Reklama Jonë

[Val9]

Populli më i ri në Europë që nga e hëna paraqitet me një fytyrë të re para botës. Këtë muaj do të transmetohet reklama e parë në shumë media ndërkombëtare. Butonin Play të hënën e shtypën Presidenti dhe Kryeministri i Kosovës.

Nga Artan Behrami më 27.10.2009 në ora 1:22
Të hënën nisi kampanja që synon t’i japë fund paragjykimeve qindravjeçare që kanë ekzistuar për kosovarët.

Tash, bota do të ketë mundësi të shohë popullin më të ri në Europë, të edukuar, modern dhe mbi të gjitha të pavarur.

Të hënën është lansuar fushata ndërkombëtare mediale për Kosovën, ku fillimisht, fokusi gjeografik do të jetë në Europë dhe SHBA, ndërsa më vonë gjatë vitit do të ketë më shumë fokus në disa vende të caktuara, ka njoftuar kompania “Saatchi & Saatchi".

Tubimi promovues i fillimit të fushatës është mbajtur në Prishtinë, në “Sheshin 21”, ku të pranishëm ishin Presidenti Fatmir Sejdiu, Kryeministri Hashim Thaçi, përfaqësues të kompanisë “Saatchi & Saatchi" dhe shumë të ftuar të tjerë.

Presidenti tha se është një mundësi e mirë që Kosova e shfrytëzon për herë të parë me miqtë e saj për të prezantuar hartën e vjetër të Europës dhe Europën e Re.

“Është një mundësi e mirë që Kosova e shfrytëzon për herë të parë me miqtë e saj, për të prezantuar hartën e vjetër të Europës, për të prezantuar Europën e Re, apo plan të ri, me këtë energji të Kosovës të prezantojë shtetin e saj, të prezantojmë ambiciet e saj, prezantojmë dëshirën e saj që të ec lirshëm dhe të bashkëngjitet fuqishëm me bashkësitë e vendeve të botës demokratike”, tha Sejdiu.
Ndërsa, Kryeministri Thaçi tha se me fillimin e kësaj kampanje mediale bëhet promovimi ndërkombëtar i Republikës së Kosovës para rrjeteve më të shikuara televizive botërore.

“Sot së bashku me ju bëjmë promovimin ndërkombëtar të Republikës së Kosovës. Sot ne prezantojmë para rrjeteve më të shikuara televizive, imazhin e ri të Kosovës, imazhin e shtetit të ri të Kosovës, imazhin e Kosovës të pavarur, sovrane, demokratike dhe multietnike”, tha ai.

Fushata është përgatitur nga kompania izraelite “Satchi & Satchi”, pas një tenderi që ka fituar vitin e kaluar nga Qeveria e vendit në vlerë prej 5.7 milionë euro, me ç’rast reklama e televizionit do të fillojë të emetohet në 6 kanale të mëdha televizive ndërkombëtare, siç janë CNN, BBC World News, Euroneës, CNN Turk, Bloomberg dhe Eurosport. Më vonë reklamat për shtyp do të publikohen në revista me renome ndërkombëtare, si në “The Economist” dhe “Newsweek”.