Petrit Ceku

[Gordon Freeman]

KITARISTI PETRIT ÇEKU HAP FESTIVALIN REMUSICA 2009



Muzika e re dhe tendencat më të fundit në skenën e muzikës artistike edhe një herë do të intonohen në 10 koncerte, të cilat do të zënë vend në Prishtinë në kuadër të Festivalit Ndërkombëtar “REMUSICA”, i cili do të zgjasë deri më 28 maj. Vepra “Icare Ubi Es” hapi festivalin në interpretim të Korit të Filarmonisë së Kosovës, nën dirigjimin e Rafet Rudit, i cili njëherësh është edhe drejtor i festivalit. Interpretimi i mexosopranos, Merita Juniku, e fuqizoi interpretimin e kësaj vepre në tërësi. Ndryshe, kitaristi Petrit Çeku, ishte ai i cili u paraqit me koncert recital në kuadër të mbrëmjes së parë të festivalit. Ai interpretoi vepra nga Bach, Rodrigo e Rudi. Çeku është një nga kitaristët më të shquar të gjeneratës së re. Vitin që shkoi pas shumë sukseseve të arritura në skenën ndërkombëtar ai u shpall “Muzikanti më i mirë i vitit 2008” në Kroaci, çmim ky i cili ndahet nga Filarmonia e Zagrebit. Po këtë vit ai ka incizuar diskun e parë për shtëpinë prestigjioze amerikane Naxos. Çeku të dielën do të ketë edhe një paraqitje tjetër para publikut kosovar. I shoqëruar nga Orkestra e Filarmonisë së Kosovës ai do të interpretojë koncertin për kitarë dhe orkestër nga Rodrigo.