Satira nga Gazeta Shekulli

[[Perla]]

Rroftë tuneli!

Hysni Dajaku deklaron për mediat:

Edhe ne komunistët që deri tani kemi qenë kundër tunelit, kur e pamë nga afër si të gjithë, njëzëri bërtitëm "Rroftë tuneli", "Rrofshin ata që e bënë tunelin", "Rrofshin ata që dhanë lekët për ta bërë tunelin", Poshtë ata që kërkuan sa lekë bënte tuneli", e shumë e shumë parulla si këto. Por, parullat tona nuk dëgjoheshin edhe aq shumë, se nuk të linin ata të PD-së që bërtisnin më shumë nga ne për Doktorin. Pamë ç'pamë, u futëm edhe ne me turmën edhe filluam të thoshim:
-Sa madhështor që qenka bërë more vëllezër.
-Kush? - ta priste demokrati që kishe në krah.
-Po tuneli o!
-Madhështor është Berisha more kokë lesh, - ta priste tjetri.
-Po padyshim që Berisha është, po tuneli qenka më i madh nga Berisha.
-Ore, qenke qorr ti apo bën vetë, - të hidhej tjetri në grykë.
-Ti do t'i nxjerr fare ata sytë unë, që ta dallosh mirë kush është më i madh, tuneli apo Berisha.
-E shikonim keq ne komunistët edhe e dridhnim menjëherë, se t'i nxirrnin sytë me të vërtetë këta të PD-së, se ngrinin gishtat lart ata edhe bënin sikur gëzonin, edhe t'i fusnin dy gishtat tek sytë, edhe pastaj dukej sikur t'i nxirrnin sytë aksidentalisht edhe hajt të gjeje të vërtetën.
-Pa dyshim që Berisha është madhështor, por edhe ky tuneli goxha është. O
-Ore trutharë, po mos të ishte Berisha nuk do ishte as tuneli. Se ja, t'i thoshte mendja Berishës, edhe mos ta bënte tunelin!!
-Ashtu është, - i thoshim ne!
-Po sikur t'i mbushej mendja e ta bënte me gjysmën e çmimit?
-Ore, nuk thoni shyqyr që s'e bëri me 4-fishin e kësaj që u bë, se kush do t'i kërkonte llogari!!
-Ashtu është, - ia prisnim ne për ta rregulluar muhabetin, se gati ishin ata!
-Ama edhe ky Luli gjigant fare është, - vazhdonim ne.
-Ai është goxha djalë edhe e ka hallall dashurinë e Doktorit, hidhej demokrati tjetër.
-Edhe ky më gjigant nga tuneli është?
-Jo, ky jo, vetëm Berisha është më i madh se tuneli. Edhe Luli i madh është, po jo aq sa Berisha.
-Po mirë, si është renditja, që mos të ngatërrohemi ne, - pyetëm njërin!
-Po ja, i pari është Berisha, i dyti vjen tuneli, i treti Luli.
-Epo mirë, tani e dimë radhën e nuk do ngatërrohemi më, se duket sikur ne jemi kundër tunelit.
-Epo duket që jeni pakëz të majtë juve edhe s'ju vjen mirë, por do t'ju rregullojmë edhe juve ne demokratët.
-Jo, jo, - u mrojtëm ne, - nuk jemi aq të majtë.
-E, dukeni ju dukeni nga qëndrimi që mbani për tunelin.
-Dale, thotë njëri, se po flet Berisha.
Edhe filloi të tundej vendi nga sokëllimat. Ne të gjithë filluam të qanim nga gëzimi, edhe përqafo njëri-tjetrin demokratë e komunistë, pro dhe kundra tunelit, ju hodhëm njëri-tjetrit në zverk edhe u qurravitëm ca çaste. O çfarë momenti more vëllezër, oh çfarë rasti, oh ç'kënaqësi të rrije tek vrima e tunelit edhe të shijoje këtë rast magjik. Berisha qante edhe falënderonte ministrat Basha e Olldashi që kishin zbatuar me përpikëri këshillat e Kryeministrit. Edhe ne të gjithë aprovonim e bërtisnim vetëm për Doktorin. Ne komunistët bërtisnim "Tuneli, tuneli,tuneli", kurse demokratët ulërinin për Doktorin, mirëpo do ti na dëgjoi njëri ne edhe u tha shokëve:
-Këta spiunët po bërtasin për tunelin.
-Çfarë the more?, - ulërin një tjetër.
-Po, po, i dëgjova me veshët e mi, po ulërinin "Tuneli, tuneli".
-Ore, do bërtisni për Doktorin ju, apo doni t'u shqyejmë nga ai tuneli që keni prapa?
-Po ne thamë se erdhëm për tunelin ore.
-Ore, spiunë, kujt i plasi për tunelin, duhet të bërtisni për Doktorin, se do u bëjmë më tunel nga tuneli.
-Ne për Doktorin s'na bënte zemra, po bënim sikur bërtisnim edhe lëviznim buzët, se nuk merrej vesh atje në atë farë zallamahije. E, thoshim ne, si paskemi bërë pa tunel.
Aty pastaj more vëllezër, folën edhe këta vëllezërit nga Kosova, që e kishin bërë rrugën më këmbë para se të bëhej tuneli për të luftuar me serbët, se nga rruga ekzistuese nuk kalonin dot, se i gjobisnin policët tanë me sa duket. Edhe për t'i shpëtuar gjobave të policisë sonë, i binin më këmbë nga mali, njëlloj si shqiptarët që shkojnë në Greqi.
-Ore, me të vërtetë nga mali i kanë rënë këta?, - pyeta njërin aty afër?
-Po nga të kalonin ore?, - ma ktheu demokrati pranë meje.
-Po ja, nga rruga që ka qenë.
-Cila rrugë more, nga rruga e Enver Hoxhës?
-E qepa unë edhe i bëja qejfin.
-Mirë e ke o vëlla. Unë them, tani që u bë tuneli, ta pushtojë përsëri Serbia Kosovën edhe të kalojë Hashim Thaçi me trimat e tij shkurt nga tuneli e mos t'i bjerë më këmbë si i ka rënë më parë, edhe të gjejë vrimë serbi e të futet pastaj.
-Ore, vërtet e ke ti apo kërkon të tallesh?, - ma priti demokrati në krah edhe më shikonte me mosbesim.
-Bëj shaka o bëj shaka, e drodha unë.
-Epo mos bëj shaka të tilla, se janë me zarar.
-Pse ore?
-Epo nuk qenke patriot ti.
-Po ti je patriot?, - e pyeta unë.
-Përderisa jam këtu, s'do mend.
-Shumë mirë e ke. Kur u bë lufta, ti kushedi sa kosovarë ke mbajtur në shtëpi, - i thashë unë.
-Asnjë, - ma ktheu.
-Mirë ke bërë, - i thashë.
-Po ti, - më pyeti.
-Po mbajta ca veta, - i thash unë.
-Epo e ke bërë për t'u dukur, - më tha.
-Ashtu është, - i thashë, ke të drejtë.
-Po Berisha ka mbajtur ndonjë kosovar në shtëpi?
-Jo, jo, ai kërkoi, po nuk rrinte njeri me të, po ja, ua shpërbleu tani që u beri rrugën.
-Ka dhënë ndonjë lek nga xhepi?, - e pyeta unë.
-Ore, qenke një firaun ti, do e qepësh apo t'u bëj zë këtyre të tjerëve unë.
-Bëj shaka o derëzi, bëj shaka, e drodha unë. U lumtë ju demokratëve, sa fat që keni, gjithë veprat madhore në demokraci i bëtë ju.
-Epo ne vetëm punojmë për këtë vend.
-Hallall ta keni, se ja, lekëve gjithmonë u gjeni nga një tunel për t'i futur, si tuneli firmave e si ky tuneli këtu, por edhe armëve ua gjetët vendin, Gërdecit i treguat vendin, Faslliut i dhatë vendin, grekut i dhatë ujë të kripur. Epo, kështu duhen patriotët, si ti me Berishën, jo si puna ime.
-Dëgjo, - më tha, - fole edhe njëherë, gjej tunel e futu.
-E qepa unë edhe hapja gojën sikur thërrisja SALIU, po pa zë, vetëm lëvizja buzët edhe ngrija gishtat përpjetë.

Hysni Dajaku | 02/06/2009 | Shekulli Online

[MaDaBeR]

Vetem se ketu ka nje ndryshim shume shume te madh duhet ti themi ketij Hysni Drunit, qe ne kohen e atij xhaxhit, njerezit ishin te detyruar qe te thonin "RROFTE TUNELI" Rrofte ky, ai, ajo, kta, kto....., dhe njerezit e kishin te ndaluar te shanin apo te thonin "POSHTE TUNELI", poshte ky, ai, ajo, kta, kto....

Ndersa sot kush deshiron e shan e kush deshiron e lavederon parinte, udheheqist apo veprat qe ndertohen. Po ky Dajaku paska nostalgji per ate kohen e xhaxhit e mesa duket shkon e i qan te varri perdit.

[[Perla]]

Beni foto te tuneli

Hysni Dajaku flet nga tyneli:

"Unë, o shokë, me pishmanllëk erdha deri këtu tek tyneli, e bëra vetëm që të mos thoshin se nuk jam patriot.

Mora edhe ca shokë edhe bëmë ndonjë foto, që, po na akuzoi njeri, fap t'i nxjerr foton edhe t'i them, ja ku kam qenë, mu te vrima e tunelit, ndaj mos më akuzo kot të lutem. Se ne e dimë që nesër të gjithë do pyeten:
-Ke qenë tek tuneli? Nëse ke qenë duhet ta vërtetosh, ndryshe nuk ke për të zgjidhur ndonjë hall që të ka zënë bishtin me qeverinë.

Ne komunistët e dimë mirë si venë këto punë, se kemi përvojë. Në atë kohë thoshim se jemi familje dëshmori, merrnim ndonjë vepër nga ato "Yje të pashuar", ku ishte ndonjë kushëriri ynë, ose me mbiemër të njëjtë, që kishte rënë në luftë edhe i hapnim dyert e shtetit me hundë. Ndërsa tani e dimë ne që në demokraci kjo puna e tunelit ka për të qenë tunel më vete.

Ndaj, unë e kam fotografinë me ngjyra dhe e kam bërë edhe të madhe, edhe të vogël, që ta mbaj në portofol. Sa herë të vete në ndonjë zyrë për të zgjidhur ndonjë hall, sa t'u tregoj foton, e di ti që të gjithë zyrtarët do më hidhen në qafë edhe do ulërijnë, "ky ka qenë tek tuneli, ky është i joni o vëllezër. Pyeteni edhe zgjidhini çfarë halli ka..."

Tani more vëllezër, ditë për ditë unë ngrihem më parë nga këta të firmës edhe shkoj e shikoj tunelin, nëse është në rregull apo jo. Sa sigurohem për këtë, shkoj e pi kafenë e mëngjesit edhe një gotë raki rrushi nga ajo që kam marrë me vete, se këtu vetëm raki kumbulle ka, edhe kthehem përsëri aty ku punohet dhe mbaj me muhabet punëtorët.

-Po ti kush je?, - më pyeti njëri.
-Lëre, lëre, - i thashë, - jam anonim, po jam kthyer në fans të këtij tuneli edhe nuk më iket që këtu.
-Opo ti qenke më keq nga Berisha more lumëmadh, - me tha.
-Ti qenke komunist më duket, - i thashë unë.
-Jo, jo, unë jam punëtor, - ma ktheu ai.
-Epo ti flet njëlloj si ata që nuk e duan rrugën patriotike.
-Po ia fut kot o derëzi, - më tha, - ti s'e ke marrë vesh fare që paska ardhur demokracia dhe fjala eshte e lirë.
-Ore, po unë ca shaka po bëja dje këtu, kur ishte Berisha, edhe desh më thyen noçkat.
-Dëgjo këtu, dëgjo.. Tani nuk dënon njeri or jo, po e keqja është se të marrin me sy të keq po mos të mbrosh veprat e Doktorit dhe nuk përfiton gjë, po kështu nuk të bon njeri keq or jo, vetëm se nuk të bëjnë mirë.
-Aha, kështu qenka stili tani more?
-Po, po.
-Epo unë prandaj po rri këtu, se mua më quajnë të gjithë komunist, po do rri këtu disa ditë të rregulloj biografinë.
-Mirë të ka vajtur mendja. Është njëlloj si ato kurset e riedukimit që bënit ju në atë kohën e komunizmit.
-Dëgjo, e di ç'ke ti, bëj një fotografi me mua që kam punuar këtu, edhe po deshe dal edhe dëshmitar që ti ke qenë këtu dhe ke qenë pro tunelit.
-Mirë e ke, - i thashë.
-Edhe e bëra edhe një foto me një nga ata punëtorët me kapele.

Hysni Dajaku | 03/06/2009 | Shekulli Online

[[Perla]]

Me Ylliun te tyneli

Hysni Dajaku flet akoma nga tuneli:
Unë more vëllezër nuk luaj më që këtu edhe ju n'daç më dëgjoni n'daç jo. Sa të iki e të vij varavingo unë lart e poshtë, më mirë po rri këtu, se Saliu këtu do vijë një herë në javë, kështu që kursej lekët e rrugës unë. Sidomos që tani kam gjetur edhe një shok, që është Ylli Pango edhe raki kemi akoma deri më 27 qershor. Deri kur të bëjë atë mbylljen Berisha, ne këtu do flemë.


Dje gjithë ditën nuk kishim ç'bënim unë me Yllin, pasi u lodhëm duke ndenjur dhe u lutëm atyre punëtorëve edhe ata na dhanë ndonjë kazëm e lopatë, edhe filluam edhe ne të punonim. Ne takat nuk kemi shumë, por sa të rrime kot edhe për fiskulturë, filluam bëmë ndonjë lekë punë. Hoqëm nja 4 karro me dhe, edhe pastruam ferrat rreth tunelit.


Pastaj, nga darka, me t'u shtrirë tek vrima e tynelit edhe pi nga një gllenjkë edhe bëj muhabet, deri sa ia morëm këngës përsëri.


Ylli më tha që sot e tutje, deri sa të vijë Saliu këtu, do këndojmë atë këngën "Shqipëria po ndryshon". Si të duash, - i thashë unë, - një rresht këndoje ti e një rresht po e këndoj unë. Edhe kështu e shtymë edhe mbrëmë. Ylli ia merrte e unë ia ktheja:

Është një thirrje që na zgjon. (Ylli)
Nga Gërdeci po jehon. (Unë)
është një dorë që na drejton (Ylli)
e prej fyti na shtrëngon (Unë)
është një ritëm që kërkon (Ylli)
që Faslliçi e këndon (Unë)
Shqipëria po ndryshon (Ylli)
uji i detit nuk mbaron... (Unë)

Po më pëlqen Hysni, - më tha, - nuk duket aq keq.
-Jepi o jepi, - i jepja zemër unë, - se të dehur jemi, nuk i merr njeri për keq.

Një motiv që frymëzon
me pushtet bën korrupsion
me lekë t'gjitha i afron
vidh e vidh e nuk mbaron
dashuri në shpirt buron
veç pushteti na shëron
Shqipëria po ndryshon
lum kush ka ooo fatin tonë...


-Ah, - ia bënte Ylli edhe turfullonte. Ah more Hysni, që nuk të njihja më parë kur isha ministër, se do kishim bërë qyfyre bashkë.
-Jepi o jepi, - i thosha unë, - se ja u njohëm tani, më mirë vonë se kurrë


Është një rrugë që na bashkon
ku harbuti lekë fiton
është e ardhmja që premton
Lul Mediu në timon
është një komb që sot beson
nga Doktori po shikon
Shqipëria po ndryshon
kush ka pushtet e kupton.


E ktheu edhe një herë Ylli me fund edhe unë nuk e pash ç'u bë më, po me siguri fjetëm të dy, se kur u ngrita unë, Yllin e gjeta përripër meje edhe duart i kishin ngelur tek mbërtheckat e mia. Më ngriu gjaku në fillim.


Thashë më mirë të kisha fjetur me Fatmir Mediun, me Lulin ose Faslliun, se sa me këtë firaun, po pastaj e pashë që e kishte nga ajo që i ishte bërë refleks, se çdo gjë ishte në rregu

Hysni Dajaku | 04/06/2009 | Shekulli Online

[[Perla]]

Takim në sabah te Tyneli

Hysniu vijon të dëshmojë direkt nga Tyneli:
Unë dhe Ylliu, gjysmë tapë, gjysmë përgjumësh dëgjojmë zhurmë.
-Çohu, - i thashë unë, - se po na vjedhin tynelin.
-Jo or jo, nuk bën vaki, do kesh parë ëndërr.
-Ore, dëgjova zhurmë. Prit, - i thashë, - mos u ndihej.
Do ti dëgjuam zëra përsëri.
-Hë ore, të thashë?
-Oh, me vërtet. Ore, mos na e prishin armiqtë e kombit, ose kanë ardhur serbët, se po dëgjoj njërin që flet serbisht.
-Rri mos u ndiej, se po afrohen.
-Kur dhanë ballë nja tre a katër veta tek vrima e tynelit.
-Mos lëvizni, - u bërtita unë, -duart lart!
-Ata ngrinë edhe ngritën duart përpjetë.
Unë me Yllin, fshehur pas një shkëmbi, kishim nxjerrë bishtin e lopatës që dukej si grykë çifteje.
-Ore, jemi nga të qeverisë, na ka dërguar Doktori.
-Mos lëvizni, - bërtita unë, - se ua mbusha bythën me saçme.
-Ore zotëri, na ka dërguar Doktori.
-Lërini gënjeshtrat ju serbët e poshtër.
-Ore, jemi shqiptarë, vetëm Faslliçi është serb.
-Epo, u ka futur serbi të gjithëve.
-Jo ore, na ka futur Doktori.
-Cili doktor? Doktori familjes?
-Jo ore jo, Doktori i madh.
-Mbase i ka dërguar Saliu, - u hodh Ylli.
-Epo pastaj na mori lumi ne, - i thashë unë, - erdhëm për të rregulluar biografinë edhe do e hamë më keq. Ç'të bëjmë tani?
-Thoni parullën, - u bërtet Ylli.
-"Gërdeci", - flet njëri nga ata të grupit.
-O bo bo, qenkan me të vërtetë të Doktorit.
-Kundërparullën, - ulërin njëri që andej.
-"Intervista", - ulërin Ylli.
-Ylli ti je?, - dëgjohet një zë nga grupi armiqësor.
-Unë o unë, ti Fatmir je?
-Po or po. Hajde o Hysni, se qenkan tanët.
E kështu dolëm ne nga ku ishim fshehur edhe u afruam tek grupi.
- Po ju ç'bëni këtu more?, - na pyetën ata.
- Ja, po ruajmë tynelin, po ju ç'kërkoni?
- Ne na dërgoi Doktori, se ka merak. Kishte parë ëndërr sikur ia kishte vjedhur Edi Rama edhe na nisi që me natë.
- Jo or jo, nuk lëmë njeri ne këtu.
- Po ky kush është?, - pyeti Mediu Yllin për mua.
- Ky është Hysni Dajaku, komunsit me nam, po tani është bërë protunelist i tërbuar edhe nuk shkulet që këtu pa mbaruar përfundimisht.
- Po ju privatisht ruani këtu, apo ju paguajnë?, - pyeti Mediu.
- Jo, jo, falas, ne jemi patriotë.
- Ore, patriotë jemi dhe ne, po ne na jep dieta Doktori. Vetëm me dietat që kemi marrë ne edhe qeveritarët e zyrtarët që e vizitojmë çdo ditë, do ishte shtuar edhe një korsi tjetër këtu.
- Bëjnë shaka këta, apo e kanë me të vërtetë?, - pyeta unë.
- Jo or jo, - u hodh Ylli, - mos flisni kështu në sy të Hysniut, se ligështohet ky, pasi ka vendosur të shesë edhe shtëpinë po nuk dolën leket për ta mbaruar rrugën.

Qeshën të gjithë edhe i shkelën sy njëri-tjetrit. Edhe thanë:
-Ky po që qenka patriot.
-Hajt të pimë nga një gotë, - u thash unë, - edhe nxora atë shishen që gjerbja me Yllin. Ua zgjata të gjithëve, edhe një gllënjkë njëri e një gllënjkë tjetri, u ngroh muhabeti.
-Do fitojmë përsëri?, - e pyet Ylli Mediun.
-Po, po, ka marrë fund ajo punë.
-Vërtet?, - ia kthen Ylli.
-Po si mendon ti, e lë më Doktori pushtetin?
-Mirë e ke, nuk e lë më ai, sikur nami të bëhet.
-Vërtet?, - u thashë unë.
-Po, po Hysni, ka marrë fund; me të mirë e me pahir, do fitojë Doktori.
-Hë më i lumtë, - thashë unë, - se kështu do ky popull.
-Po ti çfarë do bëhesh po fitoi Doktori përsëri?, - e pyeta unë Mediun.
-Unë do bëhem "ministër Sulmi".
-Oh, pse, nuk do ketë më Ministri Mbrojtjeje?
-Do ketë, po do shtohet një e re edhe do quhet Ministria e Sulmit.
-Oh sa mirë të ka vajtur mendja.
-Po për mua ka thënë gjë Doktori?, - hidhet Ylli.
-Ka respekt, - i tha Mediu. E di Doktori se ajo e jotja qe e kurdisur si ajo puna ime, ndaj mos u bëj merak, se ka menduar dhe për ty.
-Vërtet?, - thotë Ylli.
-Po, po, ka menduar të të çojë ambasador në Brazil, që të shikosh karnavale lakuriq me zogj të zinj e të bardhë, sa të pëlcasin sytë.
-Ai është burrë o vëllezër, - hidhet Ylli, - për atë edhe jetën të japësh nuk është gjë fare.
-Jemi me fat, - thotë Mediu, se të kish qenë ndonjë tjetër, do ishim në burg sot.
Ndërkohë bie zilja e celularit.
-Pushoni, - thotë Mediu, - se është djali Doktorit.
Hajt gjumë të ëmbël për sot edhe dëgjohemi nesër!

Hysni Dajaku | 05/06/2009 | Shekulli Online

[strange]

Shkrime komunistesh.

[[Perla]]

Komunistash? I njef ti ?

Jane shkrime satirike, mos u shqetesoni

[strange]

Sa u bëra gati te lexoj e paske ndryshua postimin

Si kam njohtë por prej se ka hy Edi Rama me politik kam fillua ti njohe me mire.

Ika te shikoj film.

[[Perla]]

Zëdhënësja e PD-së, Fitore Tyneli, deklaron për mediat:

Partia Demokratike dhe lideri i saj po shpalosin me sukses të plotë programin e tyre të mrekullueshëm për 4 vitet e tjera, duke i sqaruar shqiptarët se ky program është më i miri që kanë parë deri më sot.


Pikë të parë të programit, Doktori ka futjen e Edi Ramës në listat për deputet dhe zotohet se po nuk e vendosi emrin tek PS-ja, ai do ta vendosë tek lista e PD-së të parin, duke lënë veten e tij të dytin, vetëm e vetëm për të shpëtuar seriozitetin e zgjedhjeve.


Ai është zotuar se, nëse shqiptarët e votojnë për Kryeministër edhe për 4 vitet e ardhshme, do ta bëjë të detyrueshme me vendim qeverie kandidimin e çdo kryetari partie për deputet, ose ndryshe nuk do t'i njohë zgjedhjet fare. Pikë të dytë të programit, Doktori ka ndryshmin e këngës së PS-së.


Ai është zotuar se, me fitoren e tij, kënga do të ndryshohet, nga "Çohu" në "Ulu". Jo vetëm titulli që nuk i ka pëlqyer Doktorit, por as muzika nuk i hyn në sy dhe është zotuar se, me fitoren e tij, edhe kjo këngë do përpunohet dhe shqiptarët do e dëgjojnë sipas versionit të Doktorit.


Pikë tjetër e programit të partisë së Doktorit, është se po fitoi ai, asnjë nga zyrat elektorale të PS-së nuk do thyhen e dhunohen, apo të digjen, siç ka ndodhur deri më tani.


Doktori premton se me fitoren e tij nuk ka për të ndodhur më ashtu si po ndodh tani, kur kryeplaku i fshatit rreh kryetarin e PS-së në fshat, për arsye politike. Dhe policia e politizuar majtas nuk e dënon kryeplakun, se nuk e ka denoncuar njeri.


Ai është zotuar se po fitoi edhe një herë, në raste të tilla do veprohet tamam si në vendet demokratike, ku personi dënohet për veprën që kryen, e jo si bëhet në Shqipëri, që, po të vrasësh njeri, policia, megjithëse e di që e vrave ti, të lë të lirë, se nuk ka denoncuar njeri.


Kjo lloje politike do të marrë fund menjëherë pasi Doktori të marrë mandatin e dytë, se tani është i zënë me zgjedhjet. (PD-ja edhe kryepleqtë i ka të fortë, mendo si i ka krye të rinjtë, militantët dhe policët e depolitizuar.


Një kryeplak demokrat rreh dy vetë njëherësh. Po një i ri demokrat??? Po një militant demokrat???? Po një polic demokrat?????).


Doktori ka në programin e tij edhe hedhjen në gjyq të Edi Ramës, se ka rritur taksat tek Tregu Çam, pa përmendur këtu komisionin hetimor të hetuesit më të falshëm demokratik, Ferdinand Xhaferrit. Pikë tjetër e programit të Doktorit është se, mbas fitores, ai do pajisë gjithë shtetasit me letërnjoftime, që, në zgjedhjet e 2013-ës mos të ngelet këmbë shqiptari pa votuar.


Direkt mbas fitores, Doktori do t'i japë kartat falas ose do t'i paguajë vetë nga xhepi, në shenjë mirënjohjeje për ata që nuk patën mundësi t'i nxirrnin para zgjedhjeve dhe të votonin, kuptohet, kundër tij.


Nëse fiton përsëri, Doktori do financojë edhe pjesën tjetër të rrugës Durrës-Kukës, duke e çuar deri në Prishtinë për t'ia bërë dhuratë Kosovës, pasi me sa shikon ai, kosovarët nuk kanë ndërmend ta bëjnë, po meqë Doktori është patriot edhe ia mori dorën kësaj pune, në mandatin tjetër do e çojë rrugën deri në fund.


Bile po arriti të marrë edhe një mandat tjetër pas këtij tjetrit, ai do e çojë rrugën deri në Bosnjë, tek shtëpia e Faslliçit.
Edhe po e votuan prapë, ai do pyesë kush do ndonjë autostradë, tutje nga Rumania, Bullgaria. Kush ka ngelur keq, me një fjalë.


Edhe sikur të bëjë vaki që mos ta marrë ai burri që na shikon atje lart pas nja 35 vjetësh, shqiptarët do t'i hipin makinës në Durrës edhe bridh nëpër autostradat e Sali Berishës: në Kukës, në Prishtinë, në Bosnjë, në Bullgari, në Turqi, në Rusi, në Polin e Ngrirë, në Kanada, tatëpjetë Amerikës Veriore, Qendrore e Jugore, edhe kthehu përsëri mbas në Durrës.


Lum kush do rrojë, se do bëjë pallë. Pra, nëse shqiptarët e duan Edi Ramën deputet, nëse duan të ndryshojnë këngën e PS-së, nëse duan mos të digjen zyrat elektorale, nëse duan mos të hanë dru nga kryepleqtë e PD-së, nëse duan karta falas mbas zgjedhjeve, nëse duan autostrada me shumicë, patjetër duhet të votojnë për Doktorin, se ai ua gjen ilaçin. Rroftë Doktori dhe programi i tij!

Fitore Tyneli, | 07/06/2009 |Shekulli Online

[[Perla]]

Hysni Dajaku vijon të dërgojë deklarata nga tyneli. Në e-mail-in që morëm mbrëmë me "Mobile Facebook", ai thotë:


"Të dashur shokë! Gjatë kohës që unë po rrija tek tyneli, kur shikoj unë, në darkë, vjen Blendi Fevziu.
- Hë o Blendi, - i thashë unë, - ç'e mirë të solli?
- Hiç, - më tha si i mërzitur dhe seç shkruante në celular, - erdha të bëj një foto te tyneli.
- Mirë e ke, - i thashë, - se kjo do bëhet si ajo puna e partizanëve në Luftën e Dytë Botërore, se këtu kurrë nuk heqin dorë nga ato pyetjet: Ke qenë partizan? Ke qenë i persekutuar? Ke qenë në rrëzimin e bustit të Enverit? Ke qenë në grevën e urisë? E, padyshim që do pyesin: Ke qenë tek tyneli?
- Po mor po, - tha ai si pa e pasur hiç mendjen aty, edhe i vinte vërdallë vrimës së tynelit. - Më bëj një foto o Hysni.
-Si e do?, - i thashë unë, - do ta bëj një sikur i ke hipur tynelit përsipër?
-Jo, jo, se e shikon Berisha edhe kush merret me të, se thotë i paska hipur sipër tynelit tim.
-Epo mirë, po ta bëj një në këmbë edhe me celular në dorë, duke shkruar mesazhe.
Edhe pastaj nxora unë atë shishen që kisha marrë me vete edhe i thashë Blendit:
- Na ktheje një herë tani.
Edhe kthe njëherë Blendi e kthe njëherë unë, po ngrohej mirë muhabeti.
-Ama qeveri më të mirë për tynele e për gropa se kjo e Doktorit more Blendi, zor se vjen përsëri në këto anë. E kemi hak të quhemi "qeveri e tynelit".
-Po, po, - ma kthente Blendi dhe vazhdonte cak-cuk shkruante mesazhe në celular
- Ama një çikë si shtrenjtë vajti o Blendi, - i thashë unë prapë.
-Ç'ja fut kot o Hysni, - po populli do t'i paguajë.
-Mirë e ke. Vetëm se më vjen ca keq për Yllin, - i thashë, - se ndenjëm edhe ca ditë bashkë këtu te tyneli e u kënaqëm në muhabet. Ai Luli mori gjithë ato lekë edhe hiqet si patriot. Mediu e bëri tym e hi, edhe patriot doli, edhe deputet do bëhet, kurse ai shoku im Ylli, me të vërtet u dogj kot, për një mbërtheckë.
-Lëre, lëre, mos ma kujto atë Yllin, se ashtu është puna, - më thotë Blendi.
Dhe hoqi sytë nga celulari e shihte me vërejtje nga tavani i tunelit.
- Po këto tubat e ajrimit, pse i kanë bërë bojëqielli?, - më pyeti si i sikletosur.
-Ngaqë mbajnë lagështinë, - i them unë, - po hajt t'ia marrim një kënge.
Dhe ia nisëm të dy bashkë:

Mu tek vrima e tynelit
Rri e ulur shoqëria
Këtu s'jemi vetëm ne
Vijnë nga tërë Shqipëria
Sot po pati ndonjë hall
Te tyneli vjen mileti,
Ca e hanë nga partia
Ca e hanë nga Interneti

Hysni Dajaku | 08/06/2009 | Shekulli Online