Kosova Lindore (Preshevë, Bujanoc, Medvegjë)

[Tupalla2]

Në Medvegjë u mbajt takimi “Diaspora - Medvegja 2010”

Kënga dhe vallja shqipe i zgjuan shqiponjat


Medvegjë, 7 gusht 2010(medvegja.net)

Të shtunën, më 7 gusht, nën patronatin e Shoqatës Humanitare “Medvegja” në Zvicër, në Medvegjë, përkatësisht në Livadhin e Halilit te Xhamia e Siarinës, u mbajt takimi “Diaspora - Medvegja 2010”, në të cilin morën pjesë qindra mërgimtarë, bashkëvendës nga Kosova dhe qytetarë të Medvegjës.



Komuna e Medvegjës agoi ditën e shtunë më ndryshe nga ditët tjera, meqë vendlindjes ia kishin mësyrë qindra njerëz të saj, të cilët e hijeshuan atë gjatë gjithë ditës. Ky takim, i pari me këtë karakter, do të jetë tradicional dhe do të organizohet gjatë fundjavës së parë të çdo muaji gusht.

Edhe pse pjesa zyrtare filloi me pak vonesë nga ç’ishte paraparë, për shkak të rrugës dhe procedurave kufitare, të cilat e rëndojnë jetën në këto treva etnike, megjithatë efekti u arrit.

Fjalë të shkurtër rasti mbajti prof. Gani Krasniqi, në emër të Këshillit Organizativ, dhe z. Zenel Neziri, kryetar i Shoqatës Humanitare “Medvegja” në Zvicër, i cili në pika të shkurtra foli për aktivitetin humanitar në aspektin gjithëkombëtar.



Një moment i veçantë dhe emocionues ishte deklamimi artistik i një poezie nga Nehat S. Hoxha, i cili kishte ardhur enkas në këtë tubim, ndërkaq me poezinë e tij ua kujtoi të pranishmëve tërë historinë e jetën sonë iliriane dhe lashtësinë në këto treva. Takimin e nderuan edhe delegacionet e Malësisë së Bujanocit dhe asaj të Gollakut, si dhe disa telegrame urimi.


Pjesa muzikore e takimit i takoi grupit folklorik “Shpëtimi”, nën udhëheqjen e prof. Rexhep Abazit, me koreografi tipike shqiptare, duke ekzekutuar disa valle dhe pika tjera me instrumente karakteristike shqiptare.



Nuk mungoi as kënga e përcjellë me tingujt e çiftelisë nga Zenel Halimi. Ndërkaq pjesa që më tepër e ndezi atmosferën ishte këngëtari i mirënjohur i kësaj ane Fadil Fetahu, i cili nën shoqërimin e grupit në përbërje Mala (i njohur si “Kauboj Xhema”) dhe Hazreti, i ngazëllyen të pranishmit.


Tërë këtë ndejë e bëri kuptimplotë ushqimi dhe pijet me bollëk, të cilat ishin gratis për të gjithë të pranishmit, ndërkaq u siguruan nga Shoqata Humanitare “Medvegja” në Zvicër.

Në fund doli porosia: Të jemi në vendlindje sa më shpesh që të jetë e mundur, sepse vetëm kështu ajo duket më e bukur.


Shkruan: Jonuz Fetahu
Foto:medvegja.net

[Tupalla2]

Fotoreportazh:

Në 4-vjetorin e ekzistimit, Medvegja.net-Forum organizoi aktivitete për Diasporën



TË RINJTË I BASHKUAN TË GJITHË


Fushë-Kosovë, 9. VIII. 2010 (medvegja.net)

Në vazhdën e aktiviteteve me rastin e 4-vjetorit të ekzistimit, Medvegja.net -Forum organizoi të dielën, më 8 gusht, dy aktivitete mjaft atraktive për Diasporën: turnir në futboll të vogël dhe koncert muzikor.
Që në orët e hershme të mëngjesit, në palestrën sportive në Fushë-Kosovë, filloi turniri në futboll të vogël, i cili tanimë është bërë tradicional dhe i cili zgjoi interesimin e shumë futbolldashësve që të marrin pjesë në të. Kështu për pjesëmarrje u paraqitën gjithsej 11 ekipe, të cilat e paguan nga një shumë simbolike (12 euro), mjete këto të cilat u dedikohen familjeve në nevojë në komunën e Medvegjës. Në fund, pas një gare të fortë midis rivalëve, fitues doli ekipi me emrin shumë simbolik dhe domethënës, “Trojet”. Ekipi fitues u stolis me kupën kalimtare, ndërkaq kupat u dhuruan nga z.Shaban Uka .

Ndërkaq në mbrëmje, Shtëpia e Kulturës në Fushë-Kosovë, sikur të ishte edhe një herë sa është, vështirë se do t’i zinte të gjithë të interesuarit për të qenë të pranishëm aty. Në hapje të koncertit të pranishmit i përshëndeti Burim Uka, udhëheqës i Medvegja-Forum, i cili u shpreh i kënaqur me praninë dhe interesimin e publikut, ndërkaq premtoi organizime dhe aktivitete të tilla edhe në të ardhmen.

Njëkohësisht staffi i Forumit ,Arsim Syla,Burim Uka,Driton Beha,Florije Bislimi,Faton Beha,Ilir Arifi,Liridon Zejnullahu dhe Jeton Emini,ndanë mirënjohje në përvjetorin e katërt të ekzistimit të Forumit, të cilat u takuan atyre që janë vlerësuar se e kanë ndihmuar dhe kanë kontribuar në mbarëvajtjen e punës: Asllan Ismajli, Shoqata Humanitare Bamirëse “Medvegja” në Zvicër, Shaban Uka, Jonuz Fetahu dhe Arsim Krasniqi.

Tubimin dhe përvjetorin e Medvegja.net-Forum e përshëndeti z. Zenel Neziri, kryetar i Shoqatës Humanitare Bamirëse “Medvegja” në Zvicër, si dhe drejtoresha e Drejtorisë së Kulturës në Komunën e Fushë-Kosovës,si dhe me një telegram urimi edhe Skender Destani, kryetar i Kuvendit Komunal të Preshevës.
Më pas filloi pjesa muzikore e koncertit me reperin e njohur Gold Ag(Arian Agushi ), i cili krijoi atmosferë shumë të pëlqyeshme për të rinjtë e shumtë. Pas tij në skenë doli këngëtarja e re medvegjase Arlinda Kosumi, me një pikë të shkëlqyeshme muzikore, për t’ua lënë radhën grupit folklorik “Shpëtimi” me disa pika muzikore, të përcjella me çifteli, fyell e kavall, nën udhëheqjen e prof. Rexhep Abazit; e më pastaj SHKA “Shqiponjat e Medvegjës”, me një vistër vallesh popullore me veshjen karakteristike medvegjase, nga të cilat në veçanti u pëlqye “Vallja e Pavarësisë”, nën udhëheqjen e drejtorit, Selman Rexhepi. Nuk munguan as rapsodët e mirënjohur Hatem Hajrullahu dhe Gani Demolli, të cilët e therën qiellin me këngët e tyre me motive atdhedashurie. Të gjithë pjesëmarrësit u shpërblyen gjithashtu me falënderime nga stafi i Medvegja.net-Forum.

Me pjesëmarrjen e tyre, mbrëmjen e begatoi edhe SHKA “Zëri i Kosovës” nga Fushë-Kosova me disa valle të realizuara me shumë mjeshtëri.

Interes të veçantë zgjuan vargjet e poetes Miradije Avdullahu, nga Italia, me origjinë nga Kapiti i Medvegjës, e cila shprehu emocionet e saj në formë poetike, kushtuar Medvegja-Forum dhe nostalgjisë për vendlindjen.

Organizimi i tillë doli se është me shumë interes, meqë në këtë mënyrë të rinjtë njihen dhe ofrohen ndërmjet veti, shkëmbejnë përvoja dhe miqësi. Por, veç të rinjve, në këtë mbrëmje kishte njerëz të të gjitha moshave. Me një fjalë, aty u gërshetuan të gjitha: edhe mosha, edhe politika, edhe synimet e orientimet e ndryshme. Prandaj, shtohet pyetja: Kush më mirë se të rinjtë i bashkon të gjithë?


Ekipi i Trojeve,fitusit e Turneut të organizuar nga Medvegja.ne Forum


GOLD AG

Shkuan: Jonuz Fetahu
Fotografit : Arta Uka

[Tupalla2]

Vazhdojm me fotografi nga Takimet e medvegjasve - Koncerti ne Fushe Kosove te cilin e organizoj medvegja.net


sh.k.a.Shqiponjat e Medvegjës


Grupi Folklorik Shpetimi nga Medvegja nga Prishtina


Ansambli Zeri i Kosoves nga Fushe Kosova

[Tupalla2]

Me rastin e fillimit të muajit të shenjt të Ramazanit një delegacion i Shoqatës Humanitare “Medvegja” viziton familjen Rama në Svircë të Medvegjës

Shoqata Humanitare “Medvegja” në Zvicër vazhdon me aktivitete në vendlindje


Svircë-Medvegjë, 13. VIII. 2010 (medvegja.net)

Një delegacion i Shoqatës Humanitare “Medvegja” në Zvicër, i prirë nga kryetari Zenel Neziri, e ka vizituar familjen e Adem Ramës në Svircë të Medvegjës.
Me këtë rast, delegacioni i shoqatës u njoftua nga kryefamiljari i familjes së posakthyer me problemet që ka hasur pas kthimit, në veçanti me problemet ekonomike me të cilat kjo familje ballafaqohet.


Familja Rama,e po sa kthyer në Medvegjë

Me këtë rast u shtrua nevoja për punësimin e ndonjë anëtari të kësaj familjeje, në ç’mënyrë do të mundësohej një jetë më normale.

Kryetari i shoqatës, z. Zenel Neziri shprehu konsideratën e tij dhe të shoqatës që ai drejton për t’i dalë në ndihmë çdo familjeje që kthehet në Medvegjë. Me këtë rast, familjes Rama iu premtua një ndihmë prej 1000 eurosh, mjete këto që do të shërbejnë për blerjen e një lope për qumësht, në radhë të parë.

z.Zenel Neziri,kryetari i shoqatës Medvegja në Zvicër

Z. Ademi, kryefamiljari i kësaj familje, shprehu falënderimet e përzemërta për shoqatën “Medvegja” në Zvicër. Njëherësh ai falënderoi për vizitën e dytë brenda një kohe shumë të shkurtër.

Vlen të theksohet se familja e Adem Ramës është kthyer në Medvegjë para 2 muajve, ndërkaq është vendosur në Svircë, afër xhamisë së Siarinës, dhe ka 8 anëtarë, ndërkaq më parë shoqata “Medvegja” ia kishte ndarë një shumë simbolike prej 200 Chf.

Shkruan:Burim Uka

[Tupalla2]

NJOFTIM

TURNIR NË FUTBOLL TË VOGËL

Turneu u organizuar me 8 gusht 2010,ne te moren pjes 11 ekipe .Turneu u organizua nga Medvegja.net


Kupat per fitusit


Ekipet finaliste Trojet dhe Beni Com



Dua ti falenderoj te gjitha ekipet pjesmarrese ne kete Turne,ne veqanti atyre qe kishin ardh nga Shkupi,por edhe ekipeve tjera nga Prishtina,Fushe Kosova,Zvicra dhe Medvegja.

[Tupalla2]

Po vazhdoj te pasqyroj kete tem me informata nga Medvegja


Me rastin e Muajit të Shenjtë të Ramazanit

Shoqata Kulturore Bamirëse “MEDVEGJA FORUM” e vazhdon aktivitetin e saj bamirës në Medvegjë


Svircë/Llapashticë/Kapit/Medvegjë, 30 gusht 2010 (medvegja.net)

Shoqata Kulturore Bamirëse “MEDVEGJA FORUM”, që vepron në kuadër të Medvegja.net, e realizoi projektin e dytë në Medvegjë. Kështu, Medvegja Forum, me rastin e Muajit të Ramazanit, e ka zhvilluar një aksion humanitar në Medvegjë, duke arritur të shpërndajë ndihma me artikuj ushqimorë, shkollorë dhe higjienikë për 3 familje me kushte jo të mira ekonomike në fshatrat e kësaj komune të Kosovës Lindore.



Në këtë mënyrë, Medvegja Forum, në bazë të mundësive të veta, tenton që sadopak t’ua lehtësojë këtë Muaj të Bekuar dhe Festën e Fitër-Bajramit këtyre familjeve.

Ndihmat e para iu dërguan familjes Rama, e posakthyer në Svircë të Medvegjës. Ndërkaq zonja e shtëpisë, z.Selvije, pasi shprehu falënderime për përkrahjen që po ju u jepet, u bëri thirrje të gjithë atyre që mund të ndikojnë në punësimin e ndonjë anëtari të familjes, ta bëjnë një gjë të tillë. Ajo më tutje vazhdoi të rrëfejë për vështirësitë e mëdha pas kthimit në vendlindje. “Me të vërtetë nuk e kemi lehtë. Jemi 8 anëtarë, pa asnjë të punësuar. I kemi 3 fëmijë për shkollë dhe nuk po dimë kah t’ia mbajmë”, tha ndër të tjera zonja Selvije.

Vazhduam në drejtim të Llapashticës, vend ky kodrinor-malor, i zhytur në thellësi të Medvegjës, i banuar me shqiptarë. Në këtë vend dikur ishte e ndërtuar një xhami, së cilës sot, fatkeqësisht, i ka mbetur vetëm emri, meqë tani nuk vërehen as rrënojat e saj. Nga ky vend dolën edhe njerëz të shquar të kombit, ndër të cilët vlen të përmendet Halil Pasha. Dikur ky vend e kishte një gjallëri, e kishte një perspektivë, ndërkaq sot, skajshmërisht të dëshpëruara, i takojmë vetëm 2 familje shqiptare dhe ato në kushte tejet të rënda ekonomike.



E takuam kryefamiljarin e njërës prej tyre, z.Halimi, i cili e falënderoi Medvegja.net Forum për përkrahje, duke treguar njëkohësisht për vështirësitë e të jetuarit të vetmuar në këto troje.

Ndonëse Kapiti dhe Llapashtica kufizohen ndërmjet vete, na u desh të zbresim në Medvegjë, për të vazhduar në familjen e zotëri H. Haradini, familje kjo 4-anëtarëshe, e cila jeton në Kapit. Në pamundësi të infrastrukturës rrugore për t’u ngjitur deri te shtëpia e z. Halilit, atë e kontaktuam dhe e ftuam që të takohemi te shkolla, përkatësisht te xhamia e Kapitit. Aty ia dorëzuam ato për çka kishim shkuar, ndërkaq ai e falënderoi përzemërsisht stafin e Medvegja.net për këtë vizitë që ia bëri.

Duke u kthyer nga Kapiti, sa ishim të kënaqur që arritëm sadopak si shoqatë e re t’u dalim në ndihmë këtyre familjeve, ishim aq të dëshpëruar se në Medvegjë ka varfëri të tillë, madje tani më të tmerrshme se kurrë më parë. E vetmja shoqatë që deri më tani është përkujdesur për mirëqenien e shumë familjeve në Medvegjë është SHPH “Medvegja”, me seli në Zvicër.
Ky është aksioni i parë i Medvegja.net Forum në Medvegjë, ndërkaq shpresojmë se aksione të tilla të ndërmarrim më shpesh.

Vlen të theksohet se ditë më parë Medvegja Forum e kishte organizuar një turnir në futboll të vogël me karakter humanitar në Fushë-Kosovë, ndërkaq kishte ndarë disa mjete edhe nga buxheti i vet për ta zhvilluar këtë aksion bamirës.



Një falënderim të veçantë duhet bërë për prof. Fadil Mustafa, i cili e shoqëroi vazhdimisht stafin e Medvegja Forum./medvegja.net/

Shkruan: Burim Uka

[Disa]

Medvegja eshte nje qytetez e vogel per kah numri i banoreve(10.760 banore)prej te cileve kan mbetur vetem 2.816 shqiptar,apo 26,17%.
Eshte nje vend qe posedon bukuri te rralla natyrore,duke filluar nga Banja e Siarines ne te cilin gjendet gezjeri i vetem ne Evropen kontinetale,me hudhje te ujit ne lartesi prej 7metra.Gati te gjitha fshatrat dhe vendbanimet tjera jan malore,perveq qytetit-Medvegjes qe gjendet ne luginen e lumit Jabllanica,lum i cili e pershkon mes-per-mes qytetin.Per historin dhe te dhena tjera rreth Medvegjes do postoj pak me von(kur te kem koh),por ajo qe kerkoj nga ju qe te pergjigjeni eshte se a do t'mbetet jasht kufijve te shetit t'Kosoves kjo qytetez e cila nga gjiri i saj ka nxjerr figura te shquara nder shqiptaret,p.sh akademik Idriz Ajeti,pastaj heroin e popullit Zenel Hajdini e shum e shum te tjer...?
pershendetje

Mos mi prek trojet e mija,mbahu Presheve thot Shqiperia.

[Tupalla2]

RIKTHIMI I MJERIMIT NË MEDVEGJË


Rruga e fshatit Tupallë në shkatërrim e sipër

Tupallë-Medvegjë 18 tetor 2010(medvegja.net)

Çdo medvegjasi i kujtohet koha e paraluftës, kur kushtet e jetesës në komunën e Medvegjës ishin të mjerueshme, dhe dita- ditës vetëm sa po shkonin drejt përkeqësimit. Këtë e dinë mirë të gjithë medvegjasit, e sidomos ata që e përjetonin më së shumti këtë mjerim të përditshëm, përkatësisht qytetarët shqiptarë të fshatrave të Medvegjës. Ndjenja e izolimit ekstrem sikur i bënte edhe më shumë njerëzit e asaj ane që të mendojnë edhe për migrimin drejt qyteteve të cilat ofronin kushte më të mira të jetesës.



Më kujtohet biseda ime me një profesor universiteti nga Prishtina, i cili me të kuptuar se vij nga Medvegja, gjegjësisht Tupalla, filloi të fliste për eksperiencën e tij gjatë një vizite të tij në Tupallë. E para gjë që i erdhi ndërmend, ishte rruga e tmerrshme e Tupallës. Kjo për shkak se ajo ishte kohë dimri, dhe rruga e Tupallës ishte praktikisht e pakalueshme për vetura. Dhe, sot e kësaj dite më kujtohet mirë përshtypja e keqe e profesorit të nderuar, për Medvegjën në përgjithësi, përshtypje kjo e krijuar nga përvoja e hidhur në një rrugë të mjerueshme të një fshati të largët.
Përvojat e tilla të bashkëkombësve në vendlindjen tonë, Medvegjën, na bëjnë të mendojmë për përvojat e përditshme të banorëve vendas. Mund të imagjinohet se çfarë vështirësish mund të përjetoheshin, në pamundësi të udhëtimit normal prej fshatrave të Medvegjës drejt qendrave urbane, apo edhe drejt fshatrave tjera.



Koha kaloi shpejt, Medvegja u zbraz shpejt nga shqiptarët. Fshatra të tëra mbetën me pak banorë. Do të duhej bërë një analizë shumë e gjerë për t’i përmbledhur faktorët të cilët ndikuan që të ndodhë kjo lëvizje e popullsisë shqiptare nga Medvegja. Por, gjithkush mund të konkludojë se kushtet e jetesës ishin kontribuues në tërë këtë shpërngulje. Kurse një nga kushtet më të mjerueshme të jetesës në Medvegjë, ishin rrugët katastrofale. Dhe, askush nuk bëri asgjë atëbotë. U desh që të kalojnë vite të tëra, në mënyrë që të fillohej ndërtimi i rrugëve të fshatrave shqiptare në Medvegjë. U desh që në këto fshatra të mbesin vetëm disa familje të pakta, e pastaj të fillohet me përmirësimin e infrastrukturës rrugore.
Sidoqoftë, në vitin 2001-2002 u bë asfaltimi i rrugës Medvegjë – Tupallë. Kjo ngjarje i gëzoi të gjithë shqiptarët e asaj ane. Pas dëshpërimit të thellë me lënien e tokave në mëshirë të askujt, po vinte një shenjë, një grimcë shprese për t’u rimëkëmbur ky fshat. Më në fund, unë kisha argumente për t’iu kundërpërgjigjur përvojës së moçme të profesorit ...

Shpresa që të gjithë e kishim, për krijimin e kushteve të mira të jetesës në Medvegjë, si dhe për kthimin eventual të jetës në këtë vend, dita ditës po vjen A u zbehur. Rrugët e asfaltuara të Medvegjës, po rikthehen përsëri në gjendjen e mjerueshme. Asfalti i dobët i këtyre rrugëve, tashmë është prishur në masë të madhe. Siç shihet edhe në fotografitë e kohës së fundit, rruga e Tupallës po rikthehet në gjendjen e mjerueshme në të cilën ka qenë kohë më parë, përpara se të asfaltohej. Rrëshqitjet e dheut dhe peshat e mëdha të Kamionëve të cilët vjedhin drutë e maleve shqiptare në Medvegjë, ka bërë që asfalti i rrugës të shkatërrohet.



Në fund, çka mund të bëhet tjetër për këtë problem, përpos të ngrihet zëri e të bëhen publike faktet ?! Çka tjetër mund të bëhet, nëse shqiptarët e Medvegjës mbeten të përçarë në grupime të ndryshme kur bëhet fjalë për problemet e tyre të përditshme ?!

Shkruan: Gëzim Zeqiri / Fotografit:medvegja.net
Autori është Sociolog dhe vijon studimet postdiplomike në Fakultetin Ekonomik

[Tupalla2]

Gjuha shqipe vetëm për marketing politik!

Në Medvegjë nuk respektohet dygjuhësia


Medvegjë, 11 tetor 2010 (medvegja.net)

Medvegja zyrtarisht është komunë multietnike dhe sipas Statutit të Komunës, të miratuar në vitin 2003 nga Kuvendi Komunal, gjuha shqipe është gjuhë zyrtare, krahas asaj serbe.

Duke iu referuar statutit të sipërpërmendur, gjuha shqipe, së paku në letra dhe dokumente të miratuara nga Kuvendi Komunal vazhdon të mbetet gjuhë zyrtare, ndërkohë që shkrimi shqip, sipas këtij statuti, duhet të përdoret krahas atij cirilik dhe latin. Por, një gjë e tillë nuk po ndodh në praktikë.
Realiteti është krejt ndryshe. Në Medvegjë nuk mund të hasësh asnjë shenjë sinjalizuese, asnjë shenjë të komunikacionit, asnjë mbishkrim në rrugët e qytetit apo të fshatit, madje as në shtëpinë e shëndetit nuk ka asnjë mbishkrim në gjuhën shqipe.

Qytetarët shqiptarë shprehen thellë të indinjuar, ndërkaq këshilltarët shqiptarë në Kuvendin e Komunës së Medvegjës, për çudi, ende nuk e kanë ngritur një çështje të tillë për trajtim, kurse pushteti lokal e shkel me të dyja këmbët statutin e vet, sidomos kur ka të bëjë me dygjuhësinë. Mos këtë gjendje të paprecedent e ilustron më së miri thënia popullore: “Pa qarë fëmija, nëna nuk e merr!”
Medvegja.net do të vazhdoj ti ngrit qështjet të cilat i preukupojnë qytetarët e Medvegjës

Rruga në ndërtim e sipër Medvegjë-Tullar


Madje as vetë Komuna e Medvegjës nuk e zbaton statutin e saj, kur bëhet fjalë për dygjuhësinë. Këtë e dëshmon edhe kjo reklamë (bilbord), e vendosur nga Komuna mu para ndërtesës së vet.



Të pakta janë mbishkrimet në të dyja gjuhët



B.U

[Dar_di]

Marrëveshja e Konçulit të shpallet e pavlefshme, të tërhiqet nënshkrimi apo të plotësohet

Refik HASANI -

Popullata shqiptare ishte ngritur në kryengritje të armatosur dhe përmes UÇPMB-së mbrojti pragun, nderin dhe dinjitetin e shqiptarëve. Me kërkesën dhe këmbëngulësinë e faktorit politik u vendos që luftimet duhet të ndërpriten se do të garantohen të drejtat individuale dhe kolektive të kësaj krahine.

Me ndërmjetësimin faktorit ndërkombëtar, në emër të tyre, marrëveshjen e nënshkroi i dërguari i NATO-s,Piter Fejt, i cili ndërmjetësoi vazhdimisht ndërmjet Qeverisë së Beogradit dhe UÇPMB-së. Kurse në anën tjetër, nënshkrues nga pala shqiptare, nga kjo krahinë, ishte komandanti i përgjithshëm i UÇPMB-së, Shefket Musliu.

Një dekadë pas

Edhe pas gati një dekade, shumë pak zihet në gojë kjo marrëveshje, prandaj duhet të shpallet e vdekur, pasi nuk ka pasur rezultate të pritura. Që në fillim 1/3 e saj ishte e pavlefshme, pasi nënshkruese nuk ishte e përfshirë edhe pala serbe. Pala serbe ishte pyetur, konsultuar edhe për detaje, por nuk kishte pranuar ta nënshkruante, prandaj pikërisht kjo palë askund nuk iu ka përmbajtur pikave të këtij dokumenti.

Kjo marrëveshje ka shumë elemente që të shpallet e pavlefshme, pasi:
- Prezenca e forcave serbe është shtuar edhe më shumë në këto zona,
- Amnistia e ish-ushtarëve të UÇPMB-së nuk është respektuar,
- Kemi baza të shumta ushtarake si "Cepotina","Sitilia" dhe fusha mbi qytetin e Preshevës i quajtur Livadhi i Shehut dhe pjesë të tjera në rajonin e kësaj krahine shqiptare ,
- Forcat e të gjitha llojeve të Beogradit jo që janë tërhequr nëpër kazerma, por edhe më shumë pozicionohen nëpër vendbanime dhe lokalitete shqiptare ,
- Policia multietnike nuk është instaluar në bazë të përqindjes së popullatës së kësaj krahine
- Shqiptarët në hierarkinë komanduese në policin multietnike nuk janë të përfaqësuar ,
- Beogradi jo që nuk e ka respektuar marrëveshjen e Konçulit, por i ka shtuar forcat e armatosura, paramilitare, forcat e rregullta, forcat policore, grupet e civilëve të armatosur, paramilitarët, gardat kombëtare, milicinë, policinë kufitare, rezervistët ushtarakë, policinë ushtarake dhe shërbimet e inteligjencës.

Edhe pse jemi dëshmitarë të kohës, deri më sot askush nuk ka kërkuar që kjo marrëveshje të plotësohet, duke u përmirësuar me elemente që me kohë nuk janë paraparë. Për një dekadë, të gjitha anët pozitive dhe negative kemi munduar t'i shohim. Për këtë kohë edhe nenet dhe preambula e çdo kushtetute më të avancuar do të dilte në pah se çka duhet të përmirësohet.

Duhet të shpallet dhe të varroset, sepse sipas nenit 4 të kësaj marrëveshjeje kjo vlen për të gjitha forcat e armatosura që në kufijtë e Zonës së Sigurisë, të cilat janë të definuara në Marrëveshjen Tekniko-Ushtarake të Kumanovës dhe Rezolutën 1244 të KS të OKB-së.

Duhet edhe publikisht të shpallet inekzistente, pasi të gjitha kufizimeve dhe modaliteteve të kësaj marrëveshjeje nuk u është përmbajtur Qeveria e Beogradit. Jo vetëm më meritore për arritjen e kësaj, por edhe implementues dhe garantues për këtë marrëveshje është faktori politik dhe ushtarak ndërkombëtar, nga i cili kërkojmë që ky dokument të plotësohet apo të shpallet i pavlefshëm.

Të tërhiqet nënshkrimi

Ne mendojmë që tërheqjen e këtij nënshkrimi mund ta bëjë në forma të ndryshme dhe mbështetur në shumë argumente. Ishte kënaqësi dhe privilegj për firmosjen e një dokumenti për ndaljen e luftimeve, po aq me rëndësi është edhe tërheqja e këtij nënshkrimi. Prandaj, edhe ky publikim yni do të ndërgjegjësojë sadopak që vërtet të mendohet seriozisht për tërheqjen nënshkrimit. Ish-komandanti i përgjithshëm i UÇPMB-së, Shefket Musliu, është gjallë dhe këtë mund ta bëjë me një deklaratë publike të nënshkruar për arsyet e shumta për tërheqjen e këtij nënshkrimi.

Marrëveshja e Konçulit vërtet ishte dokumenti i parë që shqiptarët e mbetur nën administrimin e Beogradit arritën nën prezencën, ndërmjetësimin dhe monitorimin e faktorit ndërkombëtar të firmosin një marrëveshje të njohur edhe ndërkombëtarisht dhe me obligime të barabarta. Së paku kërkesa dhe deklarimi i të nënshkruarit në këtë marrëveshje automatikisht do të zgjonte kureshtjen e faktorit politik dhe ushtarak jo vetëm ndërkombëtar, por edhe atij serb.

Pasi asnjëherë deri më tani faktori politik dhe ushtarak ndërkombëtar nuk e ka pasur të arsyeshme të ftojë një takim konsultativ lidhur me atë se sa janë të kënaqur shqiptarët e kësaj krahine me respektimin e kësaj marrëveshje.

Ne shqiptarët nuk duhet të presim që iniciativa për një takim konsultativ do ta bëjë Beogradi sepse as që ka kërkuar dhe pranuar për një marrëveshje për dhe me shqiptarët. Një ndër arsyet për tërheqjen e kësaj marrëveshje është pasi jo që nuk janë amnistuar ushtarët e UÇPMB-së, po përkundrazi për ditë ndiqen,keqtrajtohen dhe burgosen.

Çështja e pazgjidhur e krahinës shqiptare

Këto tri propozime të parashtruara janë që sa më parë të fillohet të lëvizet nga pozicioni zero. Duhet të jemi të vetëdijshëm që çështja e shqiptarëve nga krahina jona e mbetur nën administrimin e Serbisë nuk është zgjidhur. Prandaj, u bëj apel publik të gjithë ushtarëve dhe ushtarakëve, ata që sakrifikuan më së shumti, të gjithë liderëve të partive politike nga krahina jonë të marrin një vendim dhe të dalin unanim me një qëndrim publikisht që marrëveshja e Konçulit nuk është valide, nuk e njohim, nuk ka dhënë rezultate të pritura dhe të plotësohet, të shpallet e vdekur apo të tërhiqet nënshkrimi nga ky dokument.

Çdo nismë për të filluar që kjo marrëveshje të plotësohet me elemente nga terreni. Vendbanimet dhe lokalitetet shqiptare për çdo ditë ballafaqohen me telashe duke u përballur me vështirësi dhe me padrejtësi të madha.

Nënshkruese e kësaj marrëveshje nuk ishte pala serbe, por edhe shkelësja më e madhe në këtë rast është pikërisht Qeveria e Beogradit. Ne, pala shqiptare, ishim palë luftuese kundër Qeverisë së Beogradit, kurse në këtë marrëveshje ishim palë nënshkruese me ndërkombëtarët. Këtu është hendikepi.

Kjo të rikthehet edhe një herë në një marrëveshje ose të shpallet botërisht se Qeveria e Beogradit është shkelësi i kësaj. Është në interes të ruajtjes së sigurisë dhe investimin për sjelljen e paqes i faktori ndërkombëtar, përveçqë bëri ndërmjetësimin, nuk është e mjaftueshëm, pasi edhe duhet të monitorojë respektimin në tërësi të pikave të kësaj marrëveshje.

Popullata shqiptare nga kjo krahinë tanimë ka krijuar një identitet dhe përvojë, ka ditur të organizojë referendumin më 1 e 2 mars 1992 për një autonomi territoriale dhe me të drejtë bashkëngjitjeje me Kosovën amë. Mbi të gjitha ka ditur ta bartë barrën për organizimin dhe formimin e ushtrisë për çlirimin e Medvegjës, Bujanocit dhe Preshevës.

Përgjegjësit e kësaj ane kanë ditur dhe kanë kërkuar për ndërprerjen e luftimeve dhe uljen në tryezën e bisedimeve dhe kjo të bëhet me një marrëveshje që do ta implementohej dhe që do ta garantonte faktori politik dhe ushtarak ndërkombëtar. Kur kemi ditur të gjithë këto është momenti pasi pikat e marrëveshjes nuk janë askund duke u respektuar, atëherë duhet të kërkojmë unanimisht të dalim me një qëndrim për këtë marrëveshje.

Ky dokument të shpallet i pavlefshëm, të tërhiqet apo të plotësohet që dikur ishte më se i nevojshëm. Pas një dekade ndoshta është i tejkaluar apo e ka shkelur koha. Shpërbërja e ngrehinës artificiale të quajtur Jugosllavi nxori në pah shumë çështje të pazgjidhura ndër to është edhe çështja e krahinës shqiptare të mbetur nën administrimin e Serbisë. (2lonline)