Shtajneri, Daci etj...per 2003-shin

[Brari]

Shtajner flet në televizione:

Marrja e përgjegjësisë për vitin 2003



Prishtinë, 20 janar 2003 / Marrë nga RTV21



Mikael Shtajner



Të dashur kosovarë,
Viti të cilin e kemi përpara nuk do të jetë i lehtë.

Tri sfida të mëdha janë para nesh.

· Ekonomia - ku tepër shumë njerëz janë pa punë.

· Krimi - ku kemi krim të organizuar të stilit mafioz.

· Shumetniciteti – ku ende nuk kemi shoqëri të mirëfilltë shumetnike. Ku ende ka enklava dhe pjesëtarët e pakicave trazohen tepër shpesh.

E në këtë situatë kemi institucione të cilat ende nuk i kanë kuptuar përgjegjësitë e veta. E dini lojën e fajësimit të tjetrit në Kosovë “Ne nuk kemi kompetenca - nuk mund të bëjmë asgjë – faji është i bashkësisë ndërkombëtare”.

Po ky është debat i rremë – cila është e vërteta?

E vërteta është se udhëheqësit tuaj më nuk janë në opozitë. Ata e kanë në dorë pushtetin, dhe atë, kanë pushtet të mirëfilltë. Qeveria juaj kontrollon 350 milion euro. Këto në markat e dikurshme bëjnë 700 milion. Ajo ka dhjetë ministri. Është përgjegjëse për gjërat qenësore siç janë shkollat, spitalet ose transporti. Kjo do të thotë se merren me arsimimin e fëmijëve tuaj. Shëndetin tuaj. Rrugët tuaja.

Këto janë përgjegjësi qenësore për cilëndo qeveri në botë. Këto janë çështjet për të cilat në Evropë humben ose fitohen zgjedhjet. A thua nuk e meritojnë këto përgjegjësi vëmendjen e udhëheqësve tuaj? Por ata duhet të jenë të gatshëm t’i marrin këto përgjegjësi mbi vete. Ta marrim çështjen e ‘nxehtë’ të tatimit mbi të ardhurat. I kuptoj të gjitha shqetësimet. Po, ta shohim qartë situatën e vërtetë. Shkalla e 20% të tatimit në të ardhurat mbi 3000 Euro është vendosur qysh para se të mbërrija unë në Kosovë. Pëlqimin për të e ka dhënë Qeveria juaj në takimin e Këshillit Ekonomik Fiskal (KEF) më 14 tetor. Ishte qeveria ajo që së bashku me UNMIK-un nëpërmes një dokumenti zyrtar të shpallur me 5 nëntor informoi gjithë komunitetin e donatorëve në Bruksel se cila ishte kjo shkallë tatimi.

Çka na ra të dëgjojmë javën e kaluar? “Fajin e ka Shtajneri”. Kështu nuk duhet trajtuar një çështje kaq serioze. Për këtë arsye, unë tash kam ftuar qeverinë që t’i paraqesë propozim konkret dhe të realizueshëm KEF-it në një takim të veçantë të premten e ardhshme. Pas kësaj do të veproj shpejt – natyrisht, duke i marrë parasysh realitetet shoqërore në Kosovë. Por, këto përgjegjësi duhet t’i bartim së bashku e jo vetëm ta fajësojmë njëri tjetrin.

* * * *

Të dashur kosovarë,

Kurrkush nuk priste që gjërat të ishin të përkryera menjëherë. Përkundër kësaj, UNMIK-u duhet dhe don t’i jap më shumë pushtet qeverisë dhe institucioneve tuaja. Të jem i qartë – jam i gatshëm që deri në fund të këtij viti t’ua dorëzoj Institucioneve të Përkohshme të gjitha kompetencat të cilat ligji më lejon t’i dorëzoj. Po me një kusht, institucionet duhet të punojnë më me seriozitet. Nëse punojnë kështu, do ta krijoj një plan të përbashkët drejtpërdrejt me kryeministrin Bajram Rexhepin – për të parë se si ta bëjmë këtë kalim lehtë dhe me efikasitet. E unë e Bajrami punojmë shumë mirë së bashku. Sidoqoftë, dua ta bëj po aq të qartë se ka disa gjëra që nuk mund t’i dorëzoj. Më besoni, do të ngulmoj në trajtimin e drejtë të pakicave. Edhe marrëdhëniet me jashtë si dhe lufta kundër krimit të organizuar – më mbeten mua. Këto janë mandati im – të cilin ma ka besuar autoriteti më i lartë ndërkombëtar në botë – Këshilli i Sigurimit i Kombeve të Bashkuara.

* * * *

Para se të merrem me prioritetet tona për vitin 2003, të mos harrojmë se çka kemi arritur në vitin 2002. Kemi arritur shumëçka së bashku. E kemi krijuar qeverinë. Kemi sjellë të burgosurit e mbetur prej Serbisë në Kosovë. Kemi ligjin për privatizim. Kemi mbajtur zgjedhje komunale të qeta, të suksesshme e demokratike. Mund të udhëtoni lirshëm në Shqipëri dhe Maqedoni e së shpejti edhe në vendet e tjera fqinje me targat KS dhe me sigurim të Kosovës. Kemi një marrëveshje për bashkëpunim të policisë me të gjithë fqinjët. Dhe e kemi nxjerrë pjesën veriore të Mitrovicës nga zona e hirtë – e do ta mbaj fjalën dhe nuk do të ketë ndarje.

Më lejoni ta përmend edhe Beogradin. Po të mos kishim dialog me Beogradin, si do të mund t’i kthenim të burgosurit? Si ndryshe të zbulojmë se çka ka ndodhur me të humburit? Si ndryshe do t’ia kthenim Perëndeshën në Fron muzeut të Prishtinës?

Por në të njëjtën kohë nuk do të lejojmë kthim në të kaluarën kur çështjet e Kosovës vendoseshin në Beograd. Prandaj, Beogradit i them - “Bashkëpunim PO – Përzierje JO.”

* * * *

Sidoqoftë, t’i kthehemi prioriteteve tona.

Pikë së pari ekonomia:

Të mos e mashtrojmë veten. Në një ekonomi moderne ka vetëm një mënyrë për të hapur vende të punës dhe kjo mënyrë është të joshen investimet. Si mendoni, kur do të jenë investorët të gatshëm të investojnë në Kosovë?

Vetëm kur ta dinë se nuk do t’u humben paratë.

Vetëm kur të mund të mbështeten në sistemin ligjor.

Vetëm kur të mund t’u besojnë institucioneve.

Vetëm kur të vlejnë liria e lëvizjes dhe të drejtat pronësore.

Vetëm kur të sigurohen se gjërat do të kryhen me efikasitet, pa burokraci e pa bakshish.

Shkurt, vetëm kur Kosova të tregojë se po i përmbush standarded të cilat i kemi dhënë në pikësynimet tona.

Këto standarde nuk janë pengesa. Përkundrazi, janë udhërrëfyes kah e ardhmja e Kosovës. Po ashtu duhet t’ua lehtësojmë bizneseve investimin në Kosovë. Shumë investitorë tashmë na kanë folë për frustrimet e tyre këtu. Një formular duhet ta marrin këtu, një vulë atje, e nënshkrimin krejt diku tjetër. Të gjithë e dini mirë këtë shprehi. Na duhet një vend i vetëm ku të mund të shkojnë investitorët. Një zyrë ku mund t’u kryhen të gjitha punët. Një vend për krejt punët. Natyrisht se kjo është diçka që duhet ta bëjmë së bashku me qeverinë. Dhe kur ta kemi krijuar, unë vetë do ta përhap kumtin jashtë Kosove, ashtu që sa më shumë njerëz të dëgjojnë për të dhe sa më shumë të investojnë në Kosovë për të hapur vende të reja pune.

Për t’u ndihmuar të gjithëve që të vijnë në Kosovë, po e rregullojmë aeroportin e Prishtinës, të cilin brenda një viti KFOR-i do t’ia dorëzojë drejtorisë civile. Kosova do ta ketë edhe kompaninë e vet ajrore. Tash rishtazi, kisha kënaqësinë e veçantë t’u dorëzoja çmime dy pilotëve të parë kosovarë të fluturimeve komerciale, të cilët janë aftësuar e kualifikuar në Gjermani. Këta mund të jenë të parët që do t’i drejtojnë aeroplanët për kompaninë ajrore të re të Kosovës.

E dyta, krimi:

Juve dhe mua na ka ardhur maje hunde që nami i mirë i Kosovës ende njolloset nga kriminelë që mendojnë se nuk i kap ligji. Nga gangsterë të cilët i qërojnë hesapet e vjetra me vrasje e dhunë. Po mundohemi të krijojmë një shoqëri të ndershme në Kosovë me institucione që respektohen. Në të njejtën kohë keni bomba të kurdisura në vende publike, kontrabandë në kufij dhe korrupsion në biznis dhe administratë civile. Ju popullata duhet të kërkoni nga të gjithë politikanët dhe zyrtarët publikë të zgjedhur që ta bëjnë plotësisht të qartë se nuk kanë kurrfarë lidhjesh me këtë nëntokë.

Siç e kam thënë shumë herë, krimi nuk do të tolerohet.

Nesër, Guardia di Finanza (Kontrolli Financiar), që kanë veçanërisht përvojë në Itali në luftën kundër Mafias, do të nisin punën kundër korrupsionit dhe mashtrimeve në Njësinë e re për Hetime Financiare. Por tjetra, më me rëndësi, është mos ta harroni SHPK-në tuaj. Shërbimi Policor i Kosovës është dëshmuar si i suksesshëm. Tash kemi policë kosovarë të mirë e të trajnuar siç duhet, të cilët kanë nxënë shkathtësi të reja të metodave moderne policore. Tani do t’i kyç policët e Kosovës në pjesët më të ndjeshme të luftës kundër krimit serioz e të organizuar, kështu që së bashku të jemi më efikasë dhe më efektivë. Ata tash e kanë fituar besimin tonë dhe do ta përdorin dijeninë e tyre mbi atë se si punon nëntoka e krimit.

Me lejoni të them diçka edhe për shtypin. Me lirinë e shtypit vjen përgjegjësia. Janë disa gazetarë të shkëlqyeshëm në Kosovë të cilët shkruajnë raporte dhe komente të mira, të guximshme e interesante për problemet e Kosovës. Puna e gazetarëve është edhe që të jenë kritikë, dhe mua më kënaq një kriticizëm i informuar. Por artikujt që përmbajnë fjalë urrejtjeje dhe që nxisin tensione, janë të papranueshme. Do t’i përkrah veprimet që ndërmerren nga organet e autorizuara të pavarura kundër fjalëve të urrejtjes dhe do të sigurohem se zbatohen gjobat dhe dënimet.

Së treti, shumetniciteti:

Pse duhet të bëhet Kosova shoqëri e mirëfilltë shumetnike?

Po jua them unë. Bashkësia ndërkombëtare erdhi në Kosovë duke bërë një përpjekje të paparë për t’i dhënë fund shtypjes etnike të Millosheviqit. Ata erdhën për t’i mbrojtur vlerat themelore njerëzore – ta mbrojnë të dobëtin nga i fuqishmi. Bota pati plot simpati për ata të cilët ishin nxjerrë nga shtëpitë në mënyrën më barbare. UNMIK-u dhe KFOR-i u dërguan që të ndihmojnë në ndërtimin e një shoqërie të çliruar nga shtypja e të kaluarës, në të cilën do të vlenin vlerat të cilat sollën intervenimin. E dini se Kosovës ende i duhet ndihma e bashkësisë ndërkombëtare. Kosova nuk mund të përparojë vetëm. Kosova duhet të dëshmojë se investimi shumë i madh ndërkombëtar me njerëz dhe mjete ia ka vlejtur. Ajo duhet të dëshmojë se po krijon një shoqëri në të cilën secili kosovar, pa marrë parasysh prejardhjen etnike, mund të jetojë i sigurt e me dinjitet. Mos harroni se fqinjët tuaj në Kosovë kanë të njëjtat të drejta si ju. Duhet t’i mirëpritni ata njerëz që vendosin të kthehen. Vetëm atëherë bashkësia ndërkombëtare do të vazhdojë të jetë e kuptueshme, të vazhdojë me ndihmën dhe t’ju mirëpresë në Evropë - ku Kosova e ka vendin.

******

Të dashur kosovarë,

Siç thashë në fillim, viti 2003 nuk ka me qenë i lehtë. Por besoj se mund t’ia dalim me sfidat para nesh nëse me to ballafaqohemi së bashku. Dhe nëse të gjithë jemi seriozë. Nuk kemi kohë për debate të rrejshme e lojëra të fajësimit të njëri-tjetrit. Koha për ta zgjidhë statusin final të Kosovës do të vijë, por jo në vitin 2003. Duhet të merremi me tri prioritetet. Duhet ta përmirësojmë ekonominë – që fëmijëve tuaj t’u krijojmë ardhmëri. Duhet ta luftojmë krimin – që familjeve tuaja t’u ofrojmë siguri. Duhet ta krijojmë një shoqëri shumetnike– që të gjithë ju të jeni të mirëpritur në familjen e shoqërive evropiane. Jam i gatshëm të punoj për këtë, por dua që ta bëjmë së bashku – dua të kaloj sa më shumë kompetenca që është e mundshme për institucionet që janë të gatshme të punojnë seriozisht për Kosovën. Nëse ne UNMIK-u, institucionet e Kosovës dhe populli i Kosovës jemi të gjithë seriozë dhe nëse i përvjelim mëngët dhe punojmë së bashku, jam i bindur se do të kemi sukses.

Këtë javë do t’i ftoj udhëheqësit e partive politike që t’ua shpjegoj konceptin tim për ta fituar përkrahjen e tyre. Në fund, elementi më i rëndësishëm do të jetë përkrahja e vazhdueshme nga ju – populli i Kosovës.

Ju falemnderit dhe natën e mirë.





-----------


Nexhat Daci: Qershori i këtij viti do të jetë periudha e përcaktimeve vendimtare për ardhmërinë e Kosovës
Prishtinë, 21 janar 2003 (QIK) - Në një intervistë të gjatë dhënë radios "Evropa e lirë", kryetari i Kuvendit të Kosovës Nexhat Daci, duke komentuar fjalimin e mbrëmshëm të shefit të UNMIK-ut Mihael Shtajner, drejtuar qytetarëve të Kosovës, tha se përshtypjet e tij janë se "për një vit qëndrimi në Kosovë, zoti Shtajner mban vetëm fjalime teorike.

Kësaj radhe në atë empirizëm të tij ka mjaft të vërteta që ilustrojnë naivitetin tonë, të institucioneve, besimin tonë në bashkësinë ndërkombëtare", tha zoti Daci, duke shtuar se mikpritja kosovare është keqinterpretuar nga zoti Shtajner, kurse disa e institucione kosovare kanë qenë "tepër, tepër tepër, të ndëgjueshme", shprehet kryeparlamentari Daci dhe thekson se përshtypjen e tij: "Ne jemi sjellë tepër shumë në mënyrë vazale ndaj UNMIK-ut".


Vendimi i Parlamentit është që do ta kryejë këtë vit punën e vet sipas përgjegjësive të marra nga elektorati vendor, por edhe nga parimet e politikës ndërkombëtare, thotë na vazhdim zoti Daci, për të theksuar se "Shtajner e ka kuptuar porosinë e institucioneve kosovare dhe në qoftë se e vazhdon vetëm me premtime terorike dhe nuk realizon asgjë nga ato do të hasë në një përgjigje jashtëzakonisht, politikisht të pjekur po edhe të fuqishme".

Në konstatimin e gazetarit sesi vitin e kaluar zoti Shtajner ka ndërhyrë shpesh në punën e Kuvendit, kryeparlamebtari Daci tha se "Shtajner vitin e kaluar e ka shfrytëzuar maksimalisht autoritetetin që i kanë dhënë Kombet e Bashkuara dhe nuk ka nënshkruar ligje të cilat e rregullojnë esencën e jetës në Kosovë edhe pse ato ligje janë përgatitur nga ekspertë të Brukselit e Uashingtonit".

Por, Parlamenti, sipas z. Daci, në asnjë mënyrë nuk mendon t'i ndërprejë kontaktet dhe bashkëpunimin me UNMIK-un dhe bashkësinë ndërkombëtare, përkundrazi do të jetë partner i fuqishëm, por do t'i bëjë punët në përgjegjësi me drejtësinë ndërkombëtare dhe nevojat e elektoratit.

"Në qoftë se Shtajner vazhdon më mosnënshkruarjen e ligjeve të përgatitura nga ekspertë ndërkombëtarë, Parlamenti ndoshta do të vendosë që të mos i dërgojë fare ligjet në nënshkrim", thekson Daci.

I pyetur nëse ka një komunikim dhe punë efikase ndërmjet institucioneve të Kosovës, kryeparlamentari Daci tha se bashkëpunimi i institucioneve qeverisëse në Kosovë në pjesën e dytë të 2002-shit, ishte krejtësisht normal dhe vlerësoi se institucionet janë të vetëdijshme se 2003-shi është pika e thyerjes për të mirë apo për të keq në Kosovë.

"Këtë përgjegjësi e kanë të tri institucionet, Presidenca, Parlamenti dhe Qeveria dhe është një marrëveshje e plotë në mes të kryeministrit dhe timit, që ne të punojmë me përgjegjësi, por në interes të jetës në Kosovë", tha z.Daci.

Në pyetjen se a mund të jetë ky vit përcaktues sa i përket të ardhmes së Kosovës, Nexhat Daci tha se ia ka bërë të njohur tërë bashkësisë ndërkombëtare që në Parlament ka ardhur me një strategji që qershori i 2003-shit do të jetë periudha e përcaktimeve vendimtare për ardhmërinë e Kosovës.

"Jam shumë i bindur se institucionet kosovare kanë kapacitet veprues dhe në qoftë se nuk e aktivizojmë këtë kapacitet, unë mendoj se duhet të shkojmë nga pozicionet, nuk e meritojmë ta udhëheqim Kosovën", nënvizoi z.Daci.

Ndërkaq, duke komentuar zhvillimet e djeshme në pjesën veriore të Kosovës, ku subjekte politike të minoritetit serb shpallën një lloj autonimie të kësaj pjese, kryeparlamentari Daci tha se Parlamenti duhet ta shpallë inekzistent një organizim të tillë, duke kritikuar UNMIK-un se në sigurimin e tërësisë territoriale të Kosovës nuk i ka përmbushur qëllimet e ardhjes në Kosovë.

"Tolerimi i strukturave paralele të Serbisë në Kosovë duhet të adresohet drejtpërsëdrejti në UNMIK. Prandaj, mendoj që ky vit duhet të jetë vit i ekzistencës edhe për UNMIK-un edhe për institucionet e Kosovës. Cila do palë që nuk i kryen punët e veta duhet të shkojë pa asnjë zvarritje", tha mes tejrash në këtë intervistë dhënë radios "Evropa e lirë" kryetari i Kuvendit të Kosovës Nexhat Daci.


Presidenti Rugova takohet nesër me kryeadministratorin Shtajner

Prishtinë, 21 janar 2003 - Presidenti i Kosovës dhe kryeadministratori i Kosovës Mihael Shtajner do të takohen nesër, më 22 janar. Takimi do të mbahet në selinë e UNMIK-ut në orën 16.00.


Të enjtën Kuvendi i Kosovës debaton për gjendjen e sigurisë në vend

Prishtinë, 21 janar 2003 - Deputetët e Kuvendit të Kosovës të enjtën do të debatojnë për gjendjen e sigurisë pas kërkesës së Grupit parlamentar të LDK-së dhe grupeve të tjera parlamentare.

Për situatën e sigurisë në këtë mbledhje para deputetëve do të raportojë shefi i policisë në Kosovë Shtefan Feler dhe përgjegjësi për siguri dhe drejtësi i UNMIK-ut Zhan Kristian Kadi.

Bëhet e ditur se në këtë mbledhje nuk do të ketë interpelancë të përgjegjësve ndërkombëtarë, por vetëm njoftim për gjendjen e sigurisë në Kosovë.


"Guardia di finanza" do të luftojë krimin ekonomik edhe në Kosovë

Prishtinë, 21 janar 2003 - "Guardia di finanza", njësi italiane për kontroll financiar, deri në fund të këtij muaji do të fillojë punën në Kosovë. Kjo njësi e re e hetimeve është e speciliaziuar për luftë kundër krimit ekonomik, e cila në Itali është e njohur sidomos me aksione kundër mafias.

Siç bëri të ditur zëdhënësi i UNMIK-ut Andrea Anjeli, "Guardia di finanza" sot po fillon kompletimin e ekipit edhe në Kosovë dhe do të jetë komplete brenda dhjetë ditësh.

Në Kosovë tashmë ka mbërritur edhe komandanti i këtij ekipi me kërkesën e Shtajnerit për të luftuar korrupsionin dhe krimin ekonomik. Ekipi do të përbëhet nga dhjetë oficerë, tha Anjeli.


--------------