I jepet lumtumira e fundit futbollistit Petro Ruci

[DYDRINAS]

I jepet lumtumira e fundit futbollistit Petro Ruci


» Dërguar më: 03/07/2009 - 13:10


VLORE- I është dhenë sot lamtumira e fundit futbollistit të njohur vlonjat njëherazi lojtarit të kombëtares Petro Ruci. Homazhet u bënë në shtëpinë qendrore të ushtrisë ku familjarë, të afërm, personazhe të njohur të botës së sportit i thanë lamtumirë sot një prej legjendave të futbollit shqiptar.
I cilësuar si një nga yjet e futbollit, Petro Ruci u nda nga jeta në moshën 52 vjecare në një spital në kryeqytetin grek Athinë pas një sëmundje të rëndë. Anëtar i ekipit Flamurtari, në të gjitha sukseset e tij, ai arriti që falë punës dhe aftësive të ishte njëkohësisht edhe anëtar i ekipit kombëtar. Të paharruara kanë qenë ndeshjet e tij, kundër Republikës Federale Gjermane dhe Irlandës së Veriut. Po kështu përballjet me Barcelonën, Partizanin e Beogradit etj. Vitet e fundit, Petro ka drejtuar zyrën e zbulimit të talenteve të futbollit në Greqi, duke i bërë një shërbim mjaft të mirë ekipeve kombëtare shqiptare. Kreu i Federatës Shqiptare të Futbollit Armando Duka shprehet se me largimin e tij të parakohshëm, futbolli shqiptar ka humbur një prej emrave më të shquar të tij.

(a.r/news24/balkanweb)

[DYDRINAS]

Dje në zhurmën e madhe të politikës që ka pushtuar kronikat e ditëve shqiptare, ka zënë vendin që i takon edhe një lajm i keq. Në kryeqytetin grek të Athinës është ndarë nga jeta në moshën 52-vjeçare, ish-futbollisti i njohur vlonjat Petro Ruci. Dje në mëgjes sapo ka mbëritur ky lajm i hidhur, jo vetëm në qytetin e tij të lindjes Vlorë, por edhe në gjithë mjedisin sportiv shqiptar, të gjithë janë treguar të shtangur për momentin duke ju është dukur e pabesueshme vdekja e parakohshme e Petro Rucit. Sëmundja e rëndë dhe e pashërueshme që kishte vetëm një muaj që kishte mbërthyer këtë njeri të sportit e ka bërë gjëmën e saj të zezë duke mposhtur në një moshë të parakohshme një legjendë në vite të futbollit vlonjat. Petro Ruci si një djalë që ridhte nga një familje me tradita në sport, si djali i një mjeshtri sporti si Aleks Ruci dhe vëllai i një ish-futbollisti të Flamurtarit, nuk mund ti qëndronte larg sportit, veçanërisht futbollit.

Karriera, fitoi 2 Kupa dhe shënoi 16 gola

Që në moshë fare të re, Petro Ruci është aktivizuar në ekipet e përatërinjve dhe më vonë ato të të rinjve të Flamurtarit. Që në në këtë moment ish-trajnerët e tij të parë Skënder Elmazi dhe Feredun Bejkosala pikasën tek ky djalë energjik një mbrojtës me shumë të ardhme. Kanë mjaftuar vetëm 18 vite që Petro Ruci të bindi fort Bejkush Birçen për ti besuar vendin e titullarit në krahun e djathtë të mbrojtjes së Flamurtarit. Fillimi ka qenë pak emocionues për shkak edhe të moshës shumë të re. Nelaj, Çuri, Haxhiu, Zilja, Liçaj, Xhaho, Braho Çipi kanë qenë kolegët e tij në vitet e para në skuadër. Trajneri Bejkush Birçe shumë shpejt formoi besimin e duhur tek ky djalosh energjik me një dëshirë të madhe për futbollin. Pak më vonë, në Flamurtarin e rinovuar do të afrohet brezi historisë së madhe të Flamurtarit me Berberin, Birçen, Arapin, Çipin, Tahon, Lushaj, Iljadhi, Ziain, Ferkon, Gjondedën, Ziun, Daullen, Kushtën, Bubeqin, Memushin, Vasil Rucin, Muçën, Lalucin e shumë të tjerë. Pjesëmarrja me Flamurtarin në ndeshjet për Kupën Ballkanike me AEK të Athinës dhe Velezh të Mostarit do të ishin sinjalet e para se po vinte Flamurtari i madh. Trajneri i paharruar Agron Sulaj midis këtij kontigjenti me futbollistë cilësorë do të mbështetej fort edhe tek Petro Ruci. Pozicional, i shpejtë dhe tepër energjik në krahun e djathtë të mbrojtjes, Petro Ruci do të ishte siguresa e mbrojtjes vlonjate. Më 22 shtator të 1982 ai do të jetë vlonjati i parë pas më shumë se 35 viteve që vesh fanellën e ekipit kombëtar. Trajneri i njohur Shyqyri Reli do ti besojë për tetë ndeshje resht në harkun e viteve 1982–1983 vendin e titullarit në ekipin kombëtar përkrah Targajt, Hametaj, Bimos, Omurit, Ragamit, Kolës, Bajazitit, Mingës, Vukatanës, Lames e Demollarit. Ndërkohë, në këto vite vjen edhe rritja e Flamurtarit të madh. Duelet e fuqishme për titullin kampion dhe fitues Kupe në ato vite midis Flamurtarit, Tiranës, Vllanisë, Dinamos dhe Partizanit, kanë mbrenda kronikave të tyre edhe dyluftimet e forta të Petro Rucit me Mingën, Kolën, Vukatanën, Lucin, Muçën, Ballgjinin, Lamen, Tomorri e të tjerë. Nënkampion dhe finalist Kupe do të mbetej Flamurtari deri në shkurtin e 1985 kur djemtë e Flamurtarit të drejtuar nga Leonidha Curri do të sillnin trofeun e Kupës së Republikës në Vlorën e futbollit cilësor. Ky sukses do përsëritet edhe në qershorin e 1988 ku pa asnjë dyshim Petro Ruci ka pjesën e tij në këto suksese.

Sport Ekspres

[DYDRINAS]

Duka: Humbëm një mik të mirë

Thellësisht i dëshpëruar për humbjen e mikut dhe ish‑futbollistit të njohur Petro Ruci, dëshiroj të ndaj me familjen, miqtë, shokët dhe të gjithë komunitetin e futbollit, dhimbjen e thellë që na ka pushtuar në këto çaste. Petro Ruci, ka qenë dhe do të mbetet një nga emrat më të shquar të futbollit vlonjat dhe atij shqiptar. Pjesë e sukseseve të Flamurtarit të madh të mesit të viteve 80‑të, ai do të mbetet gjithmonë një kujtim i paharruar dhe një pikë referimi. Petro ka dhënë një kontribut të shquar për futbollin edhe si zbulues talentesh. Një futbollist i madh dhe një mik i mirë i të gjithëve. Pasioni i tij i njohur për lojën e futbollit e ka shoqëruar gjatë gjithë jetës, dhe e ka bërë shumë të dashur, për të gjithë ne. Në këto momente të vështira për familjen, të afërmit dhe të gjithë njerëzit e futbollit, në emër të FSHF-së dhe në emrin tim personal, dëshiroj të shpreh ngushëllimet e mia të sinqerta, për humbjen e një mjeshtri të lojës dhe të një miku të mirë.

Bejkush Birçe: Ruci, model i futbollistit profesionist

U kam shumë të vështirë ta pranoj vdekjen e Petro Rucit, njeriut të nderuar që i ka dhënë shumë futbollist shqiptar. Unë kam jetuar në Vlorë për tre vjet e gjysmë dhe mbaj mend qe e kam marrë nga skuadra e të rinjve në ekipin e parë. Ai kishte tipare të pranueshme fizike dhe mbi të gjitha punonte shumë në stërvirtje. Pas Petro Rucit u afruan edhe futbollistë të tjerë si Kreshnik Çipi, që më vonë formuan një Flamurtar të fortë, që bëri jehonë në futbollin shqiptar. Petro Ruci kishte pasionin e punës dhe qëndronte gjithmonë larg veseve. Si rezultat i rritjes së tij profesionale u grumbullua edhe me ekipin kombtar. Ka qenë një djalë tepër korrekt, që do t’u mungojë familjarëve dhe miqve të tij të shumtë.

Sokol Kushta: Ka qenë një futbollist modern

Petro ka qenë nga ata lojtarë që u grumbulluan shumë herët me ekipin e parë, që në moshën 16‑17‑vjeçare. Unë në atë kohë kam jetuar shumë afër tij, qëndronim në të njëjtën dhomë kur luanim jashtë Shqipërisë dhe kur ishin të grumbulluar. Ishte një nga lojtarët më të kulturuar që ka pasur futbolli shqiptar dhe një mbrojtës modern bashkë me Zmijanin. Vdjeka e Petro Rucit është në radhë të parë një goditje e rëndë për familjen e tij. Jeta kështu e ka, ikin edhe njerëzit më të mirë. Gjithsesi ai ka lënë një vepër të madhe në futboll, ku edhe u shkollua. Një futbollist me dinjitet, që do t’i mungojë ambientit futbollistik shqiptar.

Mujo Targaj: Petro u hapi rrugën vlonjatëve në kombëtare

Petro Ruci ishte nga të parët lojtarë vlonjatë që kaluan në ekipin kombëtar. Unë kam luajtur me të te Dinamo, në ndeshjet e kupave të Europës. Pas Petros u afruan edhe lojtarë të tjerë si Kreshkin Çipi. Petro Ruci ka luajtur për shumë ndeshje me ekipin kombëtar si mbrojtës i majtë, që i jepte ndihmë të madhe sulmit. Si njeri pastaj ka qenë i shkëlqyer. Është një humbje e madhe për familjen e tij por edhe për futbollin. Sepse ai vazhdonte të punonte për ekipet kombëtare. Në kohën kur luaja unë, Petro u hapi rrugën futbollistëve vlonjatë në kombëtare, pra shërbeu si shembyll për shumë futbollistë të tjerë të qytetit të tij.

Alfred Zijai: Petro të bënte ta dashuroje futbollin

Kam vetëm fjalë të mira për të thënë për Petro Rucin. Ka qenë një futbollist i shkëlqyer që ka ditur gjithmonë të mbajë regjim. Falë punës dhe këmbënguljes ai arriti në nivelet më të larta të futbollit, duke dhënë kontributin në kombëtare. Fatkeqësisht iku shumë shpejt. Petro Ruci ishte një nga futbollistët më të rregullt që ka pasur Shqipëria. I rregullt në stërvitje dhe në komunikimin me shokët. Po të kesh futbollistë si Petro, që sillej si profesionist i vërtetë në stërvtje apo në ndeshjet zyrtare, të merr malli të shikosh futboll.

Shyqyri Rreli: Ruci, njeri dhe futbollist i vlerësuar

Petron e vleresoj në dy drejtime: si njeri dhe si sportist. Si njeri mund të them se ka qenë i sjellshëm dhe që pajtohej në çdo situatë. Ishte i mirëpritur në kolektivin kombëtar, sepse nuk krijonte asnjë lloj shqetësimi. Për sa i përket vlerave sportive, ai ka qenë pjesëtar i ekipit kombëtar, që ka arritur rezutate të mira. E ndiej veten shumë të prekur për humbjen e Petros, sepse i ka dhënë shumë futbollit vlonjat dhe atij kombëtar. I shpreh ngushëllimet familjes, që ka haumbur njeriun e dashur, ndërsa Shqipëria një figurë të nderuar të futbollit.

Marre nga Sporti shqiptar

[murik]

Rahmet paste Petro.Une jam tifoz i Tirones por Petron do ta kujtoj gjithmone si nje lojtar dhe njeri shembullor.Nuk harrohen ndeshjete e tij,sidomos me Gjermanine ne Saarbrucken 2-1, dhe ne Barcelone 0-0( ne kete te fundit Petro edhe pse u demtua keq,refuzoi te dilte nga fusha ne menyre qe te mos linte shoket vetem)U prefshe ne paqe i dashur Petro Ruci.

[mondishall]

Ikje e parakohshme e nje futbollisti qe na ka lene kujteses talentin e tij ne fushat e futbollit. Ngushellime familjes dhe te afermve. I perjetshem qofte kujtimi i tij.

[biligoa]

Ngushellime familjes te Petro Ruci.

Juve, ju shoqeroftë durimi, e shpresa!

E pastë në mëshirën e Tij Krijuesi i Gjithesisë!