Ligji le te lehe, karvani shkon perpara

[Brari]

Hani pini dhe votoni
Na rroft mielli dhe bidoni
Valentina Deputete
Ministresha me rrushfete.

Kjo keng kendohet kto dite ne fshatrat e Martaneshit...lol.


gazeta shqiptare

----------

OPINION

Gëzuar me armiqësi?


---------------------------------------------------------------

Andrea STEFANI

Jehona e urimit gëzuar nuk është shuar dhe në horizontet politike të vitit të mirëseardhur janë shfaqur përsëri retë e mallkuara të armiqësisë. Sali Berisha, lider i PD-së, ka reaguar ashpër kundër shpalljes fituese në Elbasan të socialistes Valentina Leskaj. Duke i cilësuar zgjedhiet në Elbasan një manipulim dhe fitore të Mafias, lideri i demokratëve kërcënoi se kjo është një shkelje e marrëveshjes nga Nano. Kaq është dashur që thuajse të gjithë mediat të çohen me alarm nga gjumi i ëmbël e trullosës i festës dhe të vënë kujën: Rikthehet konflikti, marrëveshja në krizë, Vit i Ri luftë e re! Ç'po ndodh, vërtet Shqipëria po braktis konkurrencën e ashpër, por të qetë, për t'iu rikthyer "politikave" të armiqësisë, zjarreve, sulmeve dhe mallkimeve? Vërtet liria qenka kaq e paaftë sa qetësinë në këtë vend mund ta zgjasë vetëm skllavëria, diktatura?

Pak muaj më parë, jo vetëm shqiptarët por edhe Bota përshëndetën konsensusin mes Nanos dhe Berishës për zgjedhjen e presidentit te vendit. Muajt që pasuan ishin vërtet aq të qetë sa shumë fanatikë partiakë, të mësuar me konflitktin, nisën të shqetësohen, të shtojnë presionet dhe ankimet për atë që e quajtën vdekje të opozitës. Dhe ja më në fund, këto ditë rishfaqet një Berishë thuajse i harruar, kërcënues dhe ultimativ. A është ky ndryshim rrejdhojë e presionit të fanatikëve mbi Berishën, apo e shkeljes së paktit nga Nano?

Eshtë e vështirë të vlerësosh saktë marrëdhëniet e Berishës me fanatikët e partisë së tij. Gjithsesi, pjesëmarrja e ulët e njerëzve në votime e vërejtur së fundi në Elbasan, do ta rrisë peshën e fanatikëve qëndrestarë si në PS ashtu edhe në PD. Tërheqja e masave nga kutitë e votimit është një zhvillim i mbrapshtë që nuk nxit emancipimin, por radikalizimin e politikës në tërësi. Dukuria flet për rritje të pakënaqësisë dhe zhgënjimit nga politika. E megjithatë duket se në ashpërsimin e Berishës ka një shkak që qëndron jashtë PD-së. Valentina Leskaj, e sapo shpallur fituese në zonën 52, është njëherazi edhe e akuzuar në prokurori për shkelje të ligjit, për manipulime dhe shfrytëzim posti në fushatën zgjedhore. Shqipëria vazhdon të mbetet ndër ato shtete që shfaqin paradokse të tilla ku fitorja dhe e drejta nuk janë gjithmonë në të njëjtën valë.

Forca e ngjarjejeve na kthen kështu me kokëfortësi te thembra e Akilit e shtetit shqiptar, te ajo që me të njëjtën kokëfortësi duam ta harrojmë, na kthen te drejtësia dhe ligji. Qeveritarët socialistë po konsolidojnë gradualisht një precedent shumë të rrezikshëm, injorimin e ligjit, vënien e vullnetit të partisë apo klanit politik mbi ligjin që është sendëzim i vullnetit politik më të lartë. "Ligji le të lehë, karvani shkon përpara", është bërë motoja e heshtur dhe fodulle e qeverisjes sot. Drejtësia gjithnjë e më shumë, pavarësisht simpoziumeve, nuk është një pushtet i pavarur, por një qen i bindur ose i ngordhur që nuk kafshon. Vetë Fatos Nano u ngjit në kolltukun e kryeminstrit pasi akuzoi majtas dhe djathtas për korrupsion e fashizëm shumë emra të PS-së. Por me të "ripushtuar" ekzekutivin ai i harroi këto akuza. I harruan ato gjithashtu edhe të akuzuarit që vazhdojnë të jenë në drejtim të shtetit, i harroi dhe vazhdon t'i harrojë edhe "drejtësia". Ky mentalitet i pacipë (sepse është i hapur) antishtet po vazhdon. Kështu, e akuzuar dhe e bërë "leckë" nga lideri i PD-së për korrupsion dhe manipulime të rënda, e quajtur mafioze Leskaj u shfaq në ekrane mjaft e kënaqur me fitoren dhe mjaft e mëshirëshme me Berishën. E ka nga zemërimi i humbjes, tha Leskaj, duke demonstruar një tolerancë të habitëshme ndaj akuzave shumë të rënda që iu bënë. Çdo qytetar tjetër do të vraponte në prokurori, te drejtësia për të hedhur poshtë me fakte akuza të tilla që venë në rrezik nderin, moralin e tij. Fituesja socialiste jo. Por tolerimi ndaj disa akuzave që të bëhen dhe që ti i quan të gënjeshtërta është njëherazi intolerancë ndaj drejtësisë, ndaj të vërtetës. E nuk mund të mos pyesësh: Përse këta njerëz këmbëngulin t'i qëndrojnë larg drejtësisë duke justifikuar gjithçka me "dehjen" e Nanos, apo "çmendurinë" e Bershës? Përsëri, edhe në këtë rast, nuk është fjala thjesht për Valentinën. Opinioni do të dijë nga drejtësia se kush gënjen, Leskaj apo opozita? Dhe jo vetëm kaq. Në konfliktin e zonës 52 fshihet embrioni i shpërthimeve të ardhshme që mund të përmbysin demokracinë, paqen. Ndaj e vërteta duhet të dalë sot. Nëse Leskaj ka manipuluar, ka shkelur ligjin ajo duhet të lerë mandatin sepse ai mandat, i ndërtuar mbi dhunimin e ligjit, nuk shpreh vullnetin real të zgjedhësve, dhe si i tillë është i gënjeshtërt. Në të kundërtën, nëse vërtetohet se akuzat e opozitës janë një histeri e pafaktuar, e ngritur thjesht nga sindroma e narcizizmit partiak, atëherë shfaqet edhe më akute nevoja e ndryshimit të filozofisë opozitare, e demokratizimit të opozitës.

Nëse Shqipëria nuk e zgjidh me ligj këtë nyje sot, ajo, me siguri do të rrënohet përsëri nesër nga një konflikt në zgjedhjet e ardhëshme lokale. Duhet bërë gjithçka, madje edhe duke importuar drejtësi nga ndërkombëtarët, që kjo nyje të zgjidhet sot njëherë e përgjithmonë.

Drejtësia, ligji është themeli i vërtetë i një shteti. Të gjitha tronditjet që pëson shteti kohë pas kohe janë rrjedhojë e mungesës së drejtësisë. Edhe marrëveshja Nano-Berisha, pavarësisht se ç'ndiejnë dhe synojnë ata vetë, nuk do të mund të qëndrojë nëse nuk monitorohet nga ligji, nga drejtësia. Dhe fryma e kësaj marrëveshjeje nuk është thjesht plotësimi i disa pikave apo i disa reformave, për të cilat, natyrshëm, mund të ketë edhe fërkime, pakënaqësi, kundërshti e papajtueshmëri. Fryma e kësaj marrëveshjeje është braktisja njëherë e përgjithmonë e armiqësisë në emër të shtetit dhe të demokracisë, është fryma e vendosmërisë për të ndëshkuar paaftësinë dhe abuzimin nëpërmjet pushtetit vetëm nëpërmjet kutisë së votimit dhe ligjit. Një frymë, e cila, e mbështetur nga ligji, nga drejtësia si pushtet i pavarur i qytetarëve nga politika, do të mund t'u mbijetojë edhe hileve, edhe kurtheve të mundshme reciproke të Nanos dhe të Berishës, pra të mbijetojë edhe nëse këta të fundit kanë vendosur që të mos jenë më baballarë, por vrasës të kësaj fryme.

[MENI]

Nuk gjeti karar ky popull....
Dhe keshtu do vazhdoj...
Mir Berisha e Nano bejne punen e tyre ..se per ate marrin parat...qe kur te fitoj njeri tjetri te bertas..me vodhen votat.
Po ju o te mjer qe i bini kembanave te tyre...mos jeni te paguar?
Ka tema ter tjera per te cilat mund te shpreheni...