Lajme të përditshme nga Kosova

[strange]

Gordon: Kosova ka përparuar shumë gjatë 16 muajve të pavarsisë

“Pavarësia e Kosovës është e pakthyeshme”, ka thënë ndihmës-sekretari amerikan i Shtetit, Philip Gordon, gjatë raportimit në nënkomitetin për Evropë, në kuadër të Komitetit për Marrëdhënie me Jashtë të Dhomës Përfaqësuese. Ai ka thënë se suksesi i Kosovës si shtet i pavarur brenda kufijve ekzistues mbetet faktor kritik për stabilitetin e Ballkanit. “Kosova ka bërë sukses të jashtëzakonshëm gjatë 16 muajve të parë të pavarësisë. Anëtarësimi i saj në FMN dhe në Bankën Botërore do të ndihmojnë në arritjen e stabilitetit ekonomik dhe prosperitetit për të mirën e të gjithë qytetarëve të vet”, ka thënë Gordon.

Integrimi i Maqedonisë në NATO dhe BE element vital në politikën e SHBA-së ndaj Ballkanit

Mbështetja për integrimin e Maqedonisë në NATO dhe BE mbetet element vital në përpjekjet e SHBA-së për promovimin e paqes dhe stabilizimit të Ballkanit, theksoi ndihmës-sekretari amerikan i shtetit Filip H. Gordon në fjalimin e tij para Nënkomitetit për Evropë të Komitetit për çështje të jashtme të Dhomës përfaqësuese të Kongresit.

“Aleatët në Samitin në Strasburg dhe Kel e riaafirmuan pozicionin se Maqedonia do të inkuadrohet në NATO menjëherë pasi ta zgjidhë çështjen për emrin. Ne dëshirojmë ta shohim këtë çështje të zgjidhur sa më shpejtë që është e mundur. SHBA-ja e mbështesin zgjidhjen e pranueshme nga të dy palët për emrin që do të arrihej në procesin që e zhvillon ndërmjetësuesi i KB-së Metju Nimic”, tha Gordon, duke e prezantuar politikën e administratës së presidentit Barak Obama ndaj Evropës.

Këtë mesazh, siç theksoi, autoriteteve në Shkup dhe Athinë personalisht ua transmetoi zëvendës-sekretari amerikan i shtetit Xhejms Stajnberg gjatë vizitës së muajit të kaluar në dy vendet.

Gordon theksoi se me hyrjen e Shqipërisë dhe Kroacisë dhe inkuadrimi i pritur i Maqedonisë në NATO, dërgohet mesazh i fuqishëm se dyert e Aleancës mbeten të hapura. /Shqipmedia/

[strange]

IZRAELI PËRGATITET TË NJOHË KOSOVËN

Kryeministri i Izraelit, Benjamin Netanyahu, ka deklaruar të shtunën se vendi i tij po përgatitet të njohë Pavarësinë e Kosovës në muajin gusht.

Vendimi i tij vjen si rezultat i bisedimeve të fundit me Presidentin amerikan Barack Obama.SHBA-të vazhdimisht e kanë treguar mbështetjen e tyre ndaj Qeverisë së Kosovës, duke i dalë në mbrojtje sovranitetit dhe integritetit territorial të vendit tonë.

Izraeli ka marrëdhënie shumë të mira me Shtetet e Bashkuara, ndërsa kryeministri izraelit ka thënë se ai do të dëgjojë rekomandimet e Obamas për njohjen e Kosovës.

Meqenëse nuk ishte e mundur të arrihej zgjidhja pas negociatave me Serbinë, Netanyahu ka shpjeguar se Izraeli nuk mund të qëndrojë i distancuar për këtë çështje, prandaj së shpejti do ta njohë Pavarësinë e Kosovës. /Telegrafi/

[strange]

El Salvadori dhe Rep. Dominikane në procedurë të njohjes

Nga Express më 21.06.2009 në ora 18:44
Aleanca për Kosovën e Re ka thënë të dielën se El Salvadori dhe Republika Dominikane janë në procedurë të njohjes së Kosovës.

“Republika e El Salvadorit ka konfirmuar njohjen dhe pas përfundimit të procedurave do të vijë edhe nota verbale e njohjes. Shumë shpejt do të zyrtarizohet edhe njohja nga Republika Dominikane”, është thënë në një komunikatë të AKR’së.

“Do të ishte e pa arsyeshme po të synonim të ndikonim në shpejtimin e procedurave të këto vende, derisa ato kanë premtuar se e kanë njohur Kosovën dhe janë të gatshme të vendosin marrëdhënie diplomatike me vendin tone”, vazhdohet në komunikatë.

Këto dy njohje janë paralajmëruar qe një kohë nga Kryetari i AKR’së, Behgjet Pacolli.

Partia më e madhe opozitare prapë është ankuar në Ministrinë e Jashtme për mungesë të koordinimit në lobim. Ajo ka njoftuar se Ministria nuk është përgjigjur në një letër të Pacollit me të cilën ai ka kërkuar “bashkërenditjen e veprimeve në lobim”. /Gazeta Express7

[YlliRiaN]

Departamenti për Punë i Zelandës së Re ka njoftuar se ky vend që nga 5 qershori i këtij viti i njeh pasaportat e reja të Republikës së Kosovës.

Pasaportat e Kosovës e përmbushin definicionin e pasaportave ashtu siç specifikohet në Nenin 2 të Aktit të Zelandës së Re për imigracion, thuhet në një kumtesë të Departamentit për Punë të Zelandës së Re, transmeton MPB.

Të gjitha pasaportat e lëshuara nga Republika e Kosovës si ato standarde, ashtu edhe ato diplomatike konsiderohen si dokumente të pranueshme për udhëtim dhe me këtë konsiderohen të vlefshme edhe për udhëtim në Zelandën e Re nëse bartësit i përmbushin politikat për imigracion.

[YlliRiaN]

Komuna e Prishtinës dhe Ambasada Amerikane në Prishtinë kanë nënshkruar të mërkurën Marrëveshjen e mirëkuptimit, me të cilin komuna e Prishtinës, Ambasadës Amerikane në Prishtinë i jep në shfrytëzim një parcelë prej 5 hektarësh, në lagjen Dragodan të Prishtinës, për ndërtimin e objektit të ambasadës së saj në Prishtinë.

Qeveria lokale e Prishtinës ia dhurojë këtë parcelë qeverisë amerikane si shenjë falënderimi për kontributin që SHBA-të kanë dhënë për ndërtimin e shteti të Kosovës.

Marrëveshja e nënshkruar në mes të ambasadores amerikane në Prishtinë, Tina Kaidanow dhe kryetarit të komunës së Prishtinës, Isa Mustafa, është vlerësuar si një urë e re lidhëse në mes të SHBA-ve dhe Kosovës.

Ndryshe, Shtetet e Bashkuara të Amerikës përfaqësinë e saj diplomatike e kanë filluar në vitin 1996 me hapjen e Zyrës për shërbim të informacionit të SHBA-se, tri vite më vonë kjo zyrë u shndërrua në Zyrë amerikane në Prishtinë, deri në vitin e kaluar kur pas njohjes së pavarësisë nga SHBA-të edhe zyrtarisht kjo zyrë u transformua në ambasadë.

Ambasadorja Kaidanow tha se ndërtimi i godinës së Ambasadës Amerikane mund të mos fillojë deri në vitin 2013

[fano]

Kushtetutë kundërshqiptare!

Në 160 Nenet e saj, shqiptarët nuk përmenden asnjëherë, ndërsa serbët 13 herë.

Shkruan: Koço DANAJ

Disa sqarime të nevojshme:
E para: Titulli i analizës lidhet me Projektkushtetutën e Republikës së Kosovës e cila po diskutohet dhe po bëhet gati të miratohet në Parlamentin e saj deri në fund të muajit mars 2008.
E dyta: Në këtë Kushtetutë shqiptarët nuk figurojnë as si popull, as si komb apo pjesë kombi, as si pakicë kombëtare. Neni 1 I saj thotë se: Republika e Kosovës është shtet i shtetasve të saj. (Deri më tani përbërja etnike e Kosoves është: 90 përqind shqiptare, 6 përqind serbë dhe 4 përqind boshnjakë, turq etj.) Në 160 nenet e saj, shqiptarët nuk përmenden asnjëherë, ndërsa serbët 13 herë.
E treta: Kjo Kushtetutë e ndalon bashkimin me ndonjë shtet tjetër, sic mund të nënkuptohej Shqipëria. Neni 3. i saj thotë se: Republika e Kosovës nuk ka pretendime territoriale ndaj asnjë shteti ose pjesë të ndonjë shteti dhe nuk do të kërkojë e as të pranoj të bashkohet me ndonjë shtet ose pjesë të ndonjë shteti. (Ndërsa kushtetuta e Shqipërisë në Preambulën e saj pranon dhe mbështet të drejtën e shqiptarëve për bashkimi kombëtar)
E katërta: Kushtetuta e Kosovës mund të jetë ashtu siç thonë hartuesit e saj, shumë moderne dhe shumë demokratike. Analiza nuk e mendon një gjë të tillë. Ata që e kanë hartuar atë, janë profesionistë, qofshin banorë të Kosovës apo banorë të botës. Analiza pohon vetëm faktin se ata që e kanë hartuar ketë projektkushtetutë nuk janë shqiptarë, nuk pranojnë të jenë shqiptarë dhe kanë hartuar një kushtetutë kundërshqiptare. (Jo antishqiptare)
E pesta: Pas miratimit të saj nga deputetët e Kuvendit të Kosovës, ata do të jenë të detyruar të percaktojnë identitetin e tyre kombëtar. Pasi ata nuk mund të jenë shqiptarë me kushtetutë kundërshqiptare, ata nuk mund të jenë shqiptarë duke mohuar një shekull histori shqiptare. Vetëm origjina e këtyre deputetëve do të jetë shqiptare.
E gjashta: Hartuesit e Kushtetutës kundërshqiptare janë të pasinqertë me qytetarët e Kosovës. Pse janë te tillë. Kur qytetarët i kanë pyetur përse na mohoni të drejtën të jemi shqiptarë ata ju kanë thënë se kështu i kanë porositur të huajt.
Ja disa fakte konkrete:
1. Në Shtime qytetarët pyesin: Kush është hartues i kësaj kushtetute? Pasi që në preambulën e kushtetutës së Kosovës, nuk figuron fare populli shqiptar, atëherë, sipas të gjitha gjasave ai nuk është shqiptar. Kush e ka hartuar këtë kushtetutë dhe nga ka ardhur kjo kushtetutë? Në preambulat moderne por edhe në të kaluarat historike shumë mirë figurohen edhe ambiciet, sakrificat, luftërat të cilat i ka bërë ai popull për të ardhur deri te akti më i lartë - te Kushtetuta.
Ndërsa përgjigjja që kanë marrë ishte se:
Kushtetuta nuk është akt i vullnetit të asnjë populli por është kompromis i vullneteve të caktuara.
2. Në Prishtinë, qytetarët pyesin dhe thonë se: Unë kam vërejtje esenciale në këtë projekt kushtetues. Preambula sipas meje është pa shije pa ngjyrë dhe pa erë, sepse nuk e përcakton se kush janë shumicë por të gjitha komunitete janë të barabarta. Askund nuk përmenden shqiptarët. Pse përmenden: të drejta shtesë të komuniteteve. Nuk e di nëse do të mund të kalojë kjo kushtetutë në Parlament pasi që kemi aq shumë të drejta shtesë për komunitetin serb duke i shkelur të drejtat e shqiptarëve. Nëse do të miratohet kjo kushtetutë unë do të jem njëri nga ata që do ta padisë Kuvendin e Kosovës sepse shkelen disa të drejta të popullit shqiptar.
Ja përgjigja qe kannë marrë:
Të gjithë ne e dimë kush është këtu shumicë. ( Por nuk e thotë). Midis këtyre rreziqeve të kontekstit etnik të Kushtetutës që është sugjeruar nga pakoja e Ahtisarit që të formulohet si shumë etnike ne e kemi marr konceptin liberal demokratik ku qytetarët dhe shtetasit vihen në epiqendër dhe ata bëhen bartës të sovranitetit.
3. Në Malishevë qytetarët thonë se: Në nenin 1. pika 2, ku thuhet se Republika e Kosovës është shtet i shtetasve të saj, unë mendoj se duhet të jetë pak më ndryshme: Republika e Kosovës është shtet i shqiptarëve dhe i minoriteteve tjera që jetojnë në të.
Ja përgjigja që kanë marrë:
Ju e dini që Kushtetua e Kosovës e ka edhe elementin e jashtëm, elementin e ashtuquajtur Pakoja e Ahtisarit. Kjo pako është kompromis i gjithë asaj për shumicën në Kosovë. Dhe kjo kushtetutë i plotëson nevojat thelbësore të shumicës por edhe të pakicës në Kosovë. Është dashur kështu të veprohet për shkak të pranimit të Kosovës shtet i pavarur dhe sovran. Si në kushtetuta të botës, ashtu edhe në kushtetutën e Kosovës ka gjëra që nënkuptohen, dhe duhet të nënkuptohen.(Pra sipas hartuesit të saj, Pakoja e Ahtisarit pranon që serbët të jenë serbë, por nuk pranon që shqiptarët të jenë shqiptare!!)
E shtata: Drejtuesit më të lartë të Kosovës, Sejdiu, Thaci dhe Krasniqi i dhanë shenjat e para qysh në fjalimet e tyre në 17 shkurt, kur nuk pranuan të falënderonin Shqipërinë për ndihmesën 100 vjeçare që ja dha për arritjen e pavarsisë. Shenja e dytë u dha disa ditë më vonë, kur kryeministri i Kosovës Hashim Thaçi vendosi shenjën e barazimit midis Shqiperisë, Malit të i Zi apo Maqedonisë në marrdhëniet e Kosovës me fqinjët. Ky qëndrim kundërshqiptar i parapriu publikimit të kësaj Projektkushtetute.
E teta: Pranimi i tezës për asimilimin kombëtar me anë të Kushtetutës po realizohet nga një pjesë e shtresës politike e ish-revolucionarëve të Kosovës, ish-ilegalëve të saj, ish-drejtues të UÇK, shokët e të cilëve u vranë duke luftuar me heriozëm të pashoq për të qenë dhe mbetur në radhë të parë shqiptarë. Mjerisht, fshehur pas perfeksionimit dhe modernizmit apo gjoja integrimit, një pjese prej tyre, veçanërisht në Kosovë dhe Maqedoni është tjetërsuar deri në pranimin e të mosqenit shqiptar.
E nënta: Nga diskutimet e deritanishme, shumë qytetarë të Kosovës nuk e kanë pranuar asimilimin me Kushtetutë. Ata janë treguar më euroamerikanë se politikanët e tyre. Kanë kërkuar në mënyrë demokratike të mos mbeten pa emër etnik dhe pa histori. Një popull pa të kaluar nuk ka as të ardhme. (Të mos pranosh se kush është shumica qoftë edhe njëherë në Kushtetutë, që është ligji themelor, do të thotë të heqësh dore nga identiteti kombëtar).
E dhjeta: Duket se shumë shpejt në Kosovë duhet dhe do të krijohet Partia e Shqiptarëve. Do të jetë partia më e madhe që është njohur deri më sot.
Autori është analist politik dhe drejtor i Institutit të Prognozave Rajonale me seli në Tiranë./30 Jun 2009/V.I. në www.lajmet.com

[fano]

Mali i Zi është i gatshëm që të shqyrtojë serish në Parlament çështjen e njohjes së pavarësisë së Kosovës, nëse Gjykata Ndërkombëtare e Drejtësisë në Hagë vlerëson në mënyrë eksplicite se një akt i tillë i Prishtinës ishte jo legal, ka thënë kryeministri i Malit të Zi, Millo Gjukanoviq.

Podgoricë, 2 Korrik 2009 (Kosovapress)

[fano]

Ambasadorja në largim e Shteteve të Bashkuara në Kosovë, Tina Kaidanow, tha se Kosova ka miq të fuqishëm në bashkësinë ndërkombëtare, jo vetëm në Shtetet e Bashkuara, por edhe në vendet e tjera në Evropë dhe në mbarë botën.
“Këta miq kujdesen për ju dhe për drejtimin që do ta zgjidhni, ndërsa këshilla e tyre është e rëndësishme dhe duhet të merret parasysh në mënyrë serioze”, tha të enjten Kaidanow, në ceremoninë me rastin e Ditës së Pavarësisë së Shteteve të Bashkuara.

Ajo më tutje theksoi se Kosova duhet të mësohet që në mënyrë të vërtetë ta respektoj multi-etnicitetin.

Në ceremoninë në Ambasadën e SHBA-ve në Prishtinë, ishin të pranishëm zyrtarët më të lartë të Kosovës dhe ata ndërkombëtarë. /REL/

[fano]

Të hënën, me 13 korrik, në shtëpinë e kulturës, në Arbëresh (Vitomiricë) të Pejës, duke filluar nga ora 18:00, Lëvizja VETËVENDOSJE! organizoi një tubim publik me banorët e këtij lokaliteti. Të pranishëm ishin shumë qytetarë vendas, shqiptarë dhe boshnjakë.

Para pjesëmarrësve të këtij tubimi foli Albin Kurti i cili shpjegoi konceptin e VETËVENDOSJE!-s dhe zhvillimet politike në Kosovë. Meqë pavarësia nuk u arrit përmes së drejtës së vetëvendosjes së popullit tash duhet që pavarësisë post festum t’ia shtojmë sovranitetin i cili i mungon asaj, tha Albini. Në njërën anë nuk e kemi vetëvendosjen e brendshme (nuk i kontrollojmë resurset natyrore, s’kemi integritet territorial për shkak të strukturave të Serbisë dhe as fjalën e fundit në vend për shkak të Pieter Feithit e Yves de Kermabonit) kurse, në anën tjetër, nuk e kemi as aspektin e jashtëm të së drejtës për vetëvendosje (6 Pikëshi i Ban Ki-moonit po zbatohet në vendbanimet me shumicë serbe ndërkohë që vlen neni 1.3 i Kushtetutës së Republikës së Kosovës që nuk na e lejon bashkimin me Shqipërinë), theksoi Albini. Ai shpjegoi që në Kosovë nuk po vendos populli i Kosovës anipse ajo është bërë e pavarur – disa burokratë ndërkombëtarë bashkë me krerët politikë vendorë të korruptuar marrin vendime arbitrare në përputhje me interesa personale të tyre dhe të korporatave të huaja. Në Kosovë nuk pati referendum asnjëherë për asnjë gjë përfshirë këtu edhe cështjet kapitale si flamuri, himni, kushtetuta, decentralizimi e privatizimi, shtoi Albini. Këto dy të fundit janë projektet më të rrezikshme në të cilat e kanë futur Kosovën: i pari na e copëton territorin ndërkaq i dyti i shet pasuritë e Kosovës, potencoi Albini. Në fund, ai sugjeroi që organizimi dhe mobilizimi në bazë për çështjet politike dhe socio-ekonomike nuk ka zëvendësim, aq më tepër kur kemi këso elitash super të pasura në Kosovën e varfër si asnjëherë më parë.

Pas Albinit, të pranishmëve iu drejtua përgjegjësi i Qendrës së VETËVENDOSJE!-s në Pejë, Bajram Binaku, i cili foli për obstruksionet e strukturave të Serbisë në komunën e Pejës, për stagnimin e ekonomisë vendore dhe papunësinë që e ka pllakosur Pejën, për kontestet kufitare me Malin e Zi që janë peshqesh nga Marrëveshja e Kumanovës, si dhe për zonën e veçantë të Patrikanës së Pejës që pengon lirinë e lëvizjes, turizmin, të drejtën e pronës përveçqë serbizon trashëgiminë kulturore ortodokse dhe uzurpon afër 300 hektarë tokë.

Në këtë tubim foli edhe përgjegjësi i Qendrës së VETËVENDOSJE!-s për Gjermani, Bashkim Osmanaj, i cili po ashtu është nga Peja. Ai u fokusua në gjendjen e diasporës shqiptare dhe iu bëri thirrje të gjithë atyre që jetojnë e punojnë në Gjermani ose kanë të afërt atje, të inkuadrohen në VETËVENDOSJE!.

Pasoi një debat i hapur me përplot zemërim për politikanët e Kosovës pa dallim partie e krahine dhe shumë prej banorëve të Arbëreshit, pjesëmarrës në tubim, shfaqën interesimin e tyre që të kontribuojnë në aktivitetet e Lëvizjes. Me këtë rast, detyrën e personit kontaktues të VETËVENDOSJE!-s për Arbëreshin (Vitomiricën) e Pejës e mori i riu Dardan Lajçi.

Qendra e VETËVENDOSJE!-s në Pejë

[Iliri.]

Misioni EULEKS dhe policia e Kosovës kanë zhvarrosur mbetjet e së paku 11 individëve, që supozohet se janë nga lista e personave të pagjetur në Kosovë.
EULEKS-i ka njoftuar se ndër mbetjet mortore ishin edhe ato të së paku katër fëmijëve.
Mbetjet e trupave të pajetë, janë dërguar në selinë e Zyrës për të Pagjetur dhe Mjekësi Ligjore të EULEKS-it, ku gjatë javës, pritet të kryhen procedurat e identifikimit dhe të autopsisë. Kjo varrezë masive, që ishte lokalizuar të enjten e kaluar, gjendet në një fshat afër Gjilanit. Punimet për zbulimin e varrezës mbulojnë një sipërfaqe prej përafërsisht 380 m2. Mbetjet mortore u gjetën të shpërndara në një hapësirë prej 68 m2, dhe në thellësi nga shtresa sipërfaqësore deri në 1.15 m.

A din dikush me shume per keta persona te masakruar , kusha jane, kur ndodhi ?? Falm.