Top 10 qarjet e sportisteve

**YlliRiaN** · 26-03-2009, 18:01

Sportistët i shprehin emocionet e tyre në mënyra të ndryshme. Disa qajnë nga gëzimi, e disa nga hidhërimi. Tabloidi britanik, The Sun, e ka publikuar listën e Top 10 qarjeve të sportistëve.

Sporti shpeshherë di të sjellë emocione te simpatizuesit, por edhe te vetë sportistët protagonistë. Disa buzëqeshin, e disa qajnë. Qajnë nga gëzimi, por edhe nga hidhërimi.
Tabloidi britanik, The Sun, e ka publikuar listën e Top 10 qarjeve të sportistëve, të cilët i kanë shprehur gëzimet apo hidhërimet e tyre në mënyra të ndryshme.

Vendi i parë i takon me meritë portugezit Cristiano Ronaldo, i cili ka qarë shpesh në fushë, për arsye gëzimi apo zhgënjimi. Së pari, ai qau pas humbjes së Portugalisë në finale të Euro 2004 nga Greqia. Ai nuk u ndal me kaq. Atij i ishin mbushur sytë me lot edhe kur e shënoi një gol për Portugalinë, në të njëjtin turne.

Ronaldo qante edhe kur Manchester Unitedi humbi me penallti nga Arsenali në finalen e FA Cup, në vitin 2005. Qarjet e tij vazhduan me humbjen e Portugalisë nga Franca në gjysmëfinale të Kampionatit Botëror në vitin 2006. Dhe, në fund, ai qau në natën e madhe të Moskës, kur Manchester United vitin e kaluar e mposhti Chelsean me penallti, në finale të Ligës së Kampionëve.

Vendi i dytë i takon ish-tenistit amerikan, Andre Agassi, i cili ishte paksa i ndjeshëm dhe qante shpesh kur i fitonte turnetë e mëdhenj të tenistit Grand Slam.

I treti u rendit ish-futbollisti anglez, Paul Gascoigne. “Gazza” kishte bërë ndërhyrje të palejueshme në gjysmëfinale të Botërorit kundër Gjermanisë dhe gjyqtari e kishte ndëshkuar me karton të verdhë, duke ia mohuar kështu pjesëmarrjen në finale kundër Argjentinës. Gascoigne kishte filluar të qante për këtë.

Ndër 10 qarjet e sportistëve bën pjesë edhe John Terry. Me siguri e kujtoni këtë qarje si të freskët, sepse ende nuk ka kaluar një vit. Derisa Cristiano Ronaldo qante nga gëzimi, fytyra tragjike e finales së Moskës në Ligën e Kampionëve 2008, ishte mbrojtësi i Chelseas, John Terry, i cili dështoi në penalltinë vendimtare, e cila do t’ia sillte fitoren skuadrës Blues. Përfaqësuesi anglez vështirë se do ta harrojë ndonjëherë natën e 21 majit të vitit 2008.

Në Top 10 qarjet e sportistëve bëjnë pjesë edhe fituesi i medaljeve të arta në Olimpiadë, vozitësi i sportit me varka, Matthew Pinsent, i cili është renditur i katërti, pastaj boksieri Oliver McCall (6), futbollisti David Beckham (7), ngasësi i Formulës, Mika Hakkinen (8), golfisti Tiger Woods (9), dhe i fundit është renditur tenisti Pete Sampras.