Kjo eshte teme me rendesi tashti qe zgjedhjet e 2009 iken per fiasko.
Si do shkoje puna?
Kujt do t’ia faturojë Berisha prishjen e zgjedhjeve?
Nga Mero Baze
Raporti i djeshëm i ODIHR për procesin e numërimit të votave thekson faktin që politika komandoi procesin duke ndërhyrë proceduralisht, politikisht dhe fizikisht në këtë proces. Konstatimi është një shuplakë e fortë, ndërsa Berisha ka nisur festën e formimit të koalicionit të ri me Ilir Metën. Nën tingujt e kësaj feste me ‘krushq të ngrirë’, shihet qartë që po synohet të demoralizohen institucionet e zgjedhjeve, si KQZ dhe Kolegji Zgjedhor, me qëllim tejkalimin e numrit 71 të mandateve për llogari të shumicës aktuale. Pas kësaj Berisha do të ndjehej më i qetë për peshën e tepërt që ka marrë LSI në qeverinë e tij dhe do të ishte më i hapur për aleanca të tjera fluide.
Por raporti i ODIHR është një paralajmërim i ashpër për raportin përfundimtar për zgjedhjet dhe certifikimin e tyre. Vërejtjet e saj serioze për performancën e KQZ dhe komandimin politik të rezultatit, shoqëruar me ndonjë lëvizje të mundshme të ashpër të opozitës, mund të rrëzojnë përfundimisht procesin. Pas kësaj Berisha do të formojë qeverinë më jolegjitime të këtyre 19 viteve, dhe ajo që shumë vëzhgues shqiptarë dhe të huaj po presin, është se kujt do t’ia faturojë ai këto manipulime.
Në zgjedhjet e vitit 1996 fillimisht ai mori përsipër vetë destabilizimin e procesit duke fajësuar bojkotin e socialistëve, por më vonë pak nga pak e kanalizoi përgjegjësinë te forcat e policisë dhe SHIK. Kabineti i ri që doli pas 26 majit kishte përpjekje të qarta për t’u distancuar nga emrat e “fortë” që ishin në shënjestër të diplomatëve të huaj. Aq shumë në ekstrem shkoi “kujdesi” i Berishës, sa ministër të Brendshëm emëroi një letrar nga Kavaja, me idenë se ai u jepte përparësi njerëzve më shpirt të butë. Po kështu bëri kujdes të fuste nja 8 femra në kabinet, kryesisht si sekretare Shteti, dhe emëroi ministër të Jashtëm Tritan Shehun, një personazh simpatik për të huajt, për shkak të buzëqeshjes që shoqëronte në fytyrën e tij çdo fjali që shpesh mund të ishte në të kundërt të asaj që ai mendonte vetë.
Nëse Berisha përsërit këtë skemë, atëherë duket qartë se problemet që kanë shoqëruar zgjedhjet në Berat dhe Fier mund të rëndojnë mbi kryesuesit e listave në këto qarqe. Zëra brenda PD, kryesisht njerëz të lidhur me Bashën, po e artikulojnë përditë e më shumë këtë temë, sidomos kur i referohen “njerëzve” që po prishin imazhin e PD dhe zgjedhjeve. Olldashi dhe Pollo mund të jenë të sakrifikuarit e këtyre zgjedhjeve, nëse Berisha vendos të distancohet pas raportit përfundimtar të ODIHR dhe mundësisë së mosnjohjes së zgjedhjeve nga opozita.
Por, po kaq i madh është shansi që Berisha t’i kthejë në kuaj beteje këto zona, dhe të forcojë deputetët që dolën prej tyre në shenjë vendosmërie për të legjitimuar rezultatin e komanduar politikisht. Kjo natyrisht do ta fuste situatën në një spirale të vjetër, të njohur të konfliktit të Berishës me komunitetin ndërkombëtar dhe veçanërisht me ambasadoren Glover. Kështu, ai mund të hedhë poshtë raportin e saj dhe të vlerësojë njerëzit që komanduan procesin.
Në të gjitha rastet, mënyra se si do të sillet Berisha me “skifterët” dhe “pëllumbat” e këtyre zgjedhjeve, do të tregojë shumë se sa i prirur është ai ta marrë përsipër përgjegjësinë e këtij komandimi politik të rezultatit ose sa i gatshëm është të lajë duart dhe të mbajë distancë prej tij. E sigurt është se dikush, dikur brenda Partisë Demokratike do ta përdorë këtë zhvillim negativ. Prekja e zgjedhjeve të vitit 2001 nga Ilir Meta dhe shkatërrimi me dhunë i procesit zgjedhor u kthye në debat brenda Partisë Socialiste dhe në të vërtetë u bë shkak i të mosgëzuarit të qetë të një mandati, ku u desh të ndërronin 3 kryeministra. E njëjta situatë do t’i ndodhë sërish kësaj mazhorance, për më tepër që të dy kryeministrat e vetëm të këtij vendi që kanë prekur zgjedhjet janë bashkë në të njëjtin kabinet. Ajo që nuk dimë akoma është se kush do të përpiqet të dalë i larë nga ky pisllëk dhe kush do të arrijë të nxjerrë gështenjat me gishtat e tjerëve.
Përgjigju Duke Cituar
Postuar më parë nga juanito02
Krijoni Kontakt