Ndahet nga jeta Vebi Velija, presidenti i televizionit "Alsat"

[Alienated]

Pas një sëmundje të rëndë, mbrëmë vonë në Shkup, ndërroi jetë në moshën 61-vjeçare zoti Vebi Velija, pronar i Korporatës Rajonale Ballkanike të Industrisë dhe Konsulencës VEVE Group dhe i rrjetit televiziv ALSAT në Maqedoni, Shqipëri dhe Kosovë, si edhe themelues dhe president i Institucionit Kulturor “Fondacioni Velija”. Përmes angazhimeve të tij në ekonomi dhe me pjesëmarrjen personale në trupat dhe forumet e shumta rajonale dhe ndërkombëtare ekonomike dhe politike, përmes sistemit të Televizionit “Alsat” dhe Fondacionit “Velija” për kulturë, 61-vjeçari Vebi Velija në vazhdimësi në dy dekadat që kaluan, kontribuoi për zhvillimin e lirisë, demokracisë dhe bashkëpunimit rajonal në të gjitha sferat në Ballkan.

Grupi VEVE, i themeluar nga zoti Velija, në fillim të viteve nëntëdhjetë, u bë njëra nga kompanitë më të mëdha për tërheqje të investimeve të huaja në Ballkan, sidomos në sektorët e energjetikës, industrisë ushqimore, turizmit, transportit, telekomunikacionit etj. Ceremonia e varimit zhvillohet sot në orën 15:00, në vendlindjen e tij, në fshatin Gradec të Gostivarit, në Republikën e Maqedonisë.

Vebi Velija lindi në vitin 1948, në fshatin Gradec të Gostivarit, në Maqedoni. Ai studioi për ekonomi, ndërsa e nisi biznesin e tij në Kroaci në vitin 1971. Më pas, në vitin 1981, ai i përqëndroi bizneset e tij edhe në Vienë të Austrisë. Ai ka qenë i pranishëm në Shqipëri që në vitin 1990, duke themeluar biznese në fushat e medias dhe telekomunikacionit, industrisë së duhan-cigareve, industrisë së përpunimit ushqimor, shërbimeve financiare, ndërtimtarisë, kërkimit të naftës dhe në sektorin e energjisë.

Zoti Vebi Velija ishte president i Veve Group, themelues i rrjetit televiziv ALSAT në Maqedoni, Shqipëri dhe Kosovë, dhe president i Institucionit Kulturor “Fondacioni Velija”. Ai ka qenë President i Bashkimit të Industrialistëve dhe Investitorëve të Shqipërisë. Velija themeloi Radiotelevizionin e parë Satelitor Shqiptar, rrjetin televiziv “Alsat”, i cili transmeton 24 orë programe në Shqipëri, Maqedoni, Kosovë, si dhe nëpërmjet satelitit në Evropë, Amerikë, Kanada e me gjere.

Televizioni Alsat u krijua fillimisht në Tiranë si ekrani i parë mbarëshqiptar. Më pas, ALSAT-M mori licensën e parë të një televizioni kombëtar në gjuhën shqipe në Maqedoni, ndërsa një vit më parë u mor edhe licensa e televizion Alsat në Kosovë.Alsat është televizioni që bashkoi të gjithë shqiptarët, ata në Shqipëri, Kosovë, Maqedoni, Malin e Zi, Preshevë si edhe në mbarë botën ku jetojnë.

Po ashtu, Zoti Vebi Velija ishte themelues dhe kryetar i Fondacionit “Velija”. Fondacioni u themelua më 13 korrik të vitit 1994 dhe ekziston si shprehje e bindjes së themeluesit të tij se një komb mund të mbijetojë me pak ushqim, por kurrë me pak kulturë.Fondacioni “Velija” është organizatë nacionale jofitimprurëse që funksionon përmes përkrahjes financiare të themeluesit të saj. Fondacioni Velija inicioi gjithashtu çmimin vjetor ndërkombëtar “Kadare”.

Zoti Velija është autor i librave të tillë si “Quo Vadis Albania”, një monografi mbi vizionin e programit për rimëkëmbjen ekonomike të Shqipërisë, apo “Mes Ekonomisë dhe Politikës”, një përmbledhje diskutimesh, fjalimesh dhe dorëshkrimesh. Mes të tjerash, Z.Velija ka qenë gjithashtu anëtar i Bordit Këshillimor të Biznesit në Paktin e Stabilitetit si edhe i Bordit Këshillimor të Biznesit në Iniciativën e Bashkëpunimit të Evropës Juglindore.

ALSAT

[Dito]

Ky jetoi si mbret, sbesoj se i la ndonje pishman jetes.



Dito.

[Homza]

kur vdesin njerez si puna e ktij dhe Dritan Hoxhes se Top Channel te vjen gjynah.....pamvaresisht qe dy vdekjet nuk kan asgje te perbashket.....perseri dhimbja per njerez te zot eshte shum e madhe.

[Xhuxhumaku]

Ngushellime familjes dhe Mires,...

edhe Homzes,...

[v3t0n]

Ngushllime familjes se tij.

[Brari]

Ngushellime familjes Veliaj..
Ishte nje atdhetar i madh..
Tv ALSAT eshte nga me seriozet e kjo tregon se Shefi i saje nuk shitej..

[Alienated]

TV Alsat ne Maqedoni jep lajme dhe emisione te ndryshme ne gjuhen shqipe dhe ate sllave.
Per nje kohe te shkurter u be nje nga mediat me te besueshme tek te dyja komunitetet ne Maqedoni.
Nje numer i madh sllavesh kane me shume besim tek Alsat se sa tek televizionet sllave ne Maqedoni.
I ndjeri Velija ka arritur nje sukses te pabesueshem ne kete drejtim. Asgje dy-gjuhesore ne Maqedoni s'ka mbijetuar per kohe te gjate.

[RaPSouL]

Sejdiu: Velija ndihmoi bërjen shtet të Kosovës

Presidenti i Kosovës, Fatmir Sejdiu ka thënë se vdekja e pronarit të Korporatës VEVE dhe të TV ALSAT, z. Vebi Velija është një humbje e madhe për biznesin dhe median shqiptare.
Kreu i shtetit të Kosovës ka përkujtuar rolin që TV ALSAT ka luajtur gjatë viteve të fundit në procesin er pavarësimit të Kosovës, duke thënë se nën drejtimin e tij, ky televizion ka dhënë kontribut të veçantë në arritjen e synimit të shqiptarëve të Kosovës për shtet.
“Është një dhembje e madhe humbja e z. Vebi Velija që ka qenë një ndër personalitetet e rëndësishme të biznesit për një periudhë të gjatë kohore dhe mendoj përmes biznesit të tij ai ka ndihmuar shumë procese për lirinë dhe pavarësinë e Kosovës.
Në të njëjtën kohë ka qenë një person që i ka dhënë peshë të veçantë fjalës së lirë, mediave dhe drejtpërdrejt TV ALSAT i cili ka një shtrirje të mirë në Republikën e Kosovës, në Republikën e Shqipërisë dhe në Republikën e Maqedonisë. Është një televizion me respekt të veçantë dhe mendoj është pikërisht kontribut i zotit Vebi që të japë kontributin e tij të drejtpërdrejtë dhe të parezervë edhe në këtë fushë.
Unë dua të theksoj se kam pasur raporte jashtëzakonisht të mira me të që në kohën kur ka bërë investime të bizneseve në Republikën e Shqipërisë duke ndihmuar edhe proceset demokratike por edhe zhvillimin e vendit pas një situate të vështirë që kishte hyrë Shqipëria dhe në periudha të mëvonshme kemi pasur kontakte të herëpashershme duke respektuar gjithmonë qasjen e tij për të pasur shtëpia informative ku ai ka qenë pronar, TV ALSAT, një vështrim korrekt për zhvillimet që kanë qenë për ngjarjet ditore por edhe për zhvillimet tjera.
Në këtë kuadër dua të veçoj posaçërisht përkushtimin e TV ALSAT që ishte kontribut dhe insistim i drejtpërdrejtë i z. Velija për të pasur gjithmonë çdo të hënë, në kohën e përfundimit të statusit të Kosovës apo gjatë kohës së negociatave, kur gjithmonë tema themelore bosht i kushtohej Kosovës. Pra kishte mundësinë që të zgjedhë mysafirë të shumtë, personalitete kyçe të jetës politike dhe shtetërore, vendore por edhe ndërkombëtare dhe me analizat e shumta që njerëzit i kanë ofruar përmes TV ALSAT mendoj se kanë ndihmuar drejtpërdrejt edhe proceset që ne kemi pasur para vetes.
Dua të ndaj edhe një herë dhembjen me familjen e tij, t’u shpreh ngushëllimet familjarëve për humbjen e një personaliteti të rëndësishëm dhe më të dashurit të tyre, por njëkohësisht edhe një personalitet që vërtetë ka qenë pjesë e proceseve të rëndësishme për Kosovën, flas sidomos në fushën informative”, ka thënë Presidenti i Kosovës, Fatmir Sejdiu.

Alsat

[RaPSouL]

Kryeministri Berisha: Velija, humbje e madhe për median, biznesin dhe miqtë

Kryeministri Sali Berisha i ka derguar nje telegram ngushëllimi, familjes se Presidentit te ndjere te Televizionit ALSAT, zotit Vebi Velija. “Ndarja nga jeta e prindit shembullor, bashkëshortit tuaj te dashur, drejtuesit te talentuar dhe pronarit te TV Alsat, mikut tim Vebi Velija, eshte nje humbje e madhe per ju, per boten mediatike dhe afariste shqiptare, per miqte e tij ne Shqipëri, Maqedoni, Kosove dhe kudo ne bote”, shkruan kryeministri. "Familjes, do ti mungoje njeriu i tyre me i dashur, medias shqiptare, drejtuesi dhe pronari i talentuar, i nje prej televizione me te hapura, me te çmuara te botes shqiptare. Biznesit nje perfaqesues i ndershem, i denje dhe i shquar, miqve do i mungoje nje mik i çmuar dhe besnik, te cilin nuk do e harojne kurre.
Ne kete dite zie ndaj me ju te dashur familjare dhe te aferm, bashkepunetore dhe miq te Vebi Veliajt, dhimbjen e thelle, pikëllimin e madh dhe lutem qe shpirti i tij te gjeje paqen e merituar dhe ju forcen per te përballuar hidherimin e kësaj humbje te pakompesueshme. Me respekt, Sali berisha, Kryeminister i Shqiperise". Ishte ky telegrami i ngushëllimit qe shefi i qeverise se Shqiperise, i dergoi familjes se Presidentit te ndjere te ALSAT, Zotit Vebi Velija.

Alsat

[RaPSouL]

Presidenti shqiptar Bamir Topi ngushëlloi familjen Velija

Presidenti shqiptar Bamir Topi i ka derguar nje mesazh ngushellimi familjes se zotit Velija. "Të dashur familjarë të të ndjerit Vehbi Velija! Me dhimbje e trishtim mësova për ndarjen nga jeta të të dashurit tuaj Vehbi Velia! Sëmundja e rëndë e mori para kohe babain e tre fëmijëve, që me energjitë e tij dha një kontribut shumëvjeçar në biznes, media e në promovimin e vlerave tona kombëtare brenda e jashtë vendit. Në këto momente të rënda, më lejoni të ndaj me ju dhimbjen për humbjen e pazëvendësueshme të të dashurit tuaj!", thuhet ne mesazhin e presidentit.


Në Gradec të Gostivarit iu dha lamtumira e fundit Z. Vebi Velija

Në fshatin Gradec të Gostivarit, iu dha lamtumira e fundit, presidentit të VEVE Grup dhe TV ALSAT Vebi Velija. Mijëra njerëz, të afërm, shok e miq, mes të cilëve, njerëz të shquar të fushës së biznesit, politikës, e shumë të tjerë, morën pjesë në ceremoninë funebre. Këto janë pamjet e ceremonisë funebre, ku duket qartë, numri i madh i njerëzve, përfaqësues të institucioneve, miq të të ndjerit në fushën e biznesit, si dhe të afërm të tij.
Prej orësh, shumë prej pjesëmarrësve, ishin mbledhur në ambientet e shtëpisë, në vendlindjen e tij, për t’u përshëndetur për herë të fundit me zotin Vebi Velija, president i VEVE Group dhe të TV ALSAT.
Përmes angazhimeve të tij në ekonomi dhe me pjesëmarrjen personale në trupat dhe forumet e shumta rajonale dhe ndërkombëtare, ekonomike dhe politike, përmes sistemit të Televizionit ‘ALSAT’ dhe Fondacionit ‘Velija’ për kulturë, 61-vjeçari Vebi Velija në vazhdimësi, në dy dekadat që kaluan, kontribuoi për zhvillimin e lirisë, demokracisë dhe bashkëpunimit rajonal në të gjitha sferat në Ballkan.


Alsat