Veton Surroi merr pjese ne takimin e "lidereve te botes"

[Kresha]

Liderët e botës takohen në Davos

Filloi takimi i 33-të i Forumit Ekonomik Botëror

DAVOS, 23 JANAR (KD) - Takimi i rregullt vjetor i Forumit Ekonomik Botëror, i 33-ti me radhë, ka filluar të enjten në qytezën zvicerane Davos. Takimi i sivjemë, në të cilin si zakonisht marrin pjesë qindra politikanë, ekonomistë, intelektualë si dhe aktivistë të shoqërisë civile, është paralajmëruar të mbahet nën moton “Ndërtimi i Besimit”. Po ashtu, në kuadër të takimit në Davos, që do të zgjasë deri më 28 janar, do të trajtohen edhe temat kryesore “Sfidat e përbashkëta”, “Ekonomia globale”, “Qeverisja globale”, “Sigura dhe gjeopolitika” dhe “Besimi dhe vlerat”. Panelet e këtyre temave do të jenë të ndara në nëntema që do të trajtojnë çështje nga më të ndryshmet që e rëndojnë shoqërinë globale sot.

Ndër pjesëmarrësit edhe Bill Clintoni, Wesley Clarku dhe Colin Powelli

Ndër pjesëmarrësit e shumtë me nam në Forumin Ekonomik Botëror këtë vit janë edhe ish-predsidenti i Shteteve të Bashkuara të Amerikës, Bill Clinton, dhe ish-komandanti suprem i NATO-s për Evropë, gjenerali i pensionuar amerikan Wesley Clark. Po ashtu, në Davos është paralajmëruar se do të vijë edhe sekretari amerikan i Shtetit, Colin Powell. Ndër emrat e tjerë që do të paraqiten gjatë ditëve të ardhshme në Davos janë edhe presidenti i Brazilit, Luiz Inacio Lula da Silva, presidenti i Meksikos, Vincente Fox, dhe presidenti i Gjermanisë, Johannes Rau, si dhe mbreti i Jordanisë, Abdullahu II dhe kryeministri i Malejzisë, Mahathir Mohamad. Në Forumin Eknomik Botëror, si çdo vit, do të jetë edhe themeluesi i Microsoftit, Bill Gates, si dhe drejtorët ekzekutivë, Douglas N. Daft nga Coca-Cola dhe Nobuyuki Idei nga Sony, që janë në mesin e 1.300 liderëve të biznesit të ftuar në tubim. Temat që pritet të dominojnë në Davos janë ato që ndërlidhen me krizat e tanishme, sikur që është Iraku lufta kundër terrorizmit, por në forum do të trajtohen edhe shumë çështje të tjera, që momentalisht nuk zënë vend në prioritetet më të larta të politikës globale. Në njërën nga tryezat e Davosit është ftuar të marrë pjesë edhe Veton Surroi, publicist kosovar dhe botues i gazetës “Koha ditore”. Surroi është i vetmi personalitet nga Kosova që është ftuar në këtë takim. Në të njëjtin debat do të marrë pjesë edhe Carol Bellamy, drejtoreshë e përgjithshme e UNICEF-it. Liderët, kolektivisht, mund ta ndryshojnë botën Takimi i sivjemë në Davos po mbahet në një kohë të jashtëzakonshme, në një klimë të pasigurisë dhe kompleksitetit global, thuhet në paralajmërimin zyrtar të takimit. Sipas organizatorit, fakti që vitin e kaluar në botë është parë një thurje e besimit në shumë sektorë të shoqërisë, është shtytja që nxiti që takimi i sivjemë për temë kryesore të ketë “Ndërtimin e besimit”. Ndërkohë, qëllimi i takimeve vjetore të Forumit Ekonomik Botëror është që të krijojë një platformë për diskutime dhe, aty ku është e mundur, vënien e themeleve për një zhvillim të qëndrueshëm të komunitetit global duke iu ndihmuar liderëve që t’i identifikojnë rreziqet si dhe ndikimin e tyre në mbarë botën. Po ashtu, një pjesë e madhe e programit të takimit i është dedikuar biznesit, zhvillimit, ekonomisë, lidershipit, sigurisë dhe vlerave. Në takim, po ashtu, do të hulutmohen edhe çështjet e trendeve në fusha të ndryshme, që nga shkenca dhe teknologjia e deri tek artet dhe shkencat humane. Arsyen pse liderë të shumtë pranojnë me ëndje pjesëmarrjen në këtë forum mbase më së miri e ka shpjeguar ishpresidenti amerikan, Bill Clinton. “Arsyja pse unë erdha këtu është sepse kolektivisht ju mund ta ndryshoni botën. Duhet të vendosni vetë nëse pajtoheni me mua”, pat thënë Clintoni në drejtimin e tij pjesëmarrësve të takimit vjetor të Forumit Ekonomik Botëror në vitin 2000.

Davosi, vendi më i sigurt në botë gjatë javës

Forumi Ekonomik Botëror ka edhe kundërshtarët e tij. Në kohën e njëjtë të mbajtjes së forumit në Davos, në Brazil mbahet Forumi Vjetor Socialist, tubim ky antiglobalist që mbahet në shenjë proteste kundër Forumit Ekonomik Botëror. Sipas paralajmërimeve në media, në Brazil pritet të mbidhen deri në 100.000 përkrahës të antiglobalizmit. Forumi po ashtu ka tërhequr çdo vit demonstrata edhe në vetë vendin e mbajtjes. Në Davos policia ka autorizuar mbajtjen e një proteste, por vendi ku ajo do të bëhet është caktuar dhe protestuesit nuk do të mund t’i afrohen vendit të mbajtjes së forumit. Ndrëkohë, disa protesta dhe dmeonstrata të vogla tashmë janë organizuar në Zvicër. Të mërkurën, rreth 30 protestues kanë vonuar shkuarjen nga Aeroporti i Zurichut në Davos të disa pjesëmarrësve të Forumit Ekonomik Botëror. Ndërsa, në kryeqytetin zviceran, Bernë, protestuesit planifikojnë renditjen e 6.000 palë këpucëve në shehin kryesor, duke dërguar kështu mesazhin që gjatë 6 ditëve të mbajtjes së Forumit në Davos së paku 6.000 njerëz do të dëbohen nga shtëpitë e tyre vetëm në Kolumbi. Por, duke marrë parasysh edhe frikën nga sulmi i mundshëm terrorist, organet zvicerane kanë ndërmarrë hapa të jashtëzakonshëme të sigurisë. Për herë të parë, forca ajrore zvicerane po patrullon në qiellin e vendit, ndërsa Qeveria ka kërcënuar se do të godasë secilën fluturake që fluturon mbi Zvicër pa lejekalim, përfshirë këtu edhe balonet ajrore. “Davosi mbase është vendi më i sigurt në botë këtë javë”, ka thënë për agjencinë e lajmeve AP Armin Egger, drejtori i turizmit në qytetin e Davosit.

Marre nga Koha Ditore