Materiale mbi Provimet e Lirimit nga Ministria e Arsimit (MASH)

[[Perla]]

Konkursi në degën e Arkitekturës do të ndahet në tri ditë dhe do të ketë 65 përqind të pikëve në total


Në vlerësimin e konkurentëve, krahas pedagogëve do të marrin pjesë edhe specialistë të urbanistikës nga bashkia


Konkursi i Arkitekturës në Fakultetin e Inxhinierisë së Ndërtimit, do të ruajë edhe këtë sezon të zhvillimit të tij, formën që pati viteve të fundit.

Ai do të jetë i ndarë në tri pjesë, ku 65 për qind të peshës së vlerësimit në pikë do ta ketë konkursi, ndërsa 35 për qind vlerësimi i marrë nga kandidati gjatë provimeve të Maturës Shtetërore.

Konkursi, ashtu sikurse u veprua edhe në vitin e kaluar, do të zhvillohet në muajin korrik, kjo për t'i dhënë hapësirë kohore përpunimit të të dhënave nga institucionet përgjegjëse, për pranimin e studentëve në institucionet e arsimit të lartë publik.

Seanca e parë, ku kandidatët do të kërkojnë të provojnë njohuritë, do të jetë vizatimi teknik në natyrë i një objekti, i përzgjedhur ky nga grupi i punës që është marrë me përgatitjen e konkursit.

Dekani i Fakultetit të Inxhinierisë së Ndërtimit, Andrea Maliqari, është shprehur për gazetën "Shekulli" se në grupin që do të merren me organizimin e konkursit, do të jenë të pranishëm jo vetëm pedagogë me emër në fakultet, por edhe specialistë të urbanistikës nga Bashkia e Tiranës.

Do të jenë po këta specialistë që do të bëjnë edhe vlerësimin e pikëve për secilin kandidat. "Arsyeja e përzgjedhjes së një numri të madh të specialistëve,- shpjegon dekani Maliqari,- bëhet me qëllim uljen në mënyrë drastike të kontestimeve nga ana e kandidatëve". Seanca e parë, ajo e vizatimit teknik të një objekti në natyrë, do të zgjasë 4 orë.

Objekti i përzgjedhur nga specialistët do të mbahet sekret deri në ditën e zhvillimit të provës, me qëllim që konkurrentët të mos kenë informacion mbi natyrën dhe stilin arkitektonik të godinës që ata do të vizatojnë. Specialistët sqarojnë në këtë rast se vizatimi teknik, ose ndryshe në natyrë, do të zhvillohet njëkohësisht për të gjithë konkurrentët.

Në rast se objekti i përzgjedhur do të jetë jashtë Tiranës, është parë e udhës, që në dispozicion të konkurrentëve të vihen urbanë të posaçëm, të cilët do të bëjnë transportin e tyre.

Në vlerësimin përfundimtar, vizatimi teknik i objektit do të ketë 25 për qind të pikëve në total që do të përmbajë konkursi.

Dita e dytë do t'u kushtohet njohurive që konkurrentët kanë mbi vizatimin teknik. Nëpërmjet një testi të përgatitur nga specialistët, ata duhet të shprehin njohuritë e fituara në kërkesat e dhëna në pyetësor.

Testimi në seancën e dytë do të zgjasë 4 orë, ndërkohë që konkurrentët në këtë provë do të vlerësohen me 20 për qind të pikëve në total, që do të ketë konkursi.

Seanca e tretë, ku konkurrentët do të testohen në njohuritë që ata kanë në kompozimin arkitektonik, do të shënojë edhe fundin e konkursit të arkitekturës për këtë sezon. Vlerësimi në testimin e fundit, që do të përmbyllë konkursin e arkitekturës, do të përmbajë 20 për qind të pikëve, nga 65 për qind që i është lënë në total konkursit.

Kuotat
Arkitektura, edhe këtë vit 100 pranime


Nuk janë përcaktuar ende datat e sakta të zhvillimit të konkursit të Arkitekturës, por ajo që bëhet e ditur është se regjistrimi për një vend në konkurs, do të çelet më datë 1 korrik, ndërkohë që tarifa që një konkurrent duhet të paguajë për të marrë pjesë në konkurs, do të jetë 4500 lekë.

Vetëm në vitet e fundit, interesimi për degën e Arkitekturës ka qenë gjithmonë në rritje, gjë që është vënë re edhe në kërkesat e shumta për këtë degë.

Dekani i Inxhinierisë së Ndërtimit, Andrea Maliqari, është shprehur për gazetën "Shekulli" se, me gjithë kërkesat në rritje, nuk do të kërkojë shtimin e kuotave të pranimit. "Do të mund ta kërkonim një gjë të tillë, vetëm nëse do të kishim mundësitë dhe kapacitetet e duhura si fakultet, gjë të cilën, për momentin nuk e disponojmë.

E vetmja mundësi për të shtuar numrin e pranimeve është ndërtimi i godinës shtesë",- sqaron dekani Maliqari. Çdo vit, në Fakultetin e Inxhinierisë së Ndërtimit konkurrojnë për një vend në degën e Arkitekturës rreth 400 kandidatë, nga të cilët të drejtën për të vazhduar studimet e fitojnë 100 prej tyre.

Arkitektura,
Lëndët natyrore shans më të madh për të fituar


Për të fituar të drejtën e studimit në degën e Arkitekturës, maturantët duhet të japin si provim lëndët me zgjedhje, që kanë koeficientin më të lartë, në mënyrë që të kenë shanse më të mëdha për të fituar. Për të marrë pikët maksimale, maturantët duhet të japin provim lëndë natyrore, si:

Matematikë, Fizikë dhe Kimi, ndërsa në lëndët që u përkasin gjuhëve të huaja, atë Anglisht. Shansin më të madh për të fituar të drejtën e studimit në degën e Arkitekturës, e kanë kandidatët që kanë përfunduar arsimin e mesëm në shkolla me profil të përgjithshëm ose ekonomik, shkolla të cilat kanë edhe koeficientin më të lartë në degët inxhinierike.

Përzgjedhja
Arkitektura, në të ardhmen sipas modelit francez


Dekani i Fakultetit të Inxhinierisë, nuk ka përjashtuar mundësitë për të pasur një skemë të re të pranimit të studentëve në degën e Arkitekturës, por ky, gjithsesi, mbetet një opsion për t'u riparë në të ardhmen.

"Nëse do të vinin në tavolinë mundësitë më të mira për përzgjedhjen e studentëve, unë personalisht do të preferoja modelin francez të pranimeve të studentëve në degën e Arkitekturës, i cili është një nga modelet evropiane që bën përzgjedhjen më të mirë të studentëve në këtë degë",- tha dekani Maliqari.

"Në modelin francez, studentët në degën e Arkitekturës përzgjidhen në vitin e dytë. Në vitin e parë ata bëjnë leksione të përbashkëta, ndërkohë, selektimi i vërtetë ndodh në vitin pasardhës, ku më tej vazhdojnë studimet në degën e Arkitekturës, studentët më të mirë, ndërsa ata më të dobëtit, duke parë se nuk janë të aftë për këtë degë, vendosin vetë të shkëputen nga studimet",- shpjegon dekani Maliqari.

Arsyeja se përse ky model nuk mund të jetë i aplikueshëm për momentin në Shqipëri, lidhet me vetë mundësitë e pakta në infrastrukturë që ka Fakulteti i Inxhinierisë së Ndërtimit. "Ky model do të ishte më ideali. Hëpërhë nuk mund të realizohet, pasi e nuk kemi jo vetëm kapacitetet e duhura si fakultet, por edhe numri i pedagogëve nuk është i mjaftueshëm", - pohon dekani i Fakultetit të Inxhinierisë së Ndërtimit.

Shekulli online

[[Perla]]

Dritan Laci


Formulari do të fillojë të shpërndahet në shkolla më 1 prill (gje qe nuk eshte e vertete), dhe do të dorëzohet nga maturantët më 9 korrik.

Maturantët këshillohen të mos plotësojnë formularin pa folur fillimisht me mësuesit kujdestarë


Formulari A2 do të jetë në duart e maturantëve, që në ditët e para të muajit prill. Të paktën, kështu thuhet në rregulloren e Maturës Shtetërore 2009, të përgatitur nga Ministria e Arsimit dhe e Shkencave.

Shpërndarja në shkolla e formularit, në të cilin maturantët do të rendisin 10 preferencat ku dëshirojnë të ndjekin studimet e larta në vitin akademik 2009-2010, dy muaj para periudhës kur ata do t'u nënshtrohen provimeve, bëhet me qëllim që maturantët të kenë kohë të mendohen për zgjedhjet që do të bëjnë.

Megjithëse formulari do të jetë në duart e tyre në ditët e para të muajit të ardhshëm, maturantët do të kenë plot 3 muaj kohë në dispozicion për ta plotësuar drejt dhe pa gabime.

Ata do të dorëzojnë Formularin A2 një ditë para se të japin provimet me zgjedhje. Më datë 9 korrik, një ditë para se të japin 2 provimet e fundit të Maturës Z1 dhe Z2, maturantët duhet të kenë përfunduar të gjitha procedurat dhe duhet të dorëzojnë në sekretaritë e shkollave, ku kanë kryer arsimin e mesëm, formularin me 10 preferencat e renditura.

Për të plotësuar drejt formularin, maturantët duhet të ndjekin 5 hapa të domosdoshëm. Hapi i parë, që maturantët duhet të bëjnë, është që të fotokopjojnë formularin, me qëllim praktikimin.

Kjo metodë pune do t'i ndihmojë ata që të mos dëmtojnë formularin origjinal, i cili është autentik, por të përdorin fillimisht kopje të tij, dhe vetëm pasi të jenë bindur për zgjedhjet e kryera, mund t'i hedhin të dhënat në Formularin A2 origjinal.

Për të qenë të kujdesshëm, maturantët këshillohen të lexojnë udhëzimin për plotësimin e Formularit A2.

Hapi i dytë ndërmerret në bashkëpunim me mësuesin kujdestar. Së bashku me maturantin, mësuesi kujdestar plotëson mesataren e shkollës së mesme me numra dhe fjalë.

Pasi është vendosur për programet e studimit të preferuara dhe renditjen e tyre, hapi i tretë është plotësimi i kodit të programit të studimit për secilën preferencë, nga 1 deri në preferencën e 10-të.

Hapi i parafundit është vendosja e numrit të preferencës, pranë kuadratit të programit. Kodi i programit të studimit, i shënuar te tabela e preferencave, duhet të jetë i njëjtë me atë ku është shënuar numri i preferencës përkatëse.

P.sh., nëse në preferencën 1 është shënuar programi i studimit 017, atëherë në kuadratin pranë programit të studimit 017, duhet të shënohet numri 1.


Hapi i pestë dhe i fundit është plotësimi i gjeneraliteteve të maturantit dhe firmosja e Formularit A2 nga vetë maturanti, mësuesi kujdestar dhe drejtori i shkollës.


Formulari A2, 5 hapat
Hapi 1 - Maturantët mund ta fotokopjojnë këtë formular për t'u praktikuar, por duhet të dorëzojnë formularin origjinal të plotësuar. Ata duhet të lexojnë me kujdes udhëzimin për plotësimin e A2-shit.


Hapi 2 - Në fillim, mësuesi kujdestar, bashkë me maturantin, plotësojnë mesataren e shkollës së mesme me numra dhe me fjalë.


Hapi 3 - Pasi është vendosur për programet e studimit të preferuara dhe renditjen e tyre, plotësohet kodi i programit të studimit për secilën preferencë, nga preferenca 1 deri në preferencën e 10.


Hapi 4 - Pas kësaj, në kuadratin pranë programit të studimit, do të vendosni numrin e preferencës. Kodi i programit të studimit, i shënuar te tabela e preferencave, duhet të jetë i njëjtë me atë ku është shënuar numri i preferencës përkatëse.


P.sh., nëse në preferencën 1 është shënuar programi i studimit 015, atëherë, në kuadratin pranë programit të studimit 015, duhet të shënohet numri 1.


Hapi 5 - Maturanti, mësuesi kujdestar dhe drejtori i shkollës, duhet të plotësojnë emrin, mbiemrin dhe të firmosin formularin A2.

Plotësimi


Formulari, maturantët të presin përfundimin e provimeve me detyrim
Në një procedurë, të njohur tashmë, edhe këtë vit maturantët do të zgjedhin 10 programe studimi, të cilat do t'i rendisin në Formularin A2, duke marrë parasysh pikët dhe mundësitë që ata kanë për të ndjekur studimet e larta.


Ajo që këshillohet nga specialistët e arsimit, është që maturantët të mos nxitohen në plotësimin e formularit, por të presin përfundimin dhe shpalljen e rezultateve në dy provime me detyrim, në lëndët Gjuhë-Letërsi dhe Matematikë, më datë 2 dhe 11 qershor.


Ashtu si edhe një vit më parë, Agjencia Kombëtare e Pranimeve në Institucionet e Arsimit të Lartë (APRIAL), do të realizojë përcaktimin e fituesve, sipas parimit Meritë -


Preferencë, ku parimi i meritës përcaktohet sipas pikëve të grumbulluara në bazë të rezultateve të shkollës së mesme dhe të provimeve të Maturës Shtetërore, ndërsa parimi i preferencës, i cili përcaktohet nga vullneti i kandidatëve, i shprehur nëpërmjet preferencës më të lartë të zgjedhur prej tyre.


Këshilla


Për të zgjedhur degët, llogarisni fillmisht pikët


Me anën e Formularit A2 merren të dhënat për notën mesatare të shkollës së mesme të maturantit dhe 10 preferencat e tij për programet e studimit në Institucionet e Arsimit të Lartë.

Për të marrë Formularin A2, nxënësi duhet të ketë kryer pagesën prej 2 mijë lekësh në një bankë ose në Postën Shqiptare dhe të paraqesë faturën e pagesës së kryer.

Para se të rendisin preferencat, maturantët këshillohen të bëjnë një llogaritje të përafërt të pikëve që kanë grumbulluar nga rezultatet e mesatares së shkollës së mesme dhe provimeve të detyruara, Gjuhë-Letërsi dhe Matematikë.


Pas këtij veprimi, ata mund të konsultojnë në "Guidën e Maturës Shtetërore 2009" pikët minimale për çdo program studimi që kanë bërë fitues, kandidatët e një viti më parë.


Në këtë moment maturantët mund të kristalizojnë një ide se çfarë programi studimi duhet të zgjedhin brenda 10 të mundshmeve.

Pasi të kenë kryer veprimet e mësipërm, maturantët mund të formojnë një listë, ku programet e studimit mund t'i rendisin jo vetëm sipas preferencave, por edhe mundësisë që ata kanë për të fituar në këto preferenca.

Pra, e para, (programi i parë) do të jetë dega që ata preferojnë më shumë dhe, e dyta, ajo që ata preferojnë, nëse nuk do të fitojnë në preferencën e parë, e kështu me radhë, deri te preferenca 10.

Është e detyrueshme që të mbushen të 10 kutitë e preferencave, ndryshe, formulari quhet i pavlefshëm. Nëse nuk kanë 10 preferenca, maturantët mund t'i plotësojnë kutitë me tre 0.

Shekulli

[[Perla]]

Nisi sot i pari provim i detyrueshëm i maturës shtetërore, ai i letërsisë, ku u testuan rreth 40 mijë maturantë. Provimi nisi në orën 10.00 dhe sipas rregullores, zgjati 2 orë e gjysmë. Tezat e përgatitura përmbanin 25 pyetje, 13 prej të cilave me alternativë dhe 12 me zhvillim. Ministria e Arsimit në rregulloren përkatëse ka këshilluar nxënësit të jenë në shkollë një ore para dhe të pajisur me dokument identifikimi. Ndërkaq, gati ka qenë edhe lista me administratorët e provimit për secilën shkollë. Si rregull mësuesit do monitorojnë klasat me nxënës që nuk i përkasin shkollës ku japin mësim. Testet pritet të korrigjohen brenda dhjetë ditësh në katër qendra të shpërndara në rrethet Shkodër, Tiranë, Fier dhe Elbasan.

[G.D]

Ju uroj suksese gjithe atyre maturanteve qe jane perkushtuar te mesimet.

[[Perla]]

Provimi i letërsisë, ja përgjigjet e sakta

38.499 maturantë u testuan për 7 lloje të ndryshme testesh

Përfundoi dje normalisht provimi i Gjuhë-Letërsisë i Maturës Shtetërore 2009. Gazeta "Shqip" publikon për lexuesit e saj përgjigjet e sakta të variantit A të profilit shoqëror të gjimnazeve; si dhe variantet A dhe B të profilit natyror të gjimnazeve. Provimi filloi njëkohësisht në të gjithë vendin në orën 10.00 të paradites së djeshme dhe zgjati 2 orë e gjysëm. Ashtu si edhe vitet e kaluara maturantët u testuan krahas njohurive për letërsinë, edhe për gjuhën shqipe. Në tezën e letërsisë, për profilin natyror janë shkëputur pjesë nga "Kinemaja e vjetër" e shkrimtarit Ismail Kadare, si dhe nga "I huaji" i Kamysë. Ndërsa, profili shoqëror ka patur pjesën "Jetë qytetse" të Migjenit, si dhe "Metamorfozën" e Kafkës.

Pas mbarimit të provimit, maturantët thanë se ai ishte i lehtë e deri diku mesatar, për njohuritë që ata kishin marrë.

Në provim morën pjesë gjithsej 38.499 maturantë dhe u testuan për 7 lloje të ndryshme testesh të gjuhës dhe letërsisë.

2.500 administratorë të provimit (AP) u përfshinë në këtë proces dhe mbikqyrën maturantët në 282 mjediset e provimit të përzgjedhura nga Drejtoritë Arsimore Rajonale.

Në faqen e internetit të MASH-it (www.mash.gov.al ) janë publikuar të plota përgjigjet e kërkesave (pyetjeve) të testit të gjuhë-letërsisë", për të gjitha profilet e shkollave të mesme.

Në një konferencë për shtyp, zëvendësministri i Arsimit dhe Shkencës Halit Shamata tha dje se "në orën 22.00 të mbrëmjes, filloi shpërndarja e testeve të provimit të parë të detyrueshëm për Maturën Shtetërore 2009, atë të Gjuhë-letërsisë nga Agjensia Qëndrore e Vlerësimit të Arritjeve (AVA) në drejtim të Drejtorive Arsimore Rajonale dhe Zyrave Arsimore (DAR/ZA)"`. Ai sqaroi se

sipas një grafiku të caktuar, zonat më të thella tërhoqën të parat testet e provimit. Shpërndarja filloi me Tropojën, për të përfunduar me Tiranën, në orën 6.00 të mëngjesit, të ditës së provimit. Të gjitha makinat që kryen transportin drejt Drejtorive Arsimore Rajonale u shoqëruan nga Policia e Shtetit.

"Nga raportimet e vazhdueshme për shtabin e ngritur në MASH, gjatë 24 orëve të shpërndarjes dhe kryerjes së provimit, në 37 Drejtori Arsimore Rajonale dhe Zyra Arsimore gjithçka eci normalisht", u shpreh Shamata.


Shenim: Pergjigjet mund ti lexoni ne PDF

Shqip

[[Perla]]

Në vitin akademik 2009-2010, në Universitetin e Vlorës "Ismail Qemali", nuk do të pranohet asnjë maturant kandidat për student, që do të ketë mesataren e shkollës së mesme nën 6.00. Vendimi i përket senatit të universitetit, i cili duke gjetur një shteg të lirë në ligjin për arsimin e lartë, ka ndërmarrë një hap të tillë. Rektori i Universitetit, Tanush Shaska, tha se për këtë vendim ka njoftuar Ministrinë e Arsimit.

Ministria e Arsimit ka mohuar të jetë në dijeni të një fakti të tillë, ndërkohë që Universiteti i Vlorës duhet të kishte njoftuar MASH-in për ndryshimin, të paktën një vit më parë. Elida Hoxha, drejtoreshë e politikave të arsimit të lartë në MASH, tha se në tavolinën e saj nuk është paraqitur një kërkesë e tillë, ndërkohë që po afron data e fillimit të procesit të pranimeve në universitete.

Universiteti i Vlorës vendos të mos futen në provime studentët që nuk kanë aktivizuar e-mail-in e universitetit. Njoftimi është bërë i ditur nëpërmjet faqes elektronike të universitetit. Studentëve u është lënë afat 10 ditë për të kryer një veprim të tillë, në të kundërt duhet t'u thonë lamtumirë provimeve. Po kështu, nuk do të futen në provime studentët që nuk kanë me vete, gjatë kohës së testimit, mjet identifikimi (pasaportë ose kartë identiteti).

Në vitin e ri akademik, Universiteti i Vlorës ka vendosur të vërë në zbatim projektimin e punësimit për studentët, të cilët janë në vështirësi ekonomike dhe për pasojë kanë vështirësi në pagimin e taksës shkollore. Në bazë të informacioneve që disponon gazeta "Shekulli", në Universitetin e Vlorës janë, të paktën, 150 studentë, të cilët nuk kanë paguar ende taksën shkollore dhe të cilëve u është lënë edhe një afat i fundit, përpara fillimit të sezonit, për shlyerjen e detyrimeve.


Intervista: Rektori i Universitetit të Vlorës, Tanush Shaska, shpjegon disa nga vendimet e fundit të marra nga senati.

Në fillimet e punës së tij si rektor, propozoi heqjen e emrit "Ismail Qemali" nga ballina e Universitetit të Vlorës, ndërsa tashmë ka vendosur të mos pranojë të ulet në auditorët e universitetit që drejton, asnjë maturant me mesatare të shkollës së mesme nën 6.00. Dhe kështu do të jetë.


Në vitin akademik 2009-2010, asnjë maturant që nuk plotëson kriterin e mësipërm të mesatares, nuk duhet ta marrë mundimin për t'u pranuar në Universitetin e Vlorës. Tanush Shaska, i njohur mirëfilltaz edhe si rektori i dorës së fortë, shpjegon në një intervistë të dhënë për gazetën "Shekulli", arsyet e një vendimi të tillë dhe një sërë idesh të tjera, që priten të sjellin ndryshime rrënjësore në funksionimin e Universitetit të Vlorës.


Z. Shaska, Universiteti i Vlorës vendosi që të mos pranojë në vitin e parë akademik, asnjë student me mesatare të shkollës së mesme nën 6.00. A është kjo një shkelje e sistemit "Meritë-Preferencë" të pranimeve në universitetet publike?

Në ligjin për Arsimin e Lartë ka një hapësirë edhe për vetë universitetet, ku thuhet që Ministria e Arsimit organizon pranimin në universitete, por universitetet kanë të drejtë të aplikojnë vendimet shtesë.

Vjet, në muajin maj është marrë një vendim nga senati i universitetit, që për pranimet në universitetin tonë të vendoset kriteri i mesatares, dhe të jetë nota 6.00. Ne e kishim për detyrë që ta bënim publike, që, maturantët ta dinë cilat ishin kushtet.

Nga ana ligjore mendoj se jemi në rregull, pra nuk ka shkelje. Nga ana akademike ka ndoshta diskutime të tjera. Se çfarë efekti do ketë kjo në numrin e studentëve, apo në cilësinë, kjo do të duket në muajin tetor.

Për këtë vendim kemi vënë në dijeni edhe Ministrinë e Arsimit.


Keni pasur reagime që kundërshtojnë vendimin dhe mendoni se ky hap mund të sjellë reduktimin e numrit të studentëve?

Tek ne nuk ka pasur reagime. Madje reagimet që kanë ardhur nga prindër dhe qytetarë kanë qenë mjaft pozitive. Opinioni ka reaguar duke e mirëpritur. Realisht ne kemi mundësi ta aplikojmë, pasi kërkesat për të vijuar studimet në Universitetin e Vlorës, kanë qenë gjithmonë më të mëdha se numri që mund të përballohet, dhe kur ke kërkesa më të mëdha, ke dhe të drejtë të zgjedhësh.

Ne po përpiqemi që Universiteti i Vlorës të bëhet nga më cilësorët në Shqipëri dhe cilësia është prioriteti ynë. Ky ka qenë edhe synimi për kriterin e vendosur. Kemi vënë re se maturantët që vijnë kanë vështirësi të shumta vitin e parë dhe ky vendim do të kontribuojë për të rritur cilësinë e universitetit.


Universiteti i Vlorës ka publikuar një listë me studentë, të cilët nuk kanë paguar taksën shkollore dhe, si të tillë, nuk do të hyjnë në provime. Si qëndron problemi me këta studentë?

Po, kanë qenë rreth 1 mijë studentë, të cilët ishin paralajmëruar se do të përjashtoheshin nga dhënia e provimeve, nëse nuk do të shlyenin taksën shkollore.

Aktualisht, shumica e këtyre studentëve, pas thirrjes që bëmë, e kanë paguar taksën vjetore dhe tani janë edhe rreth 150 studentë, të cilët nuk e kanë shlyer detyrimin shkollor.

Aktualisht dhe ligjërisht, ata duhet të ndërpresin shkollën derisa të kryejnë pagesat. Ne kemi bërë disa tolerime, pasi ata duhet të kishin paguar taksën që nga fillimi i vitit. Nëse ata do të vazhdojnë të mos paguajnë taksën, atëherë nuk do t'u njihet nota në provime, transkripti, deri sa të shlyejnë të gjitha detyrimet.


A keni informacione, përse nuk janë kryer këto pagesa? Si veproni në rastet kur mosshlyerja e detyrimeve shkollore ndikohet nga vështirësitë ekonomike?


Universiteti nuk ka të drejtë të përjashtojë dikë nga tarifat, pasi kjo quhet shkelje. Për vitin e ardhshëm, ne do të zbatojmë një sistem që do t'i referohet nivelit Meritë. Për këtë ne mendojmë që të vendosim një sistem që, studentë të caktuar, të kenë bursë apo avantazh financiar.


Mendojmë të vendosim edhe një program, ku universiteti ka mjaft punë të dyta, të vogla, dezhurn, sekretari, ku mendojmë të punësojmë disa nga studentët tanë, si ata që kanë rezultate, të lejohen të punojnë deri në 15 orë në javë, kundrejt një pagese të caktuar. Këto janë gjëra që në Shqipëri nuk janë aplikuar më parë, por ne do t'i propozojmë senatit dhe do të kërkojmë aprovimin e ministrisë për këtë.


Universiteti i Vlorës, nis puna për kampusin e ri


Senati i Universitetit të Vlorës ka rënë dakord parimisht për ngritjen e Kampusit të ri Universitar, i cili është menduar të ngrihet në fshatin Akërni pranë qytetit.


Rektori Tanush Shaska e motivon ngritjen e kampusit të ri me nevojën për zgjerim që ka universiteti, pas shtimit të numrit të studentëve dhe diplomave. Aktualisht, Universiteti i Vlorës ka rreth 15 mijë studentë.


Projekti, i cili do të zbatohet në një sipërfaqe prej 113 ha, mendohet të jetë nga më të mëdhenjtë në Ballkan. Ai është menduar si një projekt 10-vjeçar, dhe nëse grupet e interesit bien dakord, në shtator të vitit 2010, pritet që kampusi të fillojë nga puna. "Projekti është shumë ambicioz.


Ne nuk i kemi të gjitha fondet, por fillesën e kemi me fonde të brendshme. Ne kemi marrë kontakt me organizma ndërkombëtarë, jemi të bindur se edhe qeveria do të japë kontributin e saj dhe çdo gjë do shkojë në rrugën e duhur", - tha rektori Shaska. Kapaciteti i Kampusit të ri Universitar parashikohet të jetë rreth 40 mijë studentë, ndërsa mendohen të forcohen degët ekonomike.


Kuotat e pranimit në universitete rriten me 10%


Kuotat e pranimeve në institucionet e arsimit të lartë publik do të pësojnë rritje nga viti i kaluar. Me gjithë numrin e kufizuar të auditorëve, burime pranë MASH-it, informuan për gazetën "Shekulli" se, edhe këtë vit, numri i studentëve që ulen për herë të parë në auditorë, do të rritet me rreth 10 për qind, e thënë ndryshe, në universitete do të kemi 2 mijë studentë më shumë se vitin e kaluar.


Lajmi konfirmohet edhe nga drejtoresha për politikat e arsimit të lartë në MASH, Elida Hoxha, e cila ka pranuar se është rënë parimisht dakord për ngritjen e kuotave të pranimit, për vitin akademik 2009-2010.


Megjithëse nuk ka cituar përqindje për masën e rritjes së kuotave të pranimit, znj. Hoxha tha po bisedohet me grupet e interesit dhe se aktualisht ka marrë të gjitha propozimet përkatëse nga rektoratet e universiteteve publike.


Fjala e fundit i mbetet Këshillit të Ministrave, i cili në muajin korrik, fill pas përfundimit të Maturës Shtetërore, do të përcaktojë kuotat përfundimtare të pranimit në institucionet e arsimit të lartë publik, në vitin akademik 2009-2010

[[Perla]]

Libri i Transparencës, në muajin gusht, maturantët do kthehen sërish në shkolla, për të verifikuar të dhënat


Çdo maturant që ka kontestime, do të plotësojë një formular, i cili do të kalojë në APRIAL për verifikim


Menjëherë sapo të kthehen nga pushimet verore, maturantët do të paraqiten edhe njëherë nëpër shkolla, ndoshta për herë të fundit, për të verifikuar pikët e grumbulluara në provimet e Maturës Shtetërore. Agjencia e Pranimit në Institucionet e Arsimit të Lartë Publik (APRIAL) do të publikojë në muajin gusht, vetëm pak ditë para se të zyrtarizojë nisjen e fazës së pranimeve në universitete, Librin e Transparencës.


Në këtë libër, i cili publikohet për të tretin vit radhazi në shkolla, maturantët do të gjejnë të gjithë elementët përbërës të rezultateve të përfundimit të shkollës së mesme, të provimeve me zgjedhje, si edhe preferencat e përzgjedhura prej tyre për programet e studimit që ofron IAL-i për vitin akademik 2009-2010.


Mbi bazën e elementeve të sipërcituar, në libër do të jepen edhe pikët e fituara nga secili maturant për çdo preferencë, të llogaritura në bazë të koeficienteve të përcaktuar nga IAL-i. Bashkëngjitur me Librin e Transparencës, kandidatët për arsimin e lartë do të gjejnë në formë elektronike edhe Formularin e Korrigjimit të Pasaktësive.


Ky formular është përgatitur për të evidentuar ndryshimet që duhen bërë për një maturant, në rast se ai konstaton se të dhënat e tij nuk janë hedhur të sakta dhe ka kontestime mbi llogaritjen e pikëve të kryer nga APRIAL-i. Formulari është shumë i thjeshtë për t'u plotësuar. Në pjesën e parë kandidati do të ketë të detyrueshme të plotësojë të dhënat për rrethin, bashkinë/komunën, shkollën dhe ID-në e tij.


Në çdo kuti do të shkruajë vetëm një shkronjë ose një numër. Shkronjat duhet të jenë kapitale dhe numri me shifra arabe. Këto të dhëna janë të domosdoshme për identifikimin e maturantit, i cili konstaton pasaktësi në të dhënat e tij. Në pjesën e dytë, në seksionin "Si ishte", kandidati ka të detyrueshëm të plotësojë të gjitha të dhënat si: Emri, atësia, mbiemri, datëlindja, nota mesatare, ashtu sikurse edhe vepron në Formularin A2.


Në seksionin "Si bëhet", do të plotësohen vetëm ato të dhëna ku kërkohet ndryshimi: P.sh. nëse kërkohet ndryshim tek emri, te rreshti emri shkruhet si duhet emri i saktë. Mund të ndodhë të kërkohen dy ose më shumë ndryshime: p.sh. edhe datëlindja, edhe nota mesatare. Pasi kërkesa për ndryshimet të jetë plotësuar me kujdes, maturanti shkruan emrin, mbiemrin dhe firmos në vendin përkatës.


Të gjitha ndryshimet që maturantët do të kërkojnë, duhet medoemos të konfirmohen nga mësuesi kujdestar, drejtori i shkollës, si dhe nga drejtori i Drejtorisë Arsimore Rajonale ose Zonale Arsimore, sipas rastit konkret.

Shtyhet për të dytën herë plotësimi i Formularit, ku listohen preferencat për degët e arsimit të lartë


Formulari A2, plotësimi deri në fundjavë


Maturantët do të kenë ende ditë përpara për të plotësuar Formularin A2, ku janë listuar preferencat për pranimet në institucionet e arsimit të lartë publik. Një pjesë e mirë e gjimnazeve në Tiranë, kanë shtyrë përtej afatit të parë të përcaktuar nga Agjencia e Pranimit në Institucionet e Arsimit të Lartë Publik (APRIAL), kohën e dorëzimit në agjenci të formularëve të plotësuar.


Megjithëse 13 korriku ishte lënë si data e fundit, e mbylljes së procesit të plotësimit të Formularit A2, nxënësit do të kenë kohë edhe 4 ditë, deri në përfundim të javës, për të bërë të munduar një gjë të tillë. Shkak për shtyrjen edhe më tej të plotësimit të Formularit, në disa shkolla, është bërë regjistrimi njëkohësisht në të njëjtën periudhë i gjimnazistëve të rinj, fazë e cila nisi më datë 29 qershor. Më shumë kohë në dispozicion do të kenë maturantët e vjetër.


Të gjithë këta maturantë, të cilët kanë plotësuar në muajin prill Formularin A1 Z, dhe nuk gjenden në librin e të dhënave, duhet të drejtohen pranë Agjencisë së Vlerësimit të Arritjeve të Nxënësve (AVA), brenda datës 20 korrik, për të bërë regjistrimin në Formularin A2.


Mbyllja e procesit të plotësimit të Formularit A2 në shkolla, do të përkojë gjatë javës së ardhshme edhe me shpalljen e numrit të kuotave të pranimit në universitetet publike, nga Këshilli i Ministrave, gjë që do t'u mundësojë maturantëve verifikimin e mundësive që ata kanë për të fituar të drejtën e studimit në një nga degët e arsimit të lartë që ata kanë zgjedhur.


Po kështu, para se të marrin pushimet verore, maturantët do të mësojnë edhe mbi rezultatet e marra në provimet me zgjedhje. Ministria e Arsimit ka bërë të ditur se maturantët do të njihen me notat e marra jo më larg se data 24 korrik.



Libri i Transparencës, të gjitha të dhënat që do gjeni


Në Librin e Transparencës nuk do të përfshihen maturantët, të cilët nuk kanë marrë qoftë edhe një nga provimet e Maturës Shtetërore. Në libër secili maturant do të ketë kutinë e tij, ku në rreshtin e parë do të jepen: numri rendor, numri identifikues i maturantit (ID), që e ka shoqëruar gjatë gjithë procesit të Maturës Shtetërore; emri, atësia, mbiemri, datëlindja, ndërsa djathtas do të vendosen emërtimi i profilit të shkollës së mesme që ka mbaruar dhe së fundi numri i këtij profili.


Në pjesën majtas do të jenë emërtesat dhe notat e shkallëzuara të 5 elementeve të Maturës Shtetërore, në bazë të të cilave llogariten pikët. Këto elemente janë dhënë jo vetëm me numrin e programit të studimit, por dhe me emërtesën përkatëse. Më tej do të vijohet me preferencat e kandidatit, të renditura siç janë kërkuar prej tij në Formularin A2.


Preferencat do të përmbajnë numrin dhe emërtesën e programit të studimit. Në krah do të jepen tre koeficientet për secilin program studimi, sipas kësaj renditjeje: I pari: koeficienti i shkollës (KSH); I dyti: koeficienti për provimin e parë me zgjedhje (KZ1); I treti: koeficienti për provimin e dytë me zgjedhje (KZ2). Llogaritja e pikëve të secilit prej kandidatëve do të bëhet në bazë të kombinimit të formulave të realizuara në një program kompjuterik për programet e studimit pa konkurs dhe për programet e studimit me konkurs (Akademia e Arteve, Akademia e Sporteve, dega e Arkitekturës, UPT).


Në të dhënat e maturantëve të veçantë mund të ketë preferenca bosh, që do të thotë se maturanti: nuk e ka zgjedhur atë preferencë, e ka mbushur me 000 në Formularin A2, nuk ka marrë pjesë në konkursin e atij programi studimi, ose ka marrë pjesë në konkurs, por nuk ka fituar pikët e mjaftueshme për kualifikim.


Universiteti i Elbasanit, shtohen 600 kuota pranimi


ELBASAN - Universiteti "Aleksandër Xhuvani" i Elbasanit, do të rrisë numrin e kuotave të pranimit për vitin akademik 2009-2010. Pohimi vjen nga rektori i këtij universiteti, Liman Varoshi, i cili thotë se këtë vit do të pranohen 2.140 studentë nga 1.595 që u pranuan gjatë vitit të kaluar.


Po këtë vit, në Universitetin e Elbasanit pritet të nisë edhe procesi i akreditimit nga një agjenci e huaj, e cila do të vlerësojë standardet në këtë universitet. Rektori Varoshi tha se pas Tiranës, Elbasani do të jetë i dyti që do të kërkojë një gjë të tillë, i ndërgjegjshëm për tregun dhe konkurrencën mes universiteteve.


Ai konfirmoi se vetë universiteti ka bërë një vetëvlerësim, duke përcaktuar pikat e forta dhe të dobëta. "Në vitin e ardhshëm akademik, 2009-2010, rektorati i Universitetit të Elbasanit ka vendosur dhe është në proces të hartimit të ftesës që ky universitet do t'i bëjë një agjencie të huaj për akreditimin e tij. Ndërsa Tirana e ka bërë, të njëjtën gjë do të bëjmë edhe ne. Të jeni të bindur se viti i ardhshëm akademik do të startojë me fillimin e procesit të vlerësimit nga një agjenci e huaj me autoritet për universitetin tonë. Kjo do t'i vlejë përballimit të suksesshëm të sfidës e konkurrencës", - tha rektori.

Shekulli

[[Perla]]

Ministri i Arsimit Myqerem Tafaj përshëndet maturantët nga qyteti i Durrësit.Korrigjimet nisin javën e ardhshme

Rreth 49 mijë maturantë, të shkollave të mesme publikë dhe private, dhanë sot provimin e parë të Maturës Shtetërore, në Gjuhë-Letërsi Shqipe. Provimi nisi në orën 10:00 dhe u mbyll në mesditë. Për organizimin e këtij provimi, gjatë natës së mbrëmshme u shpërndanë të gjitha testet, duke nisur fillimisht me rrethet e largëta e më pas me qytetet e tjera. Çelësi i përgjigjeve të duhura, pritet të publikohet sot pasdite, ndërsa korrigjimi i testeve do të nisë javën e ardhshme.

Ministri i Arsimit dhe Shkencës, Myqerem Tafaj, teksa e ka vlerësuar tezën e provimit të letërsisë të një niveli mesatar, ka përshëndetur të gjithë maturantët e vendit nga qyteti bregdetar i Durrësit ku është ngritur dhe qendra më e madhe në nivel qarku, pranë universitetit “Aleksandër Moisiu”. Në këtë qendër zhvilluan testimin 460 maturantë, të cilët u përshëndetën nga ministri Myqerem Tafaj i cili u uroi suksese dhe në provimet e tjera të Maturës Shtetërore. Ky vit ka regjistruar numrin më të lartë të maturantëve në shkallë vendi.

Shqip