Anëtarët dhe Popullata që vendosin të MOS Votojnë,A ka shumë?

[ILMGAP]

Zgjedh të mos votoj--------------49----------------10.77%

Në këtë forum 49 anëtarë vendosën të mos votojnë për asnjëren Parti Politike .
1.A mendoni se do të ketë shumë njëlloj në Shqipëri ?
2.Vizioni ,arsyeja , qëllimi i këtyre anëtarëve që nuk votuan dhe popullatës tjerër që 3.nuk do votoi a mendoni se është më i saktë dhe më i preceptueshëm ?
4.Cilat janë arsyet e juaja që do votoni për njërën nga partitë ?
5.Dhe cilat janë arsyet e juaja që nuk do votoni për asnjëren Parti Politike ?
6.Cilat mendoni se janë arsyet më të forta ?

Nëse nuk dëshironi ti përgjigjeni gjitha pyetjeve , i përgjigjeni veq të parës.Ju Faleminderit.


Me Rrespekt : ILMGAP

[ILMGAP]

Do votojmë apo jo?

Shkruar nga Fejzo Subashi

Fushata elektorale e zgjedhjeve të 28 qershorit ka filluar ethet e saj. Por, unë ndihem në një siklet të madh, e jo vetëm unë, por shumë të tjerë si unë. Të them të drejtën, ky shqetësim që nuk është vetëm imi, desha t’ju bëja prezent edhe juve, mbase i juaji nuk është, por i mijëra lexuesve të tu miku im, në të katër anët e botës, e di mirë që është.Cili është shqetësimi?... A të votojmë më njëzetë e tetë qershor?... Si? Si thatë???... Të votojmë me patjetër, të votojmë me çdo kusht, sepse votojmë për të mirën tonë, votojmë për kombin, për ndryshimin, votojmë për integrimin, votojmë për ujin, dritat, punë e shtëpi. Duhet të bëhemi edhe ne si gjithë Evropa.


Po miku im, edhe unë në këtë pikë nuk do ta zgjas, vërtet jam pak skeptik e mosbesues, por do votojmë se duhet votuar me patjetër. Të gjithë që kanë të drejtë të votojnë, duhet t’i gjejnë mundësitë dhe të votojmë. Kështu bënë dhe miqtë tanë më të mirë, amerikanët, në zgjedhjet presidenciale. Ata morën pjesë masivisht në votime dhe votuan duke thyer çdo tabu. Edhe unë, jam i mendimit të votojmë masivisht e të thyejmë tabu…

Po, kështu më ke thënë edhe para tetëmbëdhjetë vjetësh miku im… Kështu më ke thënë, në çdo fushatë zgjedhore, megjithatë do të votojmë se duhet votuar… Kësaj radhe do ketë “rregull” dhe vota “do të jetë e sigurt”, “nuk do të ketë as dushk”, “e nuk do e njohim më as deputetin”… Pak rëndësi ka kjo… “Jo atë deputet që duam e bën për popullin, por atë që na caktojnë”… - Që po të konkurrojë drejtpërsëdrejti, s’merr as votën e tij dhe jo të gruas që jo e jo. “Pushoni ju, i di partia këto punë, janë të thella!”...
Pra, vetëm të votojmë se duhet të votojmë.
Do të kemi më pak parti, të voglat do i nxjerrim nga loja. E po boll tani më, me parti me gjeneralë, që s’kanë asnjë ushtar. Pra, s’do kemi më Gjinushin, Paskalin, Neritanin, Nardin, Dashin.

Mirë mo, mik mirë, e vendosëm dhe se vëmë në mëdyshje këtë punë, po kemi tjetër hall. Se ti e di, që ne, shqiptarët, vetëm hallet kemi me bollëk, kurse të tjerat me pikatore ose nuk i kemi fare. Për kë të votojmë? Se kështu si po m’i shpjegon ti, si pak parti na mbeten? Për cilën parti të votojmë?

Për Partinë Demokratike?! Shkëlqyer fare, je gjigant, je njësh. Si të mos votojmë për PD-në?! Ajo si ka bërë akoma katër vjet në pushtet e i realizoi të gjitha premtimet e premtuara. Zap e bëri opozitën. Zap them unë, se ajo s’pati opozitë fare. Opozita, vetëm kartonin “pro” kishte këtë legjislaturë. Po në fakt, ata të KOP-it i bënë ca punë… Do thuash për vete, për vete bënë, po kështu do të bëjnë edhe të tjerët… Po, me drita nuk ishim dhe keq, do thuash që ra shi, po ja që këtyre u bie shi vetëm në arën e tyre. Po, rrogat i rritën, pensionet i rritën, pak-pak, po i rritën aman… Po, do thuash ti, janë rritur edhe çmimet. Jo miku im, s’janë në dorë të këtyre, çmimet janë në dorë të tregtarëve... Si për inat, u kemi rritur taksat dhe tatimet. Ca rrugë, mirë apo keq i bëri në këtë mandat kjo qeveri. Si the, vetëm projekte?! Projekte apo ide ç’rëndësi ka?! Rëndësi ka, që kanë prerë shirita e kanë bërë përurime.
Me Evropën dhe me Amerikën i kanë punët mirë, këtë e di mirë unë. Si?! Po i kritikon ambasadori amerikan Withers dhe përfaqësuesit evropianë në Shqipëri?! Rri, o rri, tani mos ja fut kot, unë e kam fjalën për të mëdhenjtë e Amerikës e të Evropës, jo për këta të vegjlit. Po ti merresh me punë, e nuk shikon televizionet e gazetat se ç’thonë. Tani, vërtet ato televizione e gazeta kanë marre miliona lekë reklama nga qeveria e bashkia për vizitat e suksesshme të autoriteteve tona në Evropë e Amerikë, por edhe brenda vendit. Por, të vërtetën e thonë ama, ca ja bëjnë qejfin qeverisë e ca ja bëjnë qejfin opozitës. Ka nga ata që hanë nga të dy krahët, por mençuri është kjo...

Si pozita dhe opozita, e thonë me të madhe: Ne jemi faktorë vendimtarë në botë e sidomos për këto vende. Në fakt, ne jemi, por jemi “problem” ama… Pra, miku im e vendosëm këtë punë: Do votojmë për Partinë Demokratike dhe pikë…

Pa dale-dale, po ç’do thonë miqtë e mi që banojnë në Gërdec? Po miqtë e mi në prokurori, që dyshojnë e si lënë të hetojnë për korrupsion dhe për afera të shumta të qeveritarëve të kësaj qeverie? Ç’do të thonë ish-pronarët? Po biznesmenët, fshatarët, pensionistët, studentët, nxënësit, mësuesit, të pastrehët, emigrantet?... Jo, jo, nuk e bëj dot, nuk mund të votoj për PD-në… Ndihemi të zhgënjyer, prisnim shumë, mbeti me po ata… Harroje këtë punë. Ti për vete, voto për PD, unë jo…

Si more, të votoj për tjetrën ka plot, pa hë?! Të votoj për Partinë Socialiste?! Dale-dale, se nuk e ke keq ti… Edhe Muç Nano, këtë tha: Do të votoj për PS-në. Unë socialist jam, në çdo legjislaturë për PS-në kam votuar. Jam edhe anëtar i saj. Mos thatë se socialist atje vetëm unë kam mbetur, se të tjerë nuk ka më?! Tani, Edi ndonjë gjë s’më ka ofruar, pastaj…. Si dihet… Po s’ka gjë, ai është i vetmi që më dërgoi sms për ditëlindjen. Por, në fakt, ne socialistët kaq kemi nevojë, të tjerat t’i marrin ata. Edhe partia, e tyre është, e jo e socialistëve… Jo zotëri, atje ka ardhur fryma e re… Ka ca pleq, por rrinë sa për kafe dhe bëjnë ndonjë shaka me Edin… S’merren me politikë...

Aaa, të lutem! Është fondacioni “Qemal Stafa”, ideatori e moderatori i kësaj pune… Në opozitë u sollën mirë e nuk e ngacmuan fare Berishën. Çfarë donte e dëshironte ai, bënin e ia jepnin këta. Luftuan në maksimum “bukëshkalët socialistë” Petron e Makbulen. Jo që si pyetën fare, jo që s’u morën mendje, pavarësisht se ishin më të votuarit, u thanë: “Larg duart nga politika e vjetër”. Nuk bënë as edhe një analizë. Rri, rri, iku në Partinë Socialiste analiza e politika e hapur, demokracia e hapur, ikën ato e na morën të keqen bashkë me Nanon… Ik ore, se nuk i duam, ç’është kjo, flasin të gjithë e s’merr vesh asnjë, mjafton flet një e dëgjojnë të gjithë... “Vetëm një di”, s’jemi të tërë “të ditur”… S’ia kisha unë fajin Nanos që e hapi partinë, që mori e kë nuk mori… Rri, se e bëri lesh e li partinë, ai e kishte fajin...

Tani, socialistët e kanë më të lehtë kur të vijnë në pushtet. Nuk do t’i luftojë “MJAFT!”-i i Erionit, se e kanë partner e nuk do të dëgjojnë më parullat “Ik, ik, ik!”. Si, iu mbaruan paratë Erionit?! Po kjo dihet, ndaj i hyri politikës me themel...

Por, projektet dhe politikat, socialistët duken sikur i kanë më serioze. E kanë gjetur gjuhën me ata 12-14-16-vjeçarët. Si?! Ata nuk kanë moshën për votim?! Vërtet s’votojnë, por do të bindin prindërit e tyre në Amerikë, Itali, Gjermani, Greqi, që të bëjnë të pamundurën e të vijnë e të votojnë atë ditë. Lidhur me nxënësit, do t’i marrin me autobus, që nga fshatrat e do t’i sjellin të studiojnë në qytet, të jenë të barabartë të gjithë... Se këta në qytet, se mos mësojnë… Po le të vijnë, se këtu ka lokale e disko, të paktën le të pinë ndonjë kafe e të argëtohen edhe ata. Megjithëse, nuk ka rrugë as për traktorë në fshatra e jo më për autobus. Po ç’thua ore?! Nëpër fshatra vetëm pleq ka, kurse ata fëmijë që janë, janë të ngujuar e nuk dalin fare…

Këta socialistët janë edhe specialistë… Se kam thënë unë… Ç’rëndësi ka kjo?! Rëndësi ka që ata dinë të marrin për vete, s’janë si Saliu. A nuk morën për tetë vjet e s’u hyri as edhe një gjemb në këmbë, e jo…
Në fakt, programin e kanë të mirë mbi pesëqind faqe program thonë, që kanë bërë. Kur të arrij që populli ta lexojë, atyre u ka mbaruar edhe mandati i dytë. Le që, ata s’e kanë publikuar akoma, thonë se do ta bëjnë prezent dhjetë ditë para votimeve. Përse?! Kanë frikë se jua vjedhin… Kush?! Se ç’janë e se ç’është një LSI, kanë shumë frikë nga ata, se do “u marrin idetë”. Jo, o, jo. Lërë atë muhabet. Është garant që do jua vjedhin, ata s’kanë lënë “socialist” pa u marrë, e jo programin.

Ti e di mirë, që unë jam nostalgjik dhe Partia Socialiste tani ka mbetur vetëm me ish-fëmijët, nipërit dhe pinjollët e ish-drejtuesve të Luftës Partizane, të Byrosë Politike, të sekretarëve të Parë, të kryetarëve të Komitetit. Të tjerëve u kemi treguar vendin. Kjo është hapja e partisë. Kanë marrë garanci nga aleati më i madh, Gjinushi, se s’do t’u sjellë shqetësime. Tre deputetë dhe dy ministri kërkon, e poste drejtorësh pa kufi. Hajde pazar, hajde e mos voto po deshe... Sikur s’kemi bërë edhe më parë kështu...

Kam informacion të sigurt, se qeverinë do ta kenë me kosto shumë të vogël. Kanë kopjuar komplet Berishën, nuk i kalojnë njëmbëdhjetë vetë. Ata që do jenë ministra, do jenë vetëm për konferenca shtypi, takime e pritje me gazetarët, edhe këto kur të jetë i zënë kryetari, se i bën vetë ai të gjitha. Pastaj, ne vetëm një çoban duam, se po u bën dy, ngordhin fare bagëtia. Pa le që është edhe një variant ose më mirë, kanë edhe një variant tjetër. Çfarë varianti? Të mos ndërtojmë fare qeveri. Atë që kemi në bashki, e kalojmë te godina e Kryeministrisë. Kështu që lirojmë edhe një godinë për të pastrehët. Realizohet edhe dëshira e meraku i LSI-së për buxhetin, zgjidhim hallet e ca familjarëve për strehimin. Të lutem, thuaja këtë Metës.

Kush do jetë qeveria e ardhshme socialiste? Kush do jenë ministrat? Tashmë ajo dihet. Se opozita e ndërton qeverinë hije, që ditën që del në opozitë. Jam shumë i sigurt, se do jenë: Fatmiri, Sajmiri, Shpëtimi, Andisi, Mimi, Naçi, Kaçi, Baçi, Namiku, Erioni, Arta e Paskali… Po këta kanë qenë dhe më parë?! Këta ishin tetë vjet. Pse nuk i bënë reformat?! Pse nuk na i zgjidhën hallet? Pse nuk na futën në Evropë? Pse nuk sollën drita? Çfarë bënë për arsimin, për rrugët, për ujin?! A nuk janë në qeveri? Pse, nuk i kanë ata bashkitë kryesore, ku është edhe popullsia më e madhe?! Prapë këta, prapë do na gënjejnë?! Prapë duhet t’i besojmë?! Nuk ka të tjerë Shqipëria, nuk ka të rinj?! E pabesueshme... Këta, kanë tetëmbëdhjetë vjet. Këta deputetë, këta biznesmenë, këta drejtorë, këta edhe ministra... Këta dhe vetëm këta… Të gjitha. Po ne?! Kjo është politikë e re?! Ky është ndryshimi në këto zgjedhje?! E po, hajde po deshe e mos e voto…