Tjetersimi nga Nder ne Mender i Kombit dhe anasjelltas

[skampin]

Tjetërsimi nga Nder në Mender i Kombit dhe anasjelltas
» Dërguar më: 19/04/2009 - 11:54
Lajme te ngjashme
Tjetërsimi nga Nder në Menderi Kombit dhe anasjelltas
• Datë: Apr 19, 2009
Kiço Blushi

Nuk besoj të ketë qoshk të qytetëruar si ky i yni ku nderimi me çnderimin të jenë motër e vëlla, dy anë të një medaljeje Madje-madje, mund të guxoj të them, pa frikë se herezitoj, se në Shqipëri tejemot ka ngjarë që Meritokracia të jetë njëjtësuar me Shkërdhatokracinë, ndaj nderimi me çnderimin kanë tipare morale, fytyrë e trup të njëjtë, si dy binjakë; ja përse ka ndodhur e po ndodh që brenda një kohe të shkurtër nderimi të shndërrohet në çnderim dhe çnderimi në nderim e askush të mos habitet!.
Kur u rrëzua monumenti i Enverit në Gjirokastër, këngëtari popullor Xhevat Avdalli, një furrxhi, po pinte kafe me shokët e vet…-Ik, Xhevat, i thonë, ik shpejt se po vijnë ata që po shembin Enverin dhe të zunë…Shko e mbyllu në shtëpi…-E pse të mbyllem? - u përgjigj i qetë Xhevati. -Unë vetëm sa kam kënduar…Pastaj, edhe për Zogun kam kënduar…Por, ata që kishin shembur diktatorin nuk donin t’ia dinin për këtë dëshmi “naive”, ndaj, meqë Xhevati kishte pas kënduar për Enverin, prej zemërimit politik e ndoqën dhe…dhe e hodhën nga…Të gjorit iu thyen eshtrat…Pas ca kohësh, ndërroi jetë!…Por trimat e çartur që sulmuan plakun “që kishte kënduar mir’ dhe për Enverin”, me siguri bënë karrierë. U bënë policë ose doganierë…Që kur u martua meritokracia me shkërdhatokracinë, shoqërisë ju përdhosën të gjitha pasqyrat e zyrave, institucioneve, madje edhe të dhomave të gjumit! Në një të tillë pasqyrë ngjan normal po të ngjash shkërdhatë!
Kjo praktikë zbatohet edhe për njerëzit e shquar, për historinë, pra për veprimet me rëndesë e mbivlerë historike e kombëtare, duke shkuar deri te monumentet e kulturës e të kujtesës, te trashëgimia, siç janë rrugët e vjetra, veprat letrare, artistike e shkencore. Për të mos harruar dekorimet, ndërtesat publike dhe historike, lapidarët, kishat, pllakat përkujtimore, tekstet shkollore, librat e rrallë, etnografia, kalatë, folklori etj…Ne kemi qenë e po mbetemi pa kujtesë e pa dëshmi edhe për faj të deformimit që i bëri kujtesës kombëtare diktatura. Të gjitha muzetë e periferive u shkatërruan nga meritoshkërdhatat e emëruar. Në Drenovë p.sh, u gjendën në lumë fotot e vjetra dhe dokumentet e muzeut…Ne jemi i vetmi komb në Ballkan ku në asnjë lokal apo kafene nuk dëgjon muzikë shqiptare. Në Mal të Zi, në Maqedoni, le më pastaj në Greqi nuk ndodh kështu. Shqipëria po bëhet vend i shqiptarëve refugjatë. Gjithçka po tëhuajëzohet me shpejtësi, edhe gjuha, edhe mendësia. Artistët e djeshëm bashkë me veprat e tyre ndjehen të huaj, të përjashtuar, jashtë tregut; disa syresh që ishin shpallur antikombëtarë, sot quhen kombëtarë; tradhtarët e djeshëm, të poshtëruar me “kotece pulash” nëpër Estrada, sot quhen heronj të nderuar! Të dyja palët janë të lodhur e të shterur e njëkohësisht të përjashtuar…Koliqit gati-gati i quhet për nder që ka qenë fashist, po ama Kadaresë dhe Agollit nuk ka rast që nuk u përmendet se kanë pas qenë komunistë…Vetëm këngët qytetare korçare kanë mbetur pa u amerikanizuar, serbizuar a greqizuar! Nuk po rishkruhet historia, sepse gjithçka do të nisë nga sot, nga vajmedetëria!
Sot, askush nuk mund të mbetet për një kohë të mjaftueshme i nderuar….As artistët, as intelektualët, as këngëtarët, as shkencëtarët, as shkrimtarët e djeshëm, madje as ata që dhanë jetën për këtë vend. Sot heronj quhen vetëm horrat që merren me politikë dhe me biznes, d.m.th ata që kanë mundësi shitblerjeje të gjithçkaje e të gjithkujt, lavdi, nder, dinjitet, titull shkencor, diplomë, master…n’daç me shumicë, n’daç me pakicë! Kush e çfarë nuk shitet dot, nuk ka asnjë vlerë! Kush nuk blihet, është i panevojshëm, i pamoralshëm! Kush është i pamoralshëm ka të drejtë të thotë se kush ka moral! Ajo që deri dje quhej vlerë kombëtare, sot cilësohet si antivlerë me një kollajllëk të hatashëm, si këtu, si në Kosovë, më keq në diasporë. Nuk kemi nxënë mend nga revolucioni kulturor kinezo-shqiptar dhe lufta e klasave. Kush ka një të kaluar, patjetër e ka një cen! Kush ka një cen do të paguajë një haraç, duke e këmbyer nderimin moral me poshtërimin e vetes. Kjo është toka e meritoshkërdhatëve të babëzitur e të harlisur, njëri më i shquar se tjetri!
Në çdo shoqëri normale procesin krasitës të vlerave e bën vetë koha, pastaj specialistët. Por jo, jo, jo, tek ne këtë “peshore kombëtare “ e mban si kapital të vetin politika, njëlloj si në diktaturë. Kush ka vlerë e kush jo, do të përcaktohet nga ata që kanë në duar pushtetin e pagjykueshëm e të pakontrollueshëm. Vetëm ata mund të të nderojnë apo të të çnderojnë! Vetëm ata mund të të shpallin Nder të Kombit, anëtar të Gjykatës Kushtetuese apo të Lartë, kryetar të KLSH-së, anëtar të KLD-së, KQZ-së, KKRTSH-së, etj…Kriteri i vetëm është shkërdhatokracia! Me atë kriter mund të të bëjnë a çbëjnë edhe akademik, Pr. e Dr.. Ata të japin ose jo pension special, grada, medalje etj. Kur krerët zëvendësohen në pushtet nga kundërshtarët e tyre, i njëjti person mund të shpallet sakaq nga Nder në Mender i Kombit! Në mos shpallet i tillë, pra në mos transformohet nga një Hiç në Diç, shpejt do të harrohet; në mos harrohet do të përçmohet; në mos përçmohet do të përdhoset; në mos përdhoset do të poshtërohet patjetër një ditë publikisht, politikisht dhe moralisht. Kjo është sëmundja e gjithë administratës. Shikoni si trajtohen anëtarët e Gjykatave tona të Larta dhe prokurorët e Përgjithshëm, nj’ashtu si kryetarët e sindikatave. Të gjithë vdesin nga frika e një poshtërimi të nesërm publik: nuk është e lehtë të transformohesh nga Nder në Mender!! Sepse, ata nuk varen nga vetja, po nga qesja! Ata janë blerë si dele Pashke në tregun politik, duke dhënë garanci paraprake për bindje dhe nënshtrim pa kushte, duke shitur dinjitetin për të blerë postin. Duke u vetmenderosur së pari!
Në Ligjin për pastërtinë e figurave, jo vetëm opozita, po edhe analistët, edhe ambasadorët, edhe ndërkombëtarët luftuan dhe kërkuan me ngulm që ata që kanë pas qenë gjykatës dhe hetues në diktaturë, pra ata që kanë pas qenë ‘ish-a’ të mos preken nga ligji, të mos përjashtohen nga funksionet në demokraci…Por, çuditërisht ndodhi që pikërisht këta, sa u ra në duar një proces përvëlonjës “politik”, si ‘Gërdeci’ apo si rruga ‘Durrës-Kukës’, për të mos u menderosur publikisht nga salinjtë, pranuan të dhunojnë Drejtësinë që të mbeten me sadopak nder…Po, a mbetën të tillë? E sigurt është që kësisoj menderoset edhe opinioni publik!
***
Nga ky gjykim-ndëshkim-poshtërim, që gjithsesi do të përfundojë me menderosje të ndërsjellë, askush nuk mund të përjashtohet: të gjallë e të vdekur, heronj e tradhtarë, martirë e kriminelë, diktatorë e çlirimtarë, mendjendritur e trushkulur, gjykatës e kriminelë; të gjithë pra do të jenë njëlloj të kërcënuar e të rrezikuar nga përdhosja. Aq e vërtetë është kjo, sa së fundi edhe Skënderbeu e pësoi, ashtu si ka ndodhur me Konicën, Fishtën, Nolin, Zogun, Hoxhën, Haxhi Qamilin, Ismail Qemalin, Kadarenë, Agollin, etj… E kush tjetër vallë ka mbetur pa u prekur nga kjo murtajë?! Sot historia u shkon pas vetëm atyre që janë aktualisht në pushtet dhe atyre që bëhen lepepeqe të pushtetit. Sot, po e bëre fytyrën Mender, mund të shpallesh Nder i Kombit! Ama, po re nga kali do të hysh patjetër në këtë qerthull ku zifti dhe të pëgërat që ke prodhuar vetë, natyrisht për të tjerët, nesër do të të mbulojnë patjetër edhe ty! Këtij rregulli tradicional të pashkruar nuk i ka shpëtuar deri më sot askush, as historia, dhe as kujtesa jonë e shkurtër.
Prandaj, ne jemi shoqëri pa ikona dhe pa një kishë ku mund të falemi, sepse kishë dhe xhami kemi partitë dhe krerët. Delet nuk e kthejnë kokën prapa, kurse ne të kthejmë kokën se kemi frikë mos damkosemi, mos njollosemi. Nuk nderojmë të vdekurit, pasi kujtojmë se kësisoj do të mbetemi viktima të së kaluarës, nostalgjikë, “xhaketa të vjetra”, etj… Nuk lëmë monument më këmbë, ngaqë besojmë se duke i rrëzuar, duke shembur statujat, duke pështyrë mbi to, do të shpallemi një ditë “monument” partiak, qoftë edhe i së keqes. Ne duam vetëm fëmijët që u kemi bërë kokën, po harrojmë pleqtë që na kanë bërë kokën…Ne ndjekim pas dhe nderojmë vetëm ata udhëheqës që na shpërblejnë në çast, që na shajnë nga nëna, që premtojnë sot për sot, sepse e nesërmja nuk na hyn në hesap. Derisa nuk kemi të shkuar, nuk mund të kemi as të ardhme. Sepse, konsumizmi, njëlloj si komunizmi, sot quhet e vetmja vlerë, përfshi edhe patriotizmin, edhe fanatizmin partiak apo fetar, edhe poshtërimin që na bën i plotfuqishmi i pushtetit, sidomos kur ky është i huaj! Për ne, kombi, shoqëria, interesi kombëtar kanë sipërfaqe aq sa ka hapësira ku strehohet familja. Syri ynë sheh vetëm interesin vetjak. Ja përse aq shumë i pëlqejnë veshit tonë sharjet dhe shpifjet që u bëhen të tjerëve. Për këto arsye, Nderi kombëtar shndërrohet aq kollaj në Mender kombëtar!
***
“Jeto pa u ndjerë”, - thotë një mik. Ndoshta ka të drejtë. Sepse, sot po dole në publik, po kontribuove për shoqërinë, po u bëre i shquar, po luftove për një çështje të drejtë, ashtu si dje, në diktaturë, edhe sot do të jesh i kërcënuar nga poshtërimi, nga balta e shpifjet, jo vetëm ti, po edhe familja jote. Shikoni si veprojnë gjykatësit dhe prokurorët. Është gabim të thuhet se ata drejtohen nga politika; ata udhëhiqen vetëm nga interesi, nga paraja, e sidomos nga frika e së shkuarës, nga mëkatet dhe jeta e tyre puthadore në diktaturë. Prandaj, sot je i rrezikuar edhe po të kesh pas qenë shpallur Hero i Popullit, Nder i Kombit, Artist i Popullit, Mjeshtër i Madh, historian apo jurist i shquar etj, pasi nesër me siguri edhe ti do të jesh në shënjestër të çnderimit; ti dhe i gjithë xhinsi yt nëse guxon të luftosh për Drejtësi. Nëse del publikisht kundër Saliut dhe saljerëve të tij, atëherë gjej brimë e futu! Brehti thotë në një poezi: “Luftova me luanët dhe fitova, me gjakun tim ushqeva çimkat, por për të më ngrënë, më hëngrën mediokrit”.
Procesi i kuturueshëm i tjetërsimit të Nderit në Mender dhe anasjelltas bëhet me urdhër dhe “orientim” nga lart, po edhe me ligj. Po të deshi kryeministri, të duan të gjithë zyrtarët. Të gjitha dyert i ke të hapura. Mund të bëhesh akademik, prof. doktor, mund të marrësh pension special… Po të deshi Presidenti i Republikës, mund të bëhesh Nder i Kombit, natyrisht edhe sikur të mos kesh vlera! Sepse, vetëm ata e dinë kush vlen, sa vlen, përse vlen dhe natyrisht, edhe kush nuk vlen! Një kryemediokër i jep të drejtë vetes të peshojë dhe të klasifikojë vlerat e kombit, madje edhe “të shkruajë” e të diktojë kahjen e historisë dhe shkencëtarët heshtin! Atë që bëri Sartri kur refuzoi çmimin ‘Nobel’ nuk e ka bërë deri tash as edhe një akademik i nderuar: të refuzojë kandidimin për në Akademinë e shkërbërë (të emëruar) nga partia; askush nuk ka lënë titujt e dhënë as nga diktatura të cilën ata, pasi u përmbys, nuk lënë fjalë e rast pa e nëmosur. Titujt ama ia mbajnë, dekoratat ia duan, vetëm emrin diktaturës ia përdhosin. Edhe Berishën e shajnë nënzë, po ama nëpër institute e korridore flasin për të me adhurim. Shajnë diktaturën dhe lëvdojnë Salinë, që të “pëlqehen” dhe të “mbeten në treg”! Mjerim! As dje, dhe as sot nuk ka ndonjë syresh që quhet Nder i Kombit apo Mjeshtër, që merr pension special që të guxojë të thotë se ai nuk i pranon këto favore para filanit e filanit që ka më shumë vlera, se aksh shkencëtar është harruar dhe poshtëruar pa të drejtë, d.m.th politikisht, se njëlloj si dje dhe sot, Akademia dhe Albanologjia janë në pikë të hallit!…Por, kanë frikë! Kanë llahtar nga shkërdhatokratët e merituar e të emëruar! Ja përse burrat e shquar kanë ikur e kanë vdekur jashtë vendit. Ne të duam e të respektojmë po të të kemi larg, sa më larg! Edhe eshtrat mund të t’i sjellin në vatan, por vetëm kur ato nuk flasin, pra nuk i vlejnë askujt!
A keni parë e dëgjuar ndonjë PR, SR apo akademik i emëruar të dalë e të thotë se pse nuk po botohet dot Historia e Skënderbeut e K.Frashërit, dokumentet historike, revistat historike, revistat kritike të artit, botimet albanologjike; Naimi i plotë…etj? Pse po shkatërrohet arkivi i filmit të Kinostudios dhe arkivi i televizionit, apo muzeu botanik i rrënuar aq mjeranisht?...A keni parë e dëgjuar ndonjë debat përse u bë filani akademik, ky Hiç pa vepra? Përse u veprua nj’ashtu me shkencëtarët, - madje më keq! - se kur u krijua Akademia e Shkencave nga diktatura?...Ne kemi disa Akademi, kemi institute, rektorë, universitete, Dr. e Pr. me shumicë e kapicë, po vetëm në Shqipëri nuk ka debate shkencore e letrare! Nuk ka debat as kur kryeministri del e thotë të ngrihet një central atomik në Shkodër, të shpërblehen infermierët dhe profesorët, të ndryshojë jo vetëm historia, po edhe gjuha letrare etj! Asnjë gjuhëtar nuk guxon të thotë gjysmë llafi në publik. E pra, kur kanë frikë shkencëtarët, si të mos kenë frikë gjynahqarët?! Kur tremben gjykatësit, si të mos duartrokasin lypësit dhe të papunët për hiçnajën?
Ja përse vazhdon me të njëjtin ritëm kapërcimi i ylberit nga Nder në Mender! Ashtu si në diktaturë, edhe sot ky tjetërsim kryhet jo vetëm me urdhër partiak, po edhe me ligje. Kjo ndodhi mu në Kuvendin e Shqipërisë: ata që për 50 vjet u quajtën kolaboracionistë të fashizmit, dolën heronj të shquar të kombit, nacionalistë, antikomunistë; ata që u vranë dhe u shpallën dëshmorë, sot quhen ish- komunistë, d.m.th paksa “të dyshimtë”, me hije, pse jo edhe të përdhosur…Por, ndoshta edhe kjo përsiatje nuk ka vlerë. Nuk ka vlerë, sepse aq është vulgarizuar kjo puna e nderimit, sa edhe dekoratat që dha së fundi Presidenca dolën të ishin false! Jo false si monedhat dhe pijet alkoolike që bëjnë fshehur nëpër bodrume trafikantët, po si dekorata teneqesh që i bën vetë shteti, pra vetë Presidenca, nëpërmjet “tenderimeve”…Pra, edhe titujt, vlerësimet, dekoratat janë në tender! Në tender moral dhe në tender material. Janë dyfish false! Ja përse Nderi edhe Menderi sot janë e njëjta gjë! Ja përse sot për sot asgjë me vlerë nuk ka vlerë. Por, kjo nuk do të thotë që nesër një Hiç i mirëfilltë do të bëhet sërish ose Nder, ose Mender i Kombit, si ka ndodhur nga njëra zgjedhje te tjetra.
m

[Brari]

kulmi..

menderi i menderosur kico blushi.. flet per nder e per komb..
ska turp ky faqemenderosur..

thx o skampo qe na e solle se duhet te dime me cfare porosish o merret e zhvillon menderja kico blush.. kjo vegel e vjeter e menderosur e shpelles enveriste.. e tash dhe fondamentaliste ben blushoiste edviniste ..