Sot është Dita Botërore e Lirisë së Shtypit

[Vicianum]

BOTA,3 MAJ 2009(VushtrriaPress)-Me aktivitete të ndryshme sot në gjithë globin po shënohet 3-Maji, Dita Botërore e Lirisë së Shtypit. Kjo ditë zanafillën e vet e ka që nga viti 1993 atë kohë Asambleja e Përgjithshme e Kombeve të Bashkuara me rekomandim të UNESKO-s 3 Majin e shpalli si ”Ditë Botërore të Lirisë së Shtypit”. Edhe më tej mbetet shqetësuese vrasja, burgosja dhe dhuna ndaj gazetarëve në gjithë botën, sipas disa statistikave gjatë vitit 2008 në botë janë vrarë 41 gazetarë, kurse që nga janari i këtij viti e deri më tani në botë janë vrarë 11 gazetarë.
VushtrriaPress

[Llapi]

Sot është Dita Botërore e Lirisë së Shtypit

Mediat në gjithë botën sot shënojnë 3 Majin Ditën Botërore të Lirisë së Shtypit. Është ky një rast kur përkujtohen gazetarët që humbën jetën në detyrë si dhe të fokusohet roli i mediave të paanshme në shoqëri. Të përkujtojmë se 41 gazetarë janë vrarë në vitin 2008, ndërsa 11 janë vrarë prej fillimit të vitit 2009. Në vendin tonë kjo ditë do të shënohet me aktivitete të ndryshme.
Vendimi i Asamblesë së Përgjithshme të Kombeve të Bashkuara për ta caktuar 3 Majin si Ditën Botërore të Lirisë së Shtypit, u mor në përpjekje për të vetëdijesuar njerëzit mbi rëndësinë e lirisë së të shprehurit dhe për t’i përkujtuar detyrimin për të mbrojtur këtë të drejtë siç parashihet në Artikulli i 19-të i Deklaratës Universale të të Drejtave të Njeriut.

Të përkujtojmë, në prag të ditës Botërore të Lirisë së shtypit, Sekretari i përgjithshëm i OKB-së, Ban Ki-Moon ka deklaruar se numri i sulmeve ndaj gazetarëve në botë mbetet i lartë. Me këtë rast ai u bëri thirrje qeverive që i kanë arrestuar gazetarët, të sigurojnë se të drejtat e tyre respektohen plotësisht, përfshirë dhe të drejtën e apelimit dhe të mbrojtjes nga akuzat.

Sipas Komitetit për Mbrojtjen e Gazetarëve, 41 gazetarë janë vrarë në vitin 2008, ndërsa 11 janë vrarë prej fillimit të vitit 2009.

Ndërkohë sipas një raporti të publikuar nga Freedom House thuhet se përderisa liria e shtypit në shoqëritë e hapura është duke u prekur në përgjithësi nga fondet jo të mjaftueshme, në vendet me qeverisje shtypëse, kriza ekonomike po ndikon që lidershipi të ketë kontroll ndaj mediave.
Në raport ku klasifikohen 195 vende të botës, rënie të lirisë së shtypit gjatë vitit të kaluar ka pasur më së shumti në vendet e Evropës Qendrore dhe Lindore, me theks të veçantë në vendet e ish Bashkimit Sovjetik.

Me rastin e kësaj dite, Asociacioni i Gazetarëve Profesionist të Kosovës (AGPK) në bashkëpunim me Programin e Kombeve të Bashkuara për Zhvillim (UNDP) dhe Zyrën e Koordinatorit të Kombeve të Bashkuara për Zhvillim (UNDCO) organizojnë sot tryezën “Mediat, qasja në informacion dhe zhvillimi”. Qëllimi i kësaj ngjarje është diskutimi i rolit të mediave në ndërtimin dhe fuqizimin e demokracisë dhe në zhvillimin e përgjithshëm të Kosovës.

Në të njëjtin rast të gjithë gazetarët do të ftohen që të marrin pjesë në konkursin e gazetarisë “Çmimi i Varfërisë në Gazetari 2009”, që organizohet për 4 vjet radhazi, me mbështetjen e Ekipit të Agjencive të Kombeve të Bashkuara në Kosovë (UNKT).

[Duaje Siveten]

Metropol, 02/05/2009

Kompleksi antimedie i Kryeministrit

ARMAND MAHO

Kryeministri Sali Berisha sulmoi dje dhe një herë pa asnjë shkak mediet shqiptare, me pretendimin se punojnë kundër interesave të vendit. Mund ta kuptoja deri diku zemërimin e tij ndaj një medie që ka folur gjerë e gjatë për atë që është quajtur “skandali i Korfuzit”, sepse dhe qëndrimet e të dyja palëve kanë qenë të ndryshme dhe kontradiktore dhe peshorja e së vërtetës ende nuk dihet se në ç’krah anon. Mund të jetë ashtu siç thotë kjo medie, por mund të ndodhë që edhe qeveria të ketë të drejtë, megjithëse për çështje të tilla kombëtare qeveria duhet të ketë një lloj transparence kur merr vendime, sepse ka të bëjë me cenimin ose jo të interesave kombëtarë. Ajo çka la një shije të hidhur tek të gjithë ata që e dëgjuan ishte përsëritja e sulmit ndaj një tjetër gazetari, i cili e pyeti në lidhje me diskutimin që Kryeministri ka bërë me homologun e tij grek në lidhje me çështjen çame. Nuk dua t’i hyj këtu analizës se pse gjatë tërë vizitës së Karamanlisit, por edhe gjatë fjalës së tij dje Berisha s’e përmendi asnjëherë fjalën “çam”, duke lënë të zhgënjyer këtë komunitet, i cili në një pjesë të madhe voton pro së djathtës. Këto mbetet t’i sqarojë ai vetë ose ndonjë këshilltar i tij, nga ata të shkolluarit jashtë dhe të mendimit evropian, që ende s’e ka kuptuar rëndësinë që ka kjo çështje, apo se pse Shqipëria e ka ende kompleks për të kërkuar të drejtën e saj ndaj një shteti të njohur për qëllimet e tij ekspansioniste ndaj fqinjëve.

Edhe më shqetësues është fakti se Kryeministri në mënyrë të përsëritur vazhdon t’i etiketojë mediet si organizma antikombëtarë, të lidhura me mafien, hanxharë të saj etj., etj., duke bërë që në sytë e publikut shqiptar mediet dhe gazetarët të pësojnë atë çka i druhen të gjithë: mungesën e besimit. Për rastin në fjalë media s’ka bërë asgjë tjetër vetëm se lajmëroi kreun e qeverisë për shqetësimin e atyre mijëra qytetarëve me origjinë çame, të cilët përpara 50 vjetve u përzunë me përdhunë nga trojet e tyre vetëm se ishin shqipfolës. Nuk është faji i askujt që Kryeministri shqiptar (jo ai grek, ai po i mbron mirë interesat e kombit të tij) nuk foli asnjë fjalë për komunitetin çam. Mbështetja politike që mund t’i japë Greqia pushtetit të Berishës, pak i intereson medies. Në marrëdhëniet e tij personale me Karamnlisin Berisha mund të bëjë të ç’të dojë, por s’ka asnjë lloj të drejte që t’i bëjë hosana në pozicionin e kryeministrit të Shqipërisë. Shqiptarët me prejardhje çame janë taksapagues të këtij vendi dhe kanë të gjithë të drejtën e botës të dinë se çfarë po bën kryeministri i tyre për të mbrojtur një të drejtë që ata kanë kohë që e kërkojnë. Ndërsa roli dhe detyra e medies ishte që t’i tërhiqte vëmendjen Kryeministrit për pasivitetin e tij, duke menduar se edhe çamët janë pjesë e këtij kombi, një çështje po aq e rëndësishme sa çështja e Kosovës, një e drejtë që u përdhos dhe të paktën këtyre qytetarëve t’u kompensohet ose t’u kthehet ajo çfarë ka mbetur. Ku e sheh Kryeministri politikën antikombëtare këtu?

Media atë mision ka: të jetë kritike ndaj qeverisë, ndërsa qeveria ka mision të miradministrojë taksat. Se ndodh Gërdeci, nuk është faji i medies, ajo thjesht do të dijë cili ishte shkaku dhe fajtori të dënohet. Se ndodhin skandale të tjera korruptive me zyrtarë të pacipë, që vjedhin paratë e shtetasve të tyre, që janë dhe njerëzit më të varfër të Evropës, sërish nuk është problemi ynë, sepse gazetarët janë aty që të monitorojnë punën e qeverisë, ashtu siç nuk kanë përtuar të rrinë me orë të tëra përpara dyerve të Kryeministrisë, Kuvendit apo ministrive për të shkruar për sukseset e tyre.

Vetëm para pak kohe ishte po Kryeministri Berisha që i etiketoi mediet si “hanxharë të pronarëve të tyre”, ndërsa pronarët ka kohë që i ka etiketuar si mafiozë. S’e di, të them të drejtën, me ç’të drejtë? Por duke qenë pjesë këtij sistemi, di të them se vetë apo ndonjë nga kolegët e mi të jenë bërë hanxhar të ndokujt. Pa dashur t’i servilosem askujt, duhet të shtoj se këta pronarë mediesh kanë bërë një punë të lavdërueshme për publicistikën shqiptare, shumë syresh u kanë dhënë jo pak dorë të lirë gazetarëve për të shkruar ato çka ata mendojnë, dhe në këtë rast ata duhen falënderuar. Në rast se e shohim në këtë këndvështrim, pra në lirinë që na është dhënë për të shkruar, del se dhe vetë gazetarët përfaqësojnë interesat antikombëtarë, por duhet të na jepet një përgjigje se çfarë interesash përfaqësojmë.

Por problemi nuk qëndron as te mediet, as te gazetarët, dhe Kryeministri këtë e di fare mirë. Problemi qëndron pikërisht në mënyrën se si duhen parë mediet. Fatkeqësisht, mediet nuk shihen si pjesë ndihmuese e procesit të demokratizimit të vendit, por si pengesë për atë pjesë të pushtetit të korruptuar dhe me interesa okulte.

Në rast se për çdo denoncim mediatik do të ishte reaguar ashtu siç duhej nga ana e qeverisë, sot gjërat do të ishin ndryshe. Korrupsioni do të ishte ku e ku më i ulët dhe gazetarët nuk do të vuanin krizën e besimit, të inspiruar në mënyrë dashakeqe që në kohë të socialistëve dhe të vazhduar dhe në qeverisjen e demokratëve. Pra, e tërë politika është fajtore. Kryeministri duhet ta dijë se “fresku” që i bëjnë një pjesë e medieve nuk e ndihmon në punën e tij, përkundrazi, shtojnë më shumë pakënaqësitë me deformimin e realitetit që ushtrojnë.

Për ta mbyllur, dua të them se Kryeministri përpara se ta shohë fajin te mediat është mirë të bëjë një analizë pse shumë nga gazetarët që e kanë përkrahur fort në fushatën e 2009-s janë kthyer në kritikë të tij Nga ana tjetër, do bënte mirë të ishte më aktiv në mbrojtje të interesave të së djathtës, të cilat duket se i ka harruar që kur ka hipur në pushtet. Gazetarët po bëjnë sa munden për të rregulluar gjërat në këtë vend, por fuqinë e ndryshimit e kanë ata që u kemi besuar pushtetin.