Në këtë botë njeriu e ka mundësinë të zgjedh dy rrugë: atë që të çon drejt errësirës apo atë që të nxjerr nga errësira në dritë siç thuhet edhe në Kur’an:
2:257. All-llahu është mbikëqyrës i atyre që besuan, i nxjerr ata prej errësirave në dritë. E kujdestarë të atyre që nuk besuan janë djajtë që i nxjerrin ata prej drite e i hudhin në errësira. Ata janë banorë të zjarrit, ku do të qëndrojnë përgjithmonë.
Shumë njerëz e zgjedhin rrugën e parë, pra atë që të çon në humbje, shkatërrim dhe humnerë duke mos qenë të vetëdijshëm fare për këtë.
Këtë e bëjnë më së shumti njerëzit që kanë një status të mirë financiar dhe kjo fillon zakonisht nga mosha e re, sepse në atë moshë njeriun e ndien veten të fortë dhe të pavarur.
Në Kur’an thuhet për njeriun:
96:6. Jo, është e vërtetë se ai i kalon kufijtë,
96:7. Për shkak se e ndien veten të pavarur.
Njeriu që ndjek rrugën e errësirës shpenzon shumë kohë, para, dhe energji duke i kënaqur epshet e veta, dhe shumë vonë e kupton se ka qenë në rrugë të gabuar.
Gjatë këtij udhëtimi shpesh bie në situata ku rrezikon jetën, ofendohet, përqeshet, etj. por kjo nuk ndikon shumë tek ai dhe nuk mendon për këtë gjë dhe vazhdon të ecë në atë rrugë.
P.sh. një i ri shkon me shokë në një lokal nate ku konsumohet alkoholi, duhani, etj. dhe ku dëgjohet muzika me zë të lartë me qëllim që të argëtohet, por ndodh shpesh që të bëhet ndonjë përleshje në atë lokal, ku ai edhe lëndohet apo përfundon në burg edhe pse i pafajshëm.
Gjithashtu kjo rrugë ta zbras deri në fund kuletën dhe njeriu këtë e kupton vetëm pasi ta humbë atë status financiar që e kishte dhe shpesh habitet apo dëshpërohet, kur e kupton që shokët e tij që i thonin se e donin aq shumë e kanë braktisur, dhe shoqet që i ka pasur nuk shfaqin të njëjtin interes më, dhe nuk e respektojnë siç bënin dikur.
Për këta njerëz hipokritë Kur’ani thotë:
59:16. Ata (hipokritët) janë shembull si djalli, kur i thotë njeriut: "Refuzo besimin!", e kur ai ta ketë refuzuar, ai (djalli) tërhiqet e thotë: "Unë tërhiqem prej teje; unë i frikohem All-llahut, Zotit të gjithësisë!"
Kurse njeriu që është i udhëzuar nga Zoti dhe ndjek rrugën e dritës bën një jetë shumë më të lumtur se ai i pari, i lartëpërmendur.
Ai zgjohet që në mëngjes, e pastron trupin dhe shpirtin e tij, i lutet Zotit për të mira, takohet me miqtë e tij të sinqertë dhe çdo hap që e bën është në mbrojtje të Zotit.
Shokët e tij janë njerëz të devotshëm, të cilët edhe kur e thërrasin në ndeja nuk kërkojnë nga ai shërbim apo përfitim financiar, por miqësi dhe dashuri vëllazërore pa interes.
Allahu xh.sh. thotë në Kur’an:
9:71. Besimtarët dhe besimtaret janë të dashur për njëri-tjetrin, urdhërojnë për të mirë, e ndalojnë nga e keqja, e falin namazin dhe japin zeqatin, respektojnë All-llahun dhe të dërguarin e Tij. Të tillët do t'i mëshirojë All-llahu. All-llahu është ngadhënjyes, i urtë.
Ai e kalon ditën e tij në adhurim dhe është larg punëve të këqia.
Fytyra e tij shkëlqen nga nuri, i vjen aromë e mirë nga parfumi që ka hedhur, rrobat i ka të pastëra e poashtu edhe trupin dhe njerëzit që e takojnë gjatë rrugës e nderojnë dhe e përshëndesin me përshëndetjen më të mirë në këtë botë: “Paqja qoftë me ty!”
Pasiqë ky njeri ka fituar dashurinë e Allahut xh.sh. normal që edhe njerëzit e dojnë atë.
Pra, njeriu ka mundësi të zgjedh njërën nga këto rrugë, por nëse e zgjedh rrugën e errësirës ai do të shkojë në humbje dhe në mashtrim siç thuhet në Kur’an:
4:120. Ai u premton atyre dhe i bën të shpresojnë, por djalli nuk premton tjetër vetëm se mashtrim.
Kurse nëse e zgjedh rrugën e dritës do ta fitojë shpërblimin e Zotit siç thuhet në Kur’an:
4:122. E ata që besuan dhe bënë vepra të mira, Ne do t'i vendosim në xhennete, ku rrjedhin lumenj e ku do jenë përgjithmonë. Premtimi i saktë i All-llahut. E kush mund të jetë më i saktë në fjalë se All-llahu?
Këto janë vetëm disa fakte që i kam nxjerrë nga jeta dhe nga përvoja personale, e ti vëlla zgjidh cilën rrugë të duash!
Përgatiti: Sefedin Muçaj, Prizren, Kosovë.
Përgjigju Duke Cituar
Postuar më parë nga Sefedini_PZ
Krijoni Kontakt