Kredia e Bankës Islamike, Shqipëria bojkoton Izraelin
• Nga Tedi Blushi
Qeveria do të respektojë rregullat e Organizatës së Konferencës Islamike dhe vendos të bojkotojë prodhimet dhe kompanitë izraelite, duke u rreshtuar krah vendeve anëtare. Qeveria dhe Banka Islamike per Zhvillim firmos marrëveshjen për lëvrimin e kredisë 8,6 milionë dinarë islamikë.
TIRANE- Shqipëria vendos të bojkotojë prodhimet dhe kompanitë izraelite, duke u rreshtuar krah vendeve anëtare të Organizatës së Konferencës Islamike. Vendimi është konkretizuar në një klauzolë të posaçme të marrëveshjes që qeveria ka nënshkruar me Bankën Islamike për Zhvillim, për lëvrimin e një kredie me vlerë 8,6 milionë dinarë islamikë, shumë e përafërt me 13.351 mln USD. Fondi do të shkojë si investim për projektin e furnizimit me ujë dhe shërbime sanitare për zonën bregdetare të Orikumit, pranë Vlorës. Për lëvrimin e kësaj kredie, Banka Islamike i ka vendosur një kusht politik dhe jo financiar qeverisë shqiptare, dhe që lidhet pikërisht me bojkotin e Izraelit. Kusht, të cilin Tirana zyrtare e ka pranuar plotësisht. Në seksionin 2.02, të nenit 2, të kësaj marrëveshjeje të paprecedent, të paraqitur për miratim në Parlament, citojmë shprehimisht se: “Qeveria respekton Rregullat e Organizatës së Konferencës Islamike në lidhje me bojkotin e Izraelit”.
Konferenca Islamike
Bojkoti i Izraelit, sipas rregullave të Konferencës Islamike, përfshin të gjitha prodhimet dhe shërbimet izraelite si dhe institucionet akademike, kulturore, sportive dhe ekonomike. Marrja e këtij vendimi nga kjo Organizatë është bërë, citojmë: “Në mënyrë që t’i bëhet presion tregtar ndërkombëtar Izraelit ndaj dhunës gjysmëshekullore që ushtron përmbi popullatën palestineze”.
Projekti
Objekti i projektit është sigurimi i një furnizimi të pandërprerë me ujë të pijshëm të banorëve të Orikumit dhe përmirësimi i kushteve të mjedisit, nëpërmjet ndërtimit të një rrjeti furnizimi me ujë dhe shërbimesh sanitare në zonën e projektit. Pjesë të tij janë Dukati i Vjetër, zona turistike Llogara, Dukati i Ri, Tragjasi, Orikumi, Radhima e vija bregdetare turistike Radhimë-Orikum. Kostoja totale e projektit është 16.5 milionë USD që do të bashkëfinancohet nga Banka Islamike për Zhvillim, me 13.351 milionë dollarë dhe nga qeveria shqiptare, me 3.116 milionë dollarë. Ai do të zbatohet nga Ministria e Punëve Publike, Transportit dhe Telekomunikacionit dhe është parashikuar të realizohet brenda një periudhe katër-vjeçare. Marrëveshja mes qeverisë shqiptare dhe Bankës Islamike për Zhvillim u paraqit për miratim edhe në Parlament.
(s.g/GazetaShqiptare/BalkanWeb)
Përgjigju Duke Cituar
Krijoni Kontakt