Materiale mbi Provimet e Lirimit nga Ministria e Arsimit (MASH)

[E=mc²]

Me fal qe po te prish temen, po vertet eshte bere nje katrahure e madhe me keto aplikimet. Nuk e di keto formularet a jane formuluar mire, se vjet kishin kandiduar per Matematik dhe na i sollen tek Informatika, te gjithe ishin te pakenaqur me kete lloje politike qe kane zgjedhur per aplikimin ne Universitet.

[[Perla]]

MASH-i përcakton kriteret e rinj, me të cilët nxënësit që përfunduan arsimin e mesëm jashtë, do të pranohen në universitete

Dorëzimi i dokumenteve do të bëhet deri më 15 prill, ndërsa Formulari A2 do të dorëzohet deri më 30 qershor


Duke filluar nga ky vit, të gjithë nxënësit, të cilët kanë përfunduar arsimin e mesëm jashtë vendit dhe dëshirojnë të ndjekin studimet e larta në universitetet publike në Shqipëri, nuk do të jenë më të detyruar të japin provimet me detyrim D1 dhe D2, por vetëm lëndët me zgjedhje Z1 dhe Z2.

Vendimi është sanksionuar në rregulloren e re të miratuar nga Ministria e Arsimit dhe e Shkencave, ku flitet për përcaktimin e kritereve të ekuivalentimit dhe regjistrimit në Maturën Shtetërore 2009, të shtetasve shqiptarë që kanë kryer shkollën e mesme jashtë shtetit.

Kështu, duke filluar nga ky vit, për të vazhduar studimet në institucionet e arsimit të lartë publik në vend, nxënësit që kanë përfunduar arsimin e mesëm jashtë shtetit, mjafton të dorëzojnë në Ministrinë e Arsimit dhe të Shkencave diplomë të barasvlefshme me dëftesën e pjekurisë që lëshohet në Republikën e Shqipërisë.

Për të marrë pjesë në provimet me zgjedhje në Maturën 2009, nxënësit të cilët kanë përfunduar arsimin e mesëm jashtë shtetit, duhet të paraqesin për ekuivalentim në Drejtorinë e Kurrikulës dhe Monitorim Vlerësimit në Ministrinë e Arsimit dhe të Shkencave, brenda datës 15 prill, tri dokumente të nevojshme për të mundësuar vazhdimin e studimeve të larta në universitete.

Nxënësit e mësipërm duhet të dorëzojnë në MASH kërkesën me shkrim për të vazhduar studimet e larta në institucionet e arsimit të lartë publik, dëftesat origjinale me notat e të gjitha viteve të shkollës së mesme, të përkthyera dhe të noterizuara, si edhe fotokopje e noterizuar e pasaportës/letërnjoftimit ose certifikatë lindjeje me fotografi.

Menjëherë pas këtij procesi, MASH-i do të ngrejë një komision të posaçëm, i cili do të merret me ekuivalentimin e dokumentacionit. Komisioni, pasi të njohë vlefshmërinë e dëftesës shkollore, fillimisht do të kryejë përllogaritjen e notës mesatare të viteve të shkollimit dhe të notave të provimeve të detyruara D1 dhe D2, ose në mungesë të këtyre të fundit, të notave përkatëse të këtyre lëndëve, si edhe do të përcjellë zyrtarisht rezultatet e mësipërme në Komisionin e Maturës Shtetërore, pranë Drejtorive Arsimore Rajonale dhe Zyrave Arsimore, ku shtetasi ka vendbanimin, brenda datës 30 prill 2009. Më tej, Komisioni i Maturës Shtetërore pranë Drejtorive Arsimore Rajonale dhe Zyrave Arsimore, do të caktojë shkollën ku shtetasi do të kryejë provimet me zgjedhje dhe do të plotësojë formularët A1 dhe A2, do të përcjellë pranë shkollave përkatëse notat që ka përcaktuar Komisioni i Posaçëm dhe do të dorëzojë zyrtarisht dhe në formë elektronike, në Agjencinë e Vlerësimit të Arritjeve të Nxënësve (AVA), formularët A1 të plotësuar nga shtetasit dhe përmbledhësen e të dhënave të shtetasve sipas tabelës T, brenda datës 5 maj 2009.

Risia
Nxënësit që përfunduan jashtë, nuk do të japin provime me zgjedhje për konkursin në degët artistike dhe sportive,


Akademia e Arteve dhe Sportet. Pranimi, pa provime me zgjedhje.

Nxënësit që kanë përfunduar arsimin e mesëm jashtë vendit, duhet të plotësojnë dhe të dorëzojnë Formularin A2 brenda datës 30 qershor 2009, pranë Komisionit Shkollor të Maturës Shtetërore, në të kundërt humbasin të drejtën për të marrë pjesë në provimet me zgjedhje që zhvillohen 10 ditë më pas dhe, rrjedhimisht, edhe të drejtën për të ndjekur studimet e larta.

Ndryshime në rregulloren e re do të ketë edhe për nxënësit shqiptarë që duan të vazhdojnë studimet vetëm në Akademinë e Arteve, Akademinë e Edukimit Fizik dhe Sporteve, si dhe në programin e studimit të Edukimit Fizik dhe Sporteve në Universitetin "Luigj Gurakuqi" të Shkodrës. Nxënësit që kërkojnë të ndjekin studimet në degët e mësipërme, mund të konkurrojnë në këto institucione të arsimit të lartë publik, pa qenë të detyruar të japin provimet e lëndëve me zgjedhje.

Rregullorja e vjetër

Në maturën 2008 ishte e përcaktuar qartë se, për të vazhduar studimet e larta në vend, nxënësit të cilët kishin përfunduar arsimin e mesëm jashtë vendit, duhet të plotësonin dy kritere të domosdoshme: e para, për ata që kishin dhënë provimet ekuivalente me Maturën Shtetërore (provime të detyruara D1 e D2 dhe provime me zgjedhje Z1 e Z2), do të pranoheshin në shkollat e larta publike, mbi bazën e pikëve që llogariten sipas notave të marra dhe, e dyta, nëse nuk kishin dhënë provimet ekuivalente me Maturën Shtetërore (provimet me detyrim D1 e D2 dhe provimet me zgjedhje Z1 e Z2), për t'u pranuar në shkollat e larta publike, duhet të jepnin provimet me zgjedhje.

Shekulli Online

[[Perla]]

Universiteti i Tiranës dhe ai Politeknik, zbardhin koeficientet për secilin profil shkollor të mesëm


Koeficientet do shërbejnë për shumëzimin e notës mesatare dhe dy lëndëve me detyrim, që do jepen në provim
Koeficientet që universitetet do të caktojnë për secilin profil shkollor të mesëm, do të mbeten të pandryshuar.

Burime pranë dekanateve të Universitetit të Tiranës dhe atij Politeknik, thanë për gazetën "Shekulli" se nuk do të kërkojnë ndryshime në koeficiente, por do të ruajnë ato që janë përdorur në maturën e kaluar.

Edhe këtë vit, degë të ndryshme do vlerësojnë me koeficiente më të lartë, profilin shkollor që është më pranë programit dhe përmbajtjes që ato kanë. Universiteti Politeknik do të vlerësojë me koeficientin më të lartë të mundshëm, 1.4, në këtë maturë, profilin Natyror, ndërsa me koeficientin më të ulët, 1.0, shkollat me disiplina kulturore dhe sportive.

E njëjta logjikë do të ndiqet edhe në degët e Universitetit të Tiranës, ku degët me përmbajtje shkencat natyrore, apo anasjelltas, do të vlerësojnë me koeficient më të lartë shkollat me profil të ngjashëm.

Në koeficientet që i përkasin llojit të shkollës së mesme, çdo degë e shkollës së lartë ka në dispozicion 5 koeficiente, nga 1.0 deri në 1.4 (1.0, 1.1, 1.2, 1.3, 1.4), me të cilët vendos preferencën e saj për llojet e ndryshme të shkollave të mesme.


Koeficienti i shkollës së mesme do t'i shërbejë maturantit për të zgjedhur më drejt degën e studimit ku preferon të vazhdojë.

Për të përfituar shumën që do t'i duhet për të qenë pjesë e pranimeve në universitete, maturanti duhet të shumëzojë fillimisht secilën nga 3 notat e para (nota mesatare dhe 2 notat për provimet e lëndëve të detyruara matematikë e gjuhë-letërsi) me koeficientin e vendosur nga dega e fakultetit, për llojin e shkollës së mesme që ai ka kryer, dhe të mbledhë këtë shumë me pikët e dala nga shumëzimi i koeficienteve të dy lëndëve me zgjedhje, me notën e provimit që kandidati ka marrë në secilën lëndë.

Shekulli Online


Koeficentat

[[Perla]]

Risia, shkrihet Kompozicioni, Dirigjimi dhe Muzikologjia, me Pedagogjinë Muzikore. Kush merr 120 pikë, studion në tri të parat

Rregulla të forta edhe në Kitarë dhe Piano. Do ketë më shumë kërkesa në përzgjedhjen e talenteve

Konkurset e pranimit në Akademinë e Arteve, për vitin akademik 2009-2010, do të pësojnë një sërë ndryshimesh, të cilat do të synojnë rritjen e kërkesave ndaj konkurrentëve.

Kështu, duke filluar nga ky vit, konkurset e Kompozicionit, Muzikologjisë dhe Dirigjimit, do të bashkohen në një të vetëm, me konkursin për pedagogjinë muzikore, ndërkohë që në vitet e kaluara, tri degët e para kishin gjithsecila konkurs më vete.

Rektori i Akademisë së Arteve, Petrit Malaj, shpjegoi për gazetën "Shekulli" se ndryshimet në kompozicion dhe dirigjim janë bërë për disa arsye, ku ajo që ai theksoi më shumë, është cilësia e dobët e studentëve që kanë nxjerrë këto konkurse në vitet e kaluara. "Në kompozicion dhe dirigjim, ndryshimet janë bërë për disa arsye. E para, pranimet, historikisht nuk kanë përligjur qëllimin e këtyre formimeve.

Në këto vite kemi shumë pak kompozitorë, muzikologë dhe dirigjentë, në një kohë kur çdo vit kanë fituar të drejtën për të ndjekur këto degë 6-8 studentë.

E dyta, është përgatitja paraprake e konkurrentëve. Përgjithësisht vijnë konkurrentë me përgatitje në fizarmonikë ose nga studimet me instrumente, me prirje dhe informim të dobët dhe të tjerë që nuk janë cilësorë, dhe kjo dëmton cilësinë e mësimdhënies.

Për këtë fakt kemi menduar të bashkojmë konkurset e kompozicionit, muzikologjisë dhe dirigjimit me pedagogjinë muzikore", - sqaroi rektori Malaj.

Bashkimi i konkurseve do të sjellë rrjedhimisht skemë të re përzgjedhje. Konkurrentët më të mirë, që marrin 120 pikë në lëndët profesionale, do të vazhdojnë studimet në degët Kompozicion, Muzikologji dhe Dirigjim, ndërsa ata që vlerësohen me më pak pikë, kalojnë në degën Pedagogji Muzikore.

Ajo që vjen si risi tjetër në Akademinë e Arteve, në vitin akademik 2009-2010, është hapja për herë të parë e degës së Pedagogjisë Muzikore, që do të përgatisë mësuesit e ardhshëm të muzikës në shkollat e arsimit bazë dhe atij të mesëm.

Rektori, Malaj vlerësoi se "Pedagogjia Muzikore është tashmë një degë e domosdoshme për t'u hapur, kjo pasi këtë e kërkojnë edhe shkollat e mesme ku jepet muzikë.

"Është mirë që mësues muzike në shkolla të mos shkojnë persona, të cilët kanë mbrojtur diplomën për një instrument të caktuar, le të themi flaut apo violinë, por të shkojë një student i përgatitur pikërisht për Pedagogjinë Muzikore, i cili njeh elementët e muzikës së asaj lënde që jepet në arsimin bazë dhe atë të mesëm", - tha rektori i Akademisë së Arteve, duke informuar më tej se kërkesa të rrepta në konkurs do të ketë edhe në degët Piano dhe Kitarë, ku cilësia e studentëve në vitet e kaluara, ka lënë për të dëshiruar.


Piktura, dega zgjidhet që në konkurs, jo në vit të dytë


Ndryshime të pritshme do të ketë edhe në konkursin që do të zhvillohet në Fakultetin e Arteve Pamore, i cili këtë vit do të ndryshojë emër, duke u quajtur Fakulteti i Arteve të Bukura.

Rektori Malaj informoi se, në rast se vitet e tjera të gjithë fituesit kanë hyrë në shkollë dhe kanë kryer një vit të parë në bllok të tërë së bashku dhe gjatë vitit të dytë kanë specifikuar drejtimin që do ndjekin, tashmë, me Kartën e Bolonjës, ndarja e degës nga konkurrentët do të bëhet në ditën kur ata do të zhvillojnë konkursin.

"Është shumë e thjeshtë. Konkurrenti që konkurron për Pikturë, krahas testimit të aftësive që disponon në këtë fushë, do të pyetet edhe për drejtimin që do të marrë në vitet e shkollës, pra nëse dëshiron të vazhdojë për dizajn, grafik, tekstil, etj.

Kjo bëhet me qëllim kategorizimin e secilit kandidat, sipas diplomës së nivelit të parë të studimit". Ky është ndryshimi thelbësor që do të ndodhë në Fakultetin e Arteve të Bukura.

Në vitet e kaluara, ndarja e specialiteteve në Fakultetin e Arteve Pamore është bërë në vitin e dytë, ndërsa në vitin e parë ka qenë i përbashkët. Rektori Malaj, saktësoi se paçka ndryshimit të kryer, viti i parë për studentët në Fakultetin e Arteve të Bukura do jetë i përbashkët.


Shekull Online

[[Perla]]

Testi në provimet me zgjedhje, do të përmbajë 40 pikë, ku pyetjet me shtjellim do të kenë pikë variabël
Matura, pikët për secilin nga testet me zgjedhje
Pyetjet me zgjedhje do të jenë 10 për secilën lëndë, dhe do të përmbajnë një pikë secila


Çdo test, në 9 lëndët me zgjedhje që do të jepen në provimet e Maturës Shtetërore, do të ketë krahas përmbajtjes së dallueshme, edhe strukturë të ndryshme pikësh. Edhe këtë vit, testet do të jenë ndara në dy seksione; në kërkesa me zhvillim dhe zgjedhje. Në total, testi në provimet me zgjedhje do të ketë 20 pyetje, nga të cilat 10 do të jenë me zgjedhje, dhe po kaq me zhvillim. Provimi në lëndët me zgjedhje do të zgjasë 120 minuta dhe çdo test do të përmbajë në vetvete 40 pikë të mundshme, të ndara këto sipas rëndësisë së pyetjes dhe shkallës së vështirësisë. Pyetjet me zgjedhje, ose me rrethim, do të përmbajnë 4 alternativa, nga të cilat maturanti do të rrethojë vetëm njërën prej tyre, atë që ai mendon se është e saktë. Çdo pyetje e saktë do të vlejë 1 pikë, ndërkohë që maturanti nuk do të penalizohet me heqje pike, në rast se rrethon alternativën e gabuar. Kjo për sa u përket pyetjeve me zgjedhje, pasi pyetjet me zhvillim do të kenë pikëzim variabël nga njëri-tjetri, gjithmonë duke u mbështetur në rëndësinë dhe shkallën e vështirësisë që ato do të kenë. Në provimin "Njohuri për shoqërinë" dhe atë "Njohuri për Ekonominë dhe Filozofinë", që do të jepen më datë 10 korrik, në të njëjtën ditë kur maturantët do të japin provimet e tjera me zgjedhje, pyetjet me shtjellim do të kenë vlerë 3 pikë secila, që në total, bashkuar me pikët e kërkesave me zgjedhje, bëhen 40 pikë. Në kërkesat me zgjedhje, maturanti do të rrethojë vetëm shkronjën përbri përgjigjes së saktë, ndërsa për kërkesat me zhvillim është dhënë hapësira e nevojshme për të shkruar përgjigjen. Njëzet pyetje, në total, do të ketë edhe lënda e historisë. Testi do të jetë i ndarë ashtu si edhe në testet e tjera në lëndët me zgjedhje, në kërkesa me zgjedhje dhe më zhvillim, të cilët do të jenë në proporcion të drejtë. Kërkesat me zgjedhje do të kenë vlerë, në rast të përgjigjes së saktë, 1 pikë, ndërsa ato me shtjellim, nga 2-4 pikë. Në pyetjet me shtjellim, maturantët do të rendisin çështjet historike, sipas kërkesës së shtruar në test, ku secila përgjigje do të ketë 1 pikë, të cilat të mbledhura në fund, plotësojnë pikaverazhin e vendosur nga hartuesit e testit. Testi do të ketë të njëjtën strukturë edhe në lëndën e gjeografisë. I vetmi dallim nga lënda e historisë, është që pyetjet me shtjellim në këtë lëndë do të variojnë nga 2-5 pikë. Në lëndët ekzakte me zgjedhje si, kimi, biologji dhe fizikë, pyetjet me shtjellim do të kenë nga 2-3 pikë secila dhe do të jenë të ndara me ushtrime përkatëse, vlera e të cilëve do të jetë 1 pikë.


Provimet me zgjedhje
Gjuhët e huaja, testi i ndarë në tre seksione
Dallime në strukturë do të ketë në lëndët me zgjedhje, që përfshijnë Gjuhët e huaja. Në gjuhën frënge, testi do të ndahet në 3 seksione. Në seksionin e parë do të jepet fragmenti i një teksti dhe më poshtë do të parashtrohen 9 pyetje, ku do të përgjigjen maturantët. Çdo kërkesë ka përbri 1-2 pikë. Në seksionin e dytë, maturantët duhet të masin njohuritë në gramatikë dhe fjalor, ku çdo përgjigje e saktë do të ketë vlerë 1 pikë. Seksioni i tretë do të jetë më i rëndësishmi në test dhe do të përmbajë 6 pikë. Në këtë pjesë, maturanti duhet të përshkruajë në frëngjisht një eksperiencë jetësore të tij, sipas fjalëve të dhëna. E njëjta strukturë do të ndiqet edhe në formulimin e testeve në provimet me zgjedhje, që përfshijnë gjuhët e tjera si, anglisht, italisht, spanjisht, gjermanisht.


8. Lëndët e provimeve me zgjedhje të Maturës Shtetërore janë:

a) Fizikë
b) Kimi
c) Biologji
d) Histori
e) Gjeografi
f) Njohuri për shoqërinë
g) Njohuri për ekonominë, Filozofi
h) Gjuhë angleze
i) Gjuhë frënge
j) Gjuhë italiane
k) Gjuhë gjermane
l) Gjuhë spanjolle


1-Njohuri mbi shoqërinë
20 pyetje
Kohezgjatja 2 orë
10 pyetje me rrethim, nga 1 pikë secila
10 pyetje me shtjellim, nga 3 pikë secila

2-Historia
20 pyetje
2 orë
10 pyetje me rrethim, 1 pikë secila
10 pyetje me shtjellim, që variojnë nga 2-4 pikë

3-Gjeografi
20 pyetje
Kohezgjatja 2 orë
10 pyetje me alternativa
10 pyetje me shtjellim, që variojnë nga 2-5 pikë

4-Gjuha Frënge, Angleze, Italiane, Gjermane
Ndarë në tri seksione
Shtjellim fragmenti
Gramatikë dhe Fjalor
Pyetje me alternativa 1 pikë
Pyetje me shtjellim 2-6 pikë

5-Ekonomi Filozofi
20 pyetje
Pyetje Me alternativa 1 pikë
Me zhvillim 3 pikë

6-Biologjia
20 pyetje
Me alternativa 1 pikë
Me zhvillim 1-3 pikë

7-Kimia
20 pyetje
Me alternativa 1 pikë
Me zhvillim 1-4 pikë

8-Fizika
20 pyetje
Me alternativa 1 pike
Me zhvillim 2-4 pike

[[Perla]]

Nxënësit, në provimet e lirimit dhe maturë, do të marrin pikë edhe nëse nuk i kanë dhënë përgjigje të plotë ushtrimit

Për të shmangur shkallën e gabimit, AVA ka vendosur që korrigjimi të bëhet nga dy vlerësues njëherësh

Edhe nëse e shikon veten të paaftë për të plotësuar të gjitha kërkesat e parashtruara në test, nuk ka vend për t'u shqetësuar; mjafton të bësh ato që di më mirë dhe, nëse ke dhënë përgjigje të saktë, atëherë pikën e ke automatikisht të fituar. Specialistët e arsimit kanë menduar që këtë vit të mos jenë fort dorështrënguar me maturantët, por të marrin në konsideratë ato dije, qoftë edhe të pakta, që ata kanë.


Nëse në maturat e kaluara, maturanti, qoftë në provimet me detyrim, ashtu dhe në ato me zgjedhje, ishte i detyruar të plotësonte të gjithë kërkesat për të marrë pikët e plota të ushtrimit, këtë vit do të vlerësohet në bazë të asaj çka jep në test, pra, edhe nëse ka dhënë vetëm një përgjigje të saktë nga katër kërkesa që supozohet të ketë ushtrimi, atëherë ai do të vlerësohet nga komisioni me një pikë.


Dhe jo vetëm kaq, por do të ketë vlerësime edhe për ato që, në gjuhën e korrigjimeve, njihen si përgjigje jo të plota. Për të qenë sa më pranë shkallës së vërtetësisë dhe njohjes së përgatitjes të maturantit, korrigjuesit do të vlerësojnë edhe gjysmëpikëshat, p.sh., nëse një ushtrim është 2 pikë dhe maturanti nuk ka dhënë përgjigje të plotë, atëherë do të marrë 1.5 pikë.


Sistemi i mësipërm i vlerësimit do të jetë i vlefshëm jo vetëm në provimet e Maturës Shtetërore, por edhe në ato të Lirimit për ciklin 9-vjeçar. Edhe në këto provime, ku priten të marrin pjesë rreh 30 mijë nxënës, do të përdoret e njëjta logjikë vlerësimi.


Për të shmangur shkallën e gabimit gjatë korrigjimit, Agjencia Qendrore e Vlerësimit të Arritjeve të Nxënësve, ka vendosur që këtë vit, korrigjimi i testit të bëhet nga dy vlerësues njëherësh, ndërkohë që do mbetet e pandryshuar skema e përgatitjes së testit, sipas nivelit që, maturanti ose nxënësi, që përfundon ciklin 9-vjeçar, ka paraqitur gjatë ecurisë së tij shkollore.


Edhe këtë vit testet do të kenë tre nivele vështirësie, kjo për t'u dhënë mundësi nxënësve të shprehen në bazë të njohurive që ata kanë fituar gjatë ciklit shkollor që kanë ndjekur. Të vetmit që kanë paraqitur rezerva për ndarjen e testeve në nivele, janë maturantët me shkallë të lartë përgatitjeje, të cilët janë shprehur se, për shkak të moskonvertimit të niveleve, rrezikojnë të marrin të njëjtën notë me nxënësit e dobët, mendim që është rrëzuar nga specialistë të arsimit.


Specialistë të AVA-s, shpjegojnë se të gjithë maturantët, të cilët hyjnë në kategorinë e nxënësve të dobët, ecuria shkollore e të cilëve luhatet në mesataren 5-6, do të kenë hapësirë në 40 për qind të testit; maturantët, të cilët futen në kategorinë e dytë, ose ndryshe në nivelin mesatar, do të kenë 80 për qind të testit, ndërsa niveli ku përfshihen nxënësit e mirë dhe ata shumë të mirë, do të ketë hapësirë në 100 për qind të testit.


Shekulli Online

[[Perla]]

Artet, sportet, arkitektura, raporti mes provimeve të Maturës dhe konkursit. Përcaktohet pragu i pikëve që duhet të kapërcejë një maturant për të fituar


Kandidatët që duan të ndjekin studimet e larta në shkollat akademike do të përzgjidhen në bazë të rezultateve që do të arrijnë në testimin e pjesës speciale të konkursit. Bazuar dhe në llojin e degës, konkursi special për këta kandidatë do të zërë deri në 80 për qind të peshës përzgjedhëse të kandidatëve fitues për në universitet. Ndërsa pjesa tjetër do t’u atribuohet provimeve të Maturës. Përjashtim në këtë rast do të bëjë vetëm dega e Arkitekturës, e cila do të japë dhe pjesën speciale, por dhe atë të lëndëve me zgjedhje, sepse kërkohet që maturantët që përzgjedhin këtë degë, të kenë aftësi edhe në fusha të tjera, të cilat janë të domosdoshme.

Konkursi
Pas përfundimit të katër provimeve të Maturës, kandidatët që duan të ndjekin studimet në degën Arkitekturë, do t’i nënshtrohen edhe një konkursi specifik. Konkursi i pranimit, që përfshin talentin dhe përgatitjen fizike, do të ketë një peshë të madhe për t’u shpallur fitues në Akademinë e Arteve, Sporteve. Maturantët që do të pranohen në këto institucione, përveç rezultateve të Maturës Shtetërore, do t’u duhet të jenë të suksesshëm edhe në këto konkurse, që organizohen për shkak të profilit të veçantë të këtyre programeve. Sakaq është përcaktuar pragu i pikëve që duhet të marrë një maturant në konkursin e pranimit për çdo akademi për të fituar të drejtën e studimit. Në Akademinë e Arteve rezultatet e Maturës Shtetërore do të llogariten në masën 20 për qind dhe rezultatet e konkursit të pranimit në masën 80 për qind. Në bazë të propozimit të këtij institucioni, kandidati që nuk do të marrë 25 për qind të pikëve të konkursit të pranimit nuk fiton të drejtën për të studiuar në programet e studimit të kësaj akademie për vitin akademik 2009-2010. Në Akademinë e Edukimit Fizik dhe Sporteve “Vojo Kushi” në Tiranë dhe në programin e studimit “Edukim fizik dhe sporte” të Universitetit “Luigj Gurakuqi” të Shkodrës raporti mes provimeve të Maturës dhe konkursit të pranimit do të jetë në masën 30 për qind Matura me 70 për qind konkursi. Në programin e studimit “Arkitekturë” në Universitetin Politeknik të Tiranës ky raport i rezultateve do të jetë në masën 35 për qind me 65 për qind, ku përsëri peshën kryesore do ta ketë konkursi i universitetit.

Pranimet
Pranimet e studentëve në Akademinë së Arteve, në Akademinë e Edukimit Fizik dhe Sporteve “Vojo Kushi” dhe në programin e studimit “Edukim Fizik dhe Sporte” të Universitetit të Shkodrës, këtë vit do të bëhen mbi bazën e rezultateve të dy provimeve me detyrim të Maturës Shtetërore dhe të rezultateve nga konkursi i pranimit i organizuar nga këto institucione publike të Arsimit të Lartë. Në rregulloren e Maturës 2009 është vendosur që shtetasit shqiptarë, që duan të vazhdojnë studimet vetëm në Akademinë e Arteve të Bukura, Akademinë e Edukimit Fizik dhe Sporteve si dhe në programin e studimit të Edukimit Fizik dhe Sporteve në Universitetin “Luigj Gurakuqi” të Shkodrës, mund të konkurrojnë në këto institucione të Arsimit të Lartë publik pa qenë të detyruar të japin provimet e lëndëve me zgjedhje. Maturantët që do të pranohen në këto institucione, përveç rezultateve të dy provimeve të Maturës, duhet të kalojnë me sukses edhe testimin special në konkurs, për të vijuar më tej studimet e larta. Një vit më parë MASH-i vendosi t’i organizojë konkurset speciale të shkollave të larta akademike në muajin korrik, në mënyrë që raundet e pranimeve në universitete, sipas sistemit Meritë-Preferencë (MeP), të përfundonin më herët dhe brenda javës së parë të vitit akademik.

Raporti i pikëve Maturë/konkurs

Akademia e Arteve
Në Akademinë e Arteve rezultatet e Maturës Shtetërore do të llogariten në masën 20 për qind dhe rezultatet e konkursit të pranimit në masën 80 për qind. Në bazë të propozimit të këtij institucioni, kandidati që nuk do të marrë 25 për qind të pikëve të konkursit të pranimit nuk fiton të drejtën për të studiuar.

Akademia e Sporteve
Në Akademinë e Edukimit Fizik dhe Sporteve “Vojo Kushi” në Tiranë dhe në programin e studimit “Edukim fizik dhe sporte” të Universitetit “Luigj Gurakuqi” të Shkodrës, raporti mes provimeve të Maturës dhe konkursit të pranimit do të jetë në masën 30 për qind Matura me 70 për qind konkursi.

Arkitektura
Në programin e studimit Arkitekturë në Universitetin Politeknik të Tiranës ky raport i rezultateve do të jetë në masën 35 për qind me 65 për qind, ku përsëri peshën kryesore do ta ketë konkursi i universitetit.

Maturantët që kanë kryer shkollën e mesme jashtë shtetit

Maturantët që kanë kryer shkollën e mesme jashtë shtetit dhe kanë një diplomë të barasvlershme me Dëftesën e Pjekurisë të vendit tonë kanë të drejtë të vazhdojnë studimet në universitetet e Shqipërisë. Për t’u pranuar në universitetet publike të vendit, maturantët që kanë kryer shkollën e mesme jashtë, duhet të japin provimet e lëndëve me zgjedhje. Ministria e Arsimit publikon udhëzimin e posaçëm për këta kandidatë, në të cilin përcaktohen procedurat që ata duhet të ndjekin për të kryer ekuivalentimin e dëftesës si dhe për t’u regjistruar në provimet e Maturës. Maturantët që kanë mbaruar arsimin e mesëm jashtë vendit që do të japin provimet e lëndëve me zgjedhje, duhet të paraqesin për ekuivalentim në Ministrinë e Arsimit (Drejtoria e Kurrikulës dhe Monitorim, Vlerësimit) deri më 15 prill 2009 dokumentet e mëposhtme: Kërkesën me shkrim për të vazhduar studimet e larta në institucionet e arsimit të lartë publik; dëftesat origjinale me notat e të gjitha viteve të shkollës së mesme, të përkthyera dhe të noterizuara; fotokopje e noterizuar e pasaportës/letërnjoftimit ose certifikatë lindjeje me fotografi.
Në Ministrinë e Arsimit do të ngrihet komisioni i posaçëm për ekuivalentimin e dokumentacionit të shtetasve shqiptarë që kanë kryer shkollat e mesme jashtë shtetit dhe që dëshirojnë të vazhdojnë studimet e larta në institucionet e Arsimit të Lartë publik.

Procedurat pas njohjes së dëftesës

Komisioni i posaçëm, pasi njeh vlefshmërinë e dëftesës shkollore të shtetasve shqiptarë që kanë kryer shkollën e mesme jashtë shtetit, ndjek hapat e mëposhtëm:
Bën përllogaritjen e notës mesatare të viteve të shkollimit dhe të notave të provimeve të detyruara D1 dhe D2 ose, në mungesë të këtyre të fundit, të notave përkatëse të këtyre lëndëve.
Përcjell zyrtarisht rezultatet e mësipërme në Komisionin e Maturës Shtetërore pranë drejtorive arsimore rajonale dhe zyrave arsimore, ku shtetasi ka vendbanimin, brenda datës 30 prill 2009.
Komisioni i Maturës Shtetërore pranë drejtorive arsimore rajonale dhe zyrave arsimore ndjek hapat e mëposhtëm:
Cakton shkollën ku shtetasi do të kryejë provimet me zgjedhje dhe do të plotësojë formularët A1 dhe A2.
Përcjell pranë shkollave përkatëse notat që ka përcaktuar Komisioni i Posaçëm.
Dorëzon zyrtarisht dhe në formë elektronike në Agjencinë e Vlerësimit të Arritjeve të Nxënësve (AVA) formularët A1 të plotësuar nga shtetasit dhe përmbledhësen e të dhënave të shtetasve sipas tabelës T, brenda datës 5 Maj 2009.
Formularët A2 plotësohen nga shtetasit brenda datës 30 qershor 2009 dhe dorëzohen në Komisionin Shkollor të Maturës Shtetërore.


Jonida Tashi
Gazeta Albania

[[Perla]]

Shkollat e larta që do t’i pranojnë studentët pa iu nënshtruar provimeve me zgjedhje. Kandidatët në këto shkolla do të përzgjidhen në bazë të konkursit special

Maturantët që rezultojnë mbetës, qoftë edhe në një nga provimet me detyrim të Maturës, nuk kanë të drejtë t’u nënshtrohen më tej atyre me zgjedhje. Specialistët e Arsimit, bazuar në rregulloren e Maturës, shpjegojnë se ky nxënës duhet të japë riprovim lëndët e detyruara në sesionin e dytë dhe, në qoftë se i merr ato, ka të drejtë të futet në provimet me zgjedhje vitin e ardhshëm.

Vlerësimi
Kanë të drejtë të kandidojnë për të vazhduar studimet në universitetet publike të vendit vetëm nxënësit që vlerësohen kalues në të katër provimet e Maturës Shtetërore (dy provimet e detyruara dhe dy provimet me zgjedhje). Nëse një nxënës ka vlerësim kalues vetëm në njërin nga provimet e detyruara të Maturës Shtetërore, rezultati i tij ruhet (konsiderohet i vlefshëm) edhe në vitet në vazhdim. Të vetmit kandidatë, që nuk janë të detyruar të japin provimet me zgjedhje për të vijuar studimet e larta, janë ata maturantë që duan të vazhdojnë studimet vetëm në Akademinë e Arteve të Bukura, Akademinë e Edukimit Fizik dhe Sporteve si dhe në programin e studimit të Edukimit Fizik dhe Sporteve në Universitetin “Luigj Gurakuqi” të Shkodrës. Kurse çdo nxënës tjetër që ka vlerësimin kalues në të dyja provimet e detyruara dhe dëshiron të vazhdojë studimet e larta, duhet të japë edhe provimet me zgjedhje.

Ndryshimet
Gara e provimeve për këtë vit përfshin një sërë ndryshimesh për lëndët me zgjedhje, ku është vendosur që për akademitë sportive dhe artistike të mos zhvillohen provimet me zgjedhje. Kandidatët që duan të ndjekin studimet e larta në këto profile akademike do të përzgjidhen në bazë të rezultateve që do të arrijnë në testimin e pjesës speciale të konkursit. Bazuar dhe në llojin e degës, konkursi special për këta kandidatë do të zërë deri në 80 për qind të peshës përzgjedhëse të kandidatëve fitues për në universitet. Pjesa tjetër do t’i atribuohet mesatares së shkollës së mesme. Përjashtim në këtë rast do të bëjë vetëm dega e Arkitekturës, e cila do të japë dhe pjesën speciale, por dhe atë të lëndëve me zgjedhje, sepse kërkohet që maturantët që përzgjedhin këtë degë, të kenë aftësi edhe në fusha të tjera, të cilat janë të domosdoshme. Megjithatë para se të nisë plotësimi i formularit A2 do të publikohen edhe koeficientet e shkollave të mesme, në mënyrë të tillë që maturantët të bëjnë përllogaritë paraprake vetë, që të rezultojnë fitues në degët ku kanë më shumë probabilitet për të fituar.

Gazeta Albania

[[Perla]]

Instituti Italian i Kulturës: Gati certifikatat “Celi 3” për provimin më 10 nëntor 2008.

Dalin certifikatat “Celi 3” për maturantët shqiptarë që i janë nënshtruar provimit të gjuhës italiane më datën 10 nëntor 2008. Lajmi bëhet i ditur nga Instituti Italian i Kulturës në Tiranë, i cili ka përcaktuar edhe qendrat ku të rinjtë duhet të paraqiten për të tërhequr certifikatën. Instituti Italian i Kulturës njofton se kandidatët për studentë me banim në Tiranë, të cilët më datë 10 nëntor 2008 kanë dhënë provimin “Celi 3”, mund të tërheqin certifikatat e lëshuara nga Universiteti për të Huaj i Peruxhias pranë këtij instituti.

Orari
Orari javor i përcaktuar nga Instituti Italian për marrjen e certifikatës është nga e hëna në të premte, nga ora 15:00 deri në orën 16:30. Ndërsa të gjithë studentët e tjerë, që nuk banojnë në Tiranë, duhet të kontaktojnë përgjegjësit lokalë të kurseve të gjuhës italiane për t’u pajisur me certifikatën e njohjes së kësaj gjuhe, “Celi 3”. Rezultatet e provimit të gjuhës “Celi 3” për të gjithë kandidatët që duan të vazhdojnë studimet e larta në Itali janë publikuar nga Instituti Italian i Kulturës më datë 16 shkurt të këtij viti. Provimet për njohjen e gjuhës italiane organizohen nga Instituti Italian i Kulturës pranë tri konsullatave italiane: të Tiranës, Shkodrës dhe Vlorës, të cilat shërbejnë edhe për t’u pararegjistruar në universitetet italiane. Në bazë të kalimit të provimit të njohjes së gjuhës italiane do të mund të procedohet më tej në aplikimin për të filluar studimet në universitetet italiane. Marrja e provimit të gjuhës është prova e parë që duhet të kalojë një maturant për të nisur studimet në Itali. Pajisja me certifikatën “Celi 3” i paraprin regjistrimit të tyre në universitetet italiane.
Aplikimi
Ambasada Italiane bën publike rregullat që duhet të ndjekin të gjithë të interesuarit që dëshirojnë të ndjekin studimet e larta në Itali. Aplikimi për të ndjekur studimet në këtë vend nis me marrjen e provimit të gjuhës italiane “Celi 3”. Menjëherë pas shpalljes së këtyre rezultateve, kandidatët për studentë që duan të vazhdojnë universitetin në Itali duhet të nisin fazën e regjistrimit paraprak. Kandidatët për studentë në njërin nga fakultetet italiane fillimisht duhet të plotësojnë formularin e regjistrimit e më pas të marrin në dorëzim një zarf, brenda të cilit do të përfshijnë të gjitha dokumentet e nevojshme. Për këtë, secili prej tyre duhet të paraqitet te kancelaria konsullore e Ambasadës Italiane në Tiranë me disa dokumente, të cilat jo vetëm që duhet të jenë origjinale, por duhen shoqëruar edhe me fotokopje të noterizuar.

Formularët e aplikimit

Formularët e aplikimit për ndjekjen e studimeve në universitetet italiane janë dy: formulari “Modello A” dhe formulari “Autentica di foto”. Në formularin e parë, i cili është më i rëndësishëm, kandidati përcakton se cila do të jetë lënda ku dëshiron të studiojë, qyteti dhe universiteti. Pas plotësimit kandidatët nuk kanë të drejtë të ndryshojnë asgjë nga ato të dhëna që kanë deklaruar me shkrim. Të dy formularët duhet të plotësohen në çdo pjesë të tyre, formulari “Modello A” (në dy faqe), formulari “Autentica di foto” (një faqe). Vetëm pasi t’i keni plotësuar bëni një fotokopje të thjeshtë të panoterizuar për secilin formular: për formularin “Modello A” fotokopje para dhe mbrapa, ndërsa për formularin “Autentica di foto” një fletë. Studentët që e kanë mbaruar shkollën e mesme duhet të dorëzojnë Dëftesën e Pjekurisë në origjinal. Në rast se e kanë humbur atë, duhet të dorëzojnë një vërtetim zëvendësues me fotografi, me notat e të katër viteve, së bashku me ato të provimeve të Maturës Shtetërore. Gjithashtu, Dëftesës së Pjekurisë ose vërtetimit zëvendësues të saj duhet t’i bashkëngjitet edhe mesatarja e katër viteve të shkollës së mesme. Ndërsa kandidatët për studentë, të cilët aktualisht janë në vitin e fundit të shkollës së mesme dhe do ta marrin Dëftesën e Pjekurisë gjatë verës 2009, do të paraqesin vërtetimin me nota, me notat e të gjitha viteve dhe të semestrit në vazhdim, pra të vitit I, II, III dhe semestrit I të vitit IV apo V (varet nga lloji i shkollës që po mbarojnë). Në plotësimin e dy formularëve të mësipërm nevojitet edhe fotokopja e dy faqeve të para të pasaportës, si dhe dy fotografi me ngjyra për pasaportë.

G. Albania

[[Perla]]

Shtyhet pa afat publikimi i formularit A2 për pranimet në universitete. Megjithëse sipas rregullores së Maturës Shtetërore, Ministria e Arsimit duhet ta miratonte deri më datën 1 prill këtë formular, ai ende nuk është firmosur nga dikasteri i Arsimit. Të kontaktuar nga gazeta, burime zyrtare nga Ministria e Arsimit (MASH) deklaruan vetëm afatet për plotësimin e formularit A2, pa përmendur asnjë datë se kur do të bëhet publikimi i tij. Burime nga MASH-i shpjegojnë se plotësimi i formularit A2 do të nisë në muajin qershor dhe afati i fundit për dorëzimin e tij është data 30 e po këtij muaji. Duke qenë se duhet ende kohë që maturantët të nisin plotësimin e formularit A2, MASH-i ka “përfituar” për të mos bërë publikimin e tij sipas afateve të shpallura nga vetë Ministria. Ndërsa specialistët që kanë punuar për hartimin e formularit A2 shpjegojnë se ka përfunduar konceptimi i formularit dhe tashmë ai është gati për miratim. Megjithëse për MASH-in kalimi i afatit për miratim nuk përbën asnjë problem, eksperienca e viteve të kaluara ka treguar se vonesa në publikimin e formularit A2 ka sjellë kaos dhe konfuzion për maturantët. Mjaft prej këtyre të fundit, të gjendur përballë presionit të mbarimit të afatit për dorëzimin e tij e plotësuan atë në mënyrë të gabuar, gjë që u “dogji” edhe vijimin e studimeve në degën e preferuar. Madje jo vetëm kaq, por një vit më parë pati edhe nga ata maturantë që, për arsye të shpërndarjes me vonesë të formularit A2 në shkolla, nuk mundën ta dorëzonin atë në kohë, gjë që i la ata jashtë auditorëve pa marrë pjesë në konkurrim.

Gazeta Albania