Marenglen Doga, i cili kishte dy dënime, një me 10 vjet dhe një tjetër me 20 vjet burg, së fundi po hetohej për gjobëvënie ndaj një biznesmeni nga Vlora. Burime nga grupi hetimor pohuan se i dyshuari Doga i kishte vënë 100 mijë euro gjobë një ndërtuesi vlonjat, emri i të cilit nuk bëhet i ditur. Biznesmeni ishte kërcënuar nëpërmjet mesazheve në telefon që të dorëzonte shumën, ndryshe jeta e tij ishte në rrezik. I dyshuari e kishte paralajmëruar biznesmenin që të mos bisedonte me asnjeri, por duket se ai ia ka besuar këtë sekret policisë, në mënyrë që çështja të zgjidhej pa incidente. Pasi ka mbajtur të dyshuarin në përgjim prej disa ditësh, grupi hetimor i Drejtorisë Kundër Krimit të Organizuar dhe Prokurorisë së Krimeve të Rënda ka zgjedhur si moment për arrestimin e Mareglen Dogës, takimin e tij me biznesmenin. Ai ra në pranga në kohën kur do të takohej me ndërtuesin për të marrë paratë. Nga përgjimi i kontakteve me biznesmenin, grupi hetimor ka mësuar se dje, në orën 14:00, ai do të takohej me personin e kërkuar, në një lokal pranë stadiumit kombëtar "Qemal Stafa" në Tiranë. Biznesmeni i kishte premtuar Dogës se kishte edhe paratë me vete dhe do ia jepte pasi të pinin një kafe. Mareglen Doga ka shkuar të takojë biznesmenin, i shoqëruar edhe nga e fejuara e tij. Në këtë moment grupi i oficerëve të Operacioneve Speciale ka arrestuar në flagrancë 31-vjeçarin Mareglen Doga. Ai nuk ka bërë asnjë rezistencë ndërkohë që bashkë me të është shoqëruar edhe e fejuara, e cila më pas është lënë e lirë. Në një deklaratë për shtyp, Drejtoria e Përgjithshme e Policisë njoftoi se 31-vjeçari nga Vlora, Mareglen Doga, është person shumë i kërkuar nga drejtësia shqiptare dhe ajo italiane. Sipas policisë, në vitin 2004 i arrestuari ka vrarë në qytetin e Vlorës shtetasin Isuf Gjoni, vepër penale për të cilën është dënuar nga gjykata me 10 vjet burg. Po në vitin 2004 Gjykata e Bolonjës në Itali e ka dënuar Marenglen Dogën me 20 vjet burg për vrasjen e shtetasit shqiptar me iniciale A.L., vepër penale e kryer në vitin 2000 në qytetin e Ravenas në Itali.
Përgjigju Duke Cituar
Postuar më parë nga {A_N_G_E_L_69}
Krijoni Kontakt