Dilemat për komunat e reja

[Val9]

Presidenti thotë se zgjedhjet duhet të mbahen për të gjithë dhe në tërë territorin e Kosovës. Qeveria insiston se komunat e reja do të themelohen aty ku ka mundësi të ndërtohet pushtet demokratik. Por, në qarqe diplomatike po bisedohen “aranzhime praktike” për mbajtjen e zgjedhjeve në komunat e reja me shumicë serbe për shkak të vonesave në përgatitjen e tyre. ICO, ndërkohë, sugjeron se decentralizimi dhe zgjedhjet nuk janë domosdoshmërisht të ndërlidhura.

Nga Artan Mustafa më 16.07.2009 në ora 8:05
Muaj më parë, Ministri i Pushtetit Lokal Sadri Ferati e shihte ditën e zgjedhjeve si “Ditën D” të krijimit të komunave të reja me shumicë serbe që parashihen me pakon e Emisarit Martti Ahtisaari.

Në një intervistë për Express, Ministri thoshte se do të duhet të ketë një dalje të kënaqshme të popullatës në votime në rajonet që priten të bëhen komuna, në mënyrë që ato të konfirmohen si komuna të reja.

Po të realizohej kjo ide, do të ishte kthyer në një ngjarje pozitive. Serbët do të merrnin pjesë në procesin e parë zgjedhor kosovar pas pavarësisë përderisa integrimi i tyre mbetet prioriteti kryesor i institucioneve të Prishtinës.

Por, Beogradi u bëri thirrje të hapur serbëve që të mos dalin.

Kjo lëvizje e drejtuesve serbë ka vënë një pyetje të rëndësishme përpara Prishtinës: do të insistohet që dalja e serbëve më 15 nëntor është kusht për krijimin e komunave të reja duke rrezikuar kështu që të rrezikojë thellimin e ndarjeve etnike?

Në qarqet diplomatike në Prishtinë ka diskutime në lidhje me aranzhimet praktike për zgjedhjet lokale në komunat e reja që pritet të ngritën dhe që do të kenë shumicë serbe.
Diplomatët besojnë se puna e ekipeve përgatitore për krijimin e komunave të reja do të duhej të ketë qenë normalisht në një fazë shumë më të avancuar.

Është hedhur edhe ideja e aranzhimit të zgjedhjeve për ato komuna të reja të cilat nuk do të mund të përgatiten siç duhet në një kohë të mëvonshme.

Megjithatë, institucionet e Kosovës vazhdojnë të insistojnë në versionin e parë.

Zëdhënësi i Presidentit, Xhavit Beqiri, ka thënë të mërkurën për Express se deri më tash nuk ka pasur asnjë indikacion se mund të ketë diskutime për aranzhim të mëvonshëm të zgjedhjeve në ndonjë komunë të re.

“Qëndrimi ynë është se zgjedhjet do të mbahen për të gjithë në gjithë territorin e Kosovës”, ka thënë Beqiri.

Ai ka shtuar se në takimet që ka zhvilluar Presidenti me përfaqësuesit e partive politike serbe, në kuadër të takimeve me subjektet politike për caktimin e datës së zgjedhjeve, ata kanë shprehur gatishmërinë e tyre për të dalë në zgjedhje.

Beqiri ka nënvizuar gjithashtu se edhe në mesin e javës së kaluar Presidenti ka zhvilluar një takim me KQZ’në ku nuk është folur për asnjë plan tjetër për sa i takon zgjedhjeve.
“Presidenti u bënë thirrje të gjitha partive të dalin në zgjedhjeve sikurse edhe të gjithë qytetarëve”, është shprehur Beqiri.

Edhe më i drejtpërdrejt ka qenë Zëvendëskryeministri Hajredin Kuçi, në një prononcim për Express.

“Procesi i decentralizimit lidhet shumë me participimin e komunitetit serb në zgjedhje. Komunat e reja do të themelohen aty ku ka mundësi të ndërtohet pushtet demokratik. Dhe asnjë variant tjetër, aktualisht, nuk është duke u menduar”, ka deklaruar Kuçi.

Ai ka ftuar serbët që të jenë pjesë e procesit zgjedhor më 15 nëntor.

z.Kuçi ka thënë se në Qeverinë e Kosovës asnjëherë nuk është diskutuar për ndonjë aranzhim tjetër për kohën e mbajtjes së zgjedhjeve në komunat e reja me shumicë serbe.
“Gjithë angazhimi ynë dhe i bashkësisë ndërkombëtare është që serbët të marrin pjesë në zgjedhje dhe të ndërtojmë bashkë pushtetin demokratik”, është shprehur Kuçi.

Ai ndërkohë ka hedhur poshtë kritikat se institucionet më të larta kosovare nuk janë duke shtyrë përpara siç është pritur obligimet në procesin e decentralizimit.

“Përkundrazi”, përgjigjet Kuçi. “Por ne kemi qenë të kujdesshëm në dy çështje që lidhen me decentralizimin: e para që ai të jetë i balancuar në tërë territorin e Republikës dhe e dyta që participimi i serbëve të jetë bazë për komunat e reja. E jo të ndodhë që të formohen komunat e reja, e aty të instalohen strukturat paralele”.

Ndërkohë, Përfaqësuesi Civil Ndërkombëtar sot formalisht ka emëruar anëtarët e ekipit përgatitor për Kllokot-Vërbovc, të mërkurën.

“Ekipe tjera për katër komunat tjera të reja dhe për një që zgjerohet do të emërohen nga ICR në momentin e duhur”, ka thënë për Express zëdhënësi i Zyrës Civile Ndërkombëtare, Andy McGuffie.

Sidoqoftë, ai ka bërë ndarje mes decentralizimit dhe zgjedhjeve.

“Është me rëndësi të nënvizohet se decentralizimi në vete është një proces i ndarë prej zgjedhjeve. Zgjedhjet thirren në përputhje me ligjin për zgjedhjet lokale dhe do të mbahen në komuna sikurse janë thirrur nga Presidenti”.

[Guri i Kuq]

Ndonëse vlerësohen si akt jolegjitim dhe provokim i radhës nga Beogradi zyrtar, “për hir të stabilitetit në Kosovë”, zgjedhje lokale serbe në Graçanicë dhe Gorazhdec, nuk do t’i ndalojë askush.

Express,Prishtine

Nga Bekim Greiçevci më 13.08.2009 në ora 8:23

Në bazë të fjalëve të përfaqësuesve të institucioneve kosovare dhe atyre ndërkombëtare, zgjedhjet lokale serbe në Graçanicë dhe në Gorazhdec të Pejës, të paralajmëruar për këtë diel, nuk do të pengohen.

Ndonëse vlerësohen si akt jolegjitim dhe provokim i radhës nga Beogradi zyrtar, “për hir të stabilitetit në Kosovë”, edhe këto zgjedhje nuk do t’i ndalojë askush.

Kjo është hera e dytë që Serbia organizon zgjedhje në Kosovën e pavarur, megjithëse zgjedhjet e fundit, në maj të vitit të kaluar, janë mbajtur para hyrjes në fuqi të Kushtetutës së Republikës së Kosovës.

Autoritetet e Serbisë kanë bërë të ditur se për shkak të parregullsive në zgjedhjet e fundit, në komunën e Prishtinës dhe të Pejës do të mbahen zgjedhje të jashtëzakonshme më 16 gusht.

Zëdhënësi i Presidencës, Xhavit Beqiri, ka thënë se qëndrimi i të gjitha institucioneve të Republikës së Kosovës, por edhe i Presidentit Fatmir Sejdiu, është që zgjedhje në Kosovë nuk mund të organizojë askush përveç institucioneve kosovare.

Megjithëkëtë, nga fjalët e tij mund të kuptohet se komuniteti serb në Graçanicë dhe Gorazhdec nuk do të pengohet të dalë në zgjedhje të organizuara nga shteti fqinj.

“Siç e dini, institucionet e Republikës së Kosovës vazhdimisht kanë ndjekur një politikë shumë të kujdesshme në raport me minoritete, për hir të stabilitetit në vend, por edhe për krijimin e një fryme të re të bashkëpunimit të rajonit”, ka thënë Beqiri, për Express.

Ai konsideron se organizimi i këtyre zgjedhjeve është edhe një truk i ri në vazhdën e manipulimeve politike që bën Beogradi zyrtar me qytetarët e komunitetit serb në Kosovë.
“Institucionet e Kosovës nuk do të marrin karremin e Beogradit, as kësaj radhe, pra nuk do bien pre e provokimeve që bën Beogradi zyrtar”, ka thënë ai.

Ai thotë se këto zgjedhje janë absolutisht jolegjitime dhe nuk do të kenë kurrfarë efekti në Kosovë. “Për institucionet e Kosovës të ashtuquajturat zgjedhje janë krejtësisht të paqena dhe nuk përcaktojnë gjë”, ka thënë Beqiri.

Ndërkaq, zëdhënësi i Zyrës Civile Ndërkombëtare Kai Mueller-Berner ka thënë se Presidenti i Kosovës e ka caktuar 15 nëntorin si datë për zgjedhjet lokale, në përputhje me Kushtetutën e Kosovës dhe ligjet e saj. “Kjo do të jetë një mundësi e shkëlqyeshme për të gjithë qytetarët e Kosovës nga të gjitha komunitetet që të shfrytëzojnë të drejtën e tyre demokratike për të votuar dhe për t’u dëgjuar zëri i tyre”.

Nga ana tjetër, analisti politik Ramush Tahiri vlerëson se zgjedhjet serbe janë një agresion politik dhe juridiko-ligjor mbi Kosovën. “Për zgjedhjet presidenciale dhe parlamentare ( të Serbisë) mund të jemi pak fleksibilë, mirëpo për zgjedhjet lokale jo, sepse, domethënë, është pushtet i Serbisë në Kosovë. Kjo nuk lejohet me asnjë normë. Përndryshe, kjo është kundër vetë sovranitetit dhe pavarësisë së Kosovës dhe Kosova nuk mund edhe të jetë e pavarur, edhe të ketë komuna të pushtetit serb ose të Serbisë në Kosovë”, ka thënë ai për radion Europa e Lirë.