Kurti: "Vetevendosjes" nuk i ka ikur koha, per zgjedhjet vendosim me vone

[Val9]

Shpallja e pavarësisë mund t’i ketë shtyrë disa njerëz të mendojnë se Lëvizja “Vetëvendosje” nuk duhet më. Por, do të jemi këtu për pengimin e decentralizimit dhe privatizimit, e më tutje edhe për afrimin e Kosovës dhe Shqipërisë. Në zgjedhje, mund të konkurrojnë edhe lëvizjet, jo veç partitë. Për pjesëmarrje në zgjedhje, do të vendosim më vonë. Albin Kurti flet për Express.

Nga Artan Behrami - artan.behrami@gazetaexpress.com më 15.06.2009 në ora 8:00
"…në zgjedhje mund të konkurrojnë edhe Lëvizjet, jo vetëm partitë…"

Katër vjet pas themelimit të “Vetëvendosjes”, lideri i saj, Albin Kurti, mendon se pa këtë Lëvizje - shoqëria në Kosovë do të mendonte ndryshe.

Gjatë këtyre katër vjetëve, thotë se ka pasur rritje dhe rënie, ndërsa pranon se shpallja e pavarësisë ka krijuar një ide tek një numër i njerëzve se “Vetëvendosje” nuk duhet më.

“Por, kur është parë nga të gjithë se pavarësia ua bëri jetën më të mirë vetëm ministrave e kryeministrit, por jo edhe qytetareve, mendoj se po ndodh njëfarë rikthimi tek Lëvizja”, thotë ai.

Albin Kurti konsideron se hyrja në institucionet duhet të bëhet nga pozita e një qytetarie aktive, e një shoqërie dinamike, ndryshe nga kjo që kemi sot, dhe e cila do të ishte e aftë që të ndërtojë urën me institucionet e sistemit.

Express: Me gjithë aksionet, protestat dhe demonstratat, për këto katër vjet të ekzistimit të Lëvizjes “Vetëvendosje”, çfarë mendoni se keni arritur?
Albin Kurti: Mendoj që shoqëria në Kosovë do të mendonte ndryshe, sikurse nuk do të ishte Lëvizja “Vetëvendosje”. Ne kemi arritur në masë të konsiderueshme të bëjmë që qytetarët e Kosovës, kur analizojnë politikën, mos të kenë parasysh vetëm fuqitë e mëdha, por gjithnjë e më tepër vullnetin dhe interesat e tyre. Disa procese negative kemi arritur t’i ngadalësojmë, jo t’i ndalim plotësisht. Por, kemi pasur edhe sukses, ta zëmë në nxitjen dhe organizimin e padëgjueshmërisë qytetare, duke filluar prej faktit që fshati Cernicë nuk ndodhet më në komunën e Parteshit, e deri të mënyra se si unë kam dalë prej burgut. Atëherë 600 avokat të Odës së Avokatëve të Kosovës i thanë jo thirrjeve të Salustros që të më mbrojnë mua. Ky ishte momente kur padëgjueshmëria kolektive e avokatëve bëri që mua të mos më mbajnë më në burg. Pra, kemi dhënë shumë shembuj se kur padëgjueshmëria bëhet e përgjithshme, atëherë ka edhe rezultate.

Express: Ju keni qenë kundër mënyrës së shpalljes së pavarësisë, kundër Pakos së Ahtisaarit, kundër decentralizimit, megjithatë ende nuk keni arritur që t’i stoponi ato...
Albin Kurti: Edhe po të mundej Lëvizja “Vetëvendosje” që t’i stopojë proceset negative, shumë më drejtë dhe më mirë është që ky stopim të bëhet nëpërmjet qytetarëve të Kosovës. Pra, “Vetëvendosje” ndodhet këtu ku ndodhët, që në njërën anë të vetëdijesojë njerëzit për të këqijat që vijnë nga regjimi, dhe në anën tjetër t’i organizojë të pakënaqurit për ndaljen e këtyre të këqijave. Lëvizja “Vetëvendosje” nuk i ndalë dot proceset negative, pa qytetarët e Kosovës – të cilët duhet ta kuptojnë se demokracia nuk është kutia e votimit, por është artikulimi i përditshëm i asaj që beson se është e drejtë dhe e vërtetë.

Express: Këta qytetarë e kanë rritur përkrahjen për “Vetëvendosjen”, janë bërë më shumë, apo ka një rënie pas shpalljes së pavarësisë?
Albin Kurti: Gjatë këtyre katër vjetëve ka pasur rritje dhe rënie. Por, nëse do ta shikonim grafikun e përkrahjes, nga një distancë pak më e madhe, atëherë mendoj që përgjithësisht ka rritje të vazhdueshme. Sigurisht që shpallja e pavarësisë ka krijuar idenë, tek një numër i njerëzve, që Lëvizja “Vetëvendosje” do të jetë më pak e nevojshme. Mirëpo, sot, kur ne rrezikohemi kaq shumë prej privatizimit dhe decentralizimit, kur është parë nga të gjithë se pavarësia ua bëri jetën më të mirë vetëm ministrave e kryeministrit, por jo edhe qytetareve, mendoj se po ndodh njëfarë rikthimi tek Lëvizja “Vetëvendosje”.

Express: Muajt e fundit kanë munguar protestat masive. A nuk ka më shkas për të protestuar?
Albin Kurti: Pas shpalljes së pavarësisë ka pasur një përudhë kur ka qenë më i vështirë mobilizimi i njerëzve, sepse pati një lloj iluzioni se u krye puna. Por, me demonstratat që pasuan në muajin nëntor dhe dhjetor kundër Gjashtëpikëshit, mendoj që ka ndodhur një rikthim i gatishmërisë së njerëzve për të protestuar dhe demonstruar. Vjeshta e ardhshme, kjo veshtë që vjen, do të jetë periudha kur do të shohim gjithnjë e më shumë angazhime qytetare në rrugë, mbase jo vetëm nga Lëvizja e jonë.

Express: Cilat do të jenë sfidat e katër-pesë vjetëve të ardhshme të “Vetëvendosjes”?
Albin Kurti: Do t’i kisha përmendur tri. E para, pengimi i procesit të decentralizimit. E dyta, pengimi i zbatimit të privatizimit neo-liberal. E treta, krijimi i lidhjeve sa më organike në aspektin politik, ekonomik, shoqëror, kulturor, qytetar e rinor, ndërmjet Kosovës dhe Shqipërisë, por edhe të shqiptarëve në përgjithësi në Ballkan.

Express: A do të mbeteni një Lëvizje apo në të ardhmen mund të shndërroheni në parti politike?
Albin Kurti: Lëvizja “Vetëvendosje” nuk konsideron të shndërrohet në parti politike. Ndërkaq, sa i përket pjesëmarrjes në institucionet e sistemit, nuk mund të them tash se çfarë do të bëjmë në të ardhmen. Por, ne gjithmonë theksojmë faktin se Qeveria dhe regjimi ndërkombëtar në përgjithësi, nuk po i organizojnë zgjedhjet qendrore, që do të ishte thelbësore, por vetëm ato lokale, sepse janë të interesuar që ta copëtojnë Kosovën me decentralizim dhe ta shesim me privatizim, për ta përjetësuar vetën në pushtet dhe për të bërë shumë para, që është specialitet i tyre. Mbi të gjitha, Lëvizja konsideron se hyrja në institucionet e sistemit duhet të bëhet nga pozita e një qytetarie aktive, e një shoqërie dinamike, ndryshe nga kjo që kemi sot, dhe e cila do të ishte e aftë që të ndërtojë urën me institucionet e sistemit, nga të cilat aktualisht na ndan një humnerë.

Express: Përmendët pjesëmarrjen në institucione. Mund të ndodhë kjo, edhe nëse nuk shndërroni në parti politike?
Albin Kurti: Po në zgjedhje mund të konkurrojnë edhe Lëvizjet, jo vetëm partitë. E qartë, inkuadrimi shkon përmes zgjedhjeve, por edhe një herë po them që paralelisht me këto zgjedhje lokale që u paralajmëruan, e me ato që u shtynë, po ndodhin edhe disa zgjedhje tjera nëpër restorante dhe hotelet e Prishtinës, ku kryeministri me një apo dy ministra, me një këshilltar apo dy, merret vesh me ndërkombëtaret për copëtimin e Kosovës e shitjen e saj. Pra, mua shumë po më brengosin këto zgjedhjet tjera...

Express: A mund të pritet që në zgjedhjet e përgjithshme edhe Lëvizja “Vetëvendosje” të garojë në to?
Albin Kurti: Ne nuk e kemi hapur këtë diskutim në Lëvizjen tonë dhe nuk mund të themi asgjë për këtë. Do të vendosim më vonë...

[Dit']

tani nuk eshte klima e duhur qe vetevendosja te futet ne politike mirepo ne vitet e ardhshme kur te vine gjeneratat e reja dhe keto te vjetrat qe votojne me sy mbyllur sjane me atehere do te jete shume me bukur.