Një konlikt ka nisur mes bashkisë së qytetit Shkodër dhe banorëve të lagjes Parrucë. Rreth 50 banorë kundërshtojnë ndërtimin e dy pallateve të reja vendim ky i marrë nga KRRT-ja pranë bashkisë që parashikon prishjen e banesave 100 vjeçare.
SHKODËR- Ndërtimi i dy pallateve të reja njëri 8 dhe tjetri 6 katësh ka bërë që rreth 50 banorë të lagjes Parrucë në rrethin e Shkodrës, të dalin në një protestë për të kundërshtuar një vendim të tillë të marrë nga KRRT-ja pranë bashkisë Shkodër.
Sipas banorëve shtëpitë që duhen shembur për ti hapur rrugë ndërtimit të dy pallateve janë mbi 100 vjeçare për të cilën ata shprehen se kanë të gjithë dokumentacionin që u njeh atyre pronësinë e truallit, ku kanë të ndërtuara shtëpitë e tyre.
Banorët shprehen “ne e bëjmë sot këtë protestë sepse na cënohet prona private, fëmijët skano ku të lozin, në shpi nuk na futet drita. Ne jemi të vdekur si lagje nëse ky pallat do të bëhet. Ne disponojmë të gjithë dokumentacionin mbi pronësinë. Vendimi është marrë për ndërtimin e tyre. ne kemi dërguar një peticion por na është kthyer një përgjigje negative”- shprehet banorja.
I pranishëm në protestë ishte dhe deputeti i Shkodrës Gilman Bakalli, i cili është solidarizuar me banorët pasi është njohur me problemin e tyre. “Bëj thirrje në emër të banorëve të kësaj lagje pasi janë shumë të shqetësuar pasi në atë zonë ku duhet të ndërtohet një park, bashkia ka miratuar ndërtimin e dy pallateve. Këtu duhet të ishte dhe deputetja e zonës Arenca Trashaani por deputetët e PD-së janë të zënë me përpilimin e listave ndaj zakonisht punët e partisë nuk përfaqësojnë realisht shqetësimet e njerëzve”- u shpreh deputeti Bakalli.
Banorët deklarojnë se nëse kjo çështje nuk do të gjejë zgjidhje atëherë alternativa e vetme ligjore për ta do të mbetet gjykata. (a.r/news24/balkanweb)
Përgjigju Duke Cituar
Krijoni Kontakt