Të gjenden eshtrat e 4000 të vrarëve nga diktatura
18/08/2009
SHKODER Qeveria shqiptare duhet të na ndihmojë dhe të bëjë të gjitha përpjekjet për të gjetur eshtrat e 4000 të pushkatuarve në kohën e regjimit komunist, pasi vetëm kështu vendi ynë mund të ecë përpara". Kështu deklaroi dje sekretari i përgjithshëm i Shoqatës për Integrimin e ish-të Burgosurve dhe Përndjekurve Politikë, Besim Ndregjoni. Teksa po bëheshin gërmime në fshatin Kuç të Shkodrës për gjetjen e eshtrave të të burgosurve Sokol Sokoli dhe Toma Ndoja, përfaqësues të kësaj shoqate i bënë apel shtetit shqiptar për ndihmë. Sipas Ndregjonit, gjetja e eshtrave të të pushkatuarve nga diktatura është detyrimi moral që shteti ka ndaj familjeve të tyre, por që ende nuk e ka shlyer. Gjatë ditës së hënë u kryen gërmime në fshatin Kuç, por nuk u bë e mundur gjetja e eshtrave të dy viktimave të cilët kaluan vite ferri në burgun e Qafë-Barit të Pukës dhe më pas u pushkatuan nga diktatura. Në deklaratën për mediat, sekretari i përgjithshëm i shoqatës së ish-të përndjekurve dhe burgosurve politikë, Besim Ndregjoni, u shpreh se gjetja e eshtrave të të pushkatuarve nuk duhet të mbetet vetëm një iniciativë personale e kësaj shoqate dhe të afërmve të atyre.
GËRMIMET
Familjarë të të dy të pushkatuarve (Sokol Sokoli dhe Tom Ndoja), me origjinë nga Dukagjini kanë mbërritur në qytetin e Shkodrës me shpresën se do të gjenin eshtrat e të afërmve të tyre. Ata kishin marrë informacion se dy të burgosurit në kohën e diktaturës ishin ekzekutuar dhe varrosur në fshatin Kuç (në periferi të qytetit verior). Familjarët dhe përfaqësues të shoqatës në fjalë kanë mbajtur hapin tek vend i quajtur "Zalli i Kirit". Gërmimet për gjetjen e eshtrave nisën rreth orës 9:00 dhe vazhduan deri në ora 14:00. Por, eshtrat e Sokol Sokolit dhe Tom Ndojës nuk janë të vetmet të pagjetura. Sipas Besim Ndregjonit, akoma nuk dihen varret e 4000 të pushkatuarve të tjerë me gjyq dhe pa gjyq në shkallë vendi.
HISTORIA
Ish-i burgosuri politik, Bedri Blloshmi, bashkëvuajtës me dy të pushkatuarit, Sokol Sokoli dhe Tom Ndoja, nuk ka harruar protestën, e cila edhe u mori jetën dy shkodranëve. Ai tregon momentet e protestës së të burgosurve të vitit 1984 në burgun e Qafë-Barit, në Pukë. "Më 22 maj të vitit 1984, rreth 700 të burgosur në burgun e Qafë-Barit organizuan një demonstratë kundër dhunës që ushtrohej çdo ditë mbi ta nga pushteti i asaj kohe. Sokol Sokoli dhe Tom Ndoja, të dy nga Dukagjini i Shkodrës, ishin iniciatorët e kësaj proteste. Një muaj më vonë ata u dënuan me pushkatim", - thotë Blloshmi. Ndërsa, pohon se më vonë mësuan se dy shokët e tij të burgut u varrosën në një fushë të fshatit Kuç.
gazeta shqiptare
Përgjigju Duke Cituar
Postuar më parë nga Bel ami
Krijoni Kontakt