Kryeministri ndez Kongresin e Popullorëve Europianë, duartrokitje të zgjatura gjatë fjalimit
Liderët europianë shprehën dje mbështetjen e tyre të plotë për fitoren e Kryeministrit Berisha në zgjedhjet parlamentare të 28 qershorit. Të mbledhur në Varshavë në Kongresin e Partive Popullore Europiane, krerët e 74 partive të djathta europiane, shumica e tyre në pushtet në vendet anëtare të BE-së, kanë pritur me ovacione dhe duartrokitje të zgjatura fjalën e kreut të qeverisë shqiptare në këtë kongres. Personalitete të larta të politikës europiane, 22 kryeministra dhe presidentë të politikës së djathtë europiane, mes të cilëve edhe Presidenti i Komisionit Europian, Hose Manuel Barroso janë ngritur në këmbë dhe kanë shoqëruar me duartrokitje përfundimin e fjalimit të Berishës, i cili u shpreh se e djathta është progresi i Europës. Duke iu referuar zgjedhjeve në Shqipëri numri një i ekzekutivit shprehu bindjen se Partia Demokratike do të fitojë zgjedhjet parlamentare të 28 qershorit, pasi shqiptarët e kuptojnë që të votosh majtas është regres. Duke shprehur angazhimin për të respektuar çdo qëndrim të qytetarëve shqiptarë, kreu i qeverisë tha se vota e qytetarëve djathtas do të shpërblehet me ndryshimin dhe zhvillimin e mëtejshëm të vendit, duke e shndërruar atë në një vend modern e bashkëkohor. "Por gjithashtu, ndonëse jam i vendosur për të pranuar dhe respektuar çdo verdikt të kombit tim, kam kënaqësinë t'ju informoj se ne do t'i fitojmë këto zgjedhje, sepse shqiptarët janë njerëz të mençur, ata e dinë se të votosh majtas do të thotë të votosh për mure dhe ata nuk do të votojnë për mure, do të votojnë për horizonte, për horizonte që shndërrohen në realitet, horizonte që, me ndihmën tuaj, do të shndërrohen në realitet përsëri", u shpreh kreu i qeverisë në fjalën e tij para kongresit të partive të djathta europiane. Duke shprehur edhe njëherë garancinë për të zhvilluar zgjedhje të lira dhe të ndershme, Berisha ftoi të gjitha shtetet e pranishme në kongres që të dërgojnë sa më shumë vëzhgues në Shqipëri gjatë zhvillimit të zgjedhjeve parlamentare. Kreu i qeverisë vlerësoi se zhvillimi i këtij procesi në mënyrën më transparente është i nevojshëm për t'i dhënë fund njëherë e përgjithmonë abuzimit me votën e qytetarëve shqiptarë. "Ne po shkojmë drejt zgjedhjeve në qershor dhe unë bëj këtu një premtim solemn për zgjedhje të lira dhe të ndershme. Dhe do ta mbaj këtë premtim, me gjithë përkushtimin tim. Dhe iu ftoj ju, partive të PPE, të dërgoni vëzhgues, sepse shqiptarët kanë nevojë të domosdoshme për zgjedhje të lira dhe të ndershme për të lënë mbrapa grindjet për zgjedhjet", vijoi më tej kryeministri në deklaratën e tij, e cila u prit me duartrokitje nga të gjithë krerët e shteteve të pranishëm në këtë kongres.
Fitorja e së djathtës në interesin më të mirë të Europës
Fitorja e ardhshme e Partive Popullore Europiane në zgjedhjet e ardhshme për Parlamentin Europian është në interesin më të mirë të Europës. Duke shprehur falenderimet dhe mirënjohjen për ftesën për të marrë pjesë në këtë kongres, kryeministri e konsideroi Kongresin e Partive Popullore Europiane si një levë shumë të fuqishme për një fitore të ardhshme të këtyre partive në mbarë Europën. "Dua t'ju falenderoj ju për nderin që më ofruat sot që t'i drejtohem kësaj audience, Kongresit të EPP-së, që është një ngjarje shumë e madhe dhe levë shumë e fuqishme për një fitore të re të ardhshme të Partive Popullore në mbarë Europën, në interesin më të mirë të Europës", tha kryeministri. Ne, vijoi më tej ai, mblidhemi sot në një vit që shënon 20-vjetorin e rënies së Murit të Berlinit, ngjarjen më të madhe në historinë e qytetërimit tonë, në historinë e lirisë së njerëzimit, pas Luftës së Dytë Botërore. Gjithashtu, ai theksoi se në këtë përvjetor, çdo qytetar i lirë i Europës i detyrohet kaq shumë dhe nderon sot dy burra të mëdhenj të kombit polak; Papa Gjon Palin e Dytë, i cili shndërroi kishën në një mburojë të vlerave fondamentale në shoqëritë e shtypura dhe Presidentin Leh Valesa, Davidi, i cili në Dansk, në emër të popullit të tij dhe të gjithë popujve të shtypur të Europës, luftoi dhe mundi Goliath-in. Më tej, kryeministri shprehu mirënjohjen dhe përshëndetjet e tij më të përzemërta për Presidentin Valesa. "Presidenti Valesa! Ju përshëndes ju, me përshëndetjen që unë kam më shumë në zemër dhe është një përshëndetje tradicionale shqiptare; Tungjatjeta!", vijoi më tej kryeministri ndër të tjera gjatë kongresit të Partive Popullore Europiane, i cili zhvilloi punimet dyditore në Varshavë.
Aplikimi për në BE, hap shumë i rëndësishëm historik për shqiptarët
Kryeministri Berisha e cilësoi dje aplikimin e Shqipërisë për statusin e vendit kandidat për anëtarësim në BE si një hap shumë të rëndësishëm historik për mbarë kombin shqiptar. Ai vlerësoi se në muajin prill, kombi shqiptar ka përjetuar dy ngjarje madhore dhe historike; krahas aplikimit për në BE, anëtarësimin në Aleancën më të fuqishme të sigurisë në botë, NATO. "Gjatë këtyre viteve, kam udhëtuar shumë në kryeqytetet e vendeve tuaja, kam takuar kryetarët e partive, shteteve dhe qeverive tuaja. Në këto udhëtime unë kam mbajtur në shpirt dhe zemër, projektet ëndërr të kombit tim, apo ëndrrën e integrimit euroatlantik dhe europian. Këtë muaj, unë dhe kombi im, pamë në Strasburg, ëndrrën euroatlantike të bëhej realitet, Shqipëria u bë anëtare e NATO-s. Dhe tre dite më parë, bëmë një hap shumë të rëndësishëm në histori. Tre ditë më parë Shqipëria aplikoi për statusin e kandidatit në BE, me miratimin e vendeve dhe qeverive tuaja. Kjo ishte e mundshme për shkak të ndihmës, mbështetjes, asistencës tuaj", u shpreh kreu i qeverisë gjatë fjalës në Kongresin e Partive Popullore Europiane. Gjithashtu, ai shprehu një mirënjohje të veçantë për të gjitha partitë popullore, të cilat kanë qenë promotorët e vërtetë të lirisë dhe promotorët e rënies së Murit të Berlinit. Berisha tha se asnjë qeveri e majtë e asaj kohe nuk e ka mbështetur këtë proces. "Një mirënjohje e thellë, falenderim i përzemërt, është për të gjitha partitë popullore dhe njerëzit, të cilët në besimin tim më të thellë, ishin promotorët e vërtetë të rënies së Murit të Berlinit. Nuk njoh asnjë qeveri të majtë të asaj kohe që ishte e lumtur me rënien e atij muri, e kundërta është e vërtetë", tha kryeministri. Gjithashtu, ai i falenderoi vendet e partisë popullore veçanërisht për ndihmesën që i kanë dhënë Shqipërisë në rrugën e saj drejt lirisë, demokracisë dhe integrimit. "Por gjithashtu, falenderimi është për ju, për të gjithë miqtë këtu, për ndihmën e madhe që i keni dhënë vendit dhe kombit tim në udhëtimin e tij të lirisë, demokracisë dhe integrimit", tha kryeministri. Ai theksoi se në vitin 2005, kur Partia Demokratike rierdhi në pushtet, vendi përballej me një nivel shumë të lartë të korrupsionit dhe si pasojë proceset e integrimit ishin të bllokuara. "Katër vite më parë unë rierdha në pushtet. Kombi im po përballej me disa mure shumë të vështira që qëndronin para tij, mure të cilat pothuajse po i mbyllnin dyert projektit të tij ëndërr, muri i krimit të organizuar, muri i korrupsionit", tha kreu i qeverisë.
Shqipëria një vend i sigurt falë luftës me zero tolerancë ndaj krimit dhe korrupsionit
Shqipëria tashmë është një vend i sigurt jo vetëm për rajonin, por edhe më gjerë. Arritjet pozitive në luftën kundër korrupsionit dhe në luftën kundër krimit të organizuar e bëjnë atë një vend me stabilitet të lartë. Duke folur në Kongresin e Partive Popullore Europiane, kryeministri Berisha vlerësoi dje se një nga premtimet më solemne që kjo mazhorancë i ka bërë qytetarëve shqiptarë ka qenë lufta pa kompromis ndaj krimit të organizuar dhe korrupsionit. Ai vlerësoi se rezultatet në luftën kundër krimit të organizuar e kanë shndërruar Shqipërinë në vendin më të sigurtë në rajon, duke bërë që numri i turistëve të rritet në mënyrë të ndjeshme. "U zotova para qytetarëve të mi se do ta luftoj me tolerancë zero krimin e organizuar dhe do ta çmontoj atë mur dhe kështu bëra. Në 16 muaj, ne çmontuam 206 grupe kriminale dhe arrestuam mbi 1000 anëtarë dhe bosë të këtyre organizatave dhe sot vendi im ka treguesit e kriminalitetit më të ulët se mesatarja juaj. Vitin e kaluar, Shqipëria u vizitua nga 2.7 milion turistë të huaj nga vendet tuaja në siguri të plotë. Shqipëria është një vend i sigurt", u shpreh Berisha para liderëve të së djathtës europiane. Muri i dytë, tha kryeministri, ishte korrupsioni. "U zotova para qytetarëve të mi se do ta luftoj korrupsionin me zero tolerancë. Shqipëria, që ishte në 24 vendet më të korruptuara, vitin e kaluar la mbrapa 95 vende dhe është duke u përmirësuar", tha ai. Ne, vijoi kryeministri, nxorëm administratën publike jashtë konfliktit të interesit, nxorëm një ligj për të mbrojtur informantët kundër korrupsionit, njëlloj si dëshmitarët e krimeve të rënda dhe i shpërblejmë ata me 6% të vlerës që sjellin. "Ne realizuam prokurimet elektronike, taksat elektronike, doganat elektronike. Cilat janë rezultatet? Ne shkurtuam 1% shpenzimet operative të administratës, kursyem në prokurime 0.5 miliard euro, duke luftuar korrupsionin në dogana, taksa dhe tatime dhe duke ulur taksat, kemi arritur në tre vjet të kemi 3 miliard euro më shumë se qeveria e mëparshme", u shpreh më tej numri një i ekzekutivit. Duke e cilësuar korrupsionin si një fenomen negativ, i cili duhet luftuar çdo ditë, kryeministri shprehu angazhimin e qeverisë që ai drejton për ta luftuar atë çdo ditë e më shumë. "Korrupsioni është një kancer që duhet luftuar çdo ditë dhe ne jemi shumë të vendosur ta luftojmë atë. Por, këto rezultate janë rezultate të një programi të qendrës së djathtë, që ne së bashku ndajmë dhe i besojmë, reformave të ndërmarra, të bazuara në këtë program. Unë iu kam premtuar qytetarëve të mi taksa të ulëta", tha kryeministri. Gjithashtu, ai vuri në dukje se sot Shqipëria është vendi me taksat më të ulëta në Europë. Kryeministri u bëri thirrje të pranishmëve që të nxisin investitorët e vendeve të tyre të investojnë në Shqipëri, pasi qeveria ofron kushte lehtësuese për ta. "Ata do të gjejnë një taksë të sheshtë 10%, 15% kontribut social dhe 1.5% taksa e biznesit të vogël. Unë do të vazhdoj me revulucionin fiskal. Por cilat janë të ardhurat, mund të më pyesni ju? Ato rriten çdo vit me 22%, çdo vit unë kam dërguar në qershor një buxhet të dytë shtesë në Parlament. Taksat e ulëta shpërblejnë më shumë se sa taksat e larta. Vendi im kishte një rritje 8% këtë vit, si pasojë e krizës, ne përsëri po mbahemi në 4%", vijoi më tej kryeministri.
Përgjigju Duke Cituar
Postuar më parë nga perkthyes
Krijoni Kontakt