Pacolli: Kosovës i mungon demokracia

[Rugova]

Pacolli: Kosovës i mungon demokracia

Besnik Boletini, Bota Sot-Online, 28. 06. 2009

“Është folur për ndërtimin e institucioneve demokratike shtetërore, që fatkeqësisht mungojnë në Kosovë”, tha kryetari i AKR-së, Behgjet Pacolli.
Në Kosovë nuk ka demokraci të mirëfilltë dhe liri të shprehjes, është konkluzioni i konferencës LISEEN-it, tha të dielën kryetari i AKR-së Behgjet Pacolli, i cili mbajtjen e kësaj konferenca në organizim të partisë së tij e quajti të suksesshme. Pacolli tha se AKR-ja është krenare, që i është besuar një organizim i tillë, që ka rezultuar edhe me nxjerrjen e disa konkluzioneve të rëndësishme, përveç tjerash ai për hapjen e kufijve, që do të mundësonte lëvizjen e lirë të njerëzve dhe mallrave. “Kjo konferencë nuk do të kalojë pa i lënë gjurmët e veta, konkluzionet e kësaj konference do të diskutohen edhe më tutje. Si konkluzion i nxjerrë në këtë konferencë është demolimi i kufijve, që do të garantonte lëvizjen e lirë të njerëzve, mallrave, kapitalit në këtë rajon. Kur jemi te mallrat e dimë që lëvizja e mallrave është e vështirë për shkak të ashtuquajturës certifikata e origjinës dhe do te kërkojmë që edhe kjo certifikatë të bisedohet, që të mos këtë nevojë për këtë”, tha Pacolli. Gjithashtu në këtë konferencë është diskutuar edhe për liberalizimin e vizave, që edhe qytetarët e Kosovës të kenë të drejtë që të lëvizin më lirshëm në vendet e BE-së. “Një konkluzion tjetër që është nxjerrë është liberalizimi i vizave, që edhe ne bashkë me shtete të tjera të rajonit të kemi të drejtë si pronar të pasaportave të një shteti të ri që të lëvizim pa kokëçarje edhe të evitojmë pritjet para ambasadave të ndryshme”, u shpreh Pacolli. Ai tha se është diskutuar edhe për ndërtimin e institucioneve demokratike, që sipas tij mungojnë. Pacolli tha se perceptimet e vendeve pjesëmarrëse në këtë konferencë janë se në Kosovë ka mungesë të lirisë së fjalës. “Është fol për ndërtimin e institucioneve demokratike shtetërore, që fatkeqësisht mungojnë në Kosovë. Konkluzioni dhe mendimi i të gjithë pjesëmarrësve është se diçka kohëve të fundit Kosovën po e ngulfat, se qytetarët e ndjejnë vetën në një kontroll të paparë, prandaj, ne do ta ngremë zërin edhe kundër kësaj”, theksoi Pacolli. Kjo konferencë është konsideruar nga Pacolli si një hap drejtë integrimeve evropiane, sipas tij organizime të tilla do të këtë edhe në të ardhmen. “Ne kemi në plan organizimin edhe të një konference ekonomike, që do të mbahet në rajon, në vjeshtë, pra do të bëjmë përpjekje që ta qojnë Kosovën drejtë Evropës së lashtë demokratike”, tha ai.

Duke komentuar mbajtjen e zgjedhjeve në Shqipëri Pacolli shprehu bindjen së këto zgjedhjeve do të plotësojnë të gjitha standardet demokratike. “Ne e përshëndesim Shqipërinë demokratike në hapin që ka bërë në organizimin e zgjedhjeve, unë kam mësuar dhe studiuar shumë dhe kam parë që këto zgjedhje janë demokratike. KQZ-ja e Shqipërisë ka bërë një përgatitje të pa parë dhe jam i bindur se zgjedhjet do të kalojnë mirë. Ndërsa partisë fituese që nga tani i uroj sukses, që të punojë edhe më tutje në ngritjen e nivelit dhe standardeve, sepse qytetari i Shqipërisë ka nevojë për ndihmën e partive moderne demokratike”, përfundoi Pacolli.