën që do të ndiqnin në arsimimin dhe formimin e tyre deri në gradën episkopale.

Kryepiskopi Anastas deklaroi se kishte një ëndërr, që shprehej në urimin që të vinte një ditë, kur edhe Kisha e Shqipërisë të mund të dërgonte bijtë e saj misionarë në Afrikë. “Keni dëgjuar shpesh herë”,- vijoi Kryepiskopi,- “se Hierarkët e Kishës flasin për nevojat e mëdha që kanë Kishat lokale. Kjo është e vërtetë, por çdo Kishë, sado e vogël dhe nevojtare të jetë, duhet të mendojë për misionarizmin si një përparësi absolute e jetës së saj, sepse kështu bekohet edhe Kisha ku shkojnë misionarët, por bekohet edhe fuqizohet më shumë edhe Kisha që i dërgon ata. Nuk do të jetë e largët dita,- përfundoi Kryepiskopi,- që edhe misionarë shqiptarë do të shkojnë në Afrikë për të përhapur Fjalën e Perëndisë”.

Me këtë atmosferë dhe frymë hierapostullore u mbyll edhe dita e parë e vizitës paqësore dhe zyrtare e Papës dhe Patriarkut të Aleksandrisë dhe gjithë Afrikës, Thedhori II. Nesër, e diel,1 nëntor, do të zhvillohet bashkëmeshimi Patriarkal dhe Arkieratik i të dy Primatëve në Katedralen Orthodhokse “Ungjillëzimi i Hyjlindëses”, ku do të lexohen edhe mesazhet kryesore të Primatëve.


Aleks Curi

[Albo]

PËRSHËNDETJE e Fortlumturisë së Tij, Kryepiskopit të Tiranës, Durrësit dhe të gjithë Shqipërisë Anastasit në çastin e mbërritjes në Shqipëri të Fortlumturisë së Tij të Shenjtë, Papës dhe Patriarkut të Aleksandrisë dhe të gjithë Afrikës Theodhorit II në Kishën Katedrale “Ungjillëzimi i Hyjlindëses”

31.10.2009

Fortlumturi dhe Papë i Shenjtë, Patriark i Aleksandrisë dhe i gjithë Afrikës, zoti Theodhor, Fort i dashur vëlla në Zotin,
Hirësi, fort të Përndershëm,
Bij të dashur në Krishtin,

“Himno Zotin, o shpirti im, do ta lavdëroj Zotin në jetën time, do t’i psal Perëndisë derisa të jem” (Psalmi 145:1-2).

Me ngazëllim dhe himn për Perëndinë Triadik, Ju presim sot, Sinodi i Shenjtë, si dhe tërë kleri e populli i Kishës Orthodhokse Autoqefale të Shqipërisë, në këtë kishë Katedrale, Ju, Primatin e ndriçuar dhe aktiv të Patriarkanës shumë të hershme të Aleksandrisë, si edhe Sinodhinë Tuaj të shtrenjtë, Hirësitë, Mitropolitin e Kampalës dhe të gjithë Ugandës z. Jona, Mitropolitin e Muanzës z. Jeronim dhe Hirësinë e Tij, Episkopin e Nitrisë, z. Nikodhim.
Njëkohësisht, me gëzimin e pranisë Suaj, një mallëngjim i thellë e pushton folësin ndërsa sjell në mendje vitet e takimit të parë, kur ishit student i vitit të parë në Fakultetin Theologjik të Athinës e në përgjithësi vitet që Perëndia më bëri të denjë të punoj në kontinentin afrikan. Për më tepër, nuk mundem të harroj Liturgjinë time të parë në Kampala, në maj të vitit 1964, kur në altar më ndihmonte Jonai i vogël, dhjaku dhe prifti i ardhshëm, bashkëpunëtori im i ngushtë në Kenia, sot Mitropolit i Kampalës dhe gjithë Ugandës. Dhe më vonë, kur në vitin 1986 e dërguam ndihmësin tonë, atëherë djalë i ri, Jeronimin për studime në Athinë, tani Mitropolit i Muanzës. Gjithashtu dhe studentin tonë, sot bashkëpunëtorin Tuaj të zgjedhur, Episkopin e Nitrias z. Nikodhim.
Siç e dini mjaft mirë, Fortlumturi, me Afrikën, nga dhjetëvjeçari i viteve 1950, është krijuar një lidhje e veçantë, madje do të thosha lidhje dashurie. Lavdëroj Perëndinë, i Cili më bëri të denjë, që për një pjesë të madhe të jetës sime, t’i shërbej popullit të bekuar orthodhoks afrikan në çaste kritike të rrugëtimit të tij. Por edhe në vazhdim, nga pozita e drejtorit të Shërbimit Apostolik të Kishës së Greqisë, arritëm, me hirin e Perëndisë, të zyrtarizojmë mundësinë e transferimit të klerikëve për në hierapostulli, si edhe strukturat e tjera, që deri sot mbështesin veprën hierapostolike të Patriarkanës së Aleksandrisë.
Me kënaqësi të thellë, ndjekim vazhdimin dhe lulëzimin e veprës hierapostolike në saje të zellit tuaj të palodhur, iniciativat krijuese, vizitat e vazhdueshme në shumë qendra hierapostolike të Afrikës, si edhe mundimet dhe vetësakrificën e mitropolitëve afrikanë, shoqëruesve Tuaj në kushte shumë të vështira, punëtorët e Ungjillit në vijën e parë dhe në prapavijë të cilët, nën udhëheqjen tuaj të hyjfrymëzuar, mundohen për përhapjen e Orthodhoksisë në hapësirat e pamasa të Afrikës. Gjithashtu gëzohemi nga thellësia e shpirtit për frytshmërinë e pasur që vihet re tanimë në fushën hierapostolike të Afrikës, duke sjellë në kujtesë pasazhin e psalmit: “Ata që mbjellin në lot, do të korrin në ngazëllim. Duke shkuar ecnin dhe qanin duke vënë farat e tyre. Kur të vijnë do të shkojnë në ngazëllim, duke ngritur duajt e tyre” (Psalmi 125:6).
Gjatë ditëve të qëndrimit Tuaj këtu, do të keni rast të informoheni për sa kanë ndodhur në Shqipëri. Ky vend ka vuajtur persekutimin më të tmerrshëm ateist, nga viti 1967 deri më 1990 - kur ne ecnim të lirë në Afrikë -, me pasojë shkatërrimin e plotë të Kishës lokale. Njëkohësisht do të konstatoni ringritjen nga themelet të Kishës Orthodhokse Autoqefale të Shqipërisë, e cila jeton gjithashtu një periudhë apostolike brenda gëzimit të Ngjalljes dhe frymës së Pentikostisë.
Pra, në këtë atmosferë dhoksologjie dhe gëzimi, brenda kësaj kishe Katedrale - që i është kushtuar, si edhe kisha Juaj në Aleksandri, Ungjillëzimit të Hyjlindëses - me ndjenja nderimi të veçanta dhe dashurie të sinqertë, ne kleri dhe populli i Kishës së Shqipërisë, presim Fortlumturinë Tuaj të shtrenjtë, si edhe Sinodhinë Tuaj të nderuar, që mundohen për Ungjillëzimin e Afrikës. Ne urojmë me gjithë shpirt, që Shpirti i Tërëshenjtë të ndriçojë gjithmonë mendjen dhe zemrën Tuaj, të shenjtërojë jetën Tuaj, të udhëheqë dhe të mbështesë veprimet Tuaja për përhapjen dhe stabilizimin e Orthodhoksisë në kontinentin afrikan, të etur për paqe dhe drejtësi.

[mesia4ever]

I deshirojme mireseardhje ne token arberore

[Albo]

Vijon vizita zyrtare dhe paqësore e Papës dhe Patriarkut të Aleksandrisë dhe gjithë Afrikës, Theodhorit të II.

Dita e dytë, datë 1 Nëntor 2009

Mëngjesin e së Dielës, populli besimtar dhe kleri i Shqipërisë përjetuan një ngjarje të veçantë kishtare, bashkëmeshimin e Papës dhe Patriarkut të Aleksandrisë dhe gjithë Afrikës, Imzot Theodhorit II dhe Kryepiskopit të Tiranës, Durrësit dhe gjithë Shqipërisë, Imzot Anastasit.

Në katedralen orthodhokse, e cila ishte mbushur plot me njerëz, ndodheshin për të pritur Primatët, të gjithë anëtarët e Sinodhit të Shenjtë të Kishës Orthodhokse Autoqefale e Shqipërisë. Gjatë këtij bashkëmeshimi Patriarku Theodhor dhe Kryepiskopi Anastas do të shkëmbenin përshëndetjet dhe mesazhet kryesore që karakterizojnë tradicionalisht vizitat zyrtare të këtij lloji.

Kryepiskopi Anastas do ta përshëndeste vizitën e Patriarkut Theodhor duke shprehur edhe gëzimin e tij me fjalët: “ Çdo vizitë zyrtare e një primati të Kishës Orthodhokse çel një dritare të madhe në mendjen dhe në zemrat e besimtarëve të Kishës lokale, për të kundruar më me kthjelltësi dimensionet e Kishës Orthodhokse në të cilën bëjmë pjesë, “nga njëri cep i botës në tjetrin”.

Kryepiskopi theksoi edhe lidhjen mistike që ekziston midis Kishës së Afrikës dhe asaj të Shqipërisë, sepse siç theksoi ai: “Përvoja e Afrikës ishte një parapërgatitje shumë e vyer për rrugëtimin në udhë të vështira dhe të rrëshqitshme të Shqipërisë postkomuniste për ringritjen e Kishës lokale. Dhe në çdo Liturgji Hyjnore, që ofrohet për Kishën, “nga njëri cep i dheut në tjetrin”, kemi bekimin të gjendemi përsëri, në mënyrë të mistershme, pranë vëllezërve të shtrenjtë tanë në Afrikë, grigjës Suaj të zgjedhur”.

Në përshëndetjen e tij, Papa dhe Patriarku i Aleksandrisë dhe gjithë Afrikës, Theodhori i II do të ripërsëriste edhe njëherë rolin që ka luajtur Kryepiskopi Anastas gjatë veprimtarisë së tij hierapostolike në Afrikë. Patriarku shprehu ngazëllimin e zemrës së tij, kur gjendej në bashkëmeshim me Kryepiskopin Anastas në kungim të përbashkët në dashurinë e Perëndisë Triadik dhe në misterin e unitetit të të dy Kishave, të cilat i bashkon një lidhje e hershme historike që konsiston në dhiakoninë hierapostolike të Kryepiskopit Anastas në Kenia, por edhe në vende të tjera të Afrikës. “Padyshim, Fortlumturi,- theksoi Patriarku Theodhor,- Ju bëni pjesë tek personalitetet e mëdha të epokës sonë. Të gjitha energjitë tuaja frymëzohen nga koncepti ekumenik i Kishës sepse dashuria juaj e parë ishte hierapostolia e jashtme”.

Në vijim, Primati i Kishës së Afrikës përmblodhi të gjithë veprimtarinë misionarike të Kryepiskopit Anastas, duke u ndalur edhe në thënie të shkëputura nga vepra të tij, të cilat sot kanë marrë një autenticietet ekumenik dhe janë kthyer në një himn orthodhoks mbi rëndësinë dhe domosdoshmërinë e misionarizimit. Në fund, Patriarku uroi që marrëdhëniet e shkëlqyera të dy Kishave të forcoheshin edhe më tej.

Pas Liturgjisë Hyjnore u shkëmbyen edhe dhuratat simbolike midis dy primatëve. Kryepiskopi Anastas i dhuroi Patriarkut një Potir të Shenjtë, si shenjë e unitetit liturgjik të të gjithë Primatëve, sa herë që kujtohen diptikët në çdo liturgji Hyjnore. Ndërsa Patriarku Theodhor II lexoi vendimin e Sinodhit të Patriarkanës së Aleksandrisë, që i jepte Kryepiskopit Anastas çmimin e Kryqit të Madh të Shën Markut, si një shenjë falënderimi dhe mirënjohjeje për kontributin e tij baritor në Afrikë. Ai i dhuroi edhe një engolpio në formën e shqiponjës, si edhe Kryqin e bekimit për Tryezën e Shenjtë, punuar në mënyrë artizanale nga murgjit e manastirit të Shën Andonit, si një kujtim të vizitës së Tij në Shqipëri.

Programi i ditës së dytë të vizitës së Patriarkut do të vijonte me një drekë zyrtare që Kryepiskopi Anastas kishte shtruar në qendrën shpirtërore Thavor. Aty Patriarku do të bisedonte me nëpunësit e departamenteve të ndryshme të Kishës mbi rëndësinë e punës së gjithsecilit për përparimin e të gjithëve. Patriarku theksoi se Kisha e Shqipërisë ka një fat të madh që ka për Primat të saj, Kryepiskopin Anastas.

Mbasditen e së Dielës, Patriarku së bashku me delegacionin që e shoqëronte do të ndiqnin një koncert festiv të përgatitur nga rinia orthodhokse “Bijtë e Dritës”. Në këtë koncert, që organizohej me rastin e përvjetorit të tetëdhjetë të lindjes së Kryepiskopit Anastas, do të performonin grupe të shumta rinore nga e gjithë Shqipëria. Patriarku dhe pjesëmarrësit e tjerë ndoqën edhe një film dokumentar mbi jetën dhe veprën e Kryepiskopit Anastas.

Në fund të festivalit, Patriarku Theodhor, duke mos e fshehur dot mallëngjimin, përshëndeti të gjithë të rinjtë duke u thënë atyre se Kryepiskopi juaj, ashtu si shën Pavli nuk dëshiroi ar dhe argjend, por të përkushtohej te Krishti duke e treguar me vepra dashurinë e tij për Të. “Kur pamë filmin, lotuam me gjendjen e mjerueshme të Kishës, që gjeti Kryepiskopi Anastas. Zoti, nëpërmjet Kryebariut tuaj, ju ka dhënë dhurata dhe do t’ju japë akoma më shumë. Pashë se me sa gëzim e tregoni mirënjohjen tuaj ndaj Kryepiskopit në këngët dhe në vallet tuaja. Kur unë të kthehem në Afrikë dhe të kërcej me tingujt e timpaneve më mijëra fëmijët e mij afrikanë, do t’ju kem edhe ju në zemrën time. Kur mbas shumë vitesh Kisha juaj të ketë përparuar, ju do të kujtoni gjithmonë njeriun që e ka ngjallur atë”. Patriarku shprehu urimin që mbas 20 vjetësh të vinte sërish në Shqipëri për të festuar edhe 100 vjetorin e Kryepiskopit Anastas.

Kryepiskopi Anastas në përshëndetjen e tij për rininë tha: “Nuk gjej dot fjalë për t’u shprehur. Zemra ime është e përmbushur me një mallëngjim të thellë që e shpreh fjala, faleminderit. Me të gjithë zemrën ju uroj dashuri, gëzim, paqe dhe gjithmonë me Krishtin”.

Me gëzim rinor dhe fjalët falënderuese të Primatëve, u mbyll edhe dita e dytë e vizitës zyrtare dhe paqësore të Patriarkut të Aleksandrisë.

Të hënën, datë 2 Nëntor, Papa dhe Patriarku i Aleksandrisë dhe gjithë Afrikës, Imzot Theodhori II do të takohet me Presidentin e Republikës, Kryeministrin, Kryetaren e Parlamentit, Ministrin e Jashtëm, Kryetarin e Bashkisë së Tiranës, si dhe me zyrtarë të tjerë të lartë dhe përfaqësues të trupave diplomatikë të akredituar në Shqipëri.



Aleks Curi

[Albo]

Papa dhe Patriarku i Aleksandrisë dhe gjithë Afrikës, Imzot Theodhori II, takohet me krerët më të lartë të shtetit shqiptar

Dita e tretë, datë 2 Nëntor 2009

Dita e tretë e vizitës zyrtare dhe paqësore e Papës dhe Patriarkut të Aleksandrisë dhe gjithë Afrikës, Theodhorit II i ishte rezervuar takimeve të njëpasnjëshme me krerët më të lartë të shtetit shqiptar. Në këto takime, zyrtarët e lartë shqiptarë shprehën nderimet më të larta për Patriarkun e Afrikës, i uruan me gëzim mirëseardhjen, si dhe vlerësuan figurën e Kryepiskopit Anastas që ngjalli dhe ringriti Kishën e shkatërruar të Shqipërisë.

Patriarku Theodhor II u takua me Presidentin e Republikës, z. Bamir Topi. Kreu i shtetit shqiptar, pasi u uroi mirëseardhjen shprehu kënaqësinë për këtë takim duke vënë në pah edhe rëndësinë e madhe të kësaj vizite të shumëpritur të prelatëve të lartë jo vetëm për besimtarët ortodoksë, por për mbarë popullin shqiptar. Presidenti Topi theksoi rolin e jashtëzakonshëm të luajtur nga udhëheqësit shpirtërorë për promovimin e vlerave më të mira të fesë, për rritjen e besimit ndaj Zotit, për fuqizimin e harmonisë ndërfetare dhe paqes shoqërore në shërbim të arritjes së një jete më të mirë për të gjithë.

Patriarku i Aleksandrisë dhe gjithë Afrikës, Fortlumturia e Tij, Theodhori II, pasi shprehu mirënjohjen për pritjen edhe në emër të delegacionit që e shoqëronte, vuri në dukje rëndësinë e shembullit të rrallë e të vyer që ofron Shqipëria përsa u përket bashkëjetesës dhe tolerancës ndërfetare duke theksuar se: “Zoti është dashuri! Zoti është paqe për të gjithë, pavarësisht përkatësive të veçanta fetare!”

Fortlumturia e Tij, Theodhori II vlerësoi rolin e Presidentit Topi si simbol i bashkimit të popullit shqiptar duke shtuar se vizita të tilla të ndërsjellta, të rangjeve më të larta të udhëheqësve qoftë shpirtërorë, qoftë politikë, duhet të jenë më të shpeshta në mënyrë që tradita e vjetër e komunikimit mes popujve, kulturave, feve dhe historive të vendeve të Mesdheut të shtrihet e të thellohet akoma edhe më tej në shërbim të ndërtimit të një bote dhe shoqërie njerëzore më të mirë.

Patriarku i Aleksandriës në vijim u takua me Kryeministrin e Shqipërisë, z. Sali Berisha. Kryeministri Berisha vlerësoi rolin e Kryepeshkopit Anastas në ngjalljen e fesë në Shqipëri dhe në krijimin e lidershipit shqiptar në drejtimin e Kishës Orthodokse Autoqefale Shqiptare. Gjithashtu, ai theksoi rolin e rëndësishëm që luan Kisha Orthodokse në zhvillimin shpirtëror të Afrikës. “Progresi i sotëm i botës varet nga progresi i Afrikës. Kjo është arsyeja që qeveria shqiptare ka vendosur që vitin e ardhshëm të marrë pjesë në ndihmat që i jepen këtij kontinenti”, tha Kryeministri Berisha.

Fortlumturia e Tij, Theodori II vlerësoi rindërtimin nga themelet të Kishës Orthodokse Autoqefale të Shqipërisë, si dhe ndryshimet e realizuara në Shqipëri në vitet e fundit.

Edhe Kryetarja e Parlamentit, znj. Jozefina Topalli, priti në takim zyrtar Primatin e Afrikës. Duke shprehur kënaqësinë për këtë vizitë Patriarku i Aleksandrisë bëri përgëzimet e tij për progresin e arritur nga Shqipëria. “Ju përgëzoj për hapat e mëdha që Shqipëria ka bërë,- tha Primati i Kishës aleksandriane,- dhe gjithashtu jam i lumtur që takohem me ju, pasi personaliteti juaj është tepër i njohur për veprimtarinë aktive në këto vite.”

Kryetarja e Kuvendit pasi u shpreh se ndihet e nderuar që pret në këtë vizitë të parë një personalitet kaq të lartë të Kishës Ortodokse, u ndal në marrëdhëniet mes besimeve fetare në Shqipëri. Kryetarja e Kuvendit theksoi se harmonia dhe toleranca mes feve në vendin tonë është një thesar i rrallë, që e ka shndërruar Shqipërinë në një vend model për të tjerët. “Kjo harmoni është një aset i yni,- tha ajo,- dhe ne ndihemi krenarë për këtë vlerë të çmuar”. Zonja Jozefina Topalli vlerësoi kontributin e Kishës Orthoodhokse në Shqipëri dhe rolin e veçantë të Kryepeshkopit Anastas, jo vetëm për punën e tij në përçimin e vlerave humane, por edhe për bashkëpunimin e shkëlqyer me përfaqësuesit e besimeve të tjera fetare.

Patriarku i kontinenit afrikan u takua edhe me Kryetarin e Bashkisë së Tiranës, z. Edi Rama. Kryebashkiaku i shprehu Patriarkut gëzimin për vizitën e tij dhe i dhuroi atij një ikonë të Shën Theodhorit. Ndërsa Kryepiskopit Anastas, me rastin e ditëlindjes i bëri një dhuratë që mbarte një simbolikë të veçantë, një libër lutjesh orthodhokse që ishte trashëguar brez pas brezi në një familje të persekutuar për besimin e tyre gjatë periudhës së komunizmit në Shqipëri.

Patriarku Thedhor i shprehu urimet më të mira z. Rama për punën e bërë në zhvillimin e Kryeqytetit dhe e informoi atë për punën bamirëse që bën Kisha Orthodhokse në Afrikë me ndërtimin e spitaleve, shkollave dhe qendrave sociale. Ai theksoi edhe rolin kryesor që kishte Kryepiskopi Anastas në Afrisë në përgatitjen e kuadrove kishtarë lokalë.

Mbasditen e të hënës u organizua një pritje zyrtare në ambjentet e hotel “Tirana International”, ku është akomoduar edhe delegacioni i Kishës aleksandriane, me dhjetëra të ftuar, ku merrnin pjesë, Kryetarja e Kuvendit, Ministri i Jashtëm dhe Zv/Kryeministri, ministra të tjerë të kabinetit qeveritar, deputetë dhe ambasadorët e Egjitptit, SHBA, Rusisë, Greqisë dhe përfaqësues të trupave të tjerë diplomatikë të akredituar në Tiranë.

Gjatë kësaj pritjeje, Patriarku Theodhor dhe Kryepiskopi Anastas mirëpritën çdo të ftuar duke ndarë me të jo vetëm përshëndetjet e rastit, por edhe mendime të ndryshme mbi aktualitetin shoqëror dhe realitetin kishtar në Shqipëri dhe Afrikë.

Në fjalën e tij, Papa dhe Patriarku i Aleksandrisë dhe gjithë Afrikës, Theodhori II, uroi Kryepiskopin Anastas për 80 vjetorin e ditëlindjes së tij duke vënë në dukje edhe njëherë faktin që Kryepiskopi Anastas ishte mësuesi dhe udhëheqësi i tij shpirtëror. Patriarku vlerësoi edhe përparimin e Shqipërisë, si dhe vlerat e saj të çmuara shpirtërore në bashkëjetesën dhe harmoninë fetare. “Edhe në Egjipt,- nënvizoi Patriarku,- jetojmë në harmoni të krishterë e muslimanë dhe falenderojmë njëkohësisht edhe Presidentin z. Mubarak për mbështetjen që na ka dhënë në kryerjen e punës sonë.
Kryepiskopi Anastas shprehu falënderimet për urimet e Patriarkut dhe theksoi se përbënte një gëzim të veçantë për të fakti që nxënësi i tij ishte bërë më i mirë se mësuesi. Ai u uroi të gjithëve paqen, dashurinë dhe harmoninë që buron vetëm që lartazi, nga Perëndia.

Të martën, Papa dhe Patriarku i Aleksandrisë do të marrë pjesë në festimet jubilare me rastin e mbushjes 10 vjet të funksionimit të qendrës diagnostikuese “Ungjillëzimi” në Tiranë. Më pas ai do të niset drejt qytetit të Korçës.

Aleks Curi

[Albo]

Papa dhe Patriarku i Aleksandrisë dhe gjithë Afrikës, Theodhori II viziton Klinikën Orthodhokse “Ungjillëzimi” dhe pritet me madhështi në qytetin e Korçës

Dita e katërt, datë 3 Nëntor 2009

Në vijim të vizitës së tij paqësore dhe zyrtare në Shqipëri, Papa dhe Patriarku i Aleksandrisë dhe gjithë Afrikës, Theodhori i II ka parë nga afër institucione dhe departamente të ndryshme shërbimi të Kishës sonë, themeluar dhe ndërtuar me iniciativë dhe fonde të mbledhura nga Kryepiskopi i Tiranës, Durrësit dhe gjithë Shqipërisë, Imzot Anastasi.

Kështu, dy Primatët vizituan Kompleksin Polifunksional “Nazaret”, ku ndodhet punishtja e qirinjve, studio ikonografike, përpunim dhe gdhendje druri dhe shtypshkronja “Ngjallja”. Në vazhdim, Patriarku Theodhor do të vizitonte edhe Institutin e Formimit Profesional “Frymë Dashurie”, që tashmë, pas dhjetë vjetësh eksperiencë pedagogjike, sipas një dëshire të hershme të Kryepiskopit Anastas, do të shndërrohet në Universitetin Jo-Publik “Logos” me programe studimore të akredituara nga Ministria e Arsimit dhe me nivel të njehsuar me Shkollat e Larta, që njihen zyrtarisht nga shteti dhe funksionojnë në Shqipëri.

Vizita e Patriarkut, do të shënonte stacionin e radhës në Qendrën Diagnostike Orthodhokse “Ungjillëzimi”, ku do të zhvillohej një aktivitet jubilar me rastin e 10 vjetorit të funksionimit të kësaj klinike. Në këtë aktivitet, Patriarku Theodhor dhe delegacioni që e shoqëronte do të njiheshin me statistika të sakta mbi numrin e vizitave, specialitetet dhe aparaturat moderne që dispononte klinika, si dhe planet dhe objektivat për të ardhmen.

Patriarku Theodhor do të shprehte habinë e tij për ato çka kishte parë këto ditë në Shqipëri, si edhe për nivelin e lartë të shërbimit që ofrohej në Klinikën “Ungjillëzimi”. Ai theksoi se edhe gjatë vizitës së tij paqësore, po vazhdonte të mësonte prej veprës së Kryepiskopit Anastas, madje kishte porositur shoqëruesit e tij të mbanin shënime të veçanta, që të merrnin eksperiencë dhe të mund të aplikonin edhe në Afrikë shërbime dhe ndihmesa të ngjashme. “Kryepiskopi Anastas,-nënvizoi Patriarku,- e di se njeriu nuk është vetëm shpirt dhe lutje, por edhe mish dhe trup dhe këtë e tregon edhe me kujdesin e tij social dhe shëndetësor që ka organizuar në Shqipëri. Ju përgëzoj për përparimin dhe punën e mrekullueshme”.

Kryepiskopi Anastas në fjalën e tij falenderoi Patriarkun Theodhor për fjalët e tij të mira dhe vlerësimin e lartë dhe vijoi se suksesi nuk i dedikohet vetëm një personi, por të gjithë ekipit që punon me dashuri dhe përkushtim. Ai vuri në dijeni vizitorët e lartë se përballë Qendrës Diagnostike, në një ndërtesë të blerë posaçërisht do të hapet së shpejti një klinikë okulistike moderne, si një sfidë e re për dhjetëveçarin e ardhshëm që po fillon në departamentin e shëndetësisë së Kishës.

Vlen të theksojmë se në Polilklinikën Orthodhokse, që prej kohës kur u inaugura nga Patriarku Ekumenik, Vartholomeu I, në vizitën e tij zyrtare në Shqipëri, e deri më sot janë kryer mbi 900.000 vizita, analiza dhe ekzaminime të ndryshme mjekësore .

Më pas, Papa dhe Patriarku i Aleksandrisë dhe gjithë Afrikës, Theodhori II, së bashku me delegacionin që e shoqëronte, u nis drejt qytetit të Korçës. Aty do t’i rezervohej një pritje madhështore, e denjë për një qytet me kulturë dhe tradita të lashta orthodhokse. Sheshi para Katedrales ishte mbushur plot me njerëz dhe të rinjtë vallëzonin nën tingujt e gëzueshëm të muzikës tradicionale korçare.

Pritja zyrtare që iu rezervua Patriarkut aleksandrian kulmoi me dhoksologjinë që u psal në Kishën Katedrale të “Ngjalljes së Krishtit”. Mitropoliti i Korçës, Imzot Joani i uroi mirëseardhjen Patriarkut në qytetin e Korçës dhe theksoi se ardhja e tij përbënte një ngjarje historike, pasi për herë të parë në historinë e të gjithë Kishës, Patriarku i Aleksandrisë viziton vendin tonë dhe qytetin e Korçës. Mitropoliti i Korçës përmendi faktin se Patriarku i Aleksandrisë sjell me vete dhe historinë e lavdishme dhe ndriçimin e Fronit aleksandrian, si dhe të Patriarkëve të Mëdhenj të Aleksandrisë, Athanasit të Madh, Kirillit, Joan Përdëllimtarit që mbeten mësues të përjetshëm të teologjisë dhe të vërtetës orthodhokse. Ai iu drejtua edhe Kryepiskopit Anastas: “Ju faleminderit Fortlumturi që sollët në qytetin tonë Patriarkun e Aleksandrisë dhe sinodhinë e tij të nderuar. Ju faleminderit Fortlumturi që zgjodhët të festonit 80 vjetorin e lindjes suaj së bashku me ne. Ju e dini që Korça ju do dhe ju vlerëson shumë për të gjithë punën tuaj për ngjalljen e Kishës sonë, sepse ne ishim të vdekur shpirtërisht dhe ju na dhatë jetë përsëri më Krishtin”.

Patriarku Theodhor në përshëndetjen e tij falenderoi Mitropolitin Joan për pritjen mbresëlënëse që kishte organizuar, si dhe gjithë qytetarët e Korçës. “Mësuesi im, Kryepiskopi Anastas,-vijoi Patriaku,-më tha se në Korçë ndihet si në atdheun e tij. Për këtë arsye ai ka një kujdes dhe dashuri të veçantë për ju. Prandaj ju ka caktuar edhe një Mitropolit të ri dhe energjik, vëllain tim shumë të dashur më Krishtin, Imzot Joanin. Ai është biri juaj, nga Shqipëria, që flet me ju në gjuhën tuaj, që ju kupton shumë mirë hallet dhe brengat tuaja dhe që përpiqet me gjithë shpirt për t’ju ndihmuar dhe udhëzuar për shpëtimin tuaj, të bijve shpirtërorë që i ka besuar Perëndia. Në Kishën Orthodhokse bindja ndaj Episkopit është rregull thelbësor për suksesin dhe përparimin shpirtëror. Ju këshilloj që t’i qëndroni afër Mitropolit tuaj dhe t’i bindeni atij në çdo gjë, ashtu siç këshillojnë Etërit e Kishës, që të keni gjithmonë hirin dhe bekimin e Perëndisë”.

Papa dhe Patriarku i Aleksandrisë dhe gjithë Afrikës, Imzot Theodhori II do të qëndrojë edhe ditën e mërkurë në qytetin e Korçës. Në katedralen e qytetit do të kryhet edhe bashkëmeshim Patriarkal dhe Sinodial me pjesëmarrjen e dy Primatëve. Më pas Patriarku do të marrë pjesë në një sërë aktivitetesh zyrtare që janë organizuar për nder të vizitës së tij paqësore në Shqipëri.


Aleks Curi

[Albo]

Bashkëmeshimi i dy Primatëve në qytetin e Korçës dhe aktivitetet me rastin e 80 vjetorit të
Kryepiskopit Anastas, shënojnë edhe përmbushjen e vizitës zyrtare dhe paqësore të
Papës dhe Patriarkut të Aleksandrisë dhe gjithë Afrikës, Thedhori II

Dita e pestë, datë 4 Nëntor 2009

Qyteti i Korçës, i njohur për traditën e tij Orthodhokse u zgjua mëngjesin e së mërkurës nga tingujt e kambanave të Katedrales “Ngjallja e Krishti” që lajmëronin besimtarët për bashkëmeshimin e dy Primatëve në kuadër të vizitës zyrtare dhe paqëore të Papës dhe Patriarkut të Aleksandrisë dhe të gjithë Afrikës, Imzot Theodhorit II.

Kjo ditë, mbarte edhe një gëzim të veçantë për të gjithë besimtarët e Shqipërisë, pasi përkonte me përvjetorin e tetëdhjetë të ditëlindjes së Kryepiskopit Anastas, për të cilin kishin përgatitur edhe dhurata dhe surpriza të shumta.

Në Liturgjinë Hyjnore, bashkë me popullin që kishte tejmbushur Katedralen, merrnin pjesë edhe Kryetari i Bashkisë, z. Niko Peleshi, Prefekti, z. Koço Bello, Kryetari i Qarkut, z. Ilia Milo, përfaqësues diplomatik, të besimeve të tjera, etj.

Në fund të Liturgjisë, Mitropoliti i Korçës u uroi mirëseardhjen dy Primatëve dhe theksoi se vizita e Patriarkut ishte historike dhe do të mbetet e paharrueshme në historinë e qytetit të tij. Në vijim Mitropoliti njoftoi pjesëmarrësit për vendimin e Këshillit Bashkiak që në shenjtë mirënjohjeje, me rastin e ditëlindjes, i jepte rrugës që lidhte Telekomin me Mitropolinë e shenjtë, emrin e Kryepiskopit Anastas.

Patriarku në fjalën e tij, pasi shprehu falenderimet e tij për Mitropolitin dhe popullin e Korçës për mikpritjen e tyre abramiane theksoi: “Dje Korça na priti me shi të ftohtë, sot na pret me djell të ndritshëm. Edhe qielli tregon ngazëllimin e engjëjve, pikërisht ditën e lindjes së Kryepiskopit Anastas… Falenderoj autoritetet lokale per vendimin e tyre, pasi rruga që do të marrë emrin tuaj do të mbetet përjetë një simbol mirënjohjeje për veprën tuaj. Perëndia i surprizave, sikundër theksoni ju, vendosi që unë të jem sot këtu, për të festuar ditëlindjen tuaj, jo vetëm si nxënësi dhe biri juaj shpirtëror, por edhe si Primat i Kishës së Aleksandrisë”.

Në vijim, Patriarku i Aleksandrisë, në prezencë edhe të episkopëve që e shoqëronin e shpalli Kryepiskopin Anastas “Bamirës të Madh të Patriarkanës së Aleksandrisë dhe gjithë Afrikës”, vendim që u shoqërua me brohoritje nga të pranishmit. Patriarku i dhuroi Kryepiskopit edhe një statujë të vogël që paraqiste misionarin Anastas në mes të fëmijëve afrikanë, me nënshkrimin në tre dialekte afrikane “Kisha lokale e Kenias i është mirënjohëse Atit të Madh, Kryepiskopit Anastas”.

Në fjalën e tij Kryepiskopi Anastas falenderoi Patriarkun për urimet. “Jam tepër i mallëngjyer sepse brenda 24 orëve po përballem me surpiza të shumta, që në mënyrë fisnike dhe të bukur, dashuria juaj i kishte përgatitur. Ju falenderoj, Fortlumturia Juaj, Papë dhe Patriark i Aleksandrisë dhe gjithë Afrikës për vizitën tuaj, sepse prezenca juaj afër nesh na fali dashuri, mbështetje dhe fuqi. Gjërat që thatë më prekën thellë sepse Afrika është dashuria ime”

Më pas, Kryepiskopi shprehu edhe gëzimin që ditën e lindjes së tij e festonte në qytetin e Korçës, sepse besimtarët korçarë e kishin mbështetur gjithmonë, sidomos në orë të vështira. Por, Kryepiskopi Anastas theksoi edhe rrezikun që mund të fshihet duke vazhduar: “Kur po meshoja në altar, i thashë vetes, kujdes nga lavdërimet e shumta. Mund të të shkaktojnë një dehje shpirtërore që të largojnë nga dashuria e Krishtit. Le të jetë lutja dhe urimi juaj, jo për shumë vite, por për kohë që të jetoj ashtu siç do Perëndia me pastërti dhe përulësi… Në botë nuk ka propozim më të mirë se jeta e krishterë. Prandaj pranova të shërbej në Shqipëri, si vend i privuar nga besimi orthodhoks”.

Në drekën që shtroi Mitropoliti i Korçës për nder të dy primatëve, fjala u mor edhe nga personalitete të tjerë të artit, letrave, profesorë universiteti dhe përfaqësues të pushtetit lokal, të cilët falenderonin Patriarkun për vizitën e tij dhe uronin edhe Kryepiskopin për ditëlindjen, duke i paraqitur atij edhe dhuratat e ndryshme simbolike. Patriarku do të rezervonte edhe një tjetër surprizë për Kryepiskopin, kur këndoi një këngë popullore të Kretës, e cila fliste për një shqiponjë, duke simbolizuar kështu figurën e fuqishme të Kryepiskopit Anastas, i cili edhe pse në kushte të vështira, arriti të fluturonte lart, ashtu si shqiponja. Gjatë kësaj dreke zyrtare edhe Mitropolitët afrikanë, Imzot Jeronimi dhe Imzot Jonai treguan historitë e jetës së tyre, sesi Kryepiskopi Anastas, me predikimet dhe shembullin e tij, kishte ndryshuar jetët e tyre duke i përgatitur ata në mënyrën e duhur kishtare për detyrën e lartë të episkopit.

Artistët dhe të rinjtë e qytetit të Korçës kishin organizuar edhe një koncert festiv madhështor me rastin e vizitës së Papës dhe Patriarkut të Aleksandrisë dhe gjithë Afrikës. Koncerti që u shfaq mbasditen e së mërkurës do të mblidhte në sallën e teatrit shumë spektatorë, të cilët kishin ardhur për të nderuar vizitorët që vinin nga kontinenti afrikan. Në fund të koncertit, Mitropoliti i falenderoi edhe njëherë dy Primatët për prezencën e tyre këtë ditë të shënuar dhe theksoi se vizita e tyre ia kishte shtuar ndriçimin dhe bukurinë qytetit të Korçës. Ai paraqiti edhe dy dhurata simbolike, një pikturë të Katedrales së qytetit për Patriarkun Theodhor dhe një portret për Kryepiskopin Anastas.
Patriarku Theodhor falenderoi artistët e Korçës për evenimentin e bukur që kishin përgatitur dhe uroi nga zemra Kryepiskopin Anastas për ditëlindjen e tij. Ai e konsideroi si një vullnet të Përkujdesjes Hyjnore faktin se ishte i pranishëm së bashku me sinodhinë e tij, në këtë ditë gëzimi për Kishën e Shqipërisë. Edhe Kryepiskopi Anastas i falenderoi qytetarët e Korçës për të gjitha dhuratat dhe surprizat që kishin përgatitur dhe shtoi se ndjente një gëzim të veçantë që gjendej në Korçë, sepse ndjehej si në shtëpinë e tij, mes vëllezërish dhe bijve të tij shpirtërorë.

Kështu, me këtë aktivitet u mbyll edhe vizita zyrtare dhe paqësore e Papës dhe Patriarkut të Aleksandrisë dhe gjithë Afrikës, Theodhorit II. Patriarku, në krye të delegacionit zyrtar zhvilloi dhe përmbushi me sukses të plotë, vizitën e tij pesëditore në Kishën e Shqipërisë. Ai pati rastin të shikonte përparimin dhe zhvillimin e madh të Kishës së Shqipërisë, e cila nën drejtimin e frymëzuar të Kryepiskopit Anastas, ishte ringritur nga hiri dhe kishte njohur kulmin më të madh historik, që pas goditjeve fatale që i kishte dhënë sistemi totalitar për 23 vjet me radhë. Patriarku do të shprehte habinë e tij të vazhdueshme me çdo zhvillim dhe arritje të Kishës që ai konstatoi gjatë vizitës së tij hisorike në Shqipëri duke theksuar sa herë që i jepej rasti se: “Ne po jetojmë një mrekulli, çdo ditë të vizitës sonë ne pamë nga afër ringjalljen e Kishës së Shqipërisë dhe rilindjen shpirtërore të shqiptarëve. Ati dhe mësuesi ynë, Kryepiskopi Anastas, vazhdon ende të na mësojë, jo vetëm me fjalët dhe vizionin e tij hierapostolik, por edhe me veprën e tij madhështore, suksesi i së cilës të jep garancinë se ky misionar i fuqishëm dhe Kryebari i madh ka tërhequr mbi Kishën që udhëheq, Hirin mrekullibërës të Perëndisë dhe ka fituar me personalitetin që rrezaton, zemrat e të gjithë bashkëpunëtorëve dhe bijve të tij shpirtërorë”.

Me këto përshtypje të larta dhe konsiderata të sinqerta, me falenderime të cilat shpreheshin në çdo ditë të kësaj vizite zyrtare, me mallëngjim të fortë dhe ndriçim ngjallësor u përmbush kjo vizitë e parë zyrtare dhe paqësore e Papës dhe Patriarkut të Aleksandrisë dhe gjithë Afrikës, që përbën një ngjarje historike kishtare, sepse Kisha e Shqipërisë, për herë të parë në historinë e saj, vizitohet nga një delegacion i këtij niveli të Kishës aleksandriane.

Ditën e Enjte, datë 5 Nëntor 2009, Papa dhe Patriarku i Aleksandrisë së bashku me delegacionin që e shoqëronte u largua nga vendi ynë. Në aeroport, vizitorët e lartë të Kishës së Afrikës u përcollën nga Kryepiskopi Anastas dhe nga anëtarët e Sinodhit të Shenjtë të Kishës së Shqipërisë. Kishin ardhur për të përcjellë Patriarkun edhe ambasadorët e Egjiptit dhe të Greqisë. Para se të nisej, Patriarku Thedhor deklaroi: “Po marr me vete për t’u shpënë bijve të mij të Afrikës, ndriçimin paskal të Kishës së Shqipërisë, dritën e Ngjalljes së Anastasit…”


Aleks Curi

[Albo]

Per me shume foto nga vizita e Patrikut te Aleksandrise ne Shqiperi, vizitoni faqen zyrtare te KOASH:

http://www.orthodoxalbania.org/Shqip...aHistorike.htm
http://www.orthodoxalbania.org/Shqip...HistorikeI.htm
http://www.orthodoxalbania.org/Shqip...ikeDitaIII.htm
http://www.orthodoxalbania.org/Shqip...rikeDitaIV.htm
http://www.orthodoxalbania.org/Shqip...orikeDitaV.htm

[isidor]

Te gjitha lajmet zyrtare te Kishes Orthodokse Autoqefale te Shqiperise i gjeni ne www.orthodoxalbania.org.

Faleminderit!