Premtimi i mbretit

[Val9]

Kësaj radhe Behgjet Pacolli nuk ka tentuar të përvetësojë njohjen më të re për Kosovën, por ka kërkuar që t’i njihet kontributi për njohjen nga Jordania. Paralajmëron njohje të shpejtë edhe nga Kuvajti. Po ashtu, njohjen brenda disa ditësh të një shteti që e ka paralajmëruar muajt e fundit. Ndërkohë, thotë se në fund të shtatorit do t’i drejtohet me fjalim një konference të CARICOM’it.

Nga Express më 09.07.2009 në ora 8:19
Lideri i Aleancës për Kosovën e Re, Behgjet Pacolli, ka kërkuar të mërkurën t’i njihet kontributi që ka dhënë në njohjen më të re të Deklaratës së Pavarësisë që erdhi nga Mbretëria e Jordanisë.

“Fillimisht, AKR ka qenë nikoqire e një delegacioni parlamentar të Jordanisë që kishte ardhur me ftesën e përbashkët tonën dhe të Bashkësisë Islame të Kosovës”, ka thënë Pacolli për Express.

“Kemi biseduar dhe i kemi dërguar një letër Kryesisë së Parlamentit të Jordanisë që të fus në rend të ditës njohjen e Kosovës. Kjo ishte bërë dhe më pas Mbretit i ishte dërguar një propozim në të cilin thuhej se do të kishte qenë mirë të njihet Kosova”, ka shtuar Pacolli.

Lideri opozitar, i cili është fokusuar me muaj në procesin e lobimit, përmend pastaj takimin që ka pasur me Mbretin e Jordanisë Abdullah II bin al-Hussein në Washington. “Ka qenë një takim miqësor. Kemi diskutuar edhe për bashkëpunimin e kompanisë time Mabetex me Jordaninë. Grupi Mabetex është tash duke punuar atje në një projekt”, ka elaboruar Pacolli.

“Pastaj biseda është fokusuar në mundësinë e njohjes së Kosovës nga Jordania si dhe bashkëpunimin potencial mes dy vendeve. Mbreti i Jordanisë më pat thënë se do të bëjë konsultimet e fundit me Qeverinë e tij dhe se ishte i bindur se Kosova do të njihet shumë shpejt”, është shprehur Pacolli.

Ai ka insistuar se dy javë më parë kishte pasur prapë kontakte me autoritetet në Jordani
“Më informuan se njohja e Kosovës është kthyer prapë lart në procedurë. Tash njohja u realizua dhe ky hap mua më inkurajon jashtëzakonisht shumë”, ka thënë Pacolli.

“Është një njohje shumë me rëndësi. Në emër të partisë sime falënderoj mbretin Abdullah dhe të gjithë ata që kanë kontribuuar. Edhe Ministri i Jashtëm i Kosovës ka pasur takim me Ambasadorin e Jordanisë në selinë e OKB’së”, ka thënë Pacolli.

Ai ka paralajmëruar se shumë shpejt Kosova do të njihet edhe nga fqinji i Jordanisë, Kuvajti.

Pacolli ka thënë se ndërkohë, brenda disa ditësh, pritet që të përfundojë procedura e njohjes nga një shtet që ai e ka përmendur shpesh në dy muajt e fundit.

Lideri i AKR’së, gjithashtu, ka thënë se prêt njohjen nga të gjitha shtetet anëtare të CARICOM’it deri në fund të dhjetorit.

“Po punojmë për njohjen nga këto shtete. Besoj se ato do të vijnë deri në fund të dhjetorit. Në konferencën e ardhshme të shteteve të CARICOM’it, në fund të shtatorit, do të marrë pjesë dhe më është garantuar edhe mundësia e mbajtjes së një fjalimi dhe të paraqes faktet pse shtetet anëtare duhet të njohin Kosovën”, ka treguar Pacolli.