Gazetarët kundër emërimit të Kuçit

Violeta Hyseni
BBC Prishtinë


Bordit të RTK-së i ka skaduar mandati 3 vjet më parë.

Asociacioni i Gazetarëve Profesionist të Kosovës ka kritikuar të shtunën emërimin e zëvendëskryeministrit në krye të komisionit që do të përzgjedhë bordin e Radio-Televizonit Publik të Kosovës (RTK).

Emërimi i z. Hajredin Kuçi është cilësuar nga shoqata e gazetarëve si një përpjekje për të ndikuar politikisht në mediumin publik.

Shoqata ka kërkuar nga autoritetet vendore dhe ndërkombëtare që të angazhohen në mbrojtje të pavarësisë editoriale të RTK-së.

Emërimi ka nxitur reagime të ashpra dhe nga opozita dhe shoqëria civile.

Reagime

Kryetari i Aleancës për Ardhmërinë e Kosovës në opozitë, Ramush Haradinaj ka deklaruar se emërimi 'tregon se qeveria tenton të shtrijë pushtetin e saj mbi mediumin publik'.

Partitë opozitare kanë braktisur të enjten punimet e seancës së Kuvendit në shenjë proteste.

Partnerët e koalicionit qeverisës, Partia Demokratike dhe Lidhja Demokratike e Kosovës kanë hedhur poshtë kritikat.

Ata kanë thënë se emërimi i zëvendëskryeministrit nuk është në kundërshtim me ligjin për RTK-në.

Bordit të vjetër të Radio Televizionit të Kosovës i ka skaduar mandati që para tre vjetësh dhe emërimi bordit të ri është zvarritur, siç thuhet, për shkak të ndikimt të politikës në këtë medium.

BBC