Publikohen rrogat e deputeteve te Kosoves

[Val9]

Anëtarët e Kryesisë së Kuvendit të Kosovës marrin deri në 2 mijë e 400 euro në muaj. Deputetët marrin rreth 1 mijë e 500 euro. Kjo diferencë pagash ka rritur xhelozinë ndërmjet deputetëve dhe ka sjellë idenë për harmonizim të pagave. Qeveria, partitë dhe organizatat e kundërshtojnë rritjen apo ndryshimin e pagave.

Nga Jeton Musliu më 02.07.2009 në ora 8:13
Rroga bruto e një deputeti është 1 mijë e 150 euro. Por kjo shumë është vetëm për detyrën si deputet. Anëtarët e legjislativit kanë edhe benificione të veçanta. Deputetët paguhen nga taksat e qytetarëve, por transparenca për rrogat që ata marrin, nga ana e zyrtarëve përkatës, është zero.

Të dhënat që ka siguruar Expressi janë nga burime të tij brenda Kuvendit, që për shkak të ndonjë “keqkuptimi”, nuk kanë pranuar t’iu publikohet identiteti.

Kështu të gjithë 120 deputetët e legjislativit të vendit, janë së paku kryetar apo anëtar në ndonjë nga 13 komisionet parlamentare.

Madje ka prej tyre që janë anëtarë në disa komisione të ndryshme, janë kryetarë të ndonjë komisioni apo edhe anëtar të Kryesisë së Kuvendit.

Sigurisht, të gjitha këto detyra shtesë, përveç asaj si deputet, brenda mureve të Kuvendit, në fund të muajit, përkthehen në para.

Të gjitha këto angazhime të shtuara, shndërrohen në mëditje jo të liga. Madje, edhe udhëtimet zyrtare jashtë vendit.

Në këto udhëtime, deputetët mund të kenë të paguar gjithçka, nga bileta, hoteli, e deri tek ushqimi.

Por administrata e Kuvendit duhet të kujdeset që në fund të muajit, secilit që ka udhëtuar zyrtarisht, t’iu vihen në konto edhe mëditjet për ditët e qëndrimit jashtë vendit.

Kështu, një deputet i Kuvendit të Kosovës, përveç 1 mijë e 150 eurove pagë bruto që merr në muaj, merr edhe 200 euro të tjera shtesë.

Edhe pse janë të zgjedhur për të bërë detyrën e deputetit, për katër seancat që mbahen mesatarisht në muaj, ata marrin plus edhe 200 euro të tjera.

Kjo e çon rrogën e tyre neto në 1 mijë e 350 euro në muaj. Por, jo vetëm kaq. Të gjithë ata janë anëtarë apo kryetar të 13 komisioneve të ndryshme parlamentare.

Sërish ky angazhim i tyre paguhet me para të tjera shtesë. Edhe kjo vlerësohet 200 euro në muaj. Në këtë mënyrë, rroga e tyre arrin në 1 mijë e 550 euro.

Por deputetët kanë edhe dënime për mungesa. Mospjesëmarrja në një seancë pa ndonjë arsye të fortë, ndëshkohet me 50 euro gjobë.

Kjo ka bërë që shumë shpesh, ligjvënësit vetëm të nënshkruhen dhe pas pak minutash të largohen.

Kjo është rroga që marrin pjesa dërrmuese e deputetëve. Por në kuadër të institucionit më të lartë legjislativ në vend, janë diku rreth dhjetë veta që marrin edhe pak më shumë.

Këta janë anëtarët e Kryesisë së Kuvendit të Kosovës. Paga e tyre mujore është 2 mijë e 200 euro në muaj.

Në disa raste, kur një anëtar i Kryesisë së Kuvendit është edhe kryetar i ndonjë komisioni parlamentar, atëherë rrogës së tij i shtohen edhe 200 euro të tjera.

Pra, paga e tij arrin shifrën e 2 mijë e 400 eurove. Kjo është shifra e xhelozisë ndërmjet deputetëve.

“Kjo nuk është e drejtë, sepse diferenca është shumë e lartë”, thotë një nga deputetët e Kuvendit të Kosovës për Express.

Komisioni që ka propozuar harmonizimin e pagave është Komisioni për buxhet dhe financa. Kryetar i tij është Gani Koci (PDK).

“Nuk ka propozim për rritje të pagave. Kur të ketë, do ta merrni vesh. Kemi kërkuar të bëhet menaxhim më i mirë i pagave dhe mëditjeve”, thotë Koci për Express.

Ai nuk sqaron se çfarë nënkupton me ‘menaxhim më të mirë të pagave dhe mëditjeve’, sepse e mbyll telefonin.

Naser Osmani është anëtar i këtij komisioni. Ai thotë të mos ketë dëgjuar për ndonjë propozim të ri për pagat e deputetëve.

“Propozimi i Komisionit ka qenë në kohën e hartimit të buxhetit që të harmonizohen pagat, por kjo nuk është pranuar nga Kryesia e Kuvendit”, thotë Osmani për Express.

Ahmet Isufi, deputet nga AAK-ja dhe kryetar i Komisionit për mandate, imunitete dhe Rregullore të Punës së Kuvendit, nuk e përkrah ndryshimin e mundshëm të pagave.

“Unë mendoj se deputetët duhet ta kenë pagën në raport me punën që bëjnë dhe angazhimet që kanë dhe po ashtu me dallimin me administratën”, thotë Isufi për Express.

Sipas tij, rritjet që bëhen, ndodhin pa paralajmërim. “Nëse bartet në Kuvendin e Kosovës, unë do të votoj kundër kësaj rritjeje, meqë nuk ka rritje në sektorë të tjerë”, thotë Ahmet Isufi.

Një propozim të tillë për rritje apo harmonizim pagash të deputetëve të Kuvendit të Kosovës, zëvendëskryeministri Hajredin Kuçi lë të nënkuptohet se Qeveria nuk do ta përkrahte shumë.

“Një iniciativë e tillë ende nuk ka ardhur në Qeveri, por sido që të jetë, të gjithë ne duhet të jemi racionalë me gjendjen ekonomike që ka Kosova”, thotë Kuçi për Express.

Sipas zëvendëskryeministrit, Kuvendi merr vendime të pavarura, por ai beson se deputetët do të kenë mirëkuptim me krizën ekonomike në të cilën ndodhet vendi.

Për rritje të mundshme të pagave, ka reaguar të mërkurën edhe Këshilli për Mbrojtjen e të Drejtave dhe Lirive të Njeriut.

“Deputetët dhe zyrtarët e tjerë të Kuvendit janë ndër më të paguarit në rajon, ndërkaq puna dhe angazhimi i tyre mbetet mbrapa atyre që e bëjnë të njëjtën punë në vendet e tjera”, thuhet ndër të tjera në komunikatën e këtij këshilli.

Reagim të ngjashëm për rritje të pagave të deputetëve ka bërë edhe Bashkimi i Sindikatave të Pavarura të Kosovës, duke e quajtur propozim të ngutshëm.

[extreme]

se lexova krejt veq mir kishin bo mi qu edhe ndeti valla ncncncn