Pse duhet hequr Rama?

[goldian]

jashte teme po jam kurioz
me anastas angjelin
ndre legisin
e ca kan ken ket ministrat e nanos
ca beht me to?

[limbo]

Kolektorët janë shkatërruar, Tirana po shuhet

Tirana, qyteti me më shumë se një milionë banorë vazhdon të funksionojë me rrjetin e vjetër të kanalizimeve të ujërave. Këto kanalizime, para viteve ’90 u ndërtuan për një kapacitet prej 25-300 mijë banorë, ndërkohë që sot Tirana popullohet nga rreth 1 milionë banorë.

Para pak kohësh, drejtori teknik pranë Ujësjellës-Kanalizimeve të Tiranës, Ferdinand Petrela, ka pranuar se rrjeti i kanalizimeve, aktualisht, në Tiranë është i mbingarkuar për shkak të shumëfishimit të ndërtimeve dhe popullsisë. Kolektorët në Tiranë janë ndërtuar në vitet ’50 dhe që nga ajo kohë nuk janë ndërtuar të tjerë, me përjashtim të ndonjë ndërhyrjeje të vogël.

Ndërkohë që periferia e kryeqytetit funksionon pa një rrjet kolektorësh të ujërave. Një gjë e tillë e vë qytetin pra situatave alarmante në ditët me shi, ku përmbytjet janë të paevitueshme në të gjitha zonat. Prej më shumë se 7 vjetësh, në Bashkinë e Tiranës qarkullon një projekt për ndërtimin e rrjetit të kanalizimeve dhe kolektorëve, por deri më tani kjo gjë ka mbetur në dokumente.

Ndaj, Tirana është një qytet që po ndërtohet mbi një taban të vdekur, i cili nga momenti në moment mund të shembet. Shtesat e shumta të pallateve, dyqanet, lokalet e ndërtuara rishtas mbi kolektorë dhe mbi pusetat komanduese, mungesa e tubacioneve kulluese të ujërave të shiut janë problemet që ka Blloku dhe zona përreth tij deri te shkolla “Vasil Shanto”. “Në të gjithë Tiranën si dhe në zonën e Bllokut dhe në Tiranën e re, rrjeti i kanalizimeve është i amortizuar. Kullimi i ujërave në rrugët kryesore funksionon disi, pasi ujërat e bardha derdhen në kanalet e ujërave të zeza, por brenda lagjeve nuk ekzistojnë fare tubacione kulluese.

Në sistemin e kanalizimeve dhe të kolektorëve që janë ekzistues në Tiranë nuk është bërë as ndërhyrja më e vogël deri më tani. Tirana ka po kolektorë që ka pasur edhe atëherë kur popullohej nga rreth 200 mijë banorë ndërkohë që sot ajo popullohet nga rreth 1 milion banorë ndaj edhe kolektorët janë në diametra minimalë.

1. Pellgu ujëmbledhës 1- Shtrihet në afërsi të Liqenit Artificial, i cili shkarkon ujërat e shiut dhe ujërat e zeza direkt në Lanë, me anë të tre tubacioneve me diametër DN-1000. Rrjetit të kanalizimeve të këtij pellgu nuk i dihet fati dhe besojmë se do të jetë një problem që do të dalë së shpejti për t'u zgjidhur. Kjo bëhet me kritike, duke pasur parasysh densitetin e ndërtimeve në këtë zonë. Për këtë pellg janë bërë përpjekje për të sistemuar ujërat e shiut, sipas rrugëve që do të hapeshin sipas planeve rregullues, por pa rezultat, se rrugët jo vetëm që nuk u hapen, por u bllokuan dhe më shumë nga ato ekzistuese.

2. Pellgu ujëmbledhës 2 - Grumbullon ujërat e zonës së Selitës që përfshin ndërtimet e viteve të fundit, të realizuara mbështetur në planin rregullues. Ujërat e shiut të këtij pellgu derdhen në Lanë, ndërsa ujërat e zeza derdhen në kolektorët anës Lanës, me anë të një kapërderdhësi të ndërtuar gati në fund të kolektorit. Pellgu ujëmbledhës me shkarkim në pikën 1. Për këtë pellg ujëmbledhës shërbejnë kanalizime të diametrave të vegjël dhe një tubacion me diametër DN-1000 për të cilin nuk ka të dhëna. Ujërat e këtij pellgu ujëmbledhës shkarkojnë në Lanë sipas mundësisë.

3. Pellgu ujëmbledhës me shkarkim në pikën 2- Për këtë pellg ujëmbledhës ka shërbyer një kanalizim DN-1000, i cili i bllokua në vitin 2001.

4. Pellgu ujëmbledhës me shkarkim në pikën 3- Është pellgu që përfshin zonën më të vjetër të banuar, Selitë. Ky pellg i ka derdhur ujërat e zeza dhe të shiut në lumin e Lanës me anë të një tubacioni DN-1000, i cili kalonte në shtratin e vjetër të përroit. Në vitin 1992 u bë një rikonstruksion i këtij tubacioni, duke e postuar atë, por diametri ka mbetur përsëri DN-1000. Derdhja e këtij pellgu është derdhja 3.

5. Pellgu ujëmbledhës me shkarkim në pikën 4 - Përfshin zonën ndërmjet zonës së vjetër të banuar, të Selitës dhe atë të Kopshtit Botanik. Sipas rrjedhjeve natyrale të mëparshme, ky pellg ka derdhur ujërat në një kanal të hapur që bashkohej me kolektorin e shkarkimit të ujërave të Liqenit Artificial.

6. Pellgu ujëmbledhës me shkarkim në pikën 5- Përfshin pellgun ujëmbledhës të liqenit të Kopshtit Botanik dhe një pjesë të kodrave në anë të tij. Sipas rrjedhjeve natyrale të mëparshme, ky pellg ka derdhur ujërat në një kanal të hapur që bashkohej me kolektorin e shkarkimit të ujërave të Liqenit Artificial.

Diga e liqenit mund të shpërthejë për herë të dytë

kryeqytetit po i kanoset një rrezik i madh, diga e liqenit Artificial të Tiranës nga momenti në moment mund të shpërthejë sërish. Zona e Tiranës së re e cila nuk ka as edhe një kanalizim dhe as edhe një kolektor ka mundësi që të rishohë për herë të dytë tmerrin e përmbytjes me sy. Ndërtimet e reja që po bëhen në afërsi të digës së liqenit ja kanë bllokuar edhe më shumë kanalet kulluese ndaj diga ka mundësi të shpërthejë sërish dukë vënë në rrezik jetën e mijëra banorëve të Tiranës së re.

Mjafton të kujtojmë natën e 19 shtatorit të vitit 2002 kur rreth orës 4 të mëngjesit, diga e liqenit Artificial u hap. Si pasojë e hapjes së portës së madhe të digës, u përmbyt një pjesë e zonës së Tiranës së Re.

Dëmet e shkaktuara nga përmbytja qenë të rënda. Ato kapnin shifrën e mbi 1 miliard lekëve. Banesat e kateve të para si dhe dyqanet u mbushën me ujë. Si përfundim, fajin e morën kolektorët. Bashkia u shpreh se një nga shkaqet e vërshimit të ujit nëpër rrugët e qytetit, ishte edhe bllokimi i kolektorëve. Por gjatë hetimeve u vu re se arsyeja e shpërthimit të ujit, nuk ishte fare banale. Pas hapjes së portës, mosfunksionimi i rregullt i saj bëri të mos mbyllej në kohë. Porta u bllokua dhe kështu uji vërshoi nëpër rrugët e qytetit.

Tani jemi sërish në të njëjtat kushte kur kolektorët janë të bllokuar dhe thuajse jashtë funksionit ndaj diga e liqenit po mbahet në fije të perit.

http://www.sot.com.al/index.php?opti...ticle&id=14040

[limbo]

Goxhaj denoncon në prokurori: “Falangat e Edi Ramës dogjën bunkerin”

Lëvizja "Zgjohu" ka reaguar dje duke përgënjeshtruar lajmin e dhënë nga Agjencia e Lajmeve "Balkanweb" mbi kallëzimin e Altin Goxhaj për djegien e bunkerit në qendër të Tiranës.

“Sot Agjencia e Lajmeve Balkanweb ka përhapur një lajm të rremë mbi gjoja një denoncim të Policisë Tiranë në Prokurorinë Tiranë ndaj Altin Goxhaj, i cili “do përballet me akuzën e prishjes së rendit dhe qetësisë publike. Ky është një lajm ë pavërtetë dhe në dukje tendencioz pasi bën fakt të kryer që djegia e bunkerit në qendër të Tiranës është vepër e Altin Goxhajt”, thuhet në njoftimin për shtyp nga Lëvizja “Zgjohu”.

Sipas të njëjtave burime thuhet se Policia Tiranës, përkundrazi, po ndihmon në zbardhjen e çështjes pas vetë denoncimit të Altin Goxhajt për të gjetur autorët që shkatërruan dhe dogjën në mënyrë të dhunshme në mes të Tiranës simbolin e protestës së lëvizjes “Zgjohu” kundër Edi Ramës: Një Bunker Polisteroli i cili ishte planifikuar të qëndronte në mes të Tiranës për muaj të tërë me qëllim për t’i treguar të gjithë qytetarëve se kush është politika e Edi Ramës për Tiranën, një bunker betoni.

Në njoftimin për shtyp të lëvizjes “Zgjohu”, ndër të tjera thuhet se djegia e bunkerit në fakt është një sulm i pastër kundër një institucioni: Institucionit të protestës qytetare që garantohet si një nga të drejtat më themelore të Kushtetutës së Shqipërisë. Ata që e dogjën në fakt e kishin planifikuar mirë pasi e realizuan këtë gjë fill pas përfundimit të procesit të votimit në mënyrë që të tensiononin situatën dhe të akuzonin për këtë qëllim avokatin Altin Goxhaj me qëllim që ai të ndalohej nga forcat e rendit dhe të mbahej në dhomat e paraburgimit që gjatë fitores së presupozuar të Edi Ramës të jepej një shembull publik se ku do të përfundojë edhe e vetmja lëvizje qytetare që ka kurajon dhe guximin të denoncojë mafien bashkiake të lejeve te ndërtimit”.

Sipas Lëvizjes “Zgjohu”: “Ata që e dogjën bunkerin janë falangat e dhunës dhe terrorit, o përkasin të njëjtës kategori si falangat që dhunuan dy ditë më parë dy aktivistë të Lëvizjes “Zgjohu” gjatë protestës simbolike përballë këndit të përmbytur të lojërave në mes të Tiranës.

Kjo dhunë e përsëritur dhe në rritje ndodhi dy ditë më parë kur Tirana ishte e përmbytur nga bllokimi i kolektorëve dhe kanalizimeve të ujërave të bardha të qytetit ku ndërsa dhjetëra makina kishin mbetur nën ujin e shiut, aktivistë të Lëvizjes “Zgjohu” vendosën një banderolë me sloganin: “Rama çohu shko në punë”, pasi qyteti po përmbytej dhe Bashkia kishte muaj që nuk kishte kush ta drejtonte pasi të gjithë ishin në fushatë”.

Sipas anëtarëve të kësaj lëvizje, “falangat e dhunës së Edi Ramës sulmuan dhe goditën aktivistët e Lëvizjes “Zgjohu” duke shkatërruar edhe banderolën me sloganin përkatës dhe e gjitha kjo pamje është e filmuar dhe është dorëzuar në polici dhe autorët janë në kërkim pas kallzimit në Polici të aktivistëve të kësaj lëvizje.




Lëvizja “Zgjohu”: Ja lajmi i rremë i dhënë nga agjencia Balkanweb

Dogji bunkerë kartoni, dosja në prokurori
Dërguar më: 03/07/2009 - 16:47

Ditën e zgjedhjeve, Altin Goxhaj që drejton në Tiranë një lëvizje me emrin “Zgjohu”, në mënyrë simbolike dogji para Galerisë së Arteve disa bunkerë tip kartoni, në shenjë proteste ndaj kreut të bashkisë, Edi Rama.
Tiranë

Është dërguar në Prokurorinë e Tiranës dosja për Altin Goxhaj që drejton në Tiranë një lëvizje me emrin “Zgjohu”. Ditën e zgjedhjeve, Goxhaj në mënyrë simbolike dogji para Galerisë së Arteve disa bunkerë tip kartoni, në shenjë proteste ndaj kreut të bashkisë, Edi Rama. Goxhaj do përballet me akuzën e prishjes së rendit dhe qetësisë publike. Ndërkohë mësohet se vetë Goxhaj nuk i ka pranuar këto akuza.

http://www.sot.com.al/index.php?opti...ticle&id=14179

[toni007]

nuk ka personalitetin e duhur per te udhehequr PSne ....
njeri pa idee

[limbo]

Asnjë parking publik në Tiranë, bashkia gjobit qindra makina në ditë

E pamundur të parkosh në Tiranë! Është stresi që nuk i gjendet "kurë". Makina nuk po shihet më as si mjet pune e as si luks, por si një ngarkesë për t'u hedhur diku. Sapo e ndez dhe vë duart në timon, harron se për ku je nisur, pasi pyetja se "ku do parkoj sot?" shuan çdo mendim tjetër.

E gjithë kjo situatë nuk ka nevojë për shembuj, pasi ne jemi vetë shembujt e përditshëm të Tiranës, viktima të premtimeve disavjeçare të kryebashkiakut Rama. Herë me ide të parkimeve nën tokë e herë me ato mbi tokë, përfundimi ka qenë i njëjtë: ASGJË! Madje, duke qenë se numri i makinave ka ardhur gjithnjë e në rritje, në fakt duhet theksuar se situata është përkeqësuar.

Fjalët e bukura të kryebashkiakut në rastin konkret mbase i besojnë vetëm ata që nuk kanë patentë. Por edhe këta sytë në ballë i kanë… Parkimet e nëndheshme apo format e tjera të tij janë vetëm në fjalimet elektorale të kryebashkiakut. Janë të njëjtat, vetëm se disa herë u është ndërruar radhitja. E tillë ishte edhe zgjidhja e parkingjeve nëpërmjet Planit Francez për rregullimin e qendrës së Tiranës.

Deri tani asgjë nuk është bërë, veç vënies së tabelave dhe sinjalistikave të tjera rrugore, ku thuhet fort "STOP". E gjithë panorama e stresit të çon në konkluzionin se kryeqyteti është në izolim. Tirana është në shtetrrethim.


Ku janë parkimet nëntokësore?

Që në fundin e janarit të vitit 2007, u premtua nga ana e Bashkisë së Tiranës se më në fund kryeqyteti do të kishte parkingje të nëndheshme, që do të shërbenin për zgjidhjen e këtij problemi për të gjithë qytetarët. Ka kaluar mesi i vitit 2009 dhe, rrjedhimisht edhe në fund të premtimit të kryebashkiakut, dhe ndodhemi ende para së njëjtës situatë, por tashmë të përkeqësuar. Në Tiranë nuk ka as parkingje nëntokësore dhe as mbitokësore.

Ishte vetë kryetari i Bashkisë, Edi Rama, i cili më datë 31 janar 2007 konstatoi se: "Bashkia tashmë ka gati prej kohësh një program të gatshëm për parkingjet e nëndheshëm. Më në fund jemi gati që të nisim ndërtimin e dy parkingjeve të tillë sipas Planit të Qendrës së Tiranës, ndërkohë që do të ndërtohen 12 të tillë në zonën e qendrës (Zona brenda Unazës ekzistuese), deri në vitin 2011". Ka kaluar mesi i vitit 2009. Vallë të ndërtohen këto 14 parkingje në dy vitet e ardhshme, kur gjithçka është në fazën e projekteve dhe premtimeve?!


Qytetarët nuk durojnë dot më nën këtë izolim të qytetit

Shqetësimet e banorëve të kryeqytetit janë të pafundme lidhur me parkingjet. Ata tashmë flasin të irrituar dhe shprehen se e kanë të pamundur që të durojnë më gjatë një situatë të tillë kaq stresuese dhe shqetësuese.

Ermir Balla, 28 vjeç, që jeton në Tiranë prej më shumë se 10 vjetësh, shprehet se: "Është absurde një situatë e tillë. Duhet të ndihesh me fat nëse gjen një vend ku të parkosh makinën, qoftë edhe disa kilometra larg vendit ku duhet të shkosh. Këtu duket sikur askush nuk punon dhe nuk merr asnjë masë për përmirësimin e kësaj situate. Skandal i vërtetë, në asnjë vend nuk ndodh diçka e tillë".

Ndërsa një tjetër kryeqytetas, Altin Aliaj, shprehet se: "Këta dinë vetëm të bëjnë lojë fjalësh, t'i hedhin fajin njëri-tjetrit dhe të japin justifikime pafund. Mjerë ne që nuk gjejmë as edhe një vend për të lënë të sigurt makinën tonë. Qendra është izoluar totalisht, izolim i bërë peshqesh nga Bashkia dhe nga biznesmenët, të cilët i zënë vendet me karrige, stola apo bombola gazi dhe askush nuk merr masa ndëshkimore për to.


SOS Tirana, parkim vetëm në hapësirë

Bashkia e Tiranës tani ka nxjerrë urdhra të reja për të censuruar kryeqytetasit. Sikur të mos mjaftonin të gjitha kufizimet që u janë bërë qytetarëve të Tiranës, tani u shpall edhe një tjetër kufizim. Dy ditë në javë nuk mund të parkosh makinën në anën e djathtë të rrugës nga ora 22:00-08:00.

Nëse deri tani çështja e parkimit në rrugët e kryeqytetit ishte një stres për të gjithë qytetarët, tani e tutje do të kthehet në një tmerr të vërtetë. Kjo do të thotë më shumë gjoba, më shumë taksa të vjelura, më shumë bllokime rrotash, më shumë punë për karoatrecët që të marrin makinën, më pak parkingje, më pak hapësirë të lirë.


Urdhri i Bashkisë: Dy ditë në javë nuk parkohet në krahun e djathtë

Bashkia e Tiranës në bashkëpunim me Policinë e Qarkullimit Rrugor kanë vendosur se çdo ditë të hënë dhe të premte, nga ora 22.00 deri në 08.00, në zbatim të tabelës së vendosur, qytetarët duhet të parkojnë automjetet në krahun e majtë të rrugës dhe jo në krah të djathtë, siç është bërë deri më tani. Ndryshimi i krahut të parkimit është bërë për plot 16 rrugë kryesore të Tiranës. Ndërsa për disa rrugë të tjera të kryeqytetit nuk janë të përcaktuara e hëna dhe e premtja si ditë të ndaluara për parking, por janë e marta dhe e enjtja.

Rrugët në të cilat gjatë natës ndalohet parkimi i automjeteve nga ora 22:00-08:00 ditën e hënë dhe të premte janë: Rruga "Brigada 8", "Nikolla Tupe", "Pjetër Bogdani", bulevardi "Zhan D'Ark", bulevardi "Bajram Curri", Rruga e Durrësit, Rruga e Kavajës, "Gjin Bue Shpata", "Perlat Rexhepi", "Sami Frashëri", "Mine Peza" dhe "Myslym Shyri". Ndërkohë, rrugët në të cilat gjatë natës ndalohet parkimi në krah të djathtë ditën e martë dhe të enjte janë: rruga "Ismail Qemali", "Vaso Pasha", "Luigj Gurakuqi" dhe "Ded Gjo Luli".

Këto kufizime janë bërë me pretekstin që t’u lihet hapësirë punonjësve të pastrimit dhe mirëmbajtjes së rrugëve për të t’i pastruar ato. Në një kohë kur rrugët e kryeqytetit nuk lahen, por vetëm sa fshihen me pluhur me disa fije bari të thata, që Bashkia i quan fshesa...


Kufizimet e parkingjeve një mekanizëm për të vjelë taksa

Herë pas here drejtuesit e Bashkisë së Tiranës publikojnë faktin se po boshatiset arka e parave. Në raste të tilla është gjithmonë e pritshme që të publikohen rregulla dhe kufizime të reja, të cilat shoqërohen me vjelje të taksave dhe boshatisje të xhepave të qytetarëve. Edhe në këtë rast është krijuar e njëjta situatë. Me sa duket tani Bashkia ka vendosur që ta mbushë arkën, meqenëse ka shteruar buxheti dhe një ndër mënyrat më të mira është ndalimi i parkingjeve që domosdoshmërisht i detyron qytetarët që të thyejnë rregullat dhe përbëjnë raste për vënie gjobash. E në këtë rast, funksionon më së miri fushata e dalë para disa muajsh, që ka ndërmarrë bashkia të quajtur “Bllokim rrote”.

E tani kufizimet e parkingjeve në pjesën më të madhe të rrugëve kryesore të Tiranës në krahun e djathtë, duken si një mekanizëm i mirë për të vjelur taksat.


Ndalohen parkingjet në një vend ku nuk ka të tilla

Sipas çdo ligji, si dhe sipas çdo rregulli, i bie që, nëse të ndalohet një vend parkimi, nënkuptohet se të hapet një tjetër vend për të parkuar makinën tënde. Në fakt, këtë teori e dinë edhe punonjësit e Bashkisë, por në praktikë nuk e zbatojnë aspak. Sepse, herë pas here në rrugët e Tiranës shtohen tabela të reja, të cilat njoftojnë se nuk lejohet parkingu, por nga ana tjetër kurrë nuk vendosen ato që e lejojnë parkimin e automjeteve. Tani kryeqyteti ynë është pushtuar nga sinjali Stop dhe përveç atij nuk sheh gjë tjetër. E si mund të ndalohet parkimi në një vend, ku nuk ka një lejim parkimi?!


Ku do parkojmë? Bashkia mundëson vetëm dy miniparkingje

Për të gjithë kryeqytetin Bashkia ka mundësuar vetëm dy miniparkingje, ku njerëzit mund të parkojnë pa frikë makinat e tyre. Këto hapësira për parkim të lejuar ndodhen në anë të Bibliotekës Kombëtare dhe në anë të Radio Televizionit Shqiptar. Por edhe nëse do të parkosh në këto dy zona kurrë nuk do të kesh një vend të lirë, pasi hapësirat janë aq të vogla sa kurrë nuk mjaftojnë për fluksin e makinave të kryeqytetit.

Edhe pse janë parkingje nga ana e Bashkisë, ata sërish i kanë çmimet e njëjta me të privatit. Çmimi në parkingjet private është 100 lekë të reja dhe në parkingjet e Bashkisë është po 100 lekë të reja. Ndërkohë që ka disa kohë që po diskutohet për plane parkingjesh të nëndheshme por në realitet ato plane kanë mbetur thjeshtë të thëna nga ana e krerëve të bashkisë dhe në letrat e bardha se në praktikë nuk ka asgjë.

http://www.sot.com.al/index.php?opti...ticle&id=14193

[limbo]

Paralizohet administrata, Bashkia e Tiranës larg qytetarëve, në shërbim të partisë së kryetarit

Prej më shumë se një muaji Bashkia e Tiranës nuk po i shërben më qytetarëve të saj por po merret intensivisht me punët e politikës. Ashtu si prej shumë kohësh kryetari i tyre mban dy kunguj nën një sqetull të njëjtën gjë kanë nisur të bëjnë kohët e fundit edhe vartësit e tij, sigurisht me urdhër nga lart. Tani nuk kuptohet më nëse Bashkia e Tiranës është një institucion që shërben për zgjidhjen e halleve dhe problemeve të qytetarëve apo shërben si një seli e dytë e Partisë Socialiste.

Në fakt këtë gjë nuk e kemi kuptuar që prej kohës që këto institucione kishin të njëjtin kryetar që drejtonte punën në dy kahe që puthen në një pikë për interesat personal. Kjo gjë u vu në dukje akoma më shumë gjatë kohës së fushatës zgjedhore duke vazhduar më tej edhe në kohën pas fushatës.

Punonjës të Bashkisë së Tiranës prej ditësh me radhë thuajse kanë paralizuar punën totalisht duke qenë në ndjekje të procesit zgjedhor, duke bërë fushatë të ndezur për partinë e kryetarit të tyre, duke dalë në konferenca të vazhdueshme me publikun dhe median sa herë që thuhej diçka kundra tyre nga kampi politik kundërshtar.

Mjafton këtu të përmendim dhjetëra raste kur në ekranet e qytetarëve shfaqej nënkryetari i bashkisë, Eduart Shalsi duke bërë akuza politike kundrejt kundërshtarëve politik. Të gjitha këto akuza dhe kundërakuza kanë ardhur gjatë gjithë kohës nga zyrat e bashkisë të bëra nga administrata e saj sikur të ishte seli partie.

Kryeqytetasit pa bashki, prej shumë kohësh as edhe një vendimmarrje në të
Në Bashkinë e Tiranës që prej disa muajsh nuk është marrë as edhe një vendim apo te jetë miratuar ndonjë gjë. Gjëja e fundit që mbahet mend që atje është mbledhja e turpshme e Këshillit Bashkiak ku qytetarët akoma nuk e dinë nëse është miratuar një buxhet për rregullimin e Tiranës apo jo.

Ndërkohë që qytetarët vazhdojnë të derdhin taksa në atë institucion që ti marrin në shërbime për qytetin e tyre ku jetojnë bashkia i paguan ato punonjës si militantë partie. Qytetarë të shumta paraqiten për çdo ditë në dyer e zyrave të bashkisë duke dërguar kresa dhe ankesa, duke paraqitur halle dhe probleme por askush nuk ju jep atyre një përgjigje madje gjatë kohës së fushatës dhe këtyre ditëve shumë prej tyre nuk gjenden as në zyra.


Ku janë policët bashkiakë?!

Që në momentin që nisi fushata zgjedhore këto policë janë zhdukur dhe të vetmit policë bashkiakë që shihen në kryeqytet janë rojet e derës së bashkisë. Tani ato kanë hequr dorë nga fushatat e vjeljes së taksave dhe e vënies së gjobave, duke u bërë pjesë e fushatës zgjedhore. Madje ka zëra që pohojnë se ato kanë hequr uniformat e policisë bashkiake duke veshur atë të militantëve të partisë gjë të cilën e kanë bërë të gjithë punonjësit e bashkisë.

Mjafton këtu të kujtojmë rastin e sherrit që u krijua para kryeministrisë ku partia socialiste donte të zhvillonte mitingun e mbylljes së fushatës. Në atë vend ku militantët e partisë dhe vetë politikanët u përleshën me forcat e rendit shiheshin punonjës të shumtë të bashkisë si dhe policët bashkiakë. Me sa duket për këtë administratë bashkia është si një trampolinë që për ti kaluar në politikë si dhe një qendër kursi se si të bëjnë politikë.

Por ajo që i shqetëson të gjithë është puna që ato po bëjnë për qytetarët që prej kaq shumë kohësh e kanë harruar që janë aty të zgjedhur nga populli për ti zgjidhur hallet dhe problemet si dhe kanë harruar që atë vend pune e kanë të paguar nga taksat e këtyre qytetarëve që deri më tani nuk kanë bërë asgjë tjetër veçse kanë trokitur zyrë më zyrë dhe kanë pritur në radhë të gjata para bashkisë për shumë kohë pa marrë as edhe një përgjigje e jo më të kenë zgjidhur një hall apo problem.

http://www.sot.com.al/index.php?opti...ticle&id=14107

[limbo]

ky rasti posht osht skandal me vete. jep lejet bashkia, pagu faturat kurrizi shqiptarit:



Pallatet që “mbytin” ambasadat, diplomatët i kërkojnë dëmshpërblim qeverisë

Qeveria rrezikon ta paguajë me flori dëmshpërblimin që selitë diplomatike në vend i kërkojnë shtetit shqiptar për lejimin e ngritjes në afërsi të tyre të objekteve shumëkatëshe. Prej dy muajsh në zyrat e disa ministrave dhe në Gjykatën e Tiranës është paraqitur një kërkesë zyrtare, e cila ngre pretendimin e disa prej selive diplomatike më të rëndësishme në vend, të cilat kërkojnë të dëmshpërblehen.

Kompensimi i kërkuar nga qeveria shqiptare dhe nga bashkia e Tiranës lidhet me faktin që ngritja e ndërtesave të larta (pallate ose qendra biznesi) në afërsi të selive diplomatike, jo vetëm që nuk ka respektuar kriteret e urbanistikës siç janë largësia nga objekti i rëndësisë së veçantë, lartësia, nxjerrja e dritareve dhe ballkoneve, etj., por ka vënë në rrezik edhe sigurinë e këtyre objekteve.

Burime nga Ministria e Punëve Publike, kanë bërë të ditur se kërkesa vjen nga ambasada si ajo e SHBA-së, Italisë, Francës, Rumanisë, Iranit dhe disa seli të tjera, të cilat nuk janë pajtuar me ngritjen e objekteve të tilla në afërsi të selive të tyre diplomatike.


Kërkesa

Kërkesa e selive diplomatike i është drejtuar prej disa kohësh Ministrisë së Drejtësisë, Ministrisë së Punëve Publike, Gjykatës së Tiranës dhe Prokurorisë së Përgjithshme. Për dieni ajo i është dërguar në një kopje edhe Këshillit të Ministrave të cilin e bënë të njohur me faktin. Burimet thanë për “Albania”-n se, “qeveria e ndodhur përballë kësaj befasie fillimisht ka fajësuar bashkinë e Tiranës për lejet dhe vendimet e dhëna në mënyrë të pa menduar për ndërtimin e objekteve të tilla në afërsi të selive diplomatike në kryeqytet”.

Por sipas të njëjtave burime, kjo kërkesë është pranuar më pas nga qeveria e cila po shikon mundësinë e kompensimit financiar për selitë diplomatike, edhe pse fatura e financiare është shumë e madhe. Sipas të dhënave, vetëm për një pallat shumëkatësh të ngritur midis dy selive diplomatike në rrugën e Elbasanit, shuma e kërkuar për nxjerrjen e dritareve dhe ballkoneve nga krahët e ambasadave është 3 milion USD.

Ndërkohë pretendimet janë ngritur edhe nga selitë e tjera, të cilat duket se e kanë nisur seriozisht këtë punë, me pretendimin se këto objekte të ngritura pa kriter anë cenuar hapësirat, dritën, ajrin, kanë shtuar ndotjen dhe zhurmat, si dhe kanë cenuar sigurinë e selive të tyre.


Kompensimi

Fatura financiare e pretenduar nga ambasadat e huaja në Tiranë, për objektet shumëkatëshe është e njëjtë ose më e madhe edhe se vetë objektet e ngritura aty pranë. Por jo vetëm kaq. Kjo gjë duket se do t’i kushtojë edhe qeverisë shqiptare “sa frëngu pulën”. E meqë jemi tek frëngu, kompensimin e parë lidhur me këtë çështje por me vendim qeverie e ka marrë ambasada Franceze në Tiranë.

Me propozimin e ministrit të Drejtësisë, Këshilli i Ministrave ka vendosur ë mbledhjen e tij më të fundit kompensimin në të holla të ambasadës Franceze në Republikën e Shqipërisë, duke e konsideruar si subjekt të shpronësuar. Burime nga kabineti qeveritar i thanë dje për gazetën “Albania” se, “bëhet fjalë për kompensimin mbi sipërfaqen e njohur 557,75 m2, në vlerën 17.3 milionë lekë”.

Vlera e mësipërme, është vendosur që të përballohet nga fondi rezervë i buxhetit të shtetit dhe t’i vihet në dispozicion Agjencisë së Kthimit dhe Kompensimit të Pronës. Kjo e fundit, do të kryejë veprimet për kalimin e shumës në njërën nga bankat e nivelit të dytë, në emër të ambasadës franceze, në Republikën e Shqipërisë, në përputhje me procedurat për zbatimin e buxhetit të shtetit.


4 Korrik 2009
http://www.gazeta-albania.net/news.php?id=18447

[Explorer]

Pse duhet hequr Rama?


Sepse eshte per shkaterimin dhe asimilimin e Shqiperise sikurse Fatos Nano qe 8 vjet pa asçfare meshire e shiti Shqiperine Grekut.
Sali Berisha per 4 vjet e nxori Shqiperine prej Krizes Morale dhe ekonomike, na e zbardhi faqen qe na e nxine kopilat komuniste - Zoti u ardhtë hakut.

[limbo]

Bashkia hedh 800 milionë lekë në plehra, Tirana kryeqyteti më i ndotur në Europë

Bashkia e Tiranës hedh 800 milionë lekë në plehra. Ky ishte një nga vendimet e marra nga institucioni i Bashkisë, ndërsa firmat, që ajo ka përzgjedhur të pastrojnë qytetin, nuk funksionojnë në mënyrë të rregullt. Tre prej tyre e nisën punën me dy muaj vonesë si dhe më pas punonin me kohë tej mase të reduktuar gjë e cila vazhdon të ndodhë edhe sot. Shuma marramendëse u është dhënë, por Tirana vazhdon të jetë e kredhur në plehra dhe papastërit pa fund. Këtë gjë e dëshmojnë më së miri zërat e banorëve, të cilët ankohen për çdo ditë e më tepër për papastërtinë e rrugëve dhe kontenierve.

Para disa kohësh, Bashkia e ndau kryeqytetin në gjashtë zona pastrimi, në tre perëndimore dhe në tre lindore. Për çdo tre zona, ajo vendosi se do të ishin në dispozicion dy firma pastrimi, të cilat do të kryenin punën e tyre duke ju përmbajtur në mënyrë të përpiktë kontratave të lidhura me Bashkinë.

Tre firma pastrimi, të cilat kanë marrë paratë për pastrimin e zonës perëndimore, nuk punojnë me kohë të plotë, kurse ato në zonën lindore e nisën punën shumë vonë që nga momenti i nënshkrimit të kontratës me Bashkinë e Tiranës. Në disa zona, thjesht, bëhet shpërndarja e kontenierve, ndonjëherë edhe ndonjë makinë për të mbledhur mbeturinat.


Bashkia rrit taksën e pastrimit, Tirana mbulohet në plehra

Bashkia e Tiranës vendosi rritjen e taksës së pastrimit në më shumë se 50 për qind. Para se të bëhej kjo rritje kjo taksë ishte 2.100 lekë të reja ndërkohë që më pas ajo u vendos të ishte 3.600 lekë të reja. Por në këtë moment u vu re edhe paradoksi i radhës që ndodh me vendimet e Bashkisë. Me rritjen e taksave u rrit edhe sasia e plehrave në kryeqytet. Në fakt me rritjen e taksa të gjithë qytetarët pritën që të kishte edhe një rritje në cilësinë e pastrimit por na rezultoi krejt e kundërta.

Për çdo ditë e më tepër rrugët e Tiranës po mbulohen e nga plehrat gjë që ka sjellë edhe irritimin e banorëve të cilët kanë dërguar ankesa të shumta në adresë të Bashkisë. Madje edhe Agjencia Rajonale e mjedisit ka vënë disa gjoba për punën e keqe që po bëjnë këto firma pastrimi të cilat sipas kësaj agjencie më shumë i ndotin rrugët se sa i pastrojnë. Madje është pohuar se firmat e pastrimit që operojnë në kryeqytet shpeshherë bëhen edhe shkaktare të ndotjes së ambientit.


Firmat e pastrimit shkelin kontratat, kazanët rrezik për qytetarët

Firmat private të pastrimit, që veprojnë në kryeqytet, kanë shkelur disa nga pikat kryesore te kontratës së lidhur me Bashkinë e Tiranës, veprime këto që kanë çuar në gjobitjen e tyre. Para disa kohësh ishte firma “Bruçi sh.p.k” e cila u gjobit me 30 mijë lekë të reja për shkak të mospastrimit sipas orareve të përcaktuara në kontratë. Më pas ishin firmat ekzistuese që vetëm para pak kohësh u gjobitën nga Agjencia Rajonale e Mjedisit meqenëse nuk pastronin rrugët dhe nuk i lanin ato sipas kushteve të përcaktuara në kontrata.

Mosdizinfektimi i kontenierëve dhe gjendja e tyre jo e mirë tani është një nga problemet më shqetësues. Lidhur më këtë çështje, qytetarët shprehen të shqetësuar. Pasi ata ndihen të kërcënuar nga përhapja e ndonjë infeksioni apo sëmundje. E gjithë kjo situatë është krijuar nga puna jo e mirë që bëjnë të 6-ta firmat e pastrimit që janë aktualisht kontraktuese të Bashkisë.


Kazanët e plehrave nuk dezinfektohen kurrë

Të gjashtë firmat e pastrimit kontraktuese me Bashkinë e Tiranës nuk i lajnë apo dezinfektojnë asnjëherë kontenierët apo kazanët e plehrave, të cilat mund të bëhen shkak për përhapjen e një sërë infeksionesh. Në të gjitha lagjet e kryeqytetit ku gjenden të vendosura kazanët e plehrave ndihet era e keqe që mbajnë dhe që përhapet në të gjithë ambientin.

Mjekja infeksioniste, Esmeralda Priska lidhur me këtë fenomen pohoi se: “Mikrobet që janë prezentë në kontenierët e plehrave që ndodhen në rrugët e kryeqytetit janë shkaktarë për sëmundje të ndryshme. Madje këto sëmundje të cilat merren nga papastërtia janë ngjitëse dhe mjaft të rrezikshme. Më e keqja është se ato janë edhe shkaktar të ndonjë epidemie të mundshme. Dezinfektimi i kazanëve të plehrave është i domosdoshëm përndryshe qytetarët janë të rrezikuar në çdo çast. Kam vënë re se kohët e fundit në disa kontenierë hidhet pluhur gëlqereje i cili nuk është aspak efikas për mbytjen e mikrobeve dhe luftimin tyre. Duhet me patjetër të përdoren dezinfektantë të tjerë që janë të posaçëm për këtë gjë”.


Shërbimet nuk kryhen në mënyrë të rregullt nga firmat e pastrimit

Në kontratat e lidhura mes firmave të pastrimit dhe Bashkisë së Tiranës janë vendosur disa rregulla për të cilat janë përgjegjëse të dyja palët. Në marrëveshjen e nënshkruar nga të dyja palët parashikohet pastrimi 2 apo 3 here në ditë i kazanëve të plehrave si dhe dezinfektimi i tyre. Por, dezinfektimi i kazanëve duket se nuk bëhet asnjëherë dhe tregues për këtë është era e ndotur e kontenierëve.

Njëkohësisht, marrëveshja parashikon grumbullimin dhe transportim e mbetjeve urbane dhe tregjeve, fshirje dhe larje të rrugëve dhe trotuareve, larje speciale e rrugëve, pastrim i territoreve urbane me punëtorë dhe fshesa, larje dhe dezinfektim i konteniereve. Po kështu, parashikohet që të bëhet grumbullimi dhe transportimi i mbetjeve inerte dhe të vëllimshme, mirëmbajtja e vend- grumbullimeve të mbetjeve gjatë ditës, si dhe mirëmbajtja e rrugëve kryesore në kryeqytet.


Tiranë, ndotja po rrezikon jetën e banorëve

Tirana, për nga ndotja, radhitet e dyta pas Nju Delhit për sasinë e grimcave të ndotjes (PM10). Firmat e ndërtimit, një nga shkaqet kryesore të ndotjes së Tiranës. Çuditërisht firmat e pastrimit bëhen shkak tjetër për ndotjen e ambientit në kryeqytet. Tirana mban vendin e parë në listën e zezë të ndotjes së ajrit. Këtë e dëshmon rezultati i monitorimit, i kryer këto dy vitet e fundit nga organizata të huaja ambientaliste, të cilat kanë bërë studime të ndryshme për monitorimin e ajrit në rajon dhe në botë.

Organizata si "Eden" apo Unioni Botëror për Ruajtjen e Natyrës UBRN, në studimin më të fundit kanë konstatuar se çdo mëngjes në Tiranë është i barabartë me 150 milionë grimca smogu për çdo frymëmarrje.

Ndërkohë, grafiku i publikuar kohët e fundit për monitorimin e ajrit të kryeqyteteve në Evropë dhe në botë, i kryer nga Këshilli Evropian, e cilëson Tiranën si një ndër qytetet me ajrin më të ndotur. Sipas këtij grafiku, kryeqyteti për nga ndotja radhitet i dyti pas Nju - Delhit për sasinë e grimcave të ndotjes (PM10).

Një tjetër studim i kryer kohët e fundit edhe nga organizatat rajonale të mjedisit flet, gjithashtu, për shifra tepër të larta të pluhurit në atmosferën urbane për territorin e kryeqytetit tonë.


Grimcat vdekjeprurëse

Plumbi (Pb) është një nga elementet që lëshon herë pas herë grimca të ndotjes në hapësirën tonë, duke rrezikuar seriozisht jetën e njerëzve. Ky element në Shqipëri është mbi normën nga rekomandimet e OBSH-së. Shkaqet kryesore që ndikojnë në rritjen e këtyre grimcave janë shtimi i numrit të automjeteve që përdorin benzinë. Edhe dyoksidi i squfurit (SO2) vazhdon të jetë nën kufijtë e lejuar, për sa i përket kryeqytetit, pasi djegia e lëndëve fosile nga industritë ekzistuese është shtuar ndjeshëm nga djegia e mbeturinave urbane, për të cilat nuk ekziston asnjë impiant i përshtatshëm për përpunimin, apo riciklimin e tyre.

Një tjetër grimcë ndotjeje që sa vjen edhe shtohet është edhe dyoksidi i azotit (NO2), i cili lidhet kryesisht me shkarkimet e automjeteve në zonat urbane.

Ky element është shtuar ndjeshëm vetëm këto dy vitet e fundit, sidomos në zonën "21 Dhjetori", ose në Elbasan, në zonën e Kombinatit Metalurgjik. Ozoni (O3) është cilësuar nga ambientalistët si një prej grimcave më të rrezikshme të ndotjes, i cili në Tiranë sa vjen e shtohet, por mbetet gjithashtu edhe një dukuri globale për tërë rajonin

http://sot.com.al/index.php?option=c...ticle&id=13848

[limbo]

Inaugurimet false të rrugëve nga bashkia, gropat nxjerrin në pah “cilësinë”

Rrugët që rikonstrukton Bashkia e Tiranës, nuk zgjasin më shumë se dy vjet. Të gjitha këto rrugë që janë shtruar deri më tani në kryeqytet kanë pasur fatin e keq. Cilësia e punimeve është në standarde skandaloze. Ndaj, dhe kryeqyteti ynë nuk ka kurrë rrugë të rregulluara. Është e habitshme që një kryeqytet të jetë për vite të tëra si një kantier ndërtimi.

Rrugë që hapen dhe nuk përfundojnë së rregulluari për muaj të tërë, rrugë që edhe pasi rikonstruktohen, janë sërish në gjendje jo të mirë. Nuk kalojnë shumë kohë dhe ato janë sërish të prishura, ashtu si ishin në fillim.

Askush nuk e kontrollon cilësinë e punimeve ose më mirë bëjnë sikur i kontrollojnë dhe në fund të fundit shohin interesat e tyre. Bashkia e Tiranës, duket sikur ka për detyrë vetëm inaugurimin dhe prerjen e shiritit nga kryebashkiaku Rama. Më pas, gjithçka merr fund për atë rrugë. Që në ditët e para nisin problemet që janë mjaft të evidentueshme.


Shumë rrugë të kryeqytetit, duhet të kalohen me varkë

Rrugët e Tiranës në shumë zona tani janë bërë të pakalueshme. Me gropa, të ngushta, me trafik dhe më skandalozja është që në ditë me shi, në to duhet të përdorësh varka për të kaluar, pasi çizmet nuk të hyjnë në punë. Këtë ankesë e kanë ngritur prej shumë, banorët e rrugës "Ali Visha", por që nuk mbeten pas edhe shumë rrugë të tjera ashtu siç është edhe rruga e “Shkollës së Baletit”. Ata janë drejtuar në shumë instanca, duke filluar që nga Bashkia e Tiranës. Por deri më tani, askush nuk iu është përgjigjur.

Edhe pse Bashkia ka ndërhyrë disa kohë më parë në këto rrugë, gjendja e tyre mbetet sërish në kushte skandaloze dhe për të ardhur keq. Gjë e cila vërteton më së miri punën e bërë sa për sy e për faqe nga firmat të cilat kanë lidhur kontrata me bashkinë. Si rezultat i cilësisë së ulët të ndërtimit të këtyre rrugëve të gjithë qytetarët pohojnë me zë të lartë për çdo ditë e më tepër se rrugët e Tiranës shtrohen në mënyrën më të keqe të mundshme dhe se këto firma punojnë vetëm për të marrë lekët që ju jep bashkia dhe që normalisht janë marrë nga xhepat e qytetarëve me anë të taksave që ato kanë paguar vazhdimisht.


Pas përurimit të rrugëve, shfaqen gropat e para

Vetëm pak ditë pas prerjes së shiritit të inaugurimit, në rrugët e kryeqyteti mund të shihen gropat e para. Rruga fillon sërish të ketë probleme dhe të jetë e amortizuar. Fillon prishja e asfaltit dhe hapja e pusetave. Mjafton të kujtojmë këtu rrugën "Sami Frashëri", e cila vetëm dy ditë pas përurimit rezultoi me puseta të bllokuar dhe të prishura dhe si për habi të të gjithëve, aty nisën sërish punimet, megjithëse ishte një rrugë e saporikonstruktuar.

Të gjithë mbetën të habitur kur panë punëtorët të riktheheshin në këtë rrugë sepse kishin harruar dhe kishin mbyllur me asfalt kapakët e pusetave. Me rënien e shiut të parë, ata puseta nisën të plasnin si një shatërvan në mes të rrugës. Ndaj punimet e rinisura në këtë rrugë lanë gropat e para dhe kështu nisi amortizimi i kësaj rruge. E njëjta gjë ndodh në të gjitha rrugët e Tiranës, meqenëse firmat e ndërtimit bëjnë një punë jashtë standardeve. Në këto kushte, qytetarëve të Tiranës iu bëhet "dhuratë" rrugë me gropa, të ngushta dhe të amortizuara.

"Kemi frikë të nxjerrim fëmijët në rrugë apo t'i dërgojmë vetëm në shkollë, sidomos në ditët me shi. Kjo rrugë është bërë e pakalueshme për ne dhe të mos flasim pastaj për kalimin e makinave, gjë e cila është e pamundur", shprehen banorët e rrugës "Ali Visha" në Tiranë. Sipas tyre, ndërhyrja e fundit për rregullimin e këtij aksi është bërë vetëm dy vjet më parë dhe sot ajo është krejtësisht jashtë funksionit. Ata habiten me faktin se si një rrugë e rregulluar jo shumë kohë më parë të jetë në gjendje skandaloze.


Rrugët që u shtruan për fushatë, mashtrim i radhës

Para fushatës zgjedhore në kryeqytet gjithmonë nisin punimet për të rregulluar qytetin. E para gjë që bëhet është shtrimi i rrugëve. Këto shtrime rrugësh bëhen në kohë rekord me qëllimin e vetëm që të bindin qytetarët se këtu po punohet në mënyrë që ti detyrojnë ato që ti japin votën. E njëjta gjë ndodhi edhe në këto zgjedhje. Vetëm pak kohë para zhvillimit të zgjedhjeve Bashkia e Tiranës hodhi fonde për shtrimin e rrugëve sidomos ato periferike pasi ishin edhe zonat më problematike.

Në fakt akoma pa u marrë vesh rezultati i votimeve këto rrugë kanë nisur me problemet e para. Janë shoferët ata që denoncuan të parët cilësinë e ulët të punës së bërë në këto rrugë. Ndaj me pak fjalë këto rrugë u bënë me qëllimin e vetëm që t'i jepnin qytetarëve mashtrimin e radhë në mënyrë që ti rrëmbenin votën duke ju treguar se punonin për qytetin.

Ajo që vazhdon të jetë problematike për Tiranën janë zonat e periferisë ku shtrimi i rrugëve është në nivelet zero. Gropat janë fasada kryesore e këtyre zonave. Gjatë dimrit kalimi i qytetarëve në këto rrugë bëhet thuajse i pamundur pasi pellgjet e ujit janë të shpeshta dhe të mëdha për të mos folur më pas për baltën dhe llucën.

http://sot.com.al/index.php?option=c...ticle&id=13861