Mbi investimet e perfolura arabe

[AsgjëSikurDielli]

Përurohet në Vushtrri spitali "Sheiku Zaid" , me vlerë 4 milionë Euro
Lajmi i ores 9:00 PM

PRISHTINE (20 janar) - Sot në Vushtrri u përurua spitali "Sheiku Zaid", financuar nga Emiratet e Bashkuara Arabe, projekt i cili ka kushtuar rreth 4 milionë euro. Në përurimin e këtij spitali mori pjesë edhe përfaqësuesi i presidentit të Emirateve të Bashkuara Arabe, sheiku Hamed Bin Zajed. Ai përcolli mesazhet e vendit të tij që në Kosovë të mbijetojë paqja dhe siguria. Kryetari i Kuvendit Komunal të Vushtrrisë, Muharrem Shabani tha se për qytetarët e kësaj komune sot është ditë e madhe gëzimi. Ndërsa ministri i Shëndetësisë, Numan Bali tha se përurimi i spitalit tregon që shëndetësia në Kosovë po ecën përpara drejt një ardhmërie të sigurtë. Edhe kryetari i Kuvendit të Kosovës Nexhat Daci, e vlerësoi lartë ndihmën e madhe të shtetit arab. Spitali "Shaiku Zaid" ka një kapacitet prej 52 shtretërish. Në të do të punojnë 237 punëtorë shëndetësorë. anjo/ko

[AsgjëSikurDielli]

Fillon ndërtimi i Aeroportit në Kukës, njëkohësisht edhe i autostradës për në Prizren

Zhvillohet ceremonia e fillimit të ndërtimeve për Aeroportin e Kukësit

BASHKIM SHALA

KUKËS, 1 SHKURT - Në qytetin e Kukësit, është zhvilluar ceremonia e paraqitjes së projektit të Aeroportit të Kukësit, që do të pasohet me fillimin e punimeve të financuara nga Qeveria e Emirateve të Bashkuara Arabe. Në këtë ceremoni kanë marrë pjesë ministri i Transporteve e Telekomunikacioneve të Shqipërisë, Spartak Poçi, drejtoresha e Aviacionit Civil të Republikës së Shqipërisë, Merita Xhafa, drejtori i Projektit të Menaxhimit të Fluturimeve Ajrore të Kompanisë Amerikane LOKHED MARTIN, zoti Batt Backley, projektuesi dhe supervizori i aeroportit, Faruk Kaba, drejtori i Kompanisë Mak- Albania, fituese e tenderit për ndërtimin e Aeroportit Mynyr Hamit, si dhe specialistë të tjerë që janë marrë me projektin, pushtetarë vendarë të Kukësit, përfaqësues të medias etj. “Me ndërtimin e Aeroportit të Vlorës, rikonstruksionin e Aeroportit të Rinasit, Kukësi do të jetë një pikë e rëndësishme e transicionit të fluturimeve ajrore në mes Rinasit e Prishtinës, por sidomos Prishtinës”, theksoi në vijim ministri i Transporteve”, tha ministri i Transporteve të Shqipërisë, Spartak Poçi, i cili ka bërë të ditur se kompania e njohur amerikane LOKHED MARTIN, e cila ka filluar investimin për modernizimin e autostradave ajrore shqiptare do të bëjë investime edhe në Aeroportin e Kukësit dhe do t’i monitorojë të gjitha fluturimet (navigimet) ajrore në këtë zonë. “Do të finalizojmë me sukses të gjitha projektet që kemi për të lidhur me infrastrukturë veriun e Shqipërisë dhe Kosovën e më gjerë”, ka shtuar ai. “Ndërtimi i Aeroportit të Kukësit është një projekt që pak qytete në botë kanë fatin ta kenë” tha projektuesi Kaba. Sipas projektuesit në këtë aeroport do të flutuyrojnë avionë të të gjitha cilësive pa ndonjë kufizim. Aeroporti i Kukësit do të jetë i klasit C sipas standarteve të ICAO, me një kapacitet 100 mijë pasagjerë në vit. Vepra do të kushtojë 15 milionë dollarë, përveç aparaturave të navigacionit të cilat nuk janë të përfshira në këtë vlerë. Terminali i Aeroportit do të jetë 600 metra katrorë, vëllimi i përgjithshëm 3600 metra kubë ndërsa dimensioni i APRON-it (Porta ku ndalojnë avionët që vijnë nga pista e fluturimit) do të jetë 10 mijë metra katrorë. Gjatësia e pistës do të jetë 1800 metra lineare, gjërësia me bankina 60 metra lineare, ndërsa pa bankina 45 metra lineare. Afati i ndërtimit të Aeroportit është 20 muaj. Sipas projektuesit ky aeroport do të jetë i një cilësie shumë të lartë, një kompleks që ka në përbërje të gjithë elementet e një aeroporti cilësor. Krahas ndërtimit të Aeroportit të Kukësit Qeveria e Emirateve të Bashkuara Arabe do të financojë edhe ndërtimin e autostradës Kukës-Prizren. “Jemi në fazën finale për të filluar dhe segmentin rrugor nga Morini në Kukës, i cili do të jetë një segment jo i thjeshtë, por një autostradë, pjesë e rrugës së madhe Prishtinë-Kukës-Durrës. Ky segment rrugor do të financohet nga Emiratet e Bashkuara Arabe dhe do të përfundojë paralelisht me Aeroportin e Kukësit. Ndërkohë që rruga e re Prishtinë-Durrës është vendosur që të fillojë nga Kukësi dhe pikërisht nga Morini”, deklaroi numri një i Transporteve të Republikës së Shqipërisë. Ndërkohë ministri Poçi ka bërë të ditur se tre donatorët e parë, të cilët do të financojnë segmente të ndryshme të kësaj rruge, janë Qeveria shqiptare, Banka Botërore, Qeveria e Emirateve të Bashkuara Arabe (rrugën Morin- Kukës-Aeroport).


Koha